Za 13 - N’KANGULU WUMOONË

Yeesu wasukulë maalu më bilaanzi byaandi

¹ Ntetë n'saangu Paakë, Yeesu wuzaabë ti zoolë yafwaanë mu naandi mu kubiikë buloongo be buubu mu kweendë ke Taatë. Naandi wulëzolaangë ntaangu syooso baandi bo babë mu buloongo i naandi wube zolë tee fë siitu.

² Yeesu i bilaanzi byaandi bëlëlyaangaangë ndiiwu mësikë. Dyaabu wuseengë n'timë Zuda, mwaanë Simu li Iskalyootë, mu kusumbisi Yeesu.

³ Yeesu wulëzaabaangë naveekë ti wufuminë ke Nzaambi, i wuvutukënë ke Nzaambi i Taatë wutuulë byakë byooso mu lutumu lwaandi.

⁴ Naandi wusë maanë n'telë fë meesë, wuvuulë cinkutu cyaandi i wuboongë n'lelë wuziingë mu lucyeto.

⁵ Fë mbusë, naandi wusekulë masi mu liboolë i wusë sukulë maalu më bilaanzi byaandi i wumëfyoonë mu n'lelë wabë kuziingë mu lucyeto.

⁶ Naandi wusë belëmë yi Simu li Pyeelë wunë wun'kaambë : « A Fumu, njeeyi wakun'sukulë maalwe? »

⁷ Yeesu wun'vutulilë : « Njeeyi wusë munë kubakulë kuve buyifanwabu abu manë yilë mu kuvaangë, kasi wum'bakulë mu ntaangu yin'kwisë. »

⁸ Pyeelë wusë n'kaambë : « Moniko, njeeyi kupodi ve kun'sukulë maalu! » Yeesu wun'vutulilë : « Ningë miinu yisye kusukulë maalu kuve, njeeyi wusë m'bakë cikuuku ko yimunë miinu. »

⁹ Simu li Pyeelë wusë n'kaambë: « A Fumu, ningë boobo, keelë kun'sukulë tokë maalu, kasi n'sukuli yivaandi myooko i n'tu! »

¹⁰ Yeesu wun'kaambë : « Wunë wakobilë, naandi n'ciinzë mu kusukulë tokë maalu, cibilë nawooso wucya. Beeno lucya, yaaku beeno booso kuve. »

¹¹ Yeesu wuzaabë buboti nani wufitë kun'sumbisi. Bwaawu kutubilë : « Beenë booso lukeeli lucya ko. »

¹² Yeesu abu kwe mani kubësukulë maalu, naandi wuboongë cinkutu cyaandi, wuvutukë fë meesë i kubëkaambë : « Beeno lwabakulë manë yaluvaangë?

¹³ Beeno lulë mu kun'teelë “Fumu” i “N'loonji”, lu n'luungë cibilë miinu bwaawu yikeeli.

¹⁴ Ningë miinu, Fumu i N'loonji yalusukulë maalu, beeno yivaandi, lufwenikini kuyisukulë maalu benuveekë yi benuveekë.

¹⁵ Miinu yaluleesi buni lufwenikini kusiilë bwiinji luvangilë bo bumweekë miinu yasilë mu beeno.

¹⁶ Licyelikë, licyelikë yilukaambë, ciseelu sye vyokilë bunaangë yi Fumu kuve, kaambofo wunë bëfilë kuvyokilë bunaangë yi wunë wun'filë.

¹⁷ Buyifanwabu beeno lwazaabë mamoomo, beeno lum'ba mu liyaanji ningë lube mësalilë.

¹⁸ Miinu yisë n'tubilë kuve mu beeno booso, yizabisi banë yisoolë. Kasi bube fwanëkënë mo mësonëmë mëvangënë : “Wo wulëkabenaangë yaami limpa wakum'balukulë.”

¹⁹ Buyifanwabu yakulukaambë, ntetë lyaambu kuvangënë, bwiinji ti faanë lyaawu lin'kwisilë beeno luta maanë ti “miinu yikeeli”.

²⁰ Licyelikë, licyelikë yilukaambë : wosuku wun'tambulë wunë miinu yin'filë, wukun'tambulë yivaandi. Wosuku wukun'tambulë, wutambulë wunë wukun'filë. »

Yeesu wazabikini ti Zuda wukun'sumbisi

²¹ Fë mbusë mamoomo, Yeesu wucyenzëkënë beenë, naandi wusë tubë yi nkasu : « Licyelikë, licyelikë yilukaambë : wumweekë mu beeno wukun'sumbisi. »

²² Bilaanzi byaandi bëlëtalësënaangë baveekë yi baveekë i bisë kufusënë : « Mu nani kulë mu kutubilë? »

²³ Wumweekë mu bilaanzi wunë Yeesu kulëzolaangë, wabë wukalë fë nkoonzu Yeesu.

²⁴ Simu li Pyeelë wusë n'cyebulë, bwiinji kuyufulë Yeesu mu nani naandi wulë mu kutubilë.

²⁵ Cilaanzi wusë betikë n'tu fëke Yeesu i wun'yufulë : « A Fumu, nani owe? »

²⁶ Yeesu wusë vutulë : « Miinu yake m'bwiikë citini cimpa mu lubuci, wunë yin'tambikë cyaawu, na woowo. » Yeesu wusë boongooso citini cimpa, wubwiikë i wusë tambikë Zuda, li mwaanë Simu li Iskalyootë.

²⁷ Fo Zuda kwe boonji citini cimpa, Satënë wusë kotë mu naandi. Yeesu wun'kaambë : « Linë njeeyi wuvwiili n'ciinzë kuvaangë, lengë vaangë lyaawu. »

²⁸ Wun'viipë ve mu bakë booso babë fë meesë wuzaabë cibilë-mbici naandi kulëtubilaangë boobo.

²⁹ Abu Zuda kulësweekaangë n'kutë mboongo, mpaapë mu baawu bëlëbalaangë ti Yeesu wun'kaambë mu kweendë mu kusuumbë bini bifwenikini mu n'saangu, kaambofo mu ke vaanë likabu ke biyeembi.

³⁰ Zuda, wusë boongë citini cimpa i wusë lengë basikë. Bwiisi bwabë bwa kwiilë.

N'kaakë wumoonë

³¹ Zuda abu kwe basikë, Yeesu wusë tubë : « Buyifanwabu bumpumu bu Mwaanë Muutu bwamonikë i bumpumu bu Nzaambi bwamonikë mu naandi.

³² Vandi, ningë bumpumu bu Nzaambi bum'monikë mu naandi, Nzaambi yivaandi wun'leesi mu naveekë bumpumu bu Mwaanë i naandi wabelëmë mu kulivaangë.

³³ A baanë baami, miinu yicili yiinu mu mwa ntaangu too. Beeno lukun'toombë kasi yakulukaambë buyifanwabu manë miinu yikaambë Sizwiifë simesë, beeno kupodi ve kweendë ko miinu yilë mu kweendë.

³⁴ Miinu yakuluvaanë n'kaakë wumoonë : zolësënaanu benuveekë yi benuveekë. Lufwenikini kuzolësënë benuveekë yi benuveekë bo yiluzolilë.

³⁵ Ningë beeno lube zolësënë benuveekë i benuveekë faawu ofo, bakë booso bën'zabilë ti beeno bilaanzi byaami lukeeli. »

Yeesu wake n'zabikini ti Pyeelë wukun'tunë

³⁶ Simu li Pyeelë wusë n'yufulë : « A Fumu, njeeyi kuni wakë kun'kweende? » Yeesu wun'vutulilë : « Njeeyi kupodi ve kun'daandë buyifanwabu ko yakun'kwendë, kasi njeeyi wukun'daandë bilumbu bin'kwiisë kun'twaalë. »

³⁷ Pyeelë wusë n'kaambë : « A Fumu, cibilë-mbici yin'kaambu kukulaandë buyifanwabu? Miinu yabelëmë mu kuvaanë luziingu lwaami mu njeeyi! »

³⁸ Yeesu wusë n'vutulilë : « Njeeyi wun'vaanë luziingu lwaaku mu cibilë cyaami? Licyelikë, licyelikë yikukaambë: ntetë susu kukokilë fë vyaasi tatu, njeeyi wukun'tunë. »