Ebele 2 - N’KANGULU WUMOONË

Luvukulu lunenë

¹ Mu bwaawu, beeso tufwenikini kufyaatë buboti mu manë twakuwu, bwiinji tuleembu kubungënë.

² Ningë saangu yitendulë siyaanzi yabë yi cyelikë i wunë wun'kaambu kuyicinzikë kaambofo kuyivitikë, wutambulë kastikë yinë yin'fwenikini.

³ Oboobo, buni beeso tufwenikini kutiinë kastikë, ningë tusye lengilë moonyi ko mu mpilë luvukulu olwe? Fumu naveekë wulitendulë ntetë i banë bëyuwu Fumu, bëtusisimini maawu.

⁴ Nzaambi wusë ntoonzi cimbaanji cyaawu mu bimaaku bi kwaatë-yekë i bimakë bi mpilë ku mpilë yaandi, yivaandi mu mëkabu mu Ciluunzi ci Saantu kukabulilë mu n'vwiilwaandi.

Wunë wun'natë baatu kuluvukulu

⁵ Licyelikë, yaaku ti kuke siyaanzi kwa Nzaambi kuyekulilë buloongo bun'kwiisë, bunë tulë mu kutubilë.

⁶ Tiilyoko, faamë mu Libuungu wun'viipë wun'tubë : « Muutu nani kukeeli, a Nzaambi, bwiinji wum'balilë? Muutu lu moonyi nani kukeeli, bwiinji wun'zudye?

⁷ Njeeyi wan'vangisi fë mwa ntaangu kukulukë fë ntwaalë siyaanzi, njeeyi wan'zanjikë mu bumpumu i mu ludumu,

⁸ njeeyi watuulë makë mooso kusi maalu maandi. » Ningë Nzaambi wutuulë byakë byooso kusi lutumu lwaandi, lyaawu lin'tubë ti naandi wusye biikë cin'velë ko cin'kaambu kuba ku si lutumu lwaandi. Kosuku, beeso tusë m'monë ko ti byakë byooso bi bubwayi biba kusi lutumu lwaandi.

⁹ Kasi, beeso tulë mu kumonë Yeesu wuyikululë mwa ntaangu fëke siyaanzi i wuzangëmë mu bumpumu i ludumu, mu cibilë ci simpasi si lufwa kumonë. Bwiinji mu muulë Nzaambi, kufwiilë mu cibilë ci mboongu baatu.

¹⁰ Licyelikë, bwabë bufwanëkënë ti Nzaambi wunë wuvaangë i wusimbililë byakë byooso, wuzanjikë Yeesu mu bulyoomi booso mu kuvyokililë mu mëcyeenji-mëndoongë, bwiinji wunatë mpaapë baanë mu kuzingilë mu bumpumu bwaandi. Cibilë Yeesu mati naandi wubënatë kuluvukulu.

¹¹ Kosuku, Yeesu wunë wun'lyoomisi baatu lu moonyi mu mësumu maawu i banë bëlyoomë, beekë bakë booso Taatë mweekë. Mu lyaawu, Yeesu kusë m'monë sonyi ko mu kubëteelë baanë yaandi bë nguli.

¹² Naandi wutubë : « A Nzaambi, yin'tubilë mu njeeyi ke baanë yaami bë nguli, yizolisi kukudumisi fë ntwaalë libuundu lyooso. »

¹³ Wun'tubë yivaandi : « Yin'tuulë lufyaatu lwaami mu Nzaambi. » I vandyooso : « Miinu awu yimunë baanë bo Nzaambi wukum'paanë. »

¹⁴ Abu, baanë aba baatu bë n'sunyi i bë meengë, naveekë Yeesu weekë dedë mweekë baawu, naandi wabë mu n'sunyi bo buke baawu. Mati mu bwaawu, mu lufwa lwaandi, wubyesikë dyaabu, wusiimbë luleendo lu lufwa,

¹⁵ i wuyobulë banë babë mu civikë ci boomë bu lufwa luziingu lwaawu looso.

¹⁶ Licyelikë, naandi wusye kwisilë yaaku ti mu kuzudi siyaanzi, kasi mati mu sindaandu si Abalaamë.

¹⁷ Mati mu bwaawu, naandi wufitë ba mu makë mooso kufwanëkënë yi baanë yaandi bë nguli, bwiinji kuba ngangë-Nzaambi wuwaalë mëboti i wusulëmë mu cisalu ci Nzaambi, mu kobulë mësumu më mboongo baatu.

¹⁸ Buyifanwabu, naandi kupodi kuzudi banë bëke mu luseengu, cibilë naveekë wuvyokilë mu luseengu i mu mpasi.