MARK 6 - Navajo Bible

Jesus éí Názarethdi doo bidi'niidzį́į' da

¹ Áádóó Jesus t'áá hó hakéyahgóó dah nízhdiidzá, áádóó hódahooł'aahii hakéé' dah diikai.

² Áko háá'áyį́į́h jį́ azlį́į'go kin bii' áłah ná'ádleehí biyi' góne' nízhdí'níitą́ą́', áko lą'í dahodiizts'ą́ą'go t'óó bił adahóóyóigo ádaaní, Háádę́ę'shą' díí t'áá ałtso shóyoost'e'? Ha'át'íí bee hódzáanii shį́įshą' beílyá? Dooládó' ayóó át'éego áhooníiłii áyoolíił da!

³ Da' díísh doo kin ííł'íní át'į́į da? Éí Mary biyáázh, James áádóó Jóses áádóó Júdas áádóó Sáíman bínaaí nilíinii, áádóó da' dabideezhíísh doo bił kéédahwiit'į́į da? Áko hach'į' doo bił dahóózhǫǫd da.

⁴ Áko Jesus áhodííniid, Diyin God yá halne'ii t'áá ałtsogóó diné bił dajílį́, nidi t'áá hakéyahgi áádóó hak'éí índa bił hajííjéé' bitahgi éí doo bił ajílį́į da.

⁵ Áko ákwii áhooníiłii ayóó át'éii doo baa nijóya' át'ée da, nidi diné bąąh dah nidahaz'ánígíí t'áá díkwíí t'éí bik'i dah dahizhdilníihgo nááhizhdiiłjéé'.

⁶ Áko doo da'oodlą́ą́góó biniinaa t'óó hoł ahayóí. Áko kin dah naazhjaa'góó nazh'nitingo tázhdíghááh.

Jesus bídahooł'aahii naakits'áadahígíí dayííł'aad

⁷ Nít'éé' diné naakits'áadah nídziizlá'ígíí hágo bizhdííniidgo, naaki nízį́įgo ch'íjiił'aahgo baa nízdiidzá, áádóó níłch'i danchxǫ́'íii ayi'dę́ę́' hadeiniiłkaad doo biniyé bee óhólnííh bitaazdeez'ą́.

⁸ Áko ábizhdííniid, Dah sidoohkaigóó ha'át'íhída t'áadoo dayínóhłéhí, gish t'éiyá; azis bee na'aljidí éí dooda, yist'éí nidi dooda, áádóó nihidah na'ayizii nidi béeso ła' biih daoh'ááł lágo,

⁹ áádóó nihikee' t'éí dahólǫ́ǫgo áádóó nihi'éé', éí t'áádaałá'í doo.

¹⁰ Áádóó ábizhdííniid, T'áá haa'ída hooghan biyi' yah adahisoohkaigo dah náádahidoohkáahjį' t'áá ákwii nahísóotą́ą doo.

¹¹ T'áá háiida doo danihinízinígíí índa doo t'áá k'ad danihidiizts'ą́'ígíí, éí bee hwéédahózin doo biniyé, áádóó dah náádahidoohkáahgo nihikee' łeezh bąąh nidahinołdéeh doo. [T'áá aaníí ánihidishní, Ánihwiit'aah beiníłką́ądi Sádam índa Gomárah kin haal'áagi kéédahat'į́į́ nít'éé' yę́ę biláahdi át'éego atídabidi'doolnííł.]

¹² Áko dashdiikaigo, Diné danohłíinii, łahgo át'éego tsíńdahidohkeesgo nihibąąhági ádaat'éii bits'áhóhkááh, dajiníigo nidahodzisne'.

¹³ Áádóó níłch'i bida'iiníziinii lą'í ayi'dę́ę́' hadahizneeskaad, índa diné t'óó ahayóí ka nidaakaígíí ak'ah bąąh ádajile'go hadaałt'é áńdajiidlaa.

John Tó Yee Asį́įhii bi'diisyį́

¹⁴ Nít'éé' aláahgo naat'áanii Hérad wolyéhígíí Jesus baa hozdiizts'ą́ą́', háálá t'áá át'éé nít'éé' bízhi' nideezdláád. Áko ání, John Tó Yee Asį́įhii daaztsą́ą́dę́ę́' náádiidzáá lá; éí bąą díí adziil bee ayóó át'éego ádahooníiłii bii' hólǫ́ǫgo yinahjį' áánííł lá.

¹⁵ Náánáła' ádaaní, Iiláíjah át'į́. Náánáła' ánáádadi'ní, Ałk'idą́ą́' Diyin God yá dahalne'ii yę́ęgi át'éego ła' Diyin God yá halne'ii át'į́į́ lá.

¹⁶ Nidi Hérad díí yiyíínii'go ání, John, bik'os k'ínółne' dííniidgo bik'os k'élne'ígíí daaztsą́ą́dę́ę́' náádiidzáá lá.

¹⁷ Háálá Hérad t'áá hó, hasiláo John bíká ajííł'a'go John yiyiiłtsood, áko ye'eztł'ǫ́ǫgo awáalyaa góne' yah ayííłt'e'. Háálá Hérad t'áá hó hatsilí Philip be'asdzą́ą́ Heródiyas bighajíltį́įgo bá'dzízyeh.

¹⁸ Íídą́ą́' John éí Hérad ábizhdííniid, Nitsilí be'asdzą́ą́ bá'síníyehígíí doo bee ná haz'ą́ą́góó ánít'į́.

¹⁹ Éí biniinaa Heródiyas hach'į' doo bił hóózhǫǫd da, áko hodiyeeshxééł niizį́į́'. Nidi doo óone' át'ée da,

²⁰ háálá John éí diné ts'ídá t'áá ákogi át'éii índa diyinii nilį́įgo Hérad hoł bééhózingo John béédzíldzid, éí bąą t'óó baa áhojilyą́ą́ nít'éé'. Íídą́ą́' John áháłnínígíí jidiizts'ą́ą'go bik'ee t'áá íiyisí t'óó hoł haada, ákondi baa hoł hózhǫ́ǫgo jidiizts'ą́ą́'.

²¹ Nít'éé' Heródiyas bá ashja hoodzaa, háálá Hérad bi'dizhchį́ yę́ęjį' anáhoolzhiizhgo naat'áanii danilį́įgo áyaa nei'nilígíí áádóó siláo binanit'a'í danilíinii índa Gáliliidóó aląąjį' naazíinii bá da'ííyą́ą́'.

²² Áko Heródiyas bich'é'é yah ííyáago Hérad índa diné yił naháaztánígíí binááł ajoolzhiizhgo bił dahojííshǫǫd, áko aláahgo naat'áanii Hérad éí at'ééd ííłní, T'áá nínízinígíí shííníkeed, áko t'áá éí naa deeshłééł.

²³ Áko t'áá hó ádee hadzoodzíi'go at'ééd ábizhdííniid, T'áá shííníkeed shį́į́ naa deeshłééł, bee shóhólníihgo bił haz'áanii ałníí'dóo nidi.

²⁴ Áko at'ééd ch'ínádzáago bimá áyidííniid, Ha'át'íishą' yídéeshkił? Áko bimá ábíłní, John Tó Yee Asį́įhii bitsiits'iin lą́ą.

²⁵ Áádóó at'ééd tsxį́įłgo aláahgo naat'áanii yich'į' yah anáálwodgo yí'dííkeedgo ání, T'áá k'ad John Tó Yee Asį́įhii bitsiits'iin łeets'aat'ą́hí bii' si'ą́ągo shaa dííkááł.

²⁶ Áko aláahgo naat'áanii t'áá íiyisí bąąh bíni', nidi ádee hadzoodzí'ígíí índa haa haaskaigo bił nidzíiztánígíí biniinaa at'ééd t'óó jidínóo'ahígíí doo háni' nilį́į da.

²⁷ T'áá áko naat'áanii bizaak'e bá na'ałtseedii ła' ákǫ́ǫ́ ayííł'a'go áyidííniid, John bitsiits'iin nání'aah. Ákǫ́ǫ́ jiníyáago awáalyaa góne' John bik'os k'ízhníłne',

²⁸ áko bitsiits'iin éí łeets'aat'ą́hí bee názhníką́ągo at'ééd baazhníką́, áádóó at'ééd éí bimá yeiníką́.

²⁹ Áko John bídahooł'aahii díí dayíínii'go ákwii yíkaigo bits'íís dah deidiiłtį́įgo tséní'ootséél góne' yóó'ádayiilaa.

Diné ashdladi mííl yilt'éego ba'íltsood

³⁰ Áádóó dajool'aadígíí t'áá ádzíłtso Jesus baa náádziiskaigo ádajíít'įįdígíí índa bee nidaz'neeztą́'ígíí t'áá ałtso Jesus bee bił dahojoolne'.

³¹ Áko ábizhdííniid, Tį', t'áá sáhí doo naagháhígóó diikahgo haada nízahjį' háádadoołyįh. Háálá diné lą'í ałnánáálį́įgo biniinaa dazh'dooyį́į́ł yę́ęgi nidi doo há hoo'aah da.

³² Áko t'áá sáhí ats'ájíkaigo tsinaa'eeł bee doo naagháhígóó ajookai.

³³ Nidi hoł oo'ołgo diné dahoołtsą́ągo lą'í hwéédahoosįįdgo, da'níłts'ą́ą́dę́ę́' kin hadaas'áádę́ę́' t'áá ni' dayíjeehgo t'áá hó áłtsé áadi neheezhjéé'.

³⁴ Áko Jesus tsinaa'eeł yii'dę́ę́' hááyáago ayóó át'é diné yíl'áago yiyiiłtsą́, áko dibé éí baa áhályáanii ádin nahalingo biniinaa baa a'ááh jiniizį́į́', áádóó lą'í bee nízhdíníitą́ą́'.

³⁵ Áko doozhǫǫgo yaa adeez'ą́ągo hódahooł'aahii haa yíkaigo ádahodííniid, Díí doo naagháhígi ádeit'į́, áádóó k'ad doozhǫǫgo yaa adeez'ą́.

³⁶ Nídayínóhkááh, bidiní, áko kin naazhjaa'góó índa dáda'ak'ehgóó ahidookah, áadi deidooyį́łígíí nideidiyoołnih, háálá t'áadoo dayóyą́'í da.

³⁷ Nidi ábijiní, T'áá nihí bada'nołtsóód. Áko ádahałní, Dah didiikahgo daats'í denériyas naakidi neeznádiin bíighahgo bááh nidahidiilnihgo nihá deidooyį́į́ł?

³⁸ Áko ábijiní, Díkwíishą' łees'áán nidaahjaah? Nihílááh, nihił béédahoozį́į́'. Áko bił béédahoozingo ádadííniid, Łees'áán ashdla' lá, áádóó łóó' t'éí t'áá naakíhí.

³⁹ Áko Jesus ádííniid, Ał'ąą noojaa'go hootsogóó dinohbįįh.

⁴⁰ Áko t'ááłáhídi neeznádiin índa ashdladiin níjaa'go dadineezbin.

⁴¹ Áádóó łees'áán ashdla' índa łóó' naakiígíí néidiinil áádóó yá'ąąshgóó déez'į́į'go yik'i sodoolzin, índa łees'áán niyiitíihgo bídahooł'aahii yitainiih, éí diné yitaa deidoonih biniyé, áádóó łóó' naakiígíí ałdó' t'áá ałtso yá ałts'ádayiizti'.

⁴² Áko t'áá ádzíłtso da'jííyą́ą'go hwiih dadzizlį́į́'.

⁴³ Áádóó łees'áán áádóó łóó' nidahaasti'go bi'oh da'jííyą́'ígíí náádadziisdláa'go ts'iizis naakits'áadah bii' hadazhdééłbįįd.

⁴⁴ Diné t'áá bízhánígo ashdladi mííl yilt'éego da'ííyą́ą́' lá.

Jesus táłkáá' yigááł

⁴⁵ T'áá áko hódahooł'aahii ábizhdííniid, Tsinaa'eeł biih hohkáahgo wónaanígóó Bethséyida hoolyéégóó shilą́ąjį' da'doł'eeł, áko shí éí jíl'áhígíí, Nídayínóhkááh, bidideeshniił.

⁴⁶ Áádóó jíl'áhígíí, Nídayínóhkááh, bizhdííniidóó bik'ijį' sozdidoolzįįł biniyé dził bíjiiyá.

⁴⁷ Áádóó i'íí'ą́ągo tsinaa'eeł tá'ałníí'góó yi'oł, nidi hó t'éí t'áá sáhí t'áá áadi nijighá.

⁴⁸ Hach'į' nidahwii'náago da'jíł'eełgo hojiiłtsą́, háálá hadááhdę́ę́' níyol. Áko yikáíht'áahjį' daats'í ayííłką́ągo táłkáá' joogáałgo baa nídzídzá. T'óó bíighah ch'íjíghááh nít'éé',

⁴⁹ nidi táłkáá' joogáałgo dahoołtsą́ągo, Ha'át'íí shį́į́ bich'į́įdii át'į́? daniizį́į'go hak'ee hadadeeshghaazh,

⁵⁰ háálá t'áá ałtso dahoołtsą́ągo hwéédaasdzííd. Nidi t'áá áko bich'į' hadzoodzíi'go ábijiní, Nihił dahózhǫ́. Shíyee' ásht'į́; t'áadoo nídaałdzidí.

⁵¹ Áko tsinaa'eeł biih jííyá, nít'éé' ííyol. Áko t'áá íiyisí t'óó bił adahayóí.

⁵² Háálá doo honídahaz'áhígíí biniinaa łees'áán áyííł'įįdígíí t'áadoo bik'idazh'diitą́ą da.

Jesus éí Genésaretdi bąąh dah nidahaz'áanii néidiyiiłjeeh

⁵³ Áko kéyah Genésaret hoolyéejį' tsé'naa nida'dzis'éelgo tábąąhgi tsinaa'eeł dah dadziiztł'ǫ́.

⁵⁴ Áko tsinaa'eeł bii'dę́ę́' hajookaigo t'áá áko diné hwéédahoosįįd.

⁵⁵ Áko éí kéyahígi t'áá át'éé nít'éé' diné nihidadiijée'go t'áá haa nídahodiits'į́į́hgóó áádę́ę́' diné bąąh dah nidahaz'ánígíí beeldléí yikáa'gi naaztį́įgo hach'į' nidayiijáahgo yaa nídiikai.

⁵⁶ Áko kin naazhjaa'góó áádóó kin hadaas'áágóó índa dáda'ak'ehgóó hizhdigháahgo nida'iiniihgóó diné bąąh dah nidahaz'ánígíí nidayiijááh, áko, Bíni'dii ni'éé' bijánil t'éiyá nidi yidahidilchííd, dahałníigo nídahookąąh, áko hodahideeshchidígíí t'áá ałtso hadaałt'é nídaasdlį́į́'.