DANIEL 5 - Navajo Bible

Honit'ahdi ak'e'ashchínígíí

¹ Aláahgo naat'áanii Belsházar éí hakéé'dóó bídahólníihii miil yilt'éego yá ada'íísįįd, índa miil yilt'éego dabinááł wáin yoodlą́ą́'.

² Belsházar wáin dzizlįhgo hazhé'é Nébukadnézzar yę́ę Jerúsalemgi kin bii' sohodizin biyi'dóó óola łeets'aa' índa béésh łigaii łeets'aa' ch'íyiizhjaa'ii nináhidoojihgo bee hadzoodzíí', áko aláahgo naat'áanii áádóó hakéé'dóó bídahólníihii índa hwe'asdzą́ą́ danilíinii áádóó hwe'asdzą́ą́ dajíł'ínída éí yee da'doodlį́į́ł.

³ Ákohgo óola łeets'aa' índa béésh łigaii łeets'aa' éí Jerúsalem kin haal'áagi Diyin God bikin bii' sohodizin biyi'dę́ę́' ch'íheeshjaa'ígíí nidahaashjaa'go éí aláahgo naat'áanii áádóó naat'áanii danilíinii, hwe'asdzą́ą́ danilíinii áádóó hwe'asdzą́ą́ dajíł'ínída éí yee da'oodlą́ą́'.

⁴ Wáin deidlą́ągo óola índa béésh łigaii, béésh łitsoii, béésh nitł'izii áádóó tsin índa tsé bee diyin bééda'alyaago yaa dahaznih.

⁵ Nít'éé' t'áadoo hooyání yílá léi' yit'íní silį́į'go aláahgo naat'áanii bee bóhólníihgo haz'ą́ągi bikin biyi'dę́ę́' yishdlézhígíí bik'ijį' bee hool'iní bá íí'áhígíí binaashiijí ak'e'ashchį́, áádóó aláahgo naat'áanii éí yílá ak'e'ałchíigo yiyiiłtsą́.

⁶ Áko aláahgo naat'áanii éí yik'ee tsídinoolyizgo łahgo ánoosníí' áádóó bik'ee bił yée'go tsídeezkééz; bitah hoditłidgo bigod ahídínídahgo bitah doo hwiina' da.

⁷ Ayóó íits'a'go aláahgo naat'áanii hadoolghaazhgo ání, Déest'į́į́' ádeił'íinii, Kaldíya dine'é dahóyáanii índa náásgóó ádahodooníiłii yaa halne'ii t'áá ałtso de noh'éésh. Áko aláahgo naat'áanii éí Bábilandóó diné dahóyáanii áyidííniid, T'áá háiida díí bee ak'e'ashchínígíí yízhdóołtahgo ááhyiłníinii bee shił hojoolne'ígíí éí éé' tsídídééh nahalingo łichí'ígíí bee hahodi'doolnííł índa óola béésh da'ahólzha'í hazénázt'i'go táá' góne' aláahgo bee óhólníihgo bił haz'áanii binazh'nt'áa doo.

⁸ Áko aláahgo naat'áanii bidiné dahóyáanii t'áá ałtso yah aheeskai, nidi bee ak'e'ashchínígíí ch'ééh dayółta' áádóó ááhyiłníinii ch'ééh yik'ida'diitįįh.

⁹ Ákohgo aláahgo naat'áanii Belsházar ayóó át'éego niseedzáago łahgo ánoosníí' índa bídahólníihii ałdó' t'áá íiyisí t'óó bił dahóóląąd.

¹⁰ Áko aláahgo naat'áanii bimá asdzą́ą́ naat'ááh nilį́įgo éí naat'áanii índa aláahgo bídahólníihii ádaanínígíí dzidiizts'ą́ą'go ída'azįįdgo baa na'aldeehgi jiníyá, áko asdzą́ą́ naat'ááh ázhdííniid, Aláahgo naat'áanii nílíinii, hool'áágóó hinínáa le'. T'áadoo bik'ee nił yée'go nitsíníkeesí, doodaii' t'áadoo łahgo áníínílniní;

¹¹ aláahgo bee níhólníihgo nił haz'áanii biyi' diné léi' diyin danilíinii biníłch'i bii' hólǫ́. Nizhé'é bíyoołkááł yę́ędą́ą́' bee hódzáanii áádóó bee ak'idi'yiitįįhii bee éí diyin danilíinii bibee hódzáanii bii' hólónígíí bééhoozin índa aláahgo naat'áanii Nébukadnézzar nizhé'é yę́ę éí álílee k'ehgo ída'ooł'įįłii, déest'į́į́' ádeił'íinii, Kaldíya dine'é danilíinii áádóó náásgóó ádahodooníiłii yaa halne'ii yinanit'a'í nilį́įgo ábi'diilyaa.

¹² Háálá díí diné Daniel ts'ídá aláahgo haniihii éí baa na'iisgeelgo ááhyiłnínígíí yik'idi'yiitįįhgo áádóó hane' bee éé'deetįįhii yaa halne' índa t'áá íiyisí nidantł'ago deít'éehii k'ééyoołdǫǫł; éí Bélteshazar ałdó' wolyé. Áko k'ad Daniel, Hágo, bidiní; éí ááhyiłníinii nił ííshją́ą́ íidoolííł.

¹³ Ákohgo Daniel éí aláahgo naat'áanii bidááhdę́ę́' niho'deedlóóz, nít'éé' aláahgo naat'áanii éí Daniel áyidííniid, Da' niísh Daniel ánít'į́? Éí Judíya kéyahdóó shizhé'é naat'áanii nilį́ yę́ędą́ą́' Judíya kéyahdę́ę́' yisnááh danilíinii ch'íiní'eezhii ła' ánít'į́?

¹⁴ Diyin danilíinii biníłch'i nii' hólǫ́ǫgo índa nantł'aii naniłkaahgo áádóó bee ak'idi'yiitįįhii índa bee hódzą́ ts'ídá aláahdi át'éii nii' hólǫ́ǫgo yínii'.

¹⁵ Áko diné dahóyáanii, éí déest'į́į́' ádeiił'íinii, shidááhdóó niheesht'eezhgo díí bee ak'e'ashchínígíí deízhdóołtahgo ááhyiłníinii bee shił dahozhdoolnihgo shił bééhózin doo biniyé nidziiskai nít'éé', nidi ááhyiłníinii bee shił dahozhdoolnih doo bídazhneel'ą́ą da.

¹⁶ Nidi t'áá ni t'éí ááhyiłníinii baa hodíílnihgo nidantł'ago deít'éehii k'énááłdǫǫłgo bíninil'ą́ągo yínii'. K'ad díí bee ak'e'ashchínígíí yíníłta' áádóó ááhyiłníinii shił bééhózin íinilaago éé' tsídídééh nahalingo łichí'ígíí bee handi'doolnííł índa óola béésh da'ahólzha'í nizénázt'i'go éí táá' góne' aláahgo bee íhólníihgo bił haz'áanii binanít'áago ándeeshłííł.

¹⁷ Ákohgo Daniel éí aláahgo naat'áanii ábizhdííniid, T'áá jíík'eh aa dííléłígíí t'áá ni nanjaah áádóó nályééh ła'da bich'į' kódíílííł, nidi díí bee ak'e'ashchínígíí aláahgo naat'áanii t'óó bich'į' yídéeshtah áádóó ááhyiłníinii bił bééhózingo ádeeshłííł.

¹⁸ Aláahgo naat'áanii nílíinii, Aláahgo Ayóó'át'éii Diyin God éí bee óhólnííh bił haz'áanii áádóó ts'ídá ayóó át'éii áádóó bee ayóó é'ét'éii índa ił ídlíinii nizhé'é yę́ę Nébukadnézzar yeidiní'ą́.

¹⁹ Áko ts'ídá ayóó át'éii haidiní'ą́ągo bąą diné danilíinii áádóó ał'ąą dine'é danilíinii índa bizaad ał'ąą át'éego yee yádaałti'ii t'áá ałtso t'áá íiyisí bitah nidahwiiłnáago hak'ee bił daayéé' nít'éé'. Diyeeshhééł yó'níinii neiłtsxeed nít'éé', áádóó bił yá'át'éehii éí dahináago áyósin nít'éé'. A'ohgo át'éii atisgo át'éego ádeile' nít'éé', áádóó atisgo át'éii a'ohgo át'éego ádeile' nít'éé'.

²⁰ Áko ádaa hodzódlí bee hajéí áádóó háni' yítł'isgo bąą bikáá'dóó nahoji'áii áádóó ayóó át'éii índa bee ayóó ájít'éii éí Diyin God hats'ą́ąjį' kóyiilaa.

²¹ Diné danilíinii bits'á hodi'needzood áádóó háni' éí naaldlooshii bíni' bił aheełt'é dzizlį́į́' índa télii da'ałchinii bitahgóó nahwííłka' nít'éé'; béégashii nahalingo tł'oh jiłchozh nít'éé' índa wót'ááhdę́ę́' dahtoo' t'éí bee nínájíltłoh nít'éé'. Aláahgo Ayóó'át'éii Diyin God éí diné yee bóhólníihgo bił nahaz'ą́ą́góó yinant'á áádóó t'áá bí yinízinígíí yá niyiiníiłgo hoł bééhoozinjį' ákójít'éé nít'éé'.

²² Áko Belsházar nílíinii, ni éí biye' nílį́įgo díí t'áá át'é nił bééhózin nidi, t'áadoo ádaa hojíínílbá'ígo tsídííníkéez da.

²³ Nidi yá'ąąshdę́ę́' Bóhólníihii nilíinii bich'į' ayóó ánít'éego í'diinilyaa. Áko bikin bii' sohodizin góne' łeets'aa' chodao'į́į́ nít'éé' yę́ę nił yah aheeshjaa', ni índa nikéé'dóó bídahólníihii, ne'asdzą́ą́ danilíinii áádóó ne'asdzą́ą́ daníł'íní éí yee wáin dayoodlą́ą'go béésh łigaii áádóó óola, béésh łitsoii áádóó béésh nitł'izii, tsin índa tsé diyin bééda'alyaago éí yaa dahaniih, nidi éí e'elyaii doo da'oo'į́į da, doo da'diits'a' da, doo bił éédahózin da. Nidi Diyin God nídídzihgo ánóhsinii áádóó ánít'éii t'áá ałtso bílák'ee siláii éí doo baa hóniih da nít'éé'.

²⁴ Ákohgo Diyin God bits'ą́ą́dę́ę́' álázhoozh yee ak'e'ashchínígíí t'áá éí bee ak'e'ashchį́.

²⁵ Áko díí saadígíí Míínii, Míínii, Tííkel, Yufársin, níigo bee ak'e'ashchį́.

²⁶ Míínii, nínígíí díí ááhyiłní: bee níhólníihgo bił haz'áanii beidoołkáłígíí nidoot'ihjį' yéélta'.

²⁷ Tííkel, nínígíí díí ááhyiłní: ałts'ą́ąhjį' dah hidiidlohí bee dah ni'diidlo'go a'oh níníl'ąąd.

²⁸ Pííres, nínígíí díí ááhyiłní: bee níhólníihgo bił haz'áanii éí Míídiya dine'é índa Pérzha dine'é bá ałts'ádoodzohgo baa didoot'ááł.

²⁹ Ákohgo Belsházar haadzíi'go Daniel éí éé' tsídídééh nahalingo łichí'ígíí biih ho'dooltį́, óola béésh da'ahólzha'í hayo' ályaa; táá' góne' bee óhólníihgo bił haz'áanii bee hóhólníih doo.

³⁰ T'áá éí bitł'éé' Belsházar joolyéii Kaldíya dine'é binanit'a'í nilíinii seesxį́.

³¹ Áko Daráíyas Míídiya dine'é nilį́įgo bee óhólníihgo bił haz'áanii náhodii'ą́; hastą́diindóó ba'aan naaki binááhaigo ákwáát'įįd.