Lúkàs 9 - Le Nouveau Testament en langue Vute

Yésù tómndéé nɨ̀fuùb no cóóŋ ɨ́ bɨrɨ́b lè jɨ̀r ə́ré

¹ Yésù ɨ́ ɓáhè nɨ̀fuùb cóóŋ ɨ́ bɨrɨ́b, ŋgə́ ɨ́ nà ŋgáb nyòm ŋgáb ŋgɨ́íkɨ́ nɨ̀wàtɨ̀b, ŋgáb a wáŋhȩ̀ nɨ̀yábì.

² Ɗà ŋgə́ ɨ́ tôm ŋgáb tàtèènɨ kìn du ɓe ɨ́r Ŋgɔ̧́ɔ̧̀ Mèèín, ŋgáb a wáàŋcê nɨ̀yáàb.

³ Ŋgə́ ɨ́ tànà ŋgáb ɨnè: «Nyí nɨ́m kù ŋgáré ágèwá, dùgɨ̀ túb, dùgɨ̀ càká, dùgɨ̀ cɔŋ, dùgɨ̀ mòné, dùgɨ̀ júk.

⁴ Yɨ́ lâs nyí ɓa féínniì, dúú kùb gamndé nyí noò, dùná yó ku há̧á̧ hȩ nyí ɓa ndóŋnɨ tíí.

⁵ Yɨ́ lâs kùb ɓa mvúnɨ nyí gàmnɨ rɨ, éíkɨ́náam kwɨ́í kɨ́ no, nyí a lámkɨ́sò mvútúúb nyínè gureè túùmnànɨ ŋgáb ɨnayâna ŋgáb ndɨŋtɨ́ ɓáŋhîn, ŋgáb gə́tìi.»

⁶ Nɨ̀fuùb ɨ́ ə́llê. Ŋgáb ɨ́ yà gɨ̀tèènɨ kwɨ́ì lâs no. Ŋgáb ɨ́ yà tàtèènɨ Kìn Nyɔ̧ɔ̧́, ŋgáb a wáaŋteece nɨ̀yáàb yɨ́ lâs.

Hèrôdə̀ á mánɨ ɗə̀ə̀ŋnɨ na á du Yésù

⁷ Mvókín kɨ́ no ɓwê, Hèrôdə̀ nò yi du mvèìn jírií ɨ́ ô kùb átɨ̀nɨ nɨ́ɨ́b yi du ndóŋniì. Kɨ̀cáàb ɨ́ yɔ̂ ŋgə́ ɓetí nɨ̀vɨ́tɨ̀b yaá tànɨ: «Jâŋ nò kɔhɨ kùb kɔ ə́mní ɨ́ səəmcuhó̧ mvókín nɨ̀kwíbí ru.»

⁸ Nùb kù ɨ́ tà: «Èlî ɨ́ cuwo nɨ́ ru.» Nùb kù ɨ́ tàcê: «Tɨ́kìn Mèèín kù tɨŋtɨ̀ŋ kɨ́b ya tíí noò ɨ́ səəmcu nɨ́ ru.»

⁹ Ɨ́dù Hèrôdə̀ ɨ́ yà tànɨ no sumí ɨnè: «Mɨ nɨ̀mɨr ya móobɓa kùb téínkɨ́ Jâŋ ŋgwé ru, nò mɨ dukwacɨ mɨ́ óknɨ wúúm noò rè ma cè nɨ́ na?» Ŋgə́ ɨ́ yà mánɨ pénɨ Yésù.

Yésù líhií nɨ̀ŋgwáàb tɔ́sìn ŋgiì

¹⁰ Nɨ̀fuùb ɨ́ cùwò. Ŋgáb ɨ́ átɨ̀nà Yésù nɨ́ɨ́b ŋgáb tɨ ndɨŋndé lâs. Ŋgə́ ɨ́ ɓéhô̧ ŋgáb gə́nȩ̀ȩ́, ɓe ŋgáb ɨ́ gì yɨ́ nɨ̀vɨ́tɨ̀b yi du ɗàwáá, gín kwɨ́í kù ɨ́r du Bètsáyídà.

¹¹ Ɨ́dù nɨ̀vɨ́tɨ̀b ɨ́ ɗə̀ŋhȩ̀ bɨ́ àm kɨ́, á ŋgáb tuge bɨ́ ŋgə́. Yésù ɨ́ gàm ŋgáb, ŋgə́ ɨ́ nyìnnà ŋgáb àm Ŋgɔ̧́ɔ̧̀ Mèèín. Ŋgə́ ɨ́ wáàŋcê nùb yi du yábniì.

¹² Hȩ mvii yi ducɨ nɨ́ gi̧né, nɨ̀fuùb cóóŋ ɨ́ bɨrɨ́b lè ɨ́ ŋgɨ̀ɨ̀sò gín Yésùù, ŋgáb ɨ́ tànà ŋgə́ ɨnè: «Mbɨ́k wu nùb lè gɨ̀cù bɨ kwɨ́ì ɓe mwaai dutee hò̧ kə́sə́ə́ no, mánɨ yɨ́ gúnnè ɓe nɨ́m ŋgáb taŋndé. Ɓetí nɨ́m du nɨ hò̧ tɨfuru̧ú̧ á.»

¹³ Ɨ́dù Yésù ɨ́ tànà ŋgáb ɨnè: «Nyí nɨ̀miib, nanáam ŋgáb nɨ́m cɔɔ̀ŋ!» Á ŋgáb tacu ɨnè: «Nɨ́m á ɗóò ɓe bɨ̀rê ŋgiì ɓe həré bɨrɨ́b. Kèè wu ɗúú nɨ́m gɨ̀ gwɨ̀ìwònɨ cɔŋ ɓe ɨ́r vùùm nùb lèè lâs á à?»

¹⁴ (Nɨ̀ŋgwáàb yi du ɓèé yaá sàmàìn ndɨŋ tɔ́sìn ŋgiì.) Yésù ɨ́ tà ŋgáb ndɨ̀ŋ nɨ̀vɨ́tɨ̀b dùtèèré ɗàá mɨ̀kù̧ú̧ mɨ̀kù̧ú̧. Mɨ̀kù̧ú̧ mwi̧ nɨ̀vɨ́tɨ̀b sàmàìn vii bɨrɨ́b ɨ́ cóóŋ.

¹⁵ Ŋgáb ɨ́ jə̀ŋ nyindí kɨ́; á ŋgáb ndɨŋ nùb lâs dùré ɗàá.

¹⁶ Kí á Yésù ágɨ bɨ̀rê ŋgiì ɓe həré bɨrɨ́b lè, ŋgə́ ɨ́ ŋgèèwî íí còóm, ŋgə́ ɨ́ sáktè Mèín. Ŋgə́ ɨ́ kùùmè, á ŋgə́ na nɨ̀fuùb noò gɔ̀knà nɨ̀vɨ́tɨ̀b.

¹⁷ Nùb lâs ɨ́ tàŋ, ŋgáb ɨ́ fùb. Kùb ɨ́ ɓáhè kumsiì ya meré há̧á̧ lɨ̀ŋtɨ̧̀ cóóŋ ɨ́ bɨrɨ́b.

Píyéèr wáaɓatɨ́ Yésù nɨ Mèsî á

¹⁸ Ye kù Yésù yaá mɨ̀yú̧ú̧ ŋgə́ mwi̧, nɨ̀fuùb noò ɨ́ gàìnsò ŋgə́. Ŋgə́ ɨ́ fɔ̂ ŋgáb ɨnè: «Kɨ́ nɨ̀vɨ́tɨ̀bì, ŋgáb á tàcénɨ mɨ macè na?»

¹⁹ Ŋgáb ɨ́ pììnà ŋgə́ ɨnè: «Nùb kù á tànɨ wu Jâŋ nò kɔhɨ kùb kɔ ə́mní á, kɨ́ nùb kù wu Èlî á, nùb kù cè, tɨ́kìn Mèèín tɨŋtɨ̀ŋ kɨ́b ya tíí noò ɨ́ səəmcuhó̧ nɨ́ ru.»

²⁰ Yésù ɨ́ fɔ́kwà ŋgáb ɨnè: «Kɨ́ nyínè nyí ma lə́əmce mɨ macè na?» Píyéèr ɨ́ pìhè ɨnè: «Wu Mèsî á, nò Mèín ya wúrɨna gbám mvènnì.»

Yésù takɨ́yayeé àm cwá ní ɓa kúnɨ, Mèín a tì sə̀ə̀mcùhô̧ níì

²¹ Yésù ɨ́ tà kpáb! Ŋgáb nò kù àm kɨ́ tànàwá.

²² Ŋgə́ ɨ́ tàkwà ɨnè: «Á ɗúnɨ Mwin Nɨ̀rì pə́ jábɨ́r cei. Kɨ̀jííb ɓe mvènnɨ́b nùb na satɨgàà ɨ́ nɨ̀gááŋ káàtàbì ɓa ŋgə́ mvúnɨ á, kùb a kwíhè ŋgə́. Cùr jíì taarɨ́bí, Mèín a tì sə̀ə̀mcùhô̧ ŋgə́.»

²³ Á ŋgə́ tana nùb lâs ɨnè: «Nò kù ɨ́ ɗû mɨ tùnɨ, ŋgə́ mvúyàyè síí ŋgə́ nɨ̀mɨrí, ŋgə́ a â bàŋ noò, ŋgə́ a tùwò mɨ.

²⁴ Ɓetí nò ɗú ɓátɨ̀nɨ mè noò, ɓa mə̀mnɨ mè no kɨ́ á, ɨ́dù nò məm mè noò ɓe ɨ́r moò ɓa cénnɨ mè no kɨ́ á.

²⁵ Nɨ̀vɨ́tè ɨ́ kɨ̂ nɨ́ɨ́b ɗɔ̀ɔ́b lè noò lâs ɗà ŋgə́ ɨ́ mə̀m mè noò, ŋgə́ ɨ́ lɔ̧̂, ní ɨ́ kpɔ́khó̧ce ŋgə́ no?

²⁶ Nò kù ɨ́ ô sə̀ré ɓe mɨ, ɓe nyindí móò ɓwê, ɓwâ Mwin Nɨ̀rì ɓa cùwònɨ nyòm noò duɓwéece nyòm Tá ɓe dùgallɨbi noò, ŋgə́ ɓa ókɓwênɨ sə̀ré ɓe nò kɨ́ á.

²⁷ Mɨ tanaɓa nyí àmɨɨr wááŋ á: nùb kù tɨŋtɨ̀ŋ nùb lè noò ɓaye bɨ dùnɨ jáŋ ɓwâ Mèín ɓa ŋgáŋnɨ nɨ́ɨ́b lâs yaà á.»

Ɓɨ̀m Yésùù cə́ndɨtɨ́

²⁸ Sàmàìn jíì sə́r cùr Yésù yi nyin nyindí kíì, ŋgə́ ɨ́ ɓégè Píyéèr, Jâŋ ɓe Jâk. Ŋgáb ɨ́ gì ɓe kù ya Mèín yóŋnɨ.

²⁹ Ɓwâ Yésù yi du Mèín yóŋniì, ɓɨ̀m noò ɨ́ cə́ndè, júk nó sóò ɨ́ vùùɓà tóóm.

³⁰ Tií na, nɨ̀ŋgwáàb bɨrɨ́b kù ɨ́ sə̀mcɨ̀ bɨ́ ɓè sà̧nì ɓe Yésù. Yɨɨ́m Mòyîs ɓe Èlî á

³¹ yi mwȩ́ȩhó̧ bɨ́ ɓè ɓe mwa kàm ɓɨllɨnne ru. Ɓe Yésù bɨ yaá nyɨ̀nnɨ ɓe ɨ́r cwá ŋgə́ yi ɓa kúnɨ Yèrúsàlèm, yúùnɨ nɨ́m ŋgə́ yi go ndɨ̀ŋniì rè.

³² Píyéèr ɓe ɓwàjììb noò yaá bɨ́ wumí ɗákɗák; ɨ́dù ŋgáb ɨ́ sə̀mnè, ŋgáb ɨ́ pê mwa Yésùù ɓe nɨ̀ŋgwáàb bɨrɨ́b yi ə́əŋkom ɓe ŋgə́ rè.

³³ Ɓwâ nɨ̀ŋgwáàb lè yi du éímbɨ́kkɨ́sònɨ Yésùù, á Píyéèr tana ŋgə́: «Tá, á mîn nɨ́m dùná nɨ hò̧. Nɨ́m á óŋnɨ njáŋnɨ̀b taarɨ́b, kɨ́ woò mwi̧, kɨ́ Mòyíìs mwi̧, kɨ́ Èlíì cè mwi̧.» (Píyéèr ya nɨ́ ɗə̀ə̀ŋwá nɨ́m ŋgə́ yi du nyìnnɨ kɨ́.)

³⁴ Ŋgə́ á cè nyìnkɨ́nɨ u̧, á ɓàk kù ya go ŋgáb ɗèìnkɨ́nɨ. Vùù ɨ́ bɨ̀ɓà nɨ̀fuùb hȩ ŋgáb yi pə́ ɓàk kɨ́ ŋgáb fúùniì.

³⁵ Ɓàk kɨ́ no, kúu nyindíí kù ɨ́ tàhô̧ ɨnè: «Nò rè mwin móò mɨ caré á, jəŋnáam ŋgə́!»

³⁶ Cùr kúu kíì, kùb ɨ́ pə́ɗóòhácì bɨ́ Yésù mwi̧. Nɨ̀fuùb ɨ́ dù bɨ́ néín. Jíìb kɨ́ no, ŋgáb ɨ́ dùcè bɨ́ nò kù nɨ́m ŋgáb tɨ pə́ kɨ́ átɨ̀nàwá.

Yésù jukɨ́naá mwɨi kù nyéhè ɓáŋhîn só

³⁷ Kpíí kɨ́ no, Yésù ɓe nɨ̀fuùb taarɨ́b lè yaá sócùnɨ ɓeè. Kùŋkùŋ kàm nɨ̀vɨ́tɨ̀bì ɨ́ gàìnwò Yésù.

³⁸ Mɨ̀kwìn kɨ́ no, nɨ̀ŋgwá kù ɨ́ yà kɨ́ŋhó̧nɨ ɨnè: «Yée Tá tɔ̀hí! Góomwúum mwin móò íí ya, kpòk muní moò á kí.

³⁹ Nyéhè kù á ŋgə́ bìnɨ. Ɓè mu̧u̧, a nà ŋgə́ kɨ́ɨ́ŋ; ŋgə́ á ŋgə́ mgbɨ́ktɨ̀ɓànɨ, káfə́ré a yà ŋgə́ tóŋhó̧nɨ ɓɔ̧ɔ̧. Nyéhè kɨ́ á ŋgə́ ndɨ̀ŋɓànɨ ɓáŋhîn, ŋgə́ a tì éíkɨ́ɓàcì nɨ́ ŋgéé só tìírii.

⁴⁰ Mɨ tɨ yóŋtɨ́ nɨ̀fuùb woò jùkɨ́ nyéhè kɨ́, ɨ́dù, ɨ́ yɔ̂ nɨ́ ŋgáb.»

⁴¹ Yésù ɨ́ tà: «Kə́í! Ína nyí nùb ɓáŋhɨ́b ə́ə́m sumí ɗàwá rè, há̧á̧ ɓwâ ŋge á mɨ ɓa dùkwànɨ ɓe nyí? Mɨ ɓa nyí jíìkwànɨ há̧á̧ ɓwâ ŋge? Gewona mɨ mwin wó kɨ́ hò̧.»

⁴² Hȩ mutí yi du gòniì, nyéhè rè ɨ́ lòmsê ŋgə́ ɗàá, ŋgə́ ɨ́ mgbɨ́ktɨ̀ɓà ŋgə́ ɓe nyòme. Ɨ́dù Yésù ɨ́ pámɓà nyéhè rè, ŋgə́ ɨ́ wáàŋkî mutí. Ŋgə́ ɨ́ mbɨ́kcùnà ŋgə́ tá noò.

⁴³ Nɨ̀vɨ́tɨ̀b lâs ɨ́ gbɨ̀ɨ̀ŋɓà, ŋgáb ɨ́ tà: «Kə́í! Mèín á jíri.» Nùb lâs á cè gbɨ̀ɨ̀ŋháyènɨ ɓe nɨ́ɨ́b Yésù yi ndɨŋndé, á ŋgə́ tana nɨ̀fuùb noò ɨnè:

Kɨ́ gwì bɨrɨ́bí, Yésù á tànɨ àm cwá ní ɓa kúniì

⁴⁴ «Óknáɓam nɨ́m mɨ du nyí tànànɨ rè mîn. Kùb ɓa nàrénɨ Mwin Nɨ̀rì nɨ̀vɨ́tɨ̀bì ŋgáré á.»

⁴⁵ Ɨ́dù nɨ̀fuùb ɨ́ dù bɨ́ ókwa nyindí kɨ́. Kùb ya yoonatɨ́ bɨ́ ŋgáb njàb nyindí kíì, àm ŋgáb tɨ̀ óklé. Vùù yaácè nɨ́ ŋgáb bìnɨ fɔ́nɨ Yésù njàb nyindí kíì.

Na ma ɨ́ duce jíri?

⁴⁶ Nɨ̀fuùb ɨ́ yà ndáŋnɨ ŋgábè sumí, mánɨ ɗə̀ə̀ŋnɨ nò du jíri mvókín ŋgábè noò.

⁴⁷ Yésù ɨ́ ɗə̀ŋhȩ̀ nɨ́ nɨ́m ŋgáb yi lə́əmkomndé, á ŋgə́ ɗamwo mutí kù gò ə́ə̀ŋnɨ gín nóò.

⁴⁸ Ŋgə́ ɨ́ tànà ŋgáb: «Nò gamɓa mwɨi ti rè ɓe ɨ́r moò rɨ, gamɓa mɨ nɨ̀mɨr á. Nò gamce mé, gam nò tómwo mé á, ɓetí mvókín nyínè no, nò gesé síí nóò ɗàá rɨ, nò kɨ́ ɨ́ duɓagɨ nò jíri ru.»

Nò du nɨ́ ɓi̧í̧ ɓe nyí ɗàwáá du nɨ nò nyínè á

⁴⁹ Jâŋ ɨ́ gàm nyindí, ŋgə́ ɨ́ tànà Yésù: «Tá, nɨ́m tɨ péé nɨ̀ŋgwá kù ŋgɨ́nnɨ nɨ̀wàtɨ̀b ɓe ɓêé ɨ́r woò, nɨ́m ɨ́ ɗû ŋgə́ kààŋnɨ, ɓetí ŋgə́ nɨ nò nɨ́mè kpánéné sé.»

⁵⁰ Ɨ́dù Yésù ɨ́ tàcùnà ŋgə́ ɨnè: «Nyí nɨ ŋgə́ kàŋhɨ̀r, ɓetí nò du nɨ́ ɓi̧í̧ ɓe nyí ɗàwáá du nɨ nò nyínè á.»

Nùb kwɨ́í kù noò, ɗɔ̀ɔ́b Sàmàríì no mvúú gàmnɨ Yésù

⁵¹ Ɓwâ jíìb kùb yi ɓa áwúkɨ́nɨ Yésù ɓɨllɨnne yi ɗóoré, ŋgə́ ɨ́ sàb gìnɨ Yèrúsàlèm.

⁵² Ŋgə́ ɨ́ tómsòkɨ́yàyè tɨ́pénɨ̀b tíí. Nùb kɨ́ ɨ́ gì, ŋgáb ɨ́ gì féínnɨ kwɨ́í kù no, ɗɔ̀ɔ́b Sàmàríì no, nyààŋkɨ́nànɨ ŋgə́ gúúr.

⁵³ Nùb kwɨ́í kɨ́ noò ɨ́ mvû ŋgə́ gàmnɨ, àm ŋgə́ yi ɓa nɨ́ ndóŋnɨ ndó̧o̧ gìnɨ Yèrúsàlèm ndè.

⁵⁴ Ɓwâ Jâk ɓe Jâŋ nɨ̀fuùb Yésùù, yi pə́ u̧nèé, ŋgáb ɨ́ tà: «Kéké, á sàmàìn nɨ́m ɓésówo wa ɓɨllin gò nùb lè yíìndùùkɨ́niì yoo?»

⁵⁵ Ɨ́dù Yésù ɨ́ ɓàndɨ̀cùrê ŋgáb no, ŋgə́ ɨ́ yètè ŋgáb àm ŋgáb ya nyin u̧ kɨ́.

⁵⁶ Ŋgáb ɨ́ ə́llê bɨ́ gɨ̀ndóŋnɨ kwɨ́í kù no.

Nùb ɗú tùnɨ Yésùù

⁵⁷ Ŋgáb yaá gùrí jȩ̀ȩ̀, á nɨ̀ŋgwá kù tana Yésù ɨnè: «Mɨ á wu tùnɨ yɨ́ lâs wu ɓa gìniì.»

⁵⁸ Á Yésù tacuna ŋgə́: «Gáŋgbòróóŋ á ɓe ŋgwɨi ŋgábè, gààì á cè ɓe óŋnɨ́b ŋgábè, ɨ́dù Mwin Nɨ̀rì nɨ ɓàcéyè ɓe yɨ́ juu cɨ́mîn ɗàà.»

⁵⁹ Ŋgə́ ɨ́ tànàkwà nɨ̀ŋgwá kù: «Tuwom mɨ.» Á nɨ̀ŋgwá kɨ́ tana ŋgə́: «Tá, mbɨ́k mɨ gɨ̀yè vɨ́rɨ̀nɨ tá moò.»

⁶⁰ Á Yésù tacuna ŋgə́ ɨnè: «Tùwòbɨ̂ŋ wu mɨ, kɨ́ ɗàrɨ́ nɨ ə́r wóò sé. Kɨ́ woò, gɨ wu tàsénɨ kìn du ɓe ɨ́r Ŋgɔ̧́ɔ̧̀ Mèèín.»

⁶¹ Nò kù ɨ́ tànàkwà ŋgə́: «Tá, mɨ ɓa wu tùnɨ á, ɨ́dù mbɨ́kye mɨ gɨ̀ nyìndɨ̀kɨ́sònɨ gbàŋ moò.»

⁶² Yésù ɨ́ wáànà ŋgə́ ɨnè: «Nò yaré ɗȩ̀ȩ́ ɨ́ góòmcù íí cùrìì, nɨ nò ə́ré Ŋgɔ̧́ɔ̧̀ Mèèín noò sé.»