MARK 13 - Navajo Bible

Kin bii' sohodizin ádooldįįłígíí t'áá bítséedi baa hojoolne'

¹ Áko Jesus bídahooł'aahii yił kin bii' sohodizin bił haz'ą́ą́dóó ch'íjíkáahgo hódahooł'aahii ła' áháłní, Shoo, Na'nitiní, dooládó' tséda, áádóó dooládó' daakinda!

² Áko Jesus áhodííniid, Díí kin ayóó ádaat'éhígíísh yíní'į́? Kwe'é tsé doo ła' t'áá ałk'i dah si'ą́ą da dooleeł, nidi t'áá ałtso naa'ahidoolkał.

Ach'į' nahwii'náa dooleełígíí alą́ąjį' baa hojoolne'

³ Nít'éé' Dził Álivz binániidi kin bii' sohodizin binaashiijí dzineezdáago, Peter áádóó James áádóó John índa Andrew t'áá sáhí nidahódééłkidgo ádaaní,

⁴ Baa ch'íhwííní'ánígíishą' hahgo ákódadoonííł bee nihił hólne', áádóó díidí ádahodooníłígíishą' k'adę́ę t'áá ałtso ádaanéehgo ha'át'íí bee bééhózin dooleeł?

⁵ Áko Jesus hach'į' ayá'niiłti'go ání, Ádaa ádahołyą́, áko diné doo ła' yóó'adanihidínóo'ah da.

⁶ Lą'í shízhi' yee ádadójíigo nidahidookah, Shí Christ ásht'į́! daaníigo, áko lą'í yóó'adeidínóo'ah.

⁷ Áko da'anaa' índa anaa' baa dahane'go dadoohts'a'go t'áadoo nitsidaahkaaí, háálá díidí ts'ídá ádahodoonííł, nidi t'ah doo nihoogháah da doo.

⁸ Háálá ał'ąą dine'é ałch'į' nídahidiibáah doo, áádóó łahgo nihokáá' bee bóhólníihgo bił haz'áanii índa náánáła' nihokáá' bee bínááhólníihgo bił nááhást'áanii yił ałch'į' nídahidiibáah dooleeł, índa łahgóó ni' nídahidi'náah doo, áádóó dahodichin índa ach'į' nidahwii'náa doo; díidíígíí ti'hoo'nííh bee dadeezt'i'ii ádaat'é.

⁹ Nidi nihí ádaa ádahołyą́, háálá aa nídahat'į́įjį' adanihidiyoo'ish, áádóó kin bii' áłah nída'adleehí biyi'góó nídanihiniłhał doo; shiniinaa naat'áanii índa aláahgo naat'áanii naazdáágóó bidááhdę́ę́' nisoozį́įgo shá nidahołne' doo.

¹⁰ Áádóó ał'ąą dine'é t'áá ałtso hane' yá'át'éehii áłtsé ts'ídá bee bił dahodoonih.

¹¹ Áádóó aa nídahat'į́įjį' adanihidiyoo'ishgo, t'áá bítséedi ha'át'íhída dadidoohniiłígíí t'áadoo biniinaa ádił nídahodołchiłí; áajį' ahoolzhiizhgo índa t'áá nihiih yilyáhígíí éí bee hadoohdzih, háálá nihí doo hadoohdzih da, nidi Níłch'i Diyinii éí hanihidiyoołdzih.

¹² Áádóó ashiiké t'áá ła' hajíí'áazhgo ła' bidi'yoolyéełjį' niná'ahididoot'ááł, áádóó azhé'é nilíinii ba'áłchíní ninéididoo'ááł, índa áłchíní bishchíinii yidááhdę́ę́' nídahidiikáahgo nahodi'dootsiłjį' ninádahodii'aah dooleeł;

¹³ shízhi' biniinaa diné t'áá ałtso nihik'ee dadiniih doo. Nidi t'áá háiida t'áá nihoníyáajį' ha'ólníhígíí éí yisdádooltééł.

Ayóó át'éego ach'į' nahwii'náa doo

¹⁴ Nidi (díí t'áá jółta'ígíí háni' bik'izh'diitįįh) doo yildingóó ni'iiłchxǫǫhii [éí Daniel, Diyin God yá halne'ii, yaa ch'íhoní'ánígíí] doo sizį́į da dooleeł yę́ęgi sizį́įgo daołtsą́ągo, áyąądą́ą́' Judíyagi kéédahat'íinii bíni'dii dziłjį' choda'iidooł'įįł,

¹⁵ áko ła'da bikin bighą́ą'di naagháago wóne'dę́ę́' t'áadoo le'é ch'íidoolééł biniyé doo yah anídoolwoł da,

¹⁶ áádóó ła'da dá'ák'ehgi naagháago bi'éétsoh t'ááká t'ą́ą́' yaa náolyeed lágo.

¹⁷ Áko éí beiníłką́ągo dadzooltsánígíí índa awéé' dahałt'o'ígíí doo hasht'e'ígóó doo há hojooba' haz'ą́ą da doo!

¹⁸ Áko éí haigo doo áhodooníił daígíí bíká sodadołzin.

¹⁹ Háálá éí beiníłką́ągo Diyin God t'áá ałtsoní áyiilaadóó wóshdę́ę́' díí jį́įjį' ach'į' nahwii'ná ákót'éii t'ah doo yiiltséeh da yę́ę, k'ad índa, áádóó ts'ídá doo ákónáádoo'níił da.

²⁰ Áko Bóhólníihii éí yoołkáłígíí doo áłts'ísí ánáyiidlaagóogo nihokáá' dine'é doo ła' doodzih da, nidi atah yiyiizláa'ii, t'áá bí yitayiizlá'ígíí biniinaa éí yoołkáłígíí áłts'ísí ánáyiidlaa.

²¹ Áádóó diné ła'da, Shoo, kǫ́ǫ́ Christ naaghá, éí doodaléi', Shoo, níláhjí naaghá, danihiłníigo t'áadoo deinohdlání.

²² Háálá Christ ádahodil'íinii índa t'óó ádahodil'į́įgo dahalne'ii dahodooleełgo álílee k'ehgo bee éédahózinii índa bik'ee t'óó ił ahayóigo ádahooníiłii ádeił'į́į doo, áko yídaneel'ą́ą́ ládą́ą́' Diyin God atah yiyiizlá'ígíí nidi yóó'adeidínóo'ah.

²³ Nidi ádaa ádahołyą́, jó'akon, díí t'áá ałtso t'ah doo ádahanééhdą́ą́' bee nihił hashne'.

Diné Silį́į'ii nídoodáłígíí

²⁴ Nidi éí yoołkáłígíí biyi' ach'į' nahwii'ná bighá yooską́ą́dóó bik'ijį' jį́honaa'éí bił chahodoołhił, áádóó ooljéé' doo adiníłdíin da dooleeł,

²⁵ índa yádiłhił biyi'dę́ę́' sǫ' nidahindéeh doo, índa yót'ááh hiníláii biyi'di bee dahółdzilígíí dadoogał.

²⁶ Ákohgo índa Diné Silį́į'ii k'os bił yildohgo áádóó bee adziil ayóó át'éii índa ats'ádi'nílííd yił yigáałgo deizdoołtsééł.

²⁷ Áadi índa bidiyingo nidaal'a'í iidiyooł'aałgo t'áá dį́į́'góó ni' nidanees'ą́ą́dę́ę́' índa yá nidanees'ą́ą́dę́ę́' atah yiyiizláa'ii áłah ádeidoolííł.

Fig sikaadii néitsóhígíí binahjį' na'nitin

²⁸ Fig sikaadii binahjį' hane' bee ak'idi'dootį́įłii nihił béédahoozįįh: jó, éí bits'áoz'a' dit'ódí yileeh áádóó índa bit'ąą' néitsóohgo, k'adę́ę ch'ínáshį́įhgo nihił béédahózin łeh.

²⁹ Díidíígíí bidahoolníiłgo danół'į́įgo Diné Silį́į'ii k'ad t'áá áyídídę́ę́' nihich'éédą́ą'jį' nidi, bił ahoolzhiizh lá danohsingo nihił béédahózin doo.

³⁰ T'áá aaníígóó ánihidishní, Díí oochíłígíí doo bił yóó'ahodoogáał da, díidí t'áá ałtso ádaadzaago índa.

³¹ Yádiłhił índa nahasdzáán bił yóó'ahodoogááł, nidi shizaad t'éiyá doo bił yóó'ahodoogáał da.

Ákwii yoołkáłígíí índa oolkiłígíí diné ła'da doo hoł bééhózin da

³² Nidi ákwii yoołkáłígíí índa oolkiłígíí diné ła'da doo hoł bééhózin da, yá'ąąshdi diyingo nidaal'a'í nidi dooda, aYe' nidi dooda, nidi aTaa' t'éiyá bił bééhózin.

³³ Nihoolzhíísh doo nihił béédahózin daígíí bąą ádaa ádahołyą́, hada'ísídół'į́į́' áádóó sodadołzin.

³⁴ Diné Silį́į'ii éí díigi át'é: diné ła' haghan bits'ą́ą́' náánáła' kéyahgóó dashdiiyáago há nidaal'a'í t'ááłá'í nítínígo, Díí ninaanish dooleeł, dabizhdííniidgo hook'ee nizhnínil, áádóó ch'é'étiin yaa áhályáanii, Hazhó'ó ha'ísííd, bizhdííniid.

³⁵ Éí bąą hada'ísídół'į́į́', háálá éí kin bee bóhólníihii nídoodááł bijínígíí doo nihił béédahózin da, i'íí'ą́ągo daats'í, tł'é'ííłníi'go daats'í, naa'ahóóhai biką'í ádííniidgo daats'í, abínígo daats'í nídoodááł.

³⁶ Doo hada'ísídół'į́į́'góó t'áadoo hooyání nídoodáałgo, da'ołhoshgo nihik'ídoogááł.

³⁷ Áko díí ánihidishnínígíí éí t'áá ádzíłtso áhodishní, Hada'ísídół'į́į́'.