Yoane 11 - Nouveau Testament et Psaumes en Ndandi Version 1962

Erihola ryaLazaro

¹ Nikwa omundu muguma abya alwere, ye Lazaro weBetania, omuyi wa Maria na mwali wabo ye Marata.

² Abya Maria oyo wahakabaya Mukama yamaguta, mwa sangula amagulu wuwe omo nzwiri siwe, omugala wabo ye Lazaro yowabya alwere.

³ Abali babo mobamutumirako, bati, Mukama, lebaya, oyo wanzire alwere.

⁴ Abere owa, mwabuga, ati, Endwala eyi siyeriholya, nikwa busana nolukengerwa lwo Mungu, oMugala woMungu asikibawe busana nayo.

⁵ Nikwa Yesu inianzire Marata, na mwali wabo, na Lazaro.

⁶ Nomu gulu owa kwalwere, mwasiba eyabya biro bibiri.

⁷ Nenyuma waho mwabuga nabiga, ati, Tugende eYudea kandi.

⁸ Nabiga mobamubulya, bati, Mukangirirya, abaYuda babya bakasonda sonda erikwita omo mabwe; kandi ukasubayo kwehi?

⁹ Yesu mwasubirya, ati, Sihali endambi ikumi nibiri omwitungi kwehi? omundu amalendera omwitungi siaritwikala kusangwa akala ngira ekyakakala kye kihugo kino.

¹⁰ Nikwa mundu ama­lendera omo kiro akatwikala, kusangwa ekyakakala sikiri omwisi wuwe.

¹¹ Ebinywa ebi mwabugabyo: nenyuma waho mwabuga nabo, ati, Omwira wetu Lazaro ali to; nikwa ngayayo, ngayamu bukaya omo tugotseri.

¹² Abiga mobabuga naye, bati, Mukama, amabya ali to, analama.

¹³ Nikwa Yesu abya akahula oluholo luwe: nikwa baringikanaya bati ahula eriluhuka ryotugotseri.

¹⁴ Neryo Yesu mwabwirabo ndeke eriminyikalya, ati, Lazaro aholire.

¹⁵ Nage nyitsemire busana nenyu kusangwa sinabyayo, imwatoka erikirirya; nikwa tuye eyari.

¹⁶ Neryo Tomasi, oyu kahulawa mo Muhasa, mwabuga na biga balikyabo, ati, Netu tugende, tuyahole haguma naye.

Erilubuka ryaLazaro

¹⁷ Yesu abere ahikayo, mweya iniamabigotsera omwisinda ebiro bini.

¹⁸ Nikwa Betania yabya hakuhi neYerusalema nga kilometres ibiri;

¹⁹ nabangi bokobaYuda babya ibamasa uku Marata na Maria erisibikyabo busana na mugala wabo.

²⁰ Marata, omugulu owa ko Yesu amasa, mwaya hindana naye: nikwa Maria mwasigala inianikere omo nyumba.

²¹ Neryo Marata mwabuga na Yesu, ati, Mukama, kumbe wabya hano, mugala wetu nga siaritahola.

²² Na lino nyasi ebyosi ukasaba Mungu asyakuhabyo.

²³ Yesu mwabuga naye, ati, Omugala wenyu asyalubuka.

²⁴ Marata mwabuga naye, ati. Nyinasi asyalubuka okwi lubuka ryekiro kyenyuma.

²⁵ Yesu mwamu bwira, ati, Ingye indi erilubuka, nengebe: oyu kanyikiriraya, nomwangahola, asyabyaho;

²⁶ noyu kiriho amanyikirirya siendisyahola na kera. Wamikirirya ebyo kwehi?

²⁷ Naye mwamusubirya, ati, Ega Mukama: nabirikirirya kuri Kristo, oMugala woMungu oyu kasa omo kihugo.

²⁸ Neryo amabi buga atya, mwaya birikira mwali wabo ye Maria, omo bisobiso, ati, oMukangirirya ali hano, akakubirikira.

²⁹ Naye, amabi owa ekyo, mwahangana luba, mwaya aho ali.

³⁰ (Nikwa Yesu isiariahika oko muyi, nikwa iniakine aho Marata amwegaya.)

³¹ Neryo abaYuda ababya naye omo nyumba, bakamusibikya, omugulu balangira Maria ahangana luba neriya eyihya moba mukwama, ibakaringikanaya bati akaya okwisinda eriya ririrayo.

³² Maria naye, abihika aho Yesu abya, mwamulolako, mwagwa ahisi oko bisandu biwe, mwamubwira ati, Mukama, kumbe wabya hano, omugala wetu nga siaritahola.

³³ Neryo Yesu abere alangira akarira, na baYuda abasa naye bakarira, naye mwasusumana omo kirimu mwabya nobulige,

³⁴ mwabuga ati, Mwamuhirire hahi kwehi? Nabo mobamubwira, bati, Mu kama, wase ulebaye.

³⁵ Yesu mwarira.

³⁶ Na baYuda moba buga, bati, Lebaya kwabya amwanzire!

³⁷ Nikwa abandi bakubo bati, Oyu walibula ameso wendimatime, siangalekire omundu oyu iniatahola kwehi?

³⁸ Neryo Yesu iniakasusumana kandi omwisi wuwe, mwahika okwisinda. Nikwa yabya mwa ngalu, neribwe ryabya rihirire kugo.

³⁹ Yesu ati, Mulusaye eribwe. Marata, mwali wabo oyo wabya aholire, mwabuga naye ati, Mukama, oko endambi eno arimukumba; kusangwa hamakya bini aholire.

⁴⁰ Yesu mwabuga naye, ati, Mondeta kubwira nyiti, Wamikirirya, wasyalola oko lukengerwa lwo Mungu kwehi?

⁴¹ Neryo mobalusyaho eribwe. Na Yesu mwalalama, mwabuga ati, Tata, ngakuha ewasingya kusangwa ukanyowa.

⁴² Monaminya kukanyowa ebiro byosi: nikwa ngabibuga eki busana nendeko indimbireko, ibatoka erikirirya ko wanyituma.

⁴³ Neryo amabibuga atya, mwabirikira nomu lenge munene, ati, Lazaro, huluka.

⁴⁴ Noyo wabya aholire mwahuluka, iniasengasengire omo lukimba lweyisinda oko byala nebisandu; nobusu buwe ibusengire omo kihande kyo lukimba. Yesu mwabuga nabo, ati, Mumusengule, agende.

⁴⁵ Neryo bangi boko baYuda abahika uku Maria ibama langira ebyakola mobamwikirirya.

⁴⁶ Nikwa abandi bakubo mobaya oko baFarisayo, bayabwirabo emyatsi Yesu akola.

Embita yeriita Yesu

⁴⁷ Neryo abahereri bakulu na baFarisayo mobahindania eribugiro, mobabuga bati, Tukoleki kwehi? omundu oyu amakola bitikotiko binene.

⁴⁸ Twamamuleka tutya abandu bosi basyamwikirirya: kandi abaRoma basyalusya howetu nekihande kyetu.

⁴⁹ Nikwa muguma wakubo, ye Kayafa, abya muhereri mukulu wabo oko mututa oyo, mwabuga nabo, ati, Simwasi kindu na hake,

⁵⁰ kutse simweganiraya ngoko ritolere ryowene omundu muguma aholere abandu, ekihanda kyosi isikyahera.

⁵¹ Mwatabuga eki eriyahula: nikwa rye eribya omukulu wabahereri oko mututa oyo, mwaminyerera ko Yesu akandisyaholera ekihanda;

⁵² butsira busana nekihanda kyo kyene, nikwa busana na bana boMungu abapanzapanzire, erihindaniabo haguma.

⁵³ Neryo eritsuka ekiro ekyo mobaya mbita yerimwita.

⁵⁴ Neryo Yesu mwataswalendera neriminyikala omukati-kati kabaYuda, nikwa mwalwayo mwaya omu kihugo kiri hakuhi nembwarara, omo muyi wakahulawa mo Efuraimu; mwikalayo nabiga.

⁵⁵ Nikwa ekiro kyErilabwako kyabya hakuhi: nabangi abalwa omo kihugo mobahetukira eYerusalema erimbere yEri labwako, busana nerieribwa.

⁵⁶ Neryo mobasonda-sonda Yesu, mobakania omukati-kati kabo ibanimene omo hekalu, bati, Mukaganiraya muti kwehi? Siendisyasa oko kiro kinene kwehi?

⁵⁷ Nikwa abahereri bakulu na baFarisayo ibamabitegeka, bati, omundu amaminya ahari, iniatulago, ibatoka erimutsimba.