Za 15 - N’KANGULU WUMOONË

Yeesu, n'ti viinyi wumboti

¹ Miinu n'ti viinyi wumboti i Tataami naandi wuwukunë.

² Naandi wum'botulaangë bitafi byooso binamë mu miinu bin'kaambu kuvaanaangë mëkuundi, kasi wun'cyelaangë, wun'cyeesyaangë kadë citafi cinë cin'vaanaangë mëkuundi bwiinji cibweelë kuvaanë mëkuundi.

³ Liloonji linë miinu yiluvaanë lya lulyomisi.

⁴ Kangëmaanu mu miinu, bo miinu yikangëminë mu beeno. Citafi kupodi ve kubutë mëkuundi mu naveekë mooti kusye kangëmë kuve mu n'ti viinyi. Bo bumweekë beeno kupodi ve kubutë mëkuundi ningë beeno lusye kangëmë kuve mu miinu.

⁵ Miinu n'ti viinyi yikeeli, beeno bitafi. Wunë wun'kangëmë ke miinu, i wunë miinu yin'kangëmë mu naandi, naandi wum'butë mpaapë mëkuundi, cibilë beeno kupodi ve kuvaangë cin'velë kukaambu miinu.

⁶ Wunë wun'kaambu kukangëmë mu miinu, naandyoowo wum'bumu ku ngaandë dedë mweekë citafi i naandi wun'kuumë. Bitafi biyumë bëbinoongë, bëbilaakë ku mbaasu i byaawu bin'lakëtë.

⁷ Ningë beeno lube kangëmë mu miinu, i mëbuungu maami mëkalë mu beeno, loombaanu byosuku lun'zolë, i beeno lum'bakë.

⁸ Talaanu buni bumpumu bu Taatë bum'monikinaangë : mooti beeno lun'vaanë mpaapë mëkuundi i beeno lukuyileesi ti bilaanzi byaami.

⁹ Miinu yiluzolisi bo Taatë be kun'zolilë. Kangëmaanu mu luzolo lwaami.

¹⁰ Ningë lube luundë tutumu twaami, beeno lun'kangëmë mu luzolo lwaami, dedë mweekë yiluundë tutumu tu Tataami i miinu yikangëmë mu luzolo lwaandi.

¹¹ « Miinu yalukambilë boobo bwiinji liyaanji lyaami liba mu beeno i liyaanji liinu liba deku-dekoo.

¹² Aluulu lutumu lwaami: zolësënaanu benuveekë i benuveekë bo miinu yibe luzolilë.

¹³ Luzolo luvyokililë bunenë lunë muutu wum'podi kuleesi, mati mu kuvaanë luziingu lwaandi mu sindiku syaandi.

¹⁴ Beeno sindiku syaami ningë lube vaangë manë yilukaambë.

¹⁵ Miinu yisë be luteelë ko bisasi, cibilë cisasi wusë n'zaabaangë ko manë mën'vaangaangë fumwaandi. Miinu yiluteelë sindiku, cibilë yiluzabikini makë mooso yisinu ke Taatë.

¹⁶ Yaaku beeno kuve lukun'soolë, mati yilusoolë. Miinu yilufilë mu kweendë, mu kubutë likuundi i likuundi lin'ziingë. Bwaawu, Taatë wuluvaanë makë mooso manë lukun'loombë mu lizinë lyaami.

¹⁷ Linë miinu yiluloombë, lufwenikini kuzolësënë benuveekë yi benuveekë. »

Buloongo buleendë Yeesu i banë babë yaandi

¹⁸ Ningë buloongo bwaluleendë, zaabaanu ti bwaawu bëkun'deendë ntetë yi beeno.

¹⁹ Ningë beeno lubakunu mu buloongo, buloongo buluzolë cibilë beeno luke mu naandi. Kasi miinu yilusoolë i yilubotulë mu buloongo i beeno lusyeeli ko baatu bë buloongo: bwaawu, buloongo bwalulendilë.

²⁰ Tebukaanu moonyi mu manë yilukaambë : Cisasi cisye vyokilë bunaangë ko yi fumwaandi. Ningë baatu bu kun'kwamisi, baawu bëlukwamisi yivaandi. Ningë baawu bë bëvitikë liloonji lyaami, bën'vitikë yivaandi liloonji liinu.

²¹ Kasi baawu bëluvangilë makë mooso omo mu cibilë cyaami, cibilë bësye zaabë ko nani wukun'filë.

²² Baawu kusë bë bëseembë kuve mu lisumu ningë miinu yisye kwiisë ko i ningë yisye bëkaambë kuve. Kasi buyifanwabu, baawu bëkeeli yin'leenvu ko mu mësumu maawu.

²³ Wunë wukun'deendë, naandi wuleendë yivaandi Tataami.

²⁴ Baawu nkanë bësye bwa kuve mu lisumu ningë yisye vaangë ko fë meeyaawu mëvaangë mëboti manë wosuku muutu wuvangisi vyaasi ko. Kosuku, buyifanwabu baawu bamonë mëvaangë maami i bakun'deendë yimunë Tataami.

²⁵ Kasi bwiinji libuungu lisonëmë mu n'kaakaawu livangënë : « Baawu bakun'deendë fë kaambu cikumë. »

²⁶ « Bunë bun'kwiisë wunë wulunwaninë cikaangë, mu cibilë ci Taatë yin'filë ke beeno, Ciluunzi ci cyelikë. Cyaawu cikun'teelë cimbaanji.

²⁷ Beeno yiviinu, lukun'teelë cimbaanji, cibilë beeno lwabë yaami kutatikilë fë ntonunu. »