Za 20 - N’KANGULU WUMOONË

Luvulumuku lu Yeesu

¹ Mu mëcyecyelu mu bwiisi bu lumiingu, oboobo, bwiilu bwabë bucilë buyilë, Maali li Magëdaalë wuyendë ku libuumbë. Naandi wumonë limaani bëbotulë fë nkotulu libuumbë.

² Naandi wuduumë n'tinu mu ke takënë Simu li Pyeelë yimunë cilaanzi cimesi, cyo Yeesu kulëzolaangë i wubëkaambë : « Babotulë Fumu mu libuumbë i beeso tusye zaabë ko kunë bën'tuulë. »

³ Pyeelë i cilaanzi cimesi bisë kweendë ku libuumbë.

⁴ Babë bwaali bëlëdumaangë ntiinu, kasi cilaanzi cimesi wuvyokililë ntiinu yi Pyeelë i wusë ke tuukë ntetë ku libuumbë.

⁵ Naandi wubutumë mu kulaakë ntaalu i wusë monë biteendë bëtuulë fë n'toto, kasi naandi kusye kotë ko.

⁶ Simu li Pyeelë wunë wuye n'laandaangë, wuyituukë yivaandi i wusë kotë mu kati ku libuumbë. Naandi wumonë biteendë bëtuulë fë n'toto

⁷ i lilasoolë lyo bëziingë n'tu Yeesu, lilasolë be lyoolyo lisye ba ko yimunë biteendë, kasi lyaawu lyabë liziingu fën'ka, ku lweeku lun'ka.

⁸ Mu lyaawu, cilaanzi cimesi cyo cyabë cituukë ntetë fë libuumbë, wusë kotë yivaandi, naandi wumonë i wuta lyaanë.

⁹ Licyelikë, tee ntaangu ayi bilaanzi bësye bakulë kuve linë Lisonomë ti Yeesu wufitë n'vulumukë mu bo bëfwa.

¹⁰ Faawu, bilaanzi bi byooli bisë vutukënë mu maalë maawu.

Yeesu wuyimonikë ke Maali li Magëdaalë

¹¹ Maali wabë wubelëmë fë libuumbë, ku ngaandë i wulëlilaangë. Abu kulë lilaangë, naandi wubutumë mu kumonë mu kati ku libuumbë,

¹² naandi wusë kumonë yaanzi wali mu binkuutu bi mpeembi bëkalë fanë fabë nyitu yi Yeesu, wumweekë fabë n'twaandi wumesë fanë fabë maalu maandi.

¹³ Siyaanzi bën'yufulë : « Njeeyi mbici ke lililaangë? » Naandi wusë bëvutulilë : « Banatë Fumwaami i yisye zaabë ko kuni ban'tuulë. »

¹⁴ Batubi obo, baawu bisë balukë i bëmonë Yeesu wabë foofë, kasi bësye bakulë ko ti wabë naandi.

¹⁵ Yeesu wusë n'yufulë : « Cikumë mbici njeeyi ke lililaangë? Njeeyi nani ke toombaangë? » Naandi wubalë ti muutu wulë salë mu soolë, bwaawu wun'kambilë: « A Fumu ningë njeeyi wam'botulë, n'kaambi kuni wan'tuulë i miinu yam'boonji. »

¹⁶ Yeesu wusë n'kaambë : « A Maali! » Naandi wusë balukë i kun'kambilë ku mbeembu Siyebelee: « Labuuni! » — Dedë mweekë ti « A N'loonji ».

¹⁷ Yeesu wusë n'kaambë : « Keelë kun'siimbë, cibilë miinu yibuunu kumaakë ke Taatë. Kasi yendë we kaambi baanë yaami bë nguli ti miinu yakum'maakë ke Tataami awu wukeeli yivaandi Tatiinu, ke Nzaambyaami wunë wukeeli yivaandi Nzaambiinu. »

¹⁸ Bwaawu, Maali li Magëdaalë wuyendë ke bilaanzi i wusë bëkaambë : « Miinu yamonë Fumu! » Naandi wubëzabikini linë Yeesu wun'kaambë.

Yeesu wamonëkënë ke bilaanzi

¹⁹ Mësikë më lumiingu be loolo, bilaanzi bëdukënë mu n'zo. Baawu bëkaangë mëvitu mu sabi, cibilë bëlëtiinaangë mikwa-lwaangu yi Sizwiifë. Yeesu wuyitelëmë fë meeyaawu, wusë bëkaambë : « N'sikë we ba yiinu! »

²⁰ Bo kwe tubi, naandi wusë bëleesi mëkaandë i luvaati lwaandi. Bilaanzi babë mu liyaanji bunë bëmonë Fumu.

²¹ Yeesu wusë bëkaambooso : « N'sikë we ba yiinu! Bo Taatë wukun'filë, miinu yivaamë yakulufilë. »

²² Fë mbusë mamoomo, naandi wusë bëfulë muufu i wusë tubë : « Taambulaanu Ciluunzi ci Saantu!

²³ Banë beeno lun'lenvukilë mësumu maawu baawu bëm'baakë n'leenvu, banë beeno lun'kaambu kulenvukilë, baawu bisë m'bakë n'leenvu ko. »

Yeesu i Tomë

²⁴ Kosuku, wumweekë mu kuumi bilaanzi byaandi bi byooli, Tomë – awu bën'teelë Cibasë – kusye bayaawu kuve fanë Yeesu kuyisilë.

²⁵ Bilaanzi bimesi bën'kaambë : « Beeso twamonë Fumu! » Kasi Tomë wusë bëvutulilë : « Miinu buni yin'kaambu kumonë ciliimbu ci mëbandulu më siseesë mu myookwaandi, miinu ningë yisye tuulë luzalë fanë mëbandulu më siseesë i kookwaami mu luvaati lwaandi ko, miinu kuta ve maanë. »

²⁶ Lumiingu lu mweekë luvyookë, bilaanzi bi Yeesu bisë bëdukunooso mu n'zo i Tomë wabë yaawu. Mëviitu mabë mëkangëmë mu sabi, kasi Yeesu wuyitelëmë fë meeyaawu i wusë tubë : « N'sikë we ba yiinu! »

²⁷ Naandi wukaambë Tomë: « Tuulë luzalë lwaaku afa i monë myookwaami, twaalë kookwaaku i tuulë kwaawu fë luvaati lwaami. Leembu kufindë simpakë, i ta maanë! »

²⁸ Tomë wusë n'vutulilë : « A Fumwaami i Nzaambyaami! »

²⁹ Yeesu wusë n'kaambë : « Cibilë njeeyi wakum'monë bwaawu wateelë maanë? Nyeenzi ke banë bën'ta maanë keti bëlë kaambu kum'monë! »

N'ciinzë libuuku be liili

³⁰ Yeesu wuvaangooso, fë ntwaalë bilaanzi, mpaapë biliimbu bin'ka bi kwaatë-yekë bëkaambu kutubilë mu libuuku be liili.

³¹ Kasi manë mëkeeli mwaawu mësonëmë bwiinji beeno luta maanë ti Yeesu naandi Kliistu, Mwaanë Nzaambi. Ningë beeno lun'ta maanë mu naandi, beeno lum'bakë luziingu mu naandi.