Ebele 13 - N’KANGULU WUMOONË

Buni bufwenikini kutonzilë Nzaambi

¹ Tatëminaanu mu luzolo benuveekë yi benuveekë dedë mweekë baanë bë nguli.

² Nuzimbëkënyaanu ko mu kusalilë bwalëkisi. Licyelikë mu kulisalilë, bën'viipë bëtambulë siyaanzi yikulizaabë ve.

³ Tebukaanu moonyi mu banë bëke mu buloko, bëke benuviinu lwabë yaawu mu buloko. Tebukaanu moonyi mu banë bën'nyokulu, cibilë benuviinu, luke yivaandi yi nyitu yim'monë simpasi.

⁴ Likweelë lifwenikini kucinzëmë ke bakë booso, banë bëkweelë bëfwenikini kucinzësënë. Nzaambi mba wun'fundisi bangë busafu i banë bën'valaangë.

⁵ Keelaanu lulë ba nyeenzi mboongo. Vwilaanu moonyi kanuku mu binë bike yiinu, cibilë Nzaambi wutubë : « Miinu yisë kubiikë ko, yisë kuvubikë ko. »

⁶ Mati mu bwaawu, beeso tum'podi kusisiminë yi civuufu: « Fumu na wukun'zudi, yisë m'ba yi boomë mu cin'velë ko. Muutu lu moonyi mbici kum'podi kum'paange? »

⁷ Tebukaanu moonyi mëkakëtë miinu, banë bëlutendulilë libuungu li Nzaambi. Tandëkenaanu bunë baawu bëzingilë i bunë bëfwiilë, yukulilaanu ciminu cyaawu.

⁸ Yeesu Kliistu wo wumweekë yoono, bubwayi i bwendi bilimë-bilimë.

⁹ Keelaanu lulëpuutu mu lyosuku liloonji li bweenyi. Liboti beenë mu kuyiciinzi ku kati ku n'timë mu cibilë ci muulë Nzaambi, yaaku mu mikaakë yin'talë bilya. Banë bën'laandaangë mëkomini be moomo, bisë m'bakë ndaandu ko.

¹⁰ singangë-Nzaambi sin'salaangë ku civingë ci saantu ci Sizwiifë bëkeeli ko yi n'swa wukulya binë bën'kwindulë fë civakululu ciitu.

¹¹ N'kuluutu ngangë-Nzaambi wun'nataangë meengë më bibulu mu civingë civyokilili busaantu bwiinji bëyindulë dedë mweekë civakuli mu lobukulu lu mësumu. Kasi bibayi bi bibulu be byoobi bëlëkookaangë byaawu cinaanu yi ngaandë bwaalë.

¹² Mati bwaawu Yeesu yivaandi wufwiilë ku ngaandë livulë, bwiinji kulyomisi mboongo baatu mu meengë maandi.

¹³ Twe yendyaanu ke naandi ku ngaandë bwaalë, yikucikunë lunyaciku lumweekë yi naandi.

¹⁴ Cibilë beeso fë moongo butoto afa, beeso tukeeli ko livulë likalilë. Beeso tun'toombë lin'kwisë ku ntwaalë.

¹⁵ Mu Yeesu, twe lesyaanu ntaangu syakë syooso ke Nzaambi ludumu, dedë mweekë ti civakuli cinë cike likabu lin'fuminë mu bilili bin'dumisi lizinë lyaandi.

¹⁶ Kasi lwe zimbikinyaanu ko mu kuvaangë liboti i mu kuzudisënaanu, cibilë ti bivakuli bi mpilë oyo bya bin'toonzi Nzaambi.

¹⁷ Cinzikangaanu bëkuluutu biinu, bëyuwulwaangaanu. Licyelikë baawu bën'zungululaangë kadë ntaangu mu beeno, cibilë ti baawu bëfwenikini kutubilë mu beeno ke Nzaambi. Vaangaanu buumë bwiinji baawu bësalilë mu liyaanji, yaaku mu tusweenu ko, mooti boobo lusë m'bakë ndobu ko.

¹⁸ Sambilaanu mu beeso. Beeso tuzabisi ti tuke mbalulu yimboti, cibilë beeso tuzolisi kulyatilë mu kadë luvoto.

¹⁹ Miinu yiluloombë mu beeno mu kusambililë Nzaambi bwiinji yilengë vutukënë ke beeno.

N'saambu

²⁰ Nzaambi, cizibë ci n'sikë, wuvulumunë mu nkoongë bëfwa Fumwiitu Yeesu, weekë n'luunji wunenë wu mëmemë mu likanë më buvakuli bu meengë maandi, wun'zicikë n'kangulu wu sakë yi sakë.

²¹ Biikë ti Nzaambi wuluvaanë mëkanë më kuvangilë makë mooso mëboti bwiinji luvaangë n'vwiilwaandi. Wuvaangë mu beeso manë mëkun'toonzi mu Yeesu Kliistu, wunë wufwenikini kudumu tee yi tee, Ameenë!

Siitu i sibweekë

²² Baanë bë nguli, beeno yin'loombë: yuwaano yi mpuungë moonyi mëbuungu më luciinzi. Kosuku, manë yalusonikinë mëkeeli mëkulë beenë ko.

²³ Miinu yiluzabisi ti mwaniitu nguli Timotee wabasikë mu buloko. Mooti naandi bëlengë kwiisë, miinu yikulumoni yimunë naandi.

²⁴ Bilaanu bëkuluutu biinu i bakë booso bëkeeli mboongu Nzaambi. Baanë bë nguli bëke ku Itali balufilë sibweekë syaawu.

²⁵ Biikë ti muulë Nzaambi we bayiinu beeno booso.