Efeesë 3 - N’KANGULU WUMOONË

Cisalu ci Poolë mu banë bëkeeli Sizwiifë ko

¹ Mu lyalyooli, miinu Poolë, yin'vaangë n'sambwaami ke Nzaambi. Miinu yike mu buloko mu cisalu ci Kliistu Yeesu mu cibilë cinë beeno lukeeli Sizwiifë ko.

² Beeno luyuwu ti Nzaambi mu buboti bwaandi, wum'paanë cisalu aci mu cibilë ciinu.

³ Nzaambi wun'deesi mo mëswaamë, bwiinji wukun'zabikini manë kukanë naandi. Miinu yisonikë fë ntonunu n'kaandaami mwa bikumë mu lyalyooli.

⁴ Bunë lumëtaangë, beeno lum'podi kubakulë bunë miinu yizabisi mësweeci mën'talë Kliistu.

⁵ Mu sintaangu si ntamë, mësweeci ama mësye zabukunu ko ke baatu, kasi bubwayi aci, Nzaambi wamëzabikini mu Ciluunzi cyaandi ke mimbunzyaandi yi saantu i mibici.

⁶ Talaanu lisweeci beenë: mu cibilë ci Mpolu Mboti, banë bëkeeli Sizwiifë ko i bo bëke Sizwiifë beekë yi n'swa wukutambulilë biimë biboti binë Nzaambi kulundilë mboongwaandi, baawu beekë binamë bi nyitu mweekë i baawu yivaandi bëm'bakë lukanyu lo Nzaambi kuvaanë mu Kliistu Yeesu.

⁷ Miinu yeekë ciseelu ci Mpolu Mboti mu cibilë ci likabu Nzaambi wukum'paanë mu buboti bwaandi, bulë mu kumonikë yimunë luleendo.

⁸ Miinu muutu kwaandi vwiili mu bitamaanë byooso. Mu kumonë, Nzaambi wukum'paanë muulë mu kutendulë ke banë bëkeeli Sizwiifë ko businë bun'kaambu më manunu bu Kliistu.

⁹ Miinu yifwenikini kunatë cyeseesë kuke baatu booso, bunë Nzaambi kun'lesilë maambu maandi mëswaamë. Naandi na N'vaanji byakë byooso faanë yi faanë, mëkanë maandi mëswaamë,

¹⁰ bwiinji ti, buyifanwabu, mu likanë li Cingangë, tutumu i luleendo tu buloongo bu yilu, bëzaabë bungelë bu Nzaambi mu sinteku syaandi syakë syooso.

¹¹ Makë mooso omo mën'dedëkënë mu manë Nzaambi wukanë kuvaangë ci mëkulu, maawu kwavaangë mu Kliistu Yeesu Fumwiitu.

¹² Mu lubundunu yimunë Kliistu i ciminu ciitu mu naandi, beeso twatambulë lobukulu lu kumonikinë fë nduunzi Nzaambi yi civuufu cyooso.

¹³ Bwaawu, miinu yiluloombë, nuvolyaanu bitu ko mu simpasi yilë mu kumonë mu beeno: syaawu siluvangisi kuba mu nyeenzi.

Luzolo lu Kliistu

¹⁴ Mu bwaawu miinu yafukëmë fë nduunzi yi Nzaambi, Taatë,

¹⁵ mu naandi mwaawu mu ke mëkaandë makë mooso mëke ku mëyilu i fë moongo butoto.

¹⁶ Miinu yikun'loombë ti, mu bunë bukelili businë mu bumpumu bwaandi, naandi wun'ciinzi n'timiinu mu luleendo lu Ciluunzi cyaandi,

¹⁷ i Kliistu wun'kalilaangë mu mitimiinu mu ciminu. Miinu yiluloombë lusikëminaanu i luciindaanu beenë mu luzolo,

¹⁸ bwiinji luba yi mëkanë mu kuwu, yimunë mboongu yooso yi Nzaambi, buni luzolo lu Kliistu luyangililë i lukulë, luzangiminë i lu doongë.

¹⁹ Cibeeni, beeno lum'podi kuzaabë luzolo lwaandi keti lwaawu lulë vyokililë luzaabu looso i kuba luwaalë mu businë booso bu Nzaambi.

²⁰ Ke naandi, wunë wuke yi lutumu lu kuvangilë mo mëvyokilili mu makë mooso tun'loombë kaambofo tum'balë, mu luleendo lunë lun'salë mu beeso,

²¹ bumpumu ke naandi mu Cingangë i mu Kliistu Yeesu, mu ntaangu syooso i ci mëkulu! Ameenë.