Matye 2 - N’KANGULU WUMOONË

Bangë bungelë bëyimonë Yeesu

¹ Yeesu wubutulu ku livulë li Betëlëyeemë, ku si Zudee, ntaangu Eloodë kubeelë n'tinu. Bangë bungelë bëfuminë ku lweeku lu mëselukulu më ntaangu, bisë ke tuukë ku Yelusaleemë.

² Bisë kufulë : « Kuni kuke mwaanë wo wabutu, n'tinu wu Sizwiifë? Cyelikë beeso twamonë mbotaandi ku mëselukulu më ntaangu i twakwiisë mu kun'kuundë. »

³ Bunë n'tinu Eloodë kwayuwu mpolu be yooyi, wusë kuba nzenzëbë i mboongu yooso yi Yelusaleemë.

⁴ Naandi wusë kucikë mëkakëtë mooso më singangë-Nzaambi i miloonji n'kaakë i wusë bëyufulë kuni kwabutulu Kliistu.

⁵ Baawu bisë n'vutulilë : « Ku Betëlëyeemë li Zudee, bwaawu licyelikë lisonikë m'bici :

⁶ “Njeeyi, Betëlëyeemë ku si Zudee, njeeyi mwiinji bucyeeci mu n'taandë mëvulë më Zudee, cibilë mu njeeyi mwaawu mba mu m'basikilë fumu yinë mba yin'likilë mboongwaami Islayeelë.” »

⁷ Mu lyaawu, Eloodë wusë vekilë ku mësweeci, bangë bungelë bwiinji bën'sulikilë ntaangu yo yim'basikilë mbotë.

⁸ Naandi wusë bëfilë ku Betëlëyeemë, i wusë bëkaambë : « Yendaanu, lwe zaabyaanu cyelikë cyooso mu mwaanë, i bunë beeno luke n'zakënë, n'dubulyaanu, bwiinji yivaamë yeendë mu ke n'kuundi. »

⁹ Baawu bunë bayuwu n'tinu, bisë ke yendaangë. Baawu bisë monë mbotë yiselukë ku mëselukulë më ntaangu, tee yi fanë yisikiminë mbiinji yabë mwaanë.

¹⁰ Baawu bisë ba mu liyaanji linenë mu kuyimonë.

¹¹ Bakoti ku n'zo, bisë monë mwaanë yimunë mamaandi Maali. Bisë fukumë i bisë n'kuundë. Bisë kutulë businë bwaawu, bisë n'kwindulilë mëkabu : woolë, n'liinji wu mpeembi i yaafë yi miilë.

¹² Balubulu mu ndoosi, mu kuleembu kuvutukë ke Eloodë, mu kuvutukë ku bwalë bwaawu baawu bisë mboongë nzilë yin'ka.

Lutinunu ku Zipiitë

¹³ Bangë bungelë bayendi, yaanzi yi Fumu yisë kumonikinë Zozeefë mu ndoosi i yisë n'kaambë : « Manë n'telë, boongë mwaanë i mamaandi, tiinë ku Zipiitë. Kalilë kuunë tee yi fanë yikulubulilë, cibilë Eloodë mba wun'toombë kuvoondë mwaanë. »

¹⁴ Munë bwiilu beenë, Zozeefë wutelëmë, kuboongë mwaanë i mamaandi, i wusë kweendë ku Zipiitë.

¹⁵ Naandi wusë kalilë kuunë tee lufwa lu Eloodë, mu kudedikini manë mëtubilë Fumu mu m'bici : « Yatelë mwanaami mu kubasikë ku Zipiitë. »

Luvondulu lu baanë

¹⁶ Bunë Eloodë kwamoni ti bangë bungelë bëm'puutë, likaanzi lisë n'kotilë. Naandi wusë tumisi më kuvoondë ku Betëlëyeemë i mu mikabë yimesë, baanë booso bëbakëlë bë mivu wali i bo bëbunu kuyiduci, bunë ntaangu yitoonë yo bangë bungelë bëyin'zimuninë saangu.

¹⁷ Mu bwaawu lisë vangëninë lyo Yelemi m'bici kutendulë :

¹⁸ « Mbeembu yisë kuwukunu ku Lama, n'luunji i lwaambu lunenë. Mati Laceelë wulë mu kulilë baanë baandi, wumaangë kuboondu, cibilë baawu bafwa. »

Luvutukulu ku Zipiitë

¹⁹ Fë mbusë lufwa lu Eloodë, yaanzi Fumu kumonikinë Zozeefë ku ndoosi kunë Zipiitë.

²⁰ Naandi wusë n'kaambë : « Manë n'telë, boongë mwaanë i mamaandi, i vutukënë ku Islayeelë, banë bësakaangë mbingu mu luziingu lu mwaanë bafwa. »

²¹ Zozeefë wusë manë n'telë, kuboongë mwaanë i mamaandi i wusë vutukë ku Islayeelë.

²² Kasi bunë kwayuwu ti Alëkeluusë wulëtumi li Zudee fë ciikë ci tataandi Eloodë, boomë busë n'siimbë mu kube vutukë kwaawu. Na wusë ke kalë ku libweeti li Ngalilee, bunë Nzaambi kun'lubulilë mu ndoosi.

²³ Naandi wusë ke kalë ku livulë bën'teelë Nazaleetë. Bwa boobo bwa buvanginë manë mëbikë mibici : « Naandi wun'teelu musë Nazaleetë. »