PROVERBS 10 - Navajo Bible

T'áá ákogi át'éii áádóó doo yá'áshóonii doo aheełt'ée da

¹ Sálaman bizaad bee hodoodząąłii: Aye' hóyáanii éí bizhé'é yił hóshóonii nánídlį́, nidi ayáázh doo áhályáanii éí bimá yínííł yiih yiłt'eeh.

² Tsi'na'adá yee at'íinii t'áadoo nídoodleełí da, nidi t'áá ákogi é'ét'éii aniné yits'á'iinííł.

³ Bóhólníihii éí t'áá ákogi át'éii bii' sizíinii doo t'áá dichin nilį́įgo yi'doołnih da, nidi doo yá'áshóonii yídin nilínígíí nahjį' hayiiłtł'iid.

⁴ Diné bił hóyée'go naalnishii bahojoobá'í yileeh, nidi haleebee yá'át'éehgo yilnishii éí at'įįh.

⁵ Shį́įgo t'áadoo le'é hasht'e'nijiiníiłii éí aye' hóyáanii jílį́, nidi da'agizhgo aye' t'óó ałhoshii t'óó baa yáhásin.

⁶ T'áá ákogi át'éii éí bik'ihojidlí, nidi diné doo yá'áshóonii ił hááhoniłcha' bizée'di yinées'į́į́'.

⁷ T'áá ákogi át'éii nilíinii bééjílniihgo bee hak'ihojidlíi doo, nidi doo yá'áshóonii bee béého'dílzinii doochxǫǫł.

⁸ Diné bijéí yee hóyáanii éí bik'eh ó'oo'níiłii shóidoołt'eeł, nidi diné doo áhályą́ą́góó yáłti'ii éí t'áadoo biniyéhí da jidooleeł.

⁹ Diné t'áá ákóne' át'éego naagháii éí doo bihodiit'i'góó naagháa dooleeł, nidi áhoot'éii doo yá'át'ééhgóó ájoolíiłii éí hwééhodoozįįł.

¹⁰ Diné bináák'is ánáyiil'įįhii yínííł hólǫ́ǫgo ánáhool'įįh; diné doo áhályą́ą́góó yáłti'ii éí t'áadoo biniyéhí da jidooleeł.

¹¹ Diné t'áá ákogi ááníiłii éí bizéé'dę́ę́' iiná háálį́, nidi diné doo yá'áshóonii ił hááhoniłcha' bizée'di yinées'į́į́'.

¹² Ak'e'diniih éí diné ahinéidiiłtłi', nidi ayóó'ó'ó'níinii éí doo ákwii ádahóót'įįdii t'áá ałtso t'óó yik'i hoozi'.

¹³ Diné ak'i'diitįįhii hóyą́ągo yáłti', nidi bee ak'i'diitįįhii hwee ádinii hwíígháán biniyé bee atsxis silá.

¹⁴ Diné dahóyáanii ił ééhózin hasht'e'nideidiyii'nííł, nidi diné doo áhályą́ą́góó yáłti'ii éí hodoołchxǫǫłii koshídę́ę́' hólǫ́.

¹⁵ Diné at'íinii biyódí yee bidziilgo kin haal'áii nahalin, nidi diné bahojoobá'íii éí bité'é'į' bidoołchxǫǫł.

¹⁶ Diné t'áá ákogi ááníiłii binaanish iiná yii' iilóós, nidi diné doo yá'áshóonii ááníłígíí yee bąąhági át'éii yii' iilóós.

¹⁷ Bínahodi'niltinii baa áhojilyáanii éí iiná biyi' joogááł, nidi hach'aho'dishkéhígíí doozniizį́į'ii éí adzisiih.

¹⁸ Ak'eezhdiniihgo nazhnił'inígíí éí biyooch'íidii jílį́, áádóó t'áá ádzaagóó hojilne'ii éí doo áhojilyą́ą da.

¹⁹ T'óó ahayóígóó yáti'go bee haz'áanii hitíihii doo bídin da, nidi hazaad bił t'ą́ą́' dziztíinii éí hojíyą́.

²⁰ Diné t'áá ákogi ááníiłii yáłti'go éí bizaad béésh łigaii bitahaasdláa'ii nahalin; diné doo yá'áshóonii bijéí biyi'dóó yee nitsíkeesii doo ílį́į da.

²¹ Diné t'áá ákogi ááníiłii yáłti'go lą'í ya'iiłtsóód, nidi doo ádahalyáanii hódzą́ bee ádaadinígíí biniinaa dadínóonééł.

²² Bóhólníihii yee ak'ijidlíii éí at'į́įgo ó'oolííł, áádóó yíníí ł doo yíyiiłtsóod da.

²³ Diné doo áhályáanii bąąhági ááníiłgo daané'é nahalingo bił honeełnih, nidi diné ak'i'diitįįhii hódzą́ bił honeełnih.

²⁴ Diné doo yá'áshóonii yináldzidii bik'éidoot'ih, áádóó diné t'áá ákogi ááníiłii yídin nilíinii baa didoot'ááł.

²⁵ Nááts'ó'oołdísii ch'ígháhígi át'éego diné doo yá'áshóonii ábi'dildįįh, nidi diné t'áá ákogi át'éii hool'áágóó bohoníłdzilgo sizį́.

²⁶ Ch'il na'atł'o'ii bitoo' dók'ǫ́zhígíí hawoo' yidíníłtsi', áádóó łid éí hanáá' yiyiiłch'ih; t'áá ákót'éego bił hóyée'ii nidajił'a'ígíí hach'į' ákót'é.

²⁷ Bóhólníihii jidósingo iiná há binéidoo'nił, nidi diné doo yá'áshóonii éí a'ohgo béédoohah.

²⁸ Diné t'áá ákogi ááníiłii bił hózhǫ́ǫ dooleełgo bíká bił chohoo'į́, nidi diné doo yá'áshóonii nayólíii bits'ą́ą́' ádoodįįł.

²⁹ Bóhólníihii bik'ehgo áhoot'éii éí t'áá ákogi ádaat'éii yee dabidziil, nidi doo ákwii ádaaníiłii éí ábidoołdįįł.

³⁰ Diné t'áá ákogi ádaaníiłii ts'ídá doo nahjį' kódabidi'doolníił da, nidi diné doo yá'ádaashóonii nihokáá'góó doo kéédahojit'į́į da doo.

³¹ Diné t'áá ákogi ááníiłii éí hódzą́ yee yáłti', nidi diné doo yá'áshǫ́ǫ́góó yáłti'ii éí hodi'doolyił.

³² Diné t'áá ákogi át'éii éí Diyin God yee lą́ ni'iiłeehii bił bééhózingo yee yáłti', nidi diné doo yá'áshóonii éí doo yá'áshǫ́ǫ́góó yáłti'.