Liikë 14 - N’KANGULU WUMOONË

Yeesu wabelusi cibeedo

¹ Cilumbu ci saba, Yeesu wusë kweendë kuke fumu mweekë yi Sifalisyaanu mu kwambulë. Banë bëyabë faawu, bëlësungaangë Yeesu yi n'sikë wooso.

² Libakëlë limweekë lilë tifaangë nyitu wuyitelëmë fë ntwaalaandi.

³ Yeesu wusë buulë-mbeembu i wusë kufulë miloonji n'kaakë i Sifalisyaanu : « N'kaakiitu wun'vaanë n'swa vo moniko mu kubelusi muutu cilumbu ci saba? »

⁴ Kasi baawu bësye zolë kuve kun'cikuninë. Tee Yeesu wusë siimbë cibeedo, kum'belusi i wusë n'vutulë.

⁵ Boobo, naandi wusë bëkaambë : « Ningë wun'viipë wuke yi mwaanë kaambofo ngoombi yabwa mu libulu, wun'kaambu kulengë n'tapulë, keti mu cilumbu ci saba? »

⁶ Baawu bësye podi ko kuvutulë lin'viipë.

Liloonji mu banë bën'soolaangë biikë bi ntwaalë

⁷ Yeesu wusë kumonë buni bëtelu bën'solilaangë biikë biboti. Naandi wusë kaambë bakë booso sasafë ayi :

⁸ « Mooti wun'viipë be kutelë mbilë ku cikaanvu ci mëkweelë, keelë wulë ke kalë fë ciikë ci ntwaalë. Manë ti wun'viipë wutelu wuvyokilili kucinzëmë yi njeeyi,

⁹ i wunë wukutelisi wun'kwisë mu kukukaambë : “M'bikilë ciikë ocyo.” Fa foofë, njeeyi yi sonyi wun'vutukënë mu ke kalë fë ciikë ci siitu.

¹⁰ Kasi, ningë bëbe kutelë, ye kalë fë ciikë ci siitu, bwiinji fanë kun'kwisilë wunë wukutelisi, wukukaambë : “A ndikwaami, ye kalë fë ciikë ci ntwaalë.” Fa foofë, fëm'ba mu njeeyi luciinzu fë meeso më bakë booso bëm'ba fë meesë yimunë njeeyi.

¹¹ Cibilë, wosuku wuyizanjikë, bë kun'kululë, i wunë wun'kulukë bëkun'zanjikë. »

¹² Naandi wun'kaambë yivaandi wunë wun'telë : « Bunë wun'vaanë m'buluku kaambofo ndiiwu, keelë wulëtelë bayaaku, baanë yaaku bë nguli, libaambë lyaaku, kaambofo sindiku syaaku si bësinë, cibilë baawu yivaandi kupodi kukutelë mu yaawu vyaasi i bwaawu wum'bakilë ndobwaaku.

¹³ Kasi, mooti wun'vaangë cikaanvu, telë biyeembi, bibolikinyi binamë, bibolikinyi maalu, bëfwa meeso.

¹⁴ Fa foofë, njeeyi wum'ba mu nyeenzi cibilë baawu bëkeeli ko yi likanë mu kukuvutulilë fuutë. Licyelikë, lyaawu likuvutukulë fë luvulumuku lu bo bësulëmë. »

Sasafë yi cikaanvu cinenë

¹⁵ Fë mbusë kuwu maambu be moomë, wumweekë mu banë bëtelu wabë fë meesë wusë kaambë Yeesu : « Nyeenzi ke wunë wun'lya ku Lwaangu lu Nzaambi! »

¹⁶ Yeesu wusë kuzabikini sasafë ayi : « Muutu mweekë wulëvaangë cikaanvu cinenë cinë kutelë mpaapë baatu.

¹⁷ Mu zoolë kuliilë, naandi wusë filë ciseelu cyaandi kukaambë bo bëtelu : “Yisaanu, cibilë buyifanwabu byadukënë!”

¹⁸ Kasi bakë booso, wumweekë-wumweekë, wusë kuloombë linaanë. Muutu wun'tetë wusë kaambë cisasi : “Miinu yasuumbë solë i miinu yifwenikini kweendë mu ke yimonë. Miinu yikuloombë linaanë.”

¹⁹ Muutu wumesë wusë n'kaambë : “N'konkolë syaaku! Miinu yasuumbë kuumi li ngoombi i miinu yin'toombë ke sikwelikë.”

²⁰ Muutu wun'kooso wusë tubë : “Miinu yakweelë buyifanwabu i mu lyaawu, miinu yisë m'podi ko kweendë yaaku.”

²¹ Ciseelu cisë vutukë kuke fumwaandi, i wusë n'zabikini simputululu syaawu. Mu lyalyooli, fumu n'zo wusë dasukë i wusë kukaambë ciseelu cyaandi : “Yendë ntiinu mu mëvaambu i mu sinzilë si livulë, i natë afa biyeembi, bitolëkini, simpofo i bibolikinyi.”

²² Fë mbusë mwa ntaangu, ciseelu wusë vutukë i wusë tubë : “A Fumu, mivwiilwaaku yavangënë, kasi biikë bicinyooso.”

²³ Fumu wusë kukaambë ciseelu cyaandi: “Yendë mu sinzilë sinsitu, mu misolu yooso, i kacikë baatu mu kukotë, bwiinji ti n'zwaami yi waalë.

²⁴ Miinu beeno yikaambë: muutu ve mu banë bëtelu ba bën'lya bilya byaami bi cikaanvu!” »

Buni bufwenikini mu kuba cilaanzi ci Yeesu

²⁵ Nkoongë nenë yi baatu yilëkwendaangë yimunë Yeesu. Naandi wusë balukë i wusë kaambë bakë booso :

²⁶ « Wunë wun'zolë kuba cilaanzi cyaami, wufwenikini kuvyokililë kun'zolë yi tataandi, mamaandi, n'kasyaandi, baanë baandi, baanë yaandi bë bëbakëlë, bë bëcyeetu i keti nyitwaandi naveekë. Kanuku bwaawu, naandi kupodi ve kuba cilaanzi cyaami.

²⁷ Wunë wun'kaambu kunatë kuluuswaandi, mu kun'daandë, kupodi ve kuba cilaanzi cyaami.

²⁸ Ningë wumweekë mu beeno, wun'toombë kutuungë cibaangë, naandi wufwenikini ntetë kukalë, mu kubiilë lutaangu lu mboongo lunë luke yaandi i kumonë ti luboongo luke lumpaapë mu kumanisi cisalu.

²⁹ Mooti, naandi bëtuungë lufuuyi i kumanisi ve n'zo, bakë booso bëkum'monë, bëkun'sefë

³⁰ mu kutubë : “Muutu awu wutoonë kutuungë lufuuyi luboti. Kasi naandi wusye podi ko kumanisi cisalu!”

³¹ Mpilë mweekë, ningë n'tinu mweekë wuzolisi kunwanisi n'tinu wun'ka, naandi wufwenikini kutekë kalë, mu kubiilë mooti naandi wum'podi, yimunë likuumi li biveefi bi baatu, mu kunwanisi mbeenyaandi wunë wuke yi mëkumwaali li biveefi bi baatu.

³² Ningë naandi wusë m'podi ko, naandi kufilë bipayi ke n'tinu wum'mesë bunë kucililë cinaanu, mu kun'loombë kutuulë n'sikë.

³³ Mu bwaawu obo, Yeesu wusë tubooso, Wosuku ve mu beeno wum'podi kuba cilaanzi cyaami, ningë naandi wusë n'vubikë ko byakë byooso bike yaandi. »

Saalu yikaambu lutwiingu

³⁴ « Saalu n'ciinzë yikeeli, kasi, ningë lutwiingu lwaandi lusyeelyooso ko, buni bëm'podi kube n'vutulilë lutwiingwe?

³⁵ Mu cibilë ocyo, yaawu yisyeeli ko n'ciinzë, keti fë n'toto, keti fë liyalë, bëyibumë ku ngaandë. Wosuku wuke yi n'tu, matu mëke yaandi, mu kuwu! »