Za 14 - N’KANGULU WUMOONË

Yeesu nzilë yin'nataangë ke Taatë

¹ « Keelaanu lulë ba yi lusweenu, lwe baanu lufyaatu mu Nzaambi i lwe baanooso yivaandi lufyaatu mu miinu.

² Biikë bike bimpaapë ku n'zo Tataami, ningë lyaawu lisye beelë boobo kuve nkanë miinu, yisye lukaambë kwe? Ti yake lubelikilë biikë fanë lun'kalilë.

³ Bunë miinu yin'kwendë mu kulubelikilë biikë, i miinu yin'vutukë mu kuluboongë, bwiinji luba yaami, yiviinu fo yikeeli.

⁴ Beeno luzabisi nzilë yin'nataangë ko yilë mu kweendë. »

⁵ Toma wusë n'kaambë : « A Fumu, beeso tusye zaabë ko kuni wulë mu kweendë, buni tufwenikini kuzaabë nzilë? »

⁶ Yeesu wusë n'vutulilë : « Miinu nzilë, cyelikë, i luziingu. Muutu ve wum'podi kweendë ke Taatë mooti naandi sye tabilë kuve fëke miinu.

⁷ Ningë beeno lun'zabisi, lun'zaabë yivaandi Tataami. Buyifanwabu beeno lwan'zaabë, lwam'monë. »

⁸ Filiipë wusë n'kaambë : « A Fumu, tuleesi Taatë i beeso tum'ba mu nyeenzi. »

⁹ Yeesu wun'vutililë : « Mpaapë mitoono miinu yakalë yiinu, njeeyi yibuunu kun'zaabë, a Filiipë? Wunë wakum'monë, naandi wamonë Taatë. Cibilë-mbici njeeyi wakun'tubë ti : “Tuleesi Taatë”?

¹⁰ Njeeyi wusë n'ta maanë kwe ti miinu yike mu Taatë i Taatë ke mu miinwe? Mëbuungu manë yilukaambaangë beeno booso, mësë n'fuminaangë ke miinu kuve. Mati Taatë wun'zingilaangë mu miinu, naandi wun'dedikinyaangë mëvaangë maandi.

¹¹ Teelaanu maanë bunë miinu yin'tubë : miinu yin'zingilaangë mu Taatë i Taatë wun'zingilaangë mu miinu. Kaambofo teelaanu manë keti mu mëvaangë be moomo.

¹² Licyelikë, licyelikë yilukaambë : wunë wun'ta manë mu miinu, wun'vaangë bimaaku byo yilë mu kuvaangë, naandi wun'vaangë byo bivyokilili yi miinu, cibilë yilë mu kweendë ke Taatë.

¹³ Miinu yin'vaangë makë mooso lun'loombë mu lizinë lyaami, bwiinji Mwaanë wuleesi bumpumu bu Taatë.

¹⁴ Ningë beeno lube kun'doombë cyosuku ciimë mu lizinë lyaami, yilivaangë. »

Lukanyu lu Ciluunzi ci Saantu

¹⁵ Ningë beeno lun'zolisi, lun'lenvukë tutumu twaami.

¹⁶ Miinu yin'loombë ke Taatë mu kuluvaanë wun'ka wun'kwisë mu kulunwaninë cikaangë, bwiinji naandi wukalë yiinu:

¹⁷ mati Ciluunzi ci cyelikë. Buloongo kupodi ve kun'tambulë cibilë bwaawu kupodi ve kum'monë, kaambofo kun'zaabë. Kasi beeno lun'zabisi, cibilë naandi wun'kalë yiinu i naandi wum'ba yiinu mu ntaangu syakë syooso.

¹⁸ Miinu yisë lubiikë benuveekë ko dedë mweekë baanë bësyaanë. Miinu yin'vutukënë ke beeno.

¹⁹ Mu mwa ntaangu buloongo busë bëkum'monë ko, kasi beeno lukum'monë cibilë ti miinu yilë mu kuziingë i beeno lulë mu kuziingë yivaandi.

²⁰ Cilumbu be cyooci, beeno lum'bakulë ti miinu yikangëmë yi Tataami i beeno lukangëmë mu miinu i miinu mu beeno.

²¹ « Wunë wun'siimbë tutumu i wuyicinzikë, naandyoowo, be kun'zolë. Tataami wun'zolë wunë wukun'zolisi. Miinu yikun'zolë yivaandi i yim'monikë ke naandi. »

²² Zuudë – yaaku ti Zuda Iskalyootë – wun'kaambë : « A Fumu, buni lin'vangininë ti njeeyi wukuyileesi ke beeso yaaku ti mu buloongo? »

²³ Yeesu wusë n'vutulilë : « Wunë wukun'zolisi wun'vitikë manë yin'tubë. Tataami wun'zolisi, beeso tun'kwisë ke naandi, Tataami i miinu i beeso tun'kalë ke naandi.

²⁴ Wunë be kaambu kun'zolë wum'maangë mëbuungu maami. Linë lulë mu kuwu miinu kutubë lisye fuminë ke miinu ko, kasi ke Taatë wo wukun'filë.

²⁵ Miinu yalukambilë mamoomë bo yicilyooso yiinu.

²⁶ Wunë wun'kwisë mu kulusaasi, Ciluunzi ci Saantu cinë Taatë wun'filë mu lizinë lyaami, naandi wulësinë makë mooso i naandi wulutebulë moonyi mu makë mooso manë yilukaambë. »

²⁷ « Mati n'sikë yalubikilë, mati n'sikaami yaluvaanë. Miinu yisë luvaanë waawu ko dedë mweekë buloongo bun'vaninaangë. Keelaanu lulë kalilë mu lusweenu i boomë.

²⁸ Beeno lun'yuwu kutubë : “Miinu yakun'kwendë, kasi yin'vutukënë ke beeno.” Ningë beeno lube kun'zolë, beeno lum'ba mu liyaanji mu kuzaabë ti miinu yakun'kwendë ke Taatë, cibilë Taatë bëvyokilë bunaangë yi miinu.

²⁹ Buyifanwabu, beeno yin'kaambë bosuku mamaamë më kutuuci, bwiinji bunë mën'kwisë, beeno lun'ta maanë.

³⁰ Miinu yisë be tubë mpaapë ko yimunë beeno, cibilë Civadë-mbi ci buloongo wulë mu kwiisë. Naandi wukeeli yi lutumu ko mu miinu.

³¹ Kasi bufwenikini buloongo kuzaabë ti miinu yibe zoolë Taatë i yin'vaangaangë dedë mweekë Taatë wukun'tumë. Telëmaanu, twe yendyaanu! »