Za 19 - N’KANGULU WUMOONË

¹ Mu bwaawu, Pilaatë wusë vaanë n'swa bënatë Yeesu i bëm'bulë sikoti.

² Mësodaadi bisë futë ntaatë siseendë i bisë n'vwiikë fë n'tu, baawu bën'vwiikë yivaandi ciyuungë ci beengë.

³ Baawu bëm'belëmë i bën'kaambë : « Bweekë, Fumu Sizwiifë! » Baawu bisë m'bulë simbatë.

⁴ Pilaatë wubasikë vyaasi yin'ka i wukaambë nkoongë baatu : « Yuwaano, yakulun'twalilaanu fë ngaandë, bwiinji luzaabë yisye mbakë libooti ko linë yifwenikini kun'tabulilë lufwa. »

⁵ Yeesu wusë basikë, wuvwaatë ntaatë siseendë i ciyuungë ci beengë. Pilaatë wusë bëkaambë : « Monaanu muutu! »

⁶ Kasi bunë bëkuluutu bë singangë-Nzaambi i mësodaadi bisë m'monë, baawu bëlosukë : « M'baandyaanu fë kuluusu! M'baandyaanu fë kuluusu! » Pilaatë wusë bëtubë : « Yendaanu lwe m'baandyaanu fë kuluusu benuveekë, cibilë miinu yisye monë libooti ko linë yifwenikini kun'tabulilë lufwa. »

⁷ Sizwiifë bisë n'vutulilë : « Beeso tuke yi n'kaakë, i n'kaakë be woowo wun'tubë ti naandi fwenikini kufwa, cibilë watubë ti naandi Mwaanë Nzaambi. »

⁸ Bunë Pilaatë kwe yuwu mamoomo, naandi wusë ba yi boomë.

⁹ Naandi wusë kotë ku luumbu i wuyufulë Yeesu : « Njeeyi musë simbi? » Kasi Yeesu sye n'vutulilë mbeembu ko.

¹⁰ Pilaatë wusë n'kaambooso : « Njeeyi sye zoolë kum'putulilë mbeembu kwe? Njeeyi sye zaabë ko ti miinu yike lutumu mu kukubiikë kaambofo mu kukubaandë fë kuluuswe? »

¹¹ Yeesu wun'vutulilë : « Njeeyi wukeeli yi lutumu mu miinu kuve, nkanë ko lo Nzaambi wukuvaanë. Mati bwaawu muutu wo wakun'vakulë ke njeeyi, mwiinji liseembu yi njeeyi. »

¹² Mu ntaangu be syoosyo, Pilaatë wulëtoombaangë luvoto mu kubiikë Yeesu. Kasi Sizwiifë bisë losukooso : « Ningë ti njeeyi wum'biikë muutu be wuuwu, njeeyi wukeeli ndiku n'kwa-lwaangu Sezaalë ko! Wosuku wuyituunvi ti naandi n'tinu, na woowo mbeeni yi n'kwa-lwaangu! »

¹³ Bunë Pilaatë kwe yuwu mamoomë, naandi wusë natë Yeesu ku ngaandë, wukalë fë ciikë ci nzoonzi bën'teelë « Faamë bëtaandë mëmanyi bëvalë » – Bëlukë « Ngalaatë » ku mbeembu Siyebelee.

¹⁴ Cyaawu cyabë cilumbu citwaminë n'saangu Paakë, fë zoolë yi ntaangu-mbatë. Pilaatë wukaambë Sizwiifë : « Talaanu, n'tinwiinu! »

¹⁵ Kasi baawu bëlosukë: « N'voondi! N'voondi! M'baandë fë kuluusu! » Pilaatë wusë bëkaambë : « Beeno luzolisi miinu yibaandë n'tinwiinu fë kuluuswe? » Bëkuluutu singangë-Nzaambi bëcikunë: « Beeso tukeeli yi n'tinwiinu wun'ka kuve kanuku wo Sezaalë. »

¹⁶ Mu lyaawu, Pilaatë wusë kubëvaanë Yeesu bwiinji bëm'baandë fë kuluusu. Baawu bisë natooso Yeesu.

Yeesu wabaandu fë kuluusu

¹⁷ Naandi wunatë naveekë kuluuswaandi mu kubasikë ku livulë i kweendë ku nkoonzu bëlëteelë: « Cidokusu ci n'tu » — bën'teelë « Ngolëgota » mu mbeembu Siyebelee.

¹⁸ Mati fa foofë, faawu mësodaadi bëbandilë Yeesu fë kuluusu. Mo mu ntaangu mweekë baawu bëbaandooso baatu bwaali fë kuluusu mu kadi lweeku lu luvaati lu Yeesu i naandi wabë fë meeyi.

¹⁹ Pilaatë wuvaanë yivaandi n'swa mu kusonikë libayi yi kulibaandë fë kuluusu Yeesu. Bësonikinë lyaawu abu: « Yeesu li Nazaleetë, n'tinu Sizwiifë. »

²⁰ Mpaapë Sizwiifë bëtaangë bisonë be byoobyo, cibilë faanë bëtuulë Yeesu fë kuluusu fabë fë belëmë yi livulë, i bisonë byabë mu mbeembu Siyebelee, mbeembu si Loomë i mbeembu singeleekë.

²¹ Bwa boobo, bëkuluutu singangë-Nzaambi bë Sizwiifë bisë kukaambë Pilaatë: « Njeeyi kebë wulëbiikë bisonë be byoobyo “n'tinu Sizwiifë” kasi njeeyi fwenikini kutuulë: “Muutu awu watubë: Miinu n'tinu Sizwiifë”. »

²² Pilaatë wusë n'vutulilë : « Manë yasonikë, mëkalilë boobo. »

²³ Bunë mësodaadi be tuulë Yeesu fë kuluusu, baawu bisë boongë binkutu byaandi i bisë bikabulë mu bikuuku bi na, cimweekë mu kadi lisodaadi. Baawu bisë boongë yivaandi ciyuungë cyaandi cikaambu kuziilu kutoonë ku yilu tee fësi.

²⁴ Mësodaadi bisë ke tubësënaangë baveekë i baveekë : « Tuleembwaanu kubeenzë ciyuungë be cyoocyo, kasi tubulaanu njekë mu kuzaabë nani wufwenikini kuboongë cyaawu. » Mati bwaawu, bufwenikini kuvangëninë manë mësonëmë : « Baawu bëkabësënë binkutu byaami i baawu bëbulë njekë mu n'vwaatwaami. » Mamoomë maawu mësodaadi bëvaangë.

²⁵ Belë-belë yi lukuluusu lu Yeesu, fabë mamaandi, mwaanë nguli mamaandi, Maali n'kasi Kolëpaasë i Maali musë bwaalë bu Magëdaalë.

²⁶ Yeesu wumonë mamaandi i fë kumë lyaandi, cilaanzi cyo naandi kulëzolaangë. Naandi wusë kaambë mamaandi : « Ama, mwanaaku naandyoowo. »

²⁷ Naandi wusë kaambë yivaandi cilaanzi : « Mamaaku naandyaawu. » Munë zoolë beenë, cilaanzi cisë n'natë ku n'zwaandi.

Lufwa lu Yeesu

²⁸ Kumanë ofo, abu Yeesu kuzaabë ti, buyifanwabu, makë mooso mavangënë, mu kudedikini mo mësonëmë : « Miinu m'pwiilë. »

²⁹ Yabë foofo n'kesë wuwaalë viinyi nkakutu. Mësodaadi bisë bwiikë lidedeenvu mu viinyi nkakutu, bisë yikwiikë fë citafi cin'kwiisë i bisë kubelikë mu munu Yeesu.

³⁰ Yeesu wunwa viinyi nkakutu, i wusë tubë : « Make mooso mavangënë! » Fa foofë, naandi wubecikë n'tu, i wusë fwa.

Lisodaadi litobulë luvaati lu Yeesu

³¹ Yabë cilumbu ci cin'taanu i sifumu si Sizwiifë bisye zolë ko ti sinvuumbi sikaalë fë kuluusu mu cilumbu ci saba, cibilë cilumbu be cyoocyo ci saba, cyabë cilumbu ci njiinji, baawu bisë loombë ke Pilaatë mu kubokënë maalu më bo bëbaandë fë kuluusu i mu kubotulë sinvuumbi.

³² Fa foofë, mësodaadi bëbokënë maalu, yi wo wun'tetë wutabu bëtuulë fë kuluusu mu ntaangu mweekë yi Yeesu, yivaandi wumwaali.

³³ Bunë bëtuuci fëke Yeesu, baawu bisë monë ti naandi wabë wafwa, bwaawu bëleembu kum'bokënë maalu.

³⁴ Kasi lisodaadi limweekë lin'tobulu luvaati mu lyoongë i meengë i masi mësë basikë mo mu vyaasi mweekë.

³⁵ Muutu wunë wulë mu kutubë cimbaanji mu maambu omo, naandi wumonë maawu i cimbaanji cyaandi ci cyelikë. Naandi wuzabisi ti wulë mu kutubë bucyelikë. Naandi wun'tubë cimbaanji bwiinji beeno yiviinu luta maanë.

³⁶ Licyelikë, lyalyooli liyisilë bwiinji manë mësonëmë mëvangënë : « Baawu bësë kum'bokënë wosuku n'veesi kuve. »

³⁷ Mu n'kukë wu meesë wutubooso : « Baawu bësitikë ntalwaawu ke wo bëtobulë luvaati. »

Yeesu watuulu mu libuumbë

³⁸ Kumanë ofo, Zozeefë li Alimaatë, wuloombë ke Pilaatë n'swa mu kunatë nyitu yi Yeesu. – Zozeefë wabë cilaanzi ci Yeesu ku mësweeci cibilë naandi wabë yi boomë bu bëkuluutu bë Sizwiifë. – Pilaatë wusë n'vandikë n'swa. Zozeefë wusë natooso nyitu Yeesu.

³⁹ Nikodeemë, muutu wo wuye takënë Yeesu cilumbu cimweekë yi bwiilu, wuyisë yivaandi i wunatë mëkumë-tatu më bizongulu më miilë i aloweesë.

⁴⁰ Babë bwaali bëboongë nyitu yi Yeesu i bisë yiziingë, mu biteendë bi linë, bëtuulë mëfutë më n'fiimbu, bo Sizwiifë bën'silaangë mu kuziikë sinvuumbi syaawu.

⁴¹ Fanë bëbandilë Yeesu fë kuluusu, fabë citumbu ci n'situ, mu citumbu be cyoocyo mwabë libuumbë limoonë linë bëkaambu vyaasi kuzikilë muutu.

⁴² Bo bwabë cilumbu citwaamë saba ci Sizwiifë i libuumbë lyabë libelëmë, bisë ke tuulë nyitu yi Yeesu.