Za 18 - N’KANGULU WUMOONË

Lubwilulu lu Yeesu

¹ Fë mbusë mamoomo, Yeesu wuyendë yimunë bilaanzi byaandi ku lisimu limesë li mwiilë bën'teelë Sedëloonë. Faawu, fabë citumbu ci n'siitu naandi wukukotë yimunë bilaanzi byaandi.

² Zuda wunë wulën'sumbisi, wuzaabë yivaandi fabeenë, cibilë Yeesu i bilaanzi byaandi bëlëkwisaangë faawu.

³ Zuda wusë kweendë ku citumbu ci n'situ be cyoocyo, wunatë nkoongë mësodaadi i mëluungë bëfilë ke bëkuluutu bë singangë-Nzaambi i cinguuku ci Sifalisyaanu. Baawu babë yi binwanunu i bëlë ke nataangë miindë i bisisi bi mbaasu.

⁴ Oboobo, Yeesu abu kwazaabi makë mooso manë mu lun'kwisilë, wusë belëmë fëke baawu i wusë bëkufulë: « Beeno nani luke toombaangë? »

⁵ Baawu bisë n'vutulilë : « Yeesu li Nazaleetë. » Yeesu wusë bëkaambë : « Miinu awu. » Zuda wunë wun'sumbisi, wabë foofo yimunë baawu.

⁶ Bunë Yeesu wubëkaambë : « Miinu awu », baawu bisë vutukë mbusë i kubwa fë n'toto.

⁷ Yeesu wusë bëkufulooso : « Beeno nani luke toombaangë? » Baawu bisë tubë : « Yeesu li Nazaleetë. »

⁸ Yeesu wubëvutulilë : « Miinu yalukaambë lyaawu mi wuuwu. Ningë ti miinu luke toombaangë, biikaanu bëmesë beendë. »

⁹ Mati boobo bwaawu, bëfitë vangininë libuungu lyo naandi wutubë : « Miinu yisye zimbisi muutu ko mu banë njeeyi, Taatë, wukum'paanë. »

¹⁰ Simu li Pyeelë wabë yi cisabë, naandi wucibaasi, wuyukë ciseelu cin'kuluutu singangë-Nzaambi i wusë n'cyeelë kutu ku mëbakëlë. Ciseelu be cyoocyo bëkun'teelaangë Malëkiisë.

¹¹ Kasi Yeesu wukaambë Pyeelë : « Vutulë cisabë cyaaku mu lukutulu. Njeeyi wum'balë ti miinu m'ba yisë nwa ko mbuungu simpasi yo Taatë wakum'paanë? »

Yeesu bën'natë ke Aanë

¹² Nkoongë mësodaadi i kumaandë kwaawu i miluungë bëkuluutu bi Sizwiifë bisë siimbë Yeesu i kun'kaangë misiingë.

¹³ Baawu bisë n'natë ntetë ke Aanë. Naandyaawu wabë cikweesi ci Kayiifë awu wabë n'kuluutu singangë-Nzaambi mu n'vu beenë.

¹⁴ Kosuku, Kayiifë na wuvaanë ndoonji ke mikwa-lwaangu Sizwiifë : « Lifwenikini mu beeno muutu mweekë kufwa mu cibilë ci baatu bakë booso. »

Pyeelë wutunë kuba cilaanzi ci Yeesu

¹⁵ Simu li Pyeelë i cilaanzi cin'ka bëlëlaandaangë Yeesu. Cilaanzi be cyooci cimesi cyabë cizabëkënë ke n'kuluutu singangë-Nzaambi, bwaawu naandi wukotilë fë cimweekë yimunë Yeesu ku luumbu lu n'zo n'kuluutu singangë-Nzaambi.

¹⁶ Kasi Pyeelë wusë kalilë ku ngaandë, belë-belë yi munu-n'zo. Bwaawu, cilaanzi cimesi, cinë cizabëkënë ke n'kuluutu singangë-Nzaambi, wusë basikë i kukaambë n'cyeetu wulëluungaangë munu-n'zo i naandi wusë kosi Pyeelë.

¹⁷ Ciseelu ci n'cyeetu cili luungaangë munu-n'zo wukaambë Pyeelë: « Njeeyi kwe yivaaku cilaanzi ci muutu be woowee? » — Pyeelë wusë vutulë : « Moniko miinu kuve! »

¹⁸ Cyoosi cyabë, bwaawu biseelu i miluungë bëtatikë mbaasu mu kotë. Pyeelë yivaandi wabë faawu i wulëkotaangë mbaasu.

N'kuluutu singangë-Nzaambi wuyufulë Yeesu

¹⁹ N'kuluutu singangë-Nzaambi wuyufulë Yeesu mu linë lin'talë bilaanzi byaandi i mu liloonji linë naandi wulëvaanaangë.

²⁰ Yeesu wun'vutulilë : « Miinu yilëtubaangë fë ciyalëlë ke baatu booso, yilëloongaangë mu bizutununu i mu n'zo-Nzaambi, fanë fëlëzutënaangë Sizwiifë syooso, miinu yisye tubilë lin'viipë ku mësweeci ko.

²¹ Cibilë-mbici njeeyi wulë mu kun'kufulilë? Yufulë banë bëyuwu linë miinu yibëkaambë: baawu bëzabisi buboti linë yilëtubaangë. »

²² Mu mamoomo, wumweekë mu biluungë wabë faawu wubulë Yeesu mbatë i wutubë : « Njeeyi boobo bwa wufwenikini kuvutulilë n'kuluutu singaangë-Nzaambye? »

²³ Yeesu wusë n'vutulilë : « Mooti libi yitubisi, tuleesi libi mbi twavaangë, kasi ningë lyo yitubisi libe fwaanë, mu cibilë-mbici wakum'bulilë? »

²⁴ Aanë wusë n'filooso myooko yikangëmë ke Kayiifë, n'kuluutu singangë-Nzaambi.

Pyeelë wutunooso Yeesu

²⁵ Mu ntaangu be syoosyo, Simu li Pyeelë, wabë faawu mu kotë mbaasu. Bisë n'kufulë : « Njeeyi kwe yivaaku cilaanzi ci muutu be woowee? » Kasi Pyeelë wutunë i wutubë : « Moniko, miinu kuve. »

²⁶ Wumweekë mu biseelu bi n'kuluutu singangë-Nzaambi, awu wabë cifuumbë cimweekë yi muutu wo Pyeelë wucyelë kutu, wun'kaambë : « Njeeyi kwe, yimonë yimunë naandi ku cituumbu ci n'situ? »

²⁷ Kasi Pyeelë wutunë fë vyaasi yin'ka. Mu ntaangu be yooyo susu yikokilë.

Yeesu fë ntwaalë Pilaatë

²⁸ Faawu, bisë natë Yeesu ke Kayiifë ku luumbu lu n'kwa-lwaangu wu Loomë. Yabë mu micye-cyeelu bi bwiisi. Kasi bëkuluutu bë Sizwiifë bësye kotë ko ku luumbu bwiinji baawu bëleembu kusumukë i kulya ndiiwu yi Paakë.

²⁹ Mati bwaawu, Pilaatë wusë bëtakënë ku ngaandë. Naandi wusë bëyufulë : « Beeno ntoondo mbi lwabakë muutu be woowo? »

³⁰ Baawu bisë n'vutulilë : « Ningë naandi wusye ba civadë-mbi ko, nkanë beeso tusye kwiisë ko mu kun'vakulë ke njeeyi. »

³¹ Pilaatë wusë bëkaambë : « M'boonjyaanu benuveekë i lun'fundisyaanu bo bun'kwendilë n'kaakiinu. » – Baawu bisë n'vutulilë : « Beeso tukeeli yi n'swa ko, mu kuvoondë muutu. »

³² Mati boobo, bwabufitë vangëninë libuungu linë Yeesu kutubë mu kusulikë mpilë lufwa kulëfwiilë.

³³ Pilaatë wusë kotooso ku luumbu, wutelë Yeesu i wun'yufulë : « Njeeyi fumu Sizwiifë? »

³⁴ Yeesu wun'vutulë : « Njeeyi wun'tubilë oboobo cibilë wali balë njeveekë voo cibilë bën'ka batubilë mu miinu? »

³⁵ Pilaatë wuvutulë : « Miinu Zwiifë yikeeli? Banë bëkalë yaaku i bëkuluutu bë singangë-Nzaambi ba bakuvakulë ke miinu. Njeeyi mbici wavaangë? »

³⁶ Yeesu wusë vutulë : « Lwaangu lwaami lukeeli lu buloongo be buubu ko. Ningë ti lwaangu lwaami lwaabë lu buloongo be buubu, nkanë biseelu byaami bëlën'waanë mu kumaangë baawu kun'vakulë ke mikwa-lwaangu Sizwiifë. Kasi moniko, lwaangu lwaami lukeeli lu buloongo be buubu ko. »

³⁷ Pilaatë wusë be tubooso : « Njeeyi Fumu wukeelye? » Yeesu wusë vutulë : « Njeeyi walitubë : miinu Fumu. Miinu yibutu, i yiyisë mu buloongo mu kutubë cimbaanji mu bucyelikë. Wosuku muutu wun'zingilë mu bucyelikë, wun'kuwu maambu yin'tubë. » –

³⁸ Pilaatë wun'yufulë « Cyelikë beenë mbicye? » Fë mbusë bikumë obyo, Pilaatë wuyendooso kwe zakënë Sizwiifë ku ngaandë. Wusë bëkaambë : « Miinu yisye monë libooti ko linë yifwenikini kuvaanë lutabu ke muutu be wuuwu.

Yeesu ban'tabë lufwa

³⁹ Kasi dedë mweekë bo bubikilë mwa nkulu, miinu yilubasilaangë wumweekë mu buloko mu kadë n'saangu Paakë. Beeno lun'toombë yilubasilë fumu Sizwiifë? »

⁴⁰ Baawu bisë n'vutulilë yi nkasu yooso : « Moniko, naandi kuve! Beeso Balabaasë naandi tun'toombë! » Kosuku Balabaasë be woowo wabë civadë-mbi.