Lúkàs 7 - Le Nouveau Testament en langue Vute

Yésù wáŋnií nò ə́ré mvèìn sójàbì Róòm ku

¹ Ɓwâ Yésù yi nyincáaŋna nɨ̀vɨ́tɨ̀b nɨ́ɨ́b kíì, ŋgə́ ɨ́ gì Kàpèrnàwûm.

² Kàpèrnàwûm ku, mvèìn sójàbì kù yaá ɓe nò ə́ré noò ŋgə́ ya ɗúkomɓa ceí. Nò no ə́ré kɨ́ yaá yábɓànɨ, kùb ya góomkɨ́cɨ bɨ fìí á.

³ Ɓwâ mvèìn sójàbì rè ya ók kùb nyìnnɨ àm Yésùù, ŋgə́ ɨ́ tómsò kɨ̀jííb Jwîf bɨ kù tànànɨ Yésù, yée ŋgə́ gò ní ɓátɨ̀nànɨ nò ə́ré níì yáá.

⁴ Hȩ ŋgáb féín kwe, ŋgáb ɨ́ yóŋhâ Yésù ŋgáb a tace ɨnè: «Tɨ ɗú wu ndɨ̀ŋnàhá ŋgə́ nɨ́m kɨ́ á.

⁵ Ŋgə́ á ɗúɓànɨ gbàŋ nɨ́mè cei, ŋgə́ ɨ́ ndɨŋ kùb óŋ dúú mɨ̀yú̧ú̧ nɨ́mè ru.»

⁶ Kí á ŋgə́ ɓe ŋgáb ya ə́llé gùr. Ɓwâ ŋgáb ya ŋgóobso ɓe dúhéé, á mvèìn sójàbì rè ya tómso ɓwàjììb noò tànànɨ Yésù ɨnè: «Tá, wu wu síí jábɨ̀r, mɨ mɨ ɗóhîn ɓe nò wu lə́ yóò ɗàà.

⁷ Àm kɨ́ á mɨ tɨ ta mɨ́ nɨ ɗúwa mɨ nɨ̀mɨr mɨ gàìnsò wu ru, ɨ́dù nyinɗóhɨm nyindí mwi̧ ɗà nò mo ə́ré a ɓáì.

⁸ Mɨ nɨ̀mɨr, nùb kɨ́k mé á ku, mɨ á ndóŋcé ɓe nùb mɨ kɨ́klé. Mɨ ɨ́ tànà nɨ̀mwi̧: ‹Gɨm!› ŋgə́ a gì, mɨ ɨ́ tànàcè nò kù: ‹Gom!› ŋgə́ a gò. Mɨ ɨ́ tànà nò mo ə́ré: ‹Ndɨŋ nɨ́m ndè!› ŋgə́ a ndɨ̀ŋ.»

⁹ Ɓwâ Yésù ya ók nyindí kíì, ŋgə́ ɨ́ kúùmɓà mvèìn sójàbì rè, ŋgə́ ɨ́ ɓàndɨ̀cùrê kùŋkùŋ nɨ̀vɨ́tɨ̀bì ya tuwokom ŋgéé no, ŋgə́ ɨ́ tà: «Mɨ tanaɓa nyí wááŋ á, mɨ ə́ə́m kàm ndè pə́kɨ́yèwá, dùgɨ̀ ti Ísràyéèl no.»

¹⁰ Nùb kùb ya tómwo rè ɨ́ gɨ̀cù mvèìn sójàbì yó. Ŋgáb ɨ́ kwà na nò ŋgéé ə́ré tɨ hwè wáaŋtɨ́ nɨ́.

Yésù səəmcutɨ́ mwin mámkwííb kwè

¹¹ Cùr kɨ́ no, Yésù ɨ́ gì kwɨ́í kùb du ɓénɨ Nàyə̂ŋ ndɨ no. Nɨ̀fuùb noò ɓe kùŋkùŋ nɨ̀vɨ́tɨ̀bì yaá ɓe ŋgə́ kpáné.

¹² Ŋgáb ɨ́ féínɗóòrésò ŋgwé kúrì ɓwâ kùb yi du gènɨ fín kù vɨ́rɨ̀niì. Yaám kpòk muní mámkwííb kwè á. Nɨ̀vɨ́tɨ̀b ví̧i̧ yaá ɓe ŋgə́ háànɨ fín nyàbȩ́ȩ́.

¹³ Ɓwâ Kéké yi pə́ nɨ̀gwi rèè, mwàm ɨ́ bɨ̀ɓà ŋgə́ cei. Kí á ŋgə́ ta ɨnè: «Ɓáín sum!»

¹⁴ Ɗà ŋgə́ ɨ́ ŋgɨ̀ɨ̀sò, ŋgə́ ɨ́ dì̧nè kò fɨ́nní, á nùb ha̧ní ə́ŋhȩ, Yésù ɨ́ tà: «Éíwúum còóm, wàánjí ti móò. Mɨ ɨ́ ta ru!»

¹⁵ Wàánjí rè ɨ́ éícùwû còóm dùnɨ, ŋgə́ ɨ́ yàcùrê ɓɔ̧ wèìnɨ. Á Yésù mbɨ́kcuna ŋgə́ yà nóò.

¹⁶ Vùù ɨ́ bɨ̀ɓà nùb lâs. Ŋgáb ɨ́ yà mgbíìnɨ Mèín, ŋgáb a tace ɨnè: «Tɨ́kìn Mèèín jíri féíntɨ́ mvókín nɨ́mè no! Mèín pə́wútɨ́ gbàŋ noò íí ya!»

¹⁷ Nɨ́m Yésù ya ndɨŋ kɨ́ ɨ́ èrè ti Jùdéè bɨ̂ŋ ɓe kwɨ́ì duteewo gə́nȩ̀né lâs no.

Jâŋ tómsoó nɨ̀fuùb noò yɨ́ Yésùù

¹⁸ Nɨ̀fuùb Jáàŋ ɨ́ átɨ̀nà tá tɔ̀hí ɓoò nɨ́ɨ́b tɨ ndóŋndé lâs. Jâŋ ɨ́ ɓéhô̧ nùb bɨrɨ́b mvókín ŋgábè no.

¹⁹ Ŋgə́ ɨ́ tómsò nùb kɨ́ yɨ́ Kékéé, fɔ́nɨ ŋgə́ kóo ŋgə́ ɨ́ du nò vúm ɗəŋhȩ yi du gònɨ rɨ kèè vúm móŋndóŋ nò ji yàà.

²⁰ Ɓwâ ŋgáb yi féín yɨ́ Yésùù, ŋgáb ɨ́ tànà ŋgə́ ɨnè: «Jâŋ nò kɔhɨ kùb kɔ ə́mní tómwotɨ́ nɨ́m, nɨ́m gò wu fɔ́nɨ ɨnè: ‹Wu ɨ́ du nò nɨ́m ɗəŋhȩ yi du gònɨ rɨ kèè nɨ́m móŋndóŋ nò ji?› »

²¹ Mvókín kɨ́ no cè Yésù ɨ́ wáŋhȩ̀ nɨ̀yáàb ví̧i̧. Nùb nyéhɨ̀b ɓáŋhɨ́b yi jáabkomndé, ŋgə́ ɨ́ wáŋhȩ̀ ŋgáb. Ŋgə́ ɨ́ kùùmcùnà ɓùɓú̧ù̧b íí.

²² Á ŋgə́ tacuna nùb Jâŋ yi tómwo kɨ́ ɨnè: «Gɨnáam tànànɨ Jâŋ nɨ́m nyí pə́ré ɓe kɨ́ nyí óklé: ɓùɓú̧ù̧b á pə́cùnɨ, kɨ̀ɓóòb á gɨ̀cùnɨ gùr, njɨ̀njə́ə̀b lâs, njɨ̀ɨ̀b ɓoò sɨttɨ́. Mgbòŋtóob á ókcùnɨ, nɨ̀kwííb á sə̀ə̀mcùnɨ, nùb tiri á cè óknɨ Kìn Nyɔ̧ɔ̧́.

²³ Mɨ̀tù ɓa dùnɨ ɓe nò ə́ə́m nóò du nɨ́ gùwá ɓe ɨ́r moò rɨ á!»

Yésù á nyìnnànɨ nɨ̀vɨ́tɨ̀b àm Jáàŋ

²⁴ Ɓwâ nùb Jâŋ ya tómwo rè yi gɨcuré, á Yésù yi yaré nyìnnànɨ nɨ̀vɨ́tɨ̀b àm Jáàŋ sóò, ŋgə́ a tace ɨnè: «Ní á nyí yi gɨ pénɨ ŋgwàì ndɨ̀ŋnì? Nyí yi gɨ pénɨ kɨ̀càì cɨ́cɔ̧̂ du jɨ̀ɨ̀niì á à? Ɗàwá!

²⁵ Nyí ma yi gɨce nɨ́ pénɨ ní? Nyí yi gɨ pénɨ nò du ɓe júk nyɔ̧ɔ̧́ ceí á à? Ɨ́dù nùb du lénɨ júúb dɨmɨri duce bɨ́ dùnɨ ju njɔdìì á bɨ mvènnɨ́b jííbí hamnin.

²⁶ Nyí ma yi gɨce nɨ́ pénɨ ní? Nyí yi gɨ pénɨ tɨ́kìn Mèèín kèè. I̧i̧, mɨ tànàɓà nyí, ŋgə́ ndóŋɓacéyetɨ́ nɨ́ tɨ́kìn Mèèín.

²⁷ Ɓetí ɓe ɨ́r Jáàŋ á káàtà Mèèín du wáànɨ ɨnè: ‹Mèín taá: Péye, mɨ tómsotɨ́ tɨ́kìn moò wo tíí, ŋgə́ gɨ̀ wu njánnànɨ jɨ̀r.› »

²⁸ Yésù ɨ́ tà: «Mɨ tanaɓa nyí àmɨɨr wááŋ á, mvókín nɨ̀vɨ́tɨ̀bì, nò jíri kù ɗóhe ɓe Jáàŋ ɗɔ̀ɔ́b lè no sə̀myèwá. Ɨ́dù nɨ́m mwi̧, nò ti mɨ̀ténè Haam Mèèín noò ndóŋtɨ́ ŋgə́.

²⁹ Nɨ̀vɨ́tɨ̀b lâs ɓe nùb ɓáhɨ làmpóò ɨ́ yà ŋgə́ óknɨ. Ŋgáb ya ɗəəŋcuɓatɨ́ ɨnayâna Mèín nò ɗɨ́ɗɨ̧́ á, á ŋgáb ə́mne Jâŋ kɔ̀ɔ̀ vúm kɔ ə́mní.

³⁰ Ɨ́dù Fàrísààb ɓe nɨ̀gááŋ káàtàbì ya mvúú nɨ́m Mèín ya ɗú ŋgáb ndɨ̀ŋnàniì, á ŋgáb ya nyahȩ Jâŋ kɔ̀ɔ̀ vúm.»

³¹ Yésù ɨ́ tàkwà: «Mɨ áɓàyè nùb jíìb mwánnè hȩ na bɨ, na bɨ á ŋgáb duɓaye fɨ́tɨ̀nɨ?

³² Ŋgáb á hȩ mucutɨ́b du du̧ú̧ laŋtaŋ kù no, nùb kù a yà kɨ́ɨ̀ŋsònànɨ kùb ɓoò ɨnè rɨ: ‹Nɨ́m kunnatɨ́ nyí jíín, nyí ɨ́ mvû wànnɨ! Nɨ́m soŋnatɨ́ nyí bɨ̀ìmèrè, nyí ɨ́ mvû gàmnɨ!›

³³ Ɓetí Jâŋ nò kɔhɨ nɨ̀vɨ́tɨ̀bì ya goó ɗɔ̀bín: ŋgə́ bɨ̀rê tàŋ, ŋgə́ súm mə̀r, nyí ɨ́ tà: ‹ŋgə́ á ɓe nɨ̀wàtɨ̀b só!›

³⁴ Mwin Nɨ̀rì ɨ́ gò. Ŋgə́ ɨ́ tàŋ nɨ́ bɨ̀rê ŋgə́ ɨ́ mèì nɨ́ súm, nyí ɨ́ tà: ‹Pə́náhá mvə̀cɔɔ̀ŋ ndè, ɓe mbirú rè. Ɓwàjìrí nùb ɓáhe làmpóò ɓe nùb ɓáŋhɨ́bí!›

³⁵ Ɨ́dù nùb ə́mne kɨ̀cáàb Mèèín ɨ́ du bɨ́ ɗə̀ə̀ŋnɨ kɨ̀cáàb kɨ́ á ɗɨ́ɗɨ̧́ ru.»

Yésù á Fàrísà kù ɨ́r yi du Sìmóòŋ yó

³⁶ Fàrísà kù ya ɓée? Yésù cɔŋ. Yésù ɨ́ gì nɨ̀ŋgwá kíì yó, ŋgə́ ɨ́ yàrê cɔŋ.

³⁷ Nɨ̀gwi sàkèè kù yaá ɓwê kwé ku. Hȩ ŋgə́ ya ók Yésù á cɔɔ̀ŋ Fàrísà rè yó na rè, ŋgə́ ɨ́ ágè njɨ́b kùb nyaŋhȩ ɓe sɨɨ kùb ɓé «àlbâtɨ̀rè», làmɨ́ndà no ɗéé.

³⁸ Yésù yaá du̧ú̧ yɨ́ cɔɔ̀ŋ. Nɨ̀gwi rè ɨ́ gò gín Yésùù, ŋgə́ ɨ́ yà kɨ́ínɨ ɨ́sɨ̀m a ɗiséce Yésùù gure. Ŋgə́ ɨ́ pə̀kkî ɓe mvɨ̀tí nó ŋgwéné, ŋgə́ ɨ́ bì Yésù gurub, á ŋgə́ miiwú làmɨ́ndà ya.

³⁹ Ɓwâ Fàrísà yi ɓéna Yésù cɔŋ ndè yi pə́ nɨ́m kíì, ŋgə́ ɨ́ yà lə́ə̀mndéɓànɨ no sumí ɨnè: «Nɨ̀ŋgwá rè tɨ dùmèɓàyè tɨ́kìn Mèèín naa, nɨ̀gwi sàkèè di̧nɨ ŋgə́ rè, ŋgə́ yè ɗəəŋtɨ́ na á ŋgə́ du, i̧ á ŋgə́ duce.»

⁴⁰ Yésù ɨ́ tànà Fàrísà ɨnè: «Sìmôŋ, mɨ á ɓe nɨ́m kù mɨ ɗú wu nyìnnàniì.» Á Sìmôŋ ta: «Nyinwom tá.»

⁴¹ Yésù ɨ́ tà: «Nɨ̀ŋgwá kù yaá tùnɨ nɨ̀vɨ́tɨ̀b bɨrɨ́b mòné, nò kù sure mònéè təmərì ŋgiì, nò kù cè vii bɨrɨ́b ɨ́ cóóŋ.

⁴² Hȩ ŋgáb yi du sàmàìn gomna ŋgə́ nyamandì kɨ́ ɗàwáá, ŋgə́ ɨ́ mbɨ́kbɨ̂ŋnà ŋgáb mwèìn kɨ́. Mvókín ŋgə́ ɓe kùŋ bɨrɨ́bí, na ɨ́ ɓa ŋgə́ ɗúnɨ cei?»

⁴³ Sìmôŋ ɨ́ pììnà ŋgə́ ɨnè: «Mɨ lə́mne nò tɨ du ɓe mwèìn ŋgéé só ví̧i̧ rɨ á.» Á Yésù tana ŋgə́: «Àm woò á àmɨrì.»

⁴⁴ Kí á Yésù ɓandɨré nɨ̀gwi rè íí no, ŋgə́ ɨ́ tànà Sìmôŋ ɨnè: «Wu pə́haá nɨ̀gwi rè ye! Mɨ ló wo yó hò̧, wu mɨ mvúm natɨ gurubì nàwá. Ɨ́dù kɨ́ noò, ŋgə́ natɨnaá mɨ gurub ɓe ɨ́sɨ̀m noò, ɗà ŋgə́ ɨ́ pə̀kkî ɓe mvɨ̀tí no ŋgwéné.

⁴⁵ Ɓwâ mɨ féínndé, wu tɨ wu mɨ gàmwá wu ɨ́ kùùkî mɨ, ɨ́dù kɨ́ ŋgéé, hȩ mɨ tɨ lóte, ŋgə́ nɨ yèìwá ɓe bɨ̀kî mɨ gurubì.

⁴⁶ Wu tɨ wu mɨ kúrúm ŋgwéé sànàwá, ɨ́dù kɨ́ ŋgéé ŋgə́ miiwúnaá mɨ làmɨ́ndà gure.

⁴⁷ Àm kɨ́ á mɨ wáana wu ɨnè: ɗûnɨ́m kàm jíri ŋgə́ du ɓe kí rè á túùmnɨ ɨnayâna, kùb tɨ́íkíí vùùm cuum tɨ ŋgéé sóò lâs. Nò kùb tɨ tɨ́ínaɗóo ŋgób lɨ́ á ɓwê túùmnɨ ɗûnɨ́m ti ŋgóbti.»

⁴⁸ Kí á Yésù ya tanagi nɨ̀gwi rè ɨnè: «Cuum wóò lâs á tɨ́in.»

⁴⁹ Nùb ya du ɓe Yésù cɔɔ̀ŋ ɨ́ yà lə́ə̀mnɨ ɓo sumí ɨnè: «Nò rè mayè nɨ na, nò duye nɨ́ ɓe nyòm tɨ́í cumbi rè?»

⁵⁰ Ɨ́dù Yésù ɨ́ tànà nɨ̀gwi rè ɨnè: «Ə́ə́m wóò ɓátií wu, gɨ̀ mîn yáà.»