Loomë 10 - N’KANGULU WUMOONË

¹ Baanë bë nguli, miinu yin'tiisi mu n'timaami wooso mu kuloombë ke Nzaambi bwiinji Sizwiifë bëvuukë.

² Cyelikë yibëtubilë cimbaanji ti baawu bëke beenë buvavambë mu Nzaambi, kasi buvavambë bwaawu bukeeli ko buwaalë mu luzaabu.

³ Licyelikë, baawu bisye bakulë ko buni Nzaambi wun'vangisyaangë baatu kuba bësulëmë fë ntwaalaandi i baawu bisë toombë ntekwaawu yi kuzingilë. Baawu bisye yilekulë ko mu lusalusu lu Nzaambi.

⁴ Cibilë Kliistu wanatë tee ku siitu n'kaakë Moyiizë, bwiinji bakë booso bën'ta maanë bësulëmë fë meeso më Nzaambi.

Luvukulu luke mu wosuku wun'ta maanë mu Fumu

⁵ Tala linë Moyiizë wusonikë mu manë mën'talë likanë mu kuba wusulëmë mu n'kaakë : « Wunë wun'salilë tutumu tu n'kaakë wun'zingilë mu twaawu. »

⁶ Kasi tala buni naandi wun'tubilë mu likanë mu kuba wusulëmë mu ciminu : « Keelë wulëtubë mu njeveekë : Nani wum'makë ku yilu? » (dedë ti : mu kukululë Kliistu.)

⁷ Keelë wulëtubë : « Nani wun'kulukë ku buluunji bu mbaasu? » (Mu kutubë ti : mu kubaasi Kliistu fë meeyi bëfwa.)

⁸ Mbici lin'tubë? Lyaliili : « Libuungu libelëmë yi njeeyi, mu munwaaku i mu n'timaaku. » Libuungu be liili lya saangu yi ciminu yinë beeso tulë mu kutendulë.

⁹ Ningë ti mu munwaaku wulë mu kusisiminë fëke bakë booso ti Yeesu wuli Fumu i ningë njeeyi wun'ta lyaanë mu n'timaaku wooso ti Nzaambi wun'vulumunë mu bëfwa, njeeyi wun'vuukë.

¹⁰ Cibilë mu n'timë, mwaawu bëkun'teelë maanë i Nzaambi wun'vangisyaangë kusulëmë muutu wo wacikunë, mati mu munu tun'sisiminë i Nzaambi wun'vuuci wunë wun'vangilë kati obo.

¹¹ Cyelikë lisonëmë : « Wosuku wun'ta maanë mu naandi kusë wum'monë sonyi ko. »

¹² Boobo, luvyakunu voo yimunë Sizwiifë i basë Ngeleekë: bakë booso fumwaawu yimweekë, wun'vangaangë mëboti maandi ke bakë booso bëkun'telë mbilë.

¹³ Cibeeni bëtubë : « Wosuku wun'telë lizinë li Fumu wun'vuukë. »

¹⁴ Kasi buni bëm'podi kun'telë mooti bësye n'teelë maanë ko? Buni bëm'podi kun'cikuninë mooti bësye kuwulu wosuku wutubilë mu naandi? Buni bëm'podi kun'yuwulu mooti muutu ve wukun'tendulë?

¹⁵ Buni bëkun'tendulë ningë baatu ve bëfilisi mu lyaawu? Busonëmë : « Mati liboti mu kumonë lwisulu lu banë bën'natë Mpolu Mboti! »

¹⁶ Kasi yaaku bakë booso ba basiinji Mpolu Mboti. Ezayi wutubë : « A Fumu nani wata lyaanë mu Mpolu Mboti yo twatendulë? »

¹⁷ Boobo, ciminu cin'fuminë mu manë tun'kuwu i manë tun'kuwu mën'fuminë mu Libuungu li Kliistu.

¹⁸ Miinu yin'kufulë : Sizwiifë bësye kuwu Mpolu ayi kwe? Kasi ningë baawu bëyiyuwu! Lisonëmë : « Mbeembwaawu yiyuwukunu fë mongu butoto n'viipë, i mëbuungu maawu mëtuukë tee kunë kusitikilë buloongo. »

¹⁹ Miinu yin'kufulooso: Islayeelë sye zikulë kuwu kwe? Ee, talaanu manë mën'vutulë Moyiizë : « Miinu yin'vangisi ti beeno luba yi likwaafi mu banë bëkeeli ko nguliku likaandë bo Nzaambi kutubilë, miinu yiluvangisi kuba mu likaanzi mu mboongu yikaambu mëlyeelë. »

²⁰ Ezayi wutendulë yimunë bukanvi : « Banë bëlëkaambu kun'toombaangë bëkum'monë, bo Nzaambi kutubilë, yimonikënë banë bëkaambu kun'doombë tyosuku. »

²¹ Kasi mu manë mën'talë Islayeelë, naandi wutubë : « Kadë cilumbu miinu yitaambë myooko kuke mboongu yikaambu kucikunë i yike bubaalu. »