Liikë 22 - N’KANGULU WUMOONË

Mikwa-lwaangu bakotë fuundu mu kuvoondë Yeesu

¹ N'saangu wu mëmpa mëkaambu fundubulu, bën'telaangë n'saangu Paakë, wusë belëmë.

² Bëkuluutu bë singangë-Nzaambi i miloonji n'kaakë bëlëtoombaangë buni baawu bëm'podi kuvondilë Yeesu, kasi baawu babë yi boomë bu nkoongë baatu.

Zuda wabelëmë mu kuvakulë Yeesu ke sifumu

³ Oboobo, Satënë wusë kotë mu n'timë Zuda, wunë bëlëteelë Iskalyootë, wumweekë mu nkoongë likuumi bë bwaali.

⁴ Zuda wusë kweendë mu kuwusënë yi bëkuluutu bë singangë-Nzaambi i sifumu si biluungë n'zo-Nzaambi buni naandi kum'podi kubëvakulilë Yeesu.

⁵ Baawu bisë ba mu liyaanji linenë i bën'kani kun'vaanë simboongo.

⁶ Zuda wucikunë i wutoombë luvoto luboti mu kubëvakulilë Yeesu yi nkoongë kuzaabë ve lin'viipë.

Kubelikilë n'saangu Paakë

⁷ Cilumbu cisë tuukë, ci n'saangu mëmpa mëkaambu m'bweeli, cyo bëkanyi kuvakulilë mëmemë më ndiiwu Paakë.

⁸ Yeesu wusë filë Pyeelë i Za yi lutumu alu: « Yendaanu lwe tubelikilë ndiiwu Paakë. »

⁹ Baawu bisë n'yufulë : « kuni njeeyi wun'zolë ti beeso tukubelikilë yaawu? »

¹⁰ Yeesu wusë bëkaambë : « Yuwaano : bunë beeno lun'kotë ku livulë, lun'dyengënë libakëlë like nataangë cidoyi ci masi. N'laandyaanu tee ku n'zo kun'kotë

¹¹ i kaambaanu fumu n'zo: “Fumu njeeyi kulë mu kufulë : Kuni kuke civeenji cibelikulu yifwenikini kwambulilë ndiiwu Paakë yimunë bilaanzi byaami?”

¹² Naandi syawululeesi, ku yilu cibaangë, civingë cinenë yimunë byakë byooso binë bike n'ciinzë. Faawu lum'belikilë ndiiwu Paakë. »

¹³ Baawu bisë kweendë i ke zakënë makë mooso bunë Yeesu kubëkambilë i bisë belikë ndiiwu Paakë.

Ndiiwu yi Fumu

¹⁴ Bunë zoolë yisë fwaanë, Yeesu wusë kalë fë meesë yimunë mimbunzi.

¹⁵ Naandi wusë bëkaambë : « Miinu yike beenë tesu mu kwambulë ndiiwu Paakë yimunë beeno ntetë kumonë simpasi!

¹⁶ Licyelikë, yilukaambë, yisë be podyooso ko kube lya yaawu tee ntaangu yaawu yin'zabukunu buboti ku Lwaangu lu Nzaambi. »

¹⁷ Naandi wusë siimbë mbuungu, kutoondë Nzaambi i wusë tubë : « Boongaanu mbuungu ayi yi viinyi i kabënaanu yaawu benuveekë i benuveekë.

¹⁸ Licyelikë, yilukaambë, kutatikilë mu bubwayi aci, miinu yisë be nwa kuve viinyi tee yi fanë Lwaangu lu Nzaambi lun'kwisilë. »

¹⁹ Naandi wusë boongë limpa, kutoondë Nzaambi i wusë limukënë i kubëtambikë lyaawu i kutubë : « Ayiiyi nyitwaami yavaanë mu cibilë ciinu. Vangilangaanu lyaliili mu kun'tebukilaangë moonyi. »

²⁰ Naandi wusë kubëvaanë yivaandi mbuungu viinyi, bunë bamani kulya i wusë tubë : « Mbuungu be yiiyi n'kangulu wumoonë mu meengë maami, mëtyamukë mu cibilë ciinu.

²¹ Kasi lwe monaanu: wunë wukun'sumbisi wuke afa, fë meesë yimunë miinu!

²² Cibeeni, Mwaanë muutu wun'fwa bunë bukelili n'vwiilu Nzaambi, kasi mënyoni ke muutu wunë wukun'sumbisi! »

²³ Baawu bisë toonë kufusënë baveekë i baveekë, nani mu kati kwaawu wuzolisi kuvaangë lyaambu be lyooli.

Nani wuvyokilili kucinzëmë?

²⁴ Bilaanzi bisë toonë kwambilë baveekë i baveekë, mu kuzaabë nani mu nkoongaawu wuvyokilili kucinzëmë.

²⁵ Yeesu wusë bëkaambë : « Mitinu mëkaandë bëbëtumyaangë i bo bëke lutumu mu baawu bëzolisi bëbëteelë “Baatu bëboti”.

²⁶ Kasi busye fwaanë ko kubeelë katyoobo mu beeno. Kosuku, wunë wuvyokili bukuluutu fë meeyiinu kwe ba dedë mweekë mwaanë wun'ciici i wunë wun'tumi wufwenikini kuba dedë mweekë cisasi.

²⁷ Cibilë nani wuvyokili bunaangë, wunë wukalë fë meesë voo wunë wun'salilë bayaandi? Mati wo wuke fë meesë kanuku boobo kwe? Mu lyaawu, miinu yike fë meeyiinu bo buke wunë wuke mu kusalilë baatu!

²⁸ Beeno luke yaami ntaangu syooso mu simpasi syaami.

²⁹ Bo bumweekë buvangilë Taatë mu kubelikilë Lwaangu, miinu yivaamë yalubelikilë lwaawu.

³⁰ Beeno lun'lya i lun'nwa fë meesë maami ku Lwaangu lwaami i beeno lun'tumi mu sintaanzi bwiinji lufundisi likuumi li bifuumbë bi byooli bi Islayeelë. »

Yeesu wazabikini lutununu lu Pyeelë

³¹ « A Simu, a Simu! Yuwo Satënë waloombë mu kulunyikunë bo bën'nyikuninaangë singeenzë mu cicyenzulu mu kusilyomisi.

³² Kasi miinu yasambililë mu njeeyi, bwiinji ciminu cyaaku cileembu kuvolë. Bunë njeeyi wun'vutukë ke miinu, we ciinzi baanë yaaku bë nguli. »

³³ Pyeelë wusë n'kaambë : « A Fumu, miinu yibelëminë mu kweendë yaaku ku buloko, i keti mu kufwa yimunë njeeyi. »

³⁴ Yeesu wusë n'vutulilë : « A Pyeelë, miinu nje yikaambë, bubwayi, ntetë susu kokilë, njeeyi wukun'tunë fë vyaasi tatu ti wusye kun'zaabë ko. »

Luboongo, cipokuluku, i cisabë

³⁵ Yeesu wusë bëkaambë : « Bunë miinu yilufilë mu mweendo luboongo ve, cipokuluku ve, keti mëpaapë ve, mu beeno ciimë mbi ci lukaambu? » Baawu bisë vutulë : « Cyosuku ciimë ve cikaambu mu beeso. »

³⁶ Tee naandi wusë bëkaambë : « Abu lyekilë obo, wunë wuke yi simboongo wufwenikini kusiboongë, mpilë mweekë yivaandi, wunë ke yi cipokuluku kwe ciboongë. Wunë wukaambu cisabë wufwenikini kusumbisi ciyuungë cyaandi mu kusuumbë cimweekë.

³⁷ Cibilë, miinu yilukaambë, bufwenikini maambu be maamë mësonëmë kuvangënë bo yicili moonyi: “Bën'tuulë mu nkoongë bilyaani.” Licyelikë, maambu manë mën'talë miinu mën'vangënë. »

³⁸ Bilaanzi bisë tubë : « Fumu, talo mësabë mwaali. » Yeesu wusë vutulë : « Mëbe fwaanë. »

Yeesu wulë mu kusambilë ku limoongo li miti Oliivë

³⁹ Yeesu wubasikë i wusë kweendë ku limoongo li miti Oliivë bunë bwabë ciipë cyaandi. Bilaanzi byaandi bisë n'laandë.

⁴⁰ Bunë kwatuuci mbiinji beenë, naandi wusë bëkaambë : « Sambilaanu bwiinji luleembo kubwa mu lisokë. »

⁴¹ I naandi wusë kwakënë yaawu fë mwa n'takë, na kufukumë i wusë sambilë,

⁴² mu bikumë abi : « Taatë, ningë njeeyi wulizolisi, yakini yi miinu mbuungu ayi yimpasi. Ntaangu syooso, yaaku ti n'vwiilwaami wufwenikini ko kuvangënë, kasi wo waaku. »

⁴³ Mu lyalyooli, yaanzi mweekë yi yilu yisë m'monikënë mu kun'ciinzi bitu.

⁴⁴ Lusweenu lwan'kotili i naandi wusë bweelë kusambilë yi n'viingu wooso. Lyuufu lyaandi lisë basikë buke mëbeti më meengë mëlë bwa fë n'toto.

⁴⁵ Bunë kwamani kusambilë, wusë manë n'telë i wusë vutukë ke bilaanzi i kubëzakënë bëlëdofaangë tolo, wusë volë bitu mu cyaali.

⁴⁶ Naandi wusë bëkaambë : « Cibilë-mbici lulë mu kudofë tolo? Telëmaanu i sambilaanu, mu kumaangë kubwa mu lisokë. »

Yeesu bam'bwiilë

⁴⁷ Naandi wulëtubaangooso, bunë nkoongë yibasikë fë ntwaalaandi. Zuda, wumweekë mu nkoongë likuumi bë bwaali li bilaanzi, wulënatë nkoongë. Naandi wusë belëmë Yeesu mu kun'fifë.

⁴⁸ Kasi Yeesu wusë n'kaambë : « A Zuda, buni, mu kun'fifë mwaawu njeeyi wun'sumbisilë Mwaanë muutu? »

⁴⁹ Banë bëlëkwendë yimunë Yeesu mu mweendo bamoni manë makun'yiisilë, baawu bisë n'kufulë : « A Fumu, beeso kupodi kunwaanë mu bisabë biitwe? »

⁵⁰ Wumweekë mu baawu wuyukë cisabë ke cisasi cin'kuluutu singangë-Nzaambi i wusë n'cyelë kutu ku mëbakëlë.

⁵¹ Kasi Yeesu wusë tubë : « Biikaanu, bwafwaanë boobo. » Naandi wusë siimbë kutu ku muutu beenë i wusë m'bukë.

⁵² Fë mbusë, Yeesu wusë kaambë bëkuluutu bë singangë-Nzaambi i sifumu si miluunji n'zo-Nzaambi i mëkakëtë banë bëyisë mu kum'bwiilë: « Beeno lufwenikini kwiisë yi bisabë i biboondo buka ti miinu cilyaani yikeeli?

⁵³ Bilumbu byakë byooso, miinu yabë yimunë beeno mu n'zo-Nzaambi i lusye toombë ko mu kum'bwiilë. Kasi zoolë ayi yiinu beeno i lutumu lu citoombi. »

Lutununu lu Pyeelë

⁵⁴ Mu lyalyooli, baawu bisë bwiilë Yeesu. Bisë n'natë, bisë n'kosi ku n'zo yi n'kuluutu singangë-Nzaambi. Pyeelë wusë ke bëlaandaangë ku cinaanu.

⁵⁵ Bëluungë mbaasu ku kati ku luumbu i Pyeelë wusë kalë yaawu cintwaali mu kotë mbaasu.

⁵⁶ Ciseelu cimweekë ci n'cyeetu cisë m'monë wukalë fëke mbaasu. Naandi wusë kun'sitikë ntalu i wutubë : « Muutu awu wabë yivaandi yimunë naandi! »

⁵⁷ Kasi Pyeelë wusë tunë i wusë tubë : « Miinu sye n'zaabë ko. »

⁵⁸ Fë mwa ntaangu, muutu wun'ka wusë monë Pyeelë i wusë tubë : « Njeeyi yivaaku wulë wum'mweekë mu baawu! » Kasi Pyeelë wusë vutulë muutu beenë: « Moniko, yaaku miinu ko. »

⁵⁹ Fë mbusë zoolë mweekë, muutu wun'ka yivaandi wusë sisiminë yi nkasu yooso: « Licyelikë, muutu awuuwu wabë yimunë Yeesu cibilë ti naandi musë Ngalilee kukeeli. »

⁶⁰ Kasi Pyeelë wusë vutulë : « Miinu yisye zaabë ko manë njeeyi wulë mu kutubë. » Mo mu ntaangu beenë susu kukokilë.

⁶¹ Fumu wusë balukë i wusë sitikë ntalu kuke Pyeelë. Mu lyalyooli, Pyeelë wusë tebukë moonyi mu maambu manë Fumu wun'zabikini: « Bubwaayi, ntetë susu kokilë, njeeyi wukun'tunë fë vyaasi tatu. »

⁶² Pyeelë wusë basikë i wusë yivoondë kulilë.

Yeesu wufiingu i wubulu

⁶³ Baatu bo bëlësuungaangë Yeesu bën'sefë i bëm'bulë.

⁶⁴ Baawu bën'fukë ciinyi i bisë n'yufulë : « Bikulë, nani wakubule? »

⁶⁵ Baawu bisë n'fiingë mpaapë bituumbu.

Yeesu fë ntwaalë cinzonzi ci Sizwiifë

⁶⁶ Bunë bwiisi bwacya, mëkakëtë më Sizwiifë, bëkuluutu bë singangë-Nzaambi i miloonji n'kaakë bisë bundënë fë cimweekë. Baawu bisë tumisi ti bënatë Yeesu fë ntwaalë cinzonzi ci Sizwiifë,

⁶⁷ i bisë kuyufulë : « Tukaambi, njeeyi wuli Kliistu? » Yeesu wusë vutulë ti : « Ningë miinu yibe luzabikini maawu, beeno lusë n'ta maanë mu miinu kuve,

⁶⁸ ningë yibe lukufulë cyuufu, beeno lusë kum'paanë n'vutu ko.

⁶⁹ Kasi kutoonë ntaangu be yiiyi, Mwaanë muutu wun'kalilë ku lweeku lu mëbakëlë më Nzaambi Nkwa-Muundë. »

⁷⁰ Bake booso bisë kulookë : « Mu lyalyooli, njeeyi wulë Mwaanë Nzaambye? » Naandi wusë bëvutulë : « Benuveekë lwalitubë. »

⁷¹ Mu lyalyooli, baawu bisë tubë : « Beeso tusyeelyooso kuve nzalë bumbaanji bun'ka! Besuveekë twakuwu maambu manë mabasikilë mu munwaandi! »