Yoane 4 - BONKANDA WA NZAKOMBA W’AEYOKO

¹ AKI Nkolo oeaka wae Bafalusi baoloka wete bakimi baata Yesu ko bandin’ende nd’asi baolekola ba Yoane bauke,

² (lolo Yesu mongo ntinaki, lolonde bakimi’akande)

³ ende aolimana Yudea, ko aoluta nda Ngalilaya.

⁴ Ko mboka elek’ende wae eko ecuwana Samalia:

⁵ ko aokita nda bonanga wa Samalia botangema Sukala ntutama l’itenela y’okili iki Yakoba okaaka bon’okae Yosefa;

⁶ ko etoko ea Yakoba eki eko. Koko Yesu aowa l’ompele wa lokendo, aokit’ase o ngoko nd’ompempe w’etoko, Eki midi,

⁷ ko bomoto owa Samalia aoy’otokol’asi. Yesu aolokela, Onka basi, mmele.

⁸ Eki bakimi’akae ocwaka osomba toma nd’onanga.

⁹ Bomoto owa Samalia akela. La we bosi Yuda ondomb’emi bosi Samalia basi ba mmamela ngamo? (ele Ba-Yuda la Ba-Samalia ntabaki l’oseka).

¹⁰ Yesu aolamba, aolokela, Nga weaki nganji ea Nzakomba, ko l’ende okokela, Onka basi, mmele; siki olombak’ende ko aokoka basi ba loiko.

¹¹ Bomoto aolokela, Nkolo, ofa l’etokwelo, ko etoko eleki njindo: oata basi bako ba loiko lima nko?

¹² Kamba w’olekola nde Yakoba, nkokoolo ekiso, otokaaki etoko ko amelaki lim’eko, ende l’ana’akande, la bibwa bikande?

¹³ Yesu aolamba, aolokela, Wengi’onto omela basi bane ifoka lenkina mposa;

¹⁴ lolo os’omela basi ba em’oka ende, afaoka lenkina mposa nye; lolo basi ba em’oka ende bifoyalema: nd’otema’okande etoko e’asi bandola wowo elaka nko loiko ja seko.

¹⁵ Bomoto aolokela, Nkolo, onka basi bako, nyango mpoke mposa, ko mpoy’endo esi otokol’asi.

¹⁶ Yesu aolokela, Nco, yete bome’okawe, kela wut’endo.

¹⁷ Bomoto aolamba, akela, Mpa l’ome. Yesu aolokela, Otefela nsosolo, Mpa l’ome,

¹⁸ eki we l’aome batano, ko ole la we aeyoko afa bome’okawe: otefelaki nsosolo.

¹⁹ Bomoto aolokela, Nkolo, njena wae w’ole boteli.

²⁰ Baise’akiso bamemyaki Nzakomba imemya nda ngongo ene, lolonde inyo Ba-Yuda lokela, Yelusalema el’itenela indeji la mmamemya ea Nzakomba.

²¹ Yesu aolokela, Bomoto, onjimez’emi wae ekeke eoya e iny’omemya Ise, afa nda ngong’ene ko afa nda Yelusalema.

²² Inyo lomemya of’iny’oea: iso tea oko omemy’iso: ele loiko loya lim’ele Ba-Yuda.

²³ Lolonde ekeke eoya, ko eokit’aeyoko ee bamemyi ba nsosolo bifomemy’Ise la nd’olimo ko la nsosolo; ele Ise ayase bamemyi b’eleng’eko.

²⁴ Nzakomba ale Bolimo, ko bandomemya, kela bomemy’ende l’olimo ko la nsosolo.

²⁵ Bomoto aolokela, Njea wae Masiya (otangema Kilisito) aoya, ko a end’oya ifotosangela baoyi’auma.

²⁶ Yesu aolokela. Em’on’okotefeela nde nk’ende.

²⁷ Ko nkako bakimi’akae baoya: ko baokamwa nd’ewela wae ayotefela l’omoto; lolo nk’ont’okiyo ouola, Ondasa we na? nkina Otefela l’ende lae?

²⁸ Koko bomoto aocik’ekucu ekae, ko aocwa nd’onanga, ko aokel’anto,

²⁹ Loyaka, lene bont’onsangelaki baoyi baki’m’okelaka bauma: l’one afa Masiya nde?

³⁰ Iyo baolola lim’onanga, ko baoy’ele Yesu.

³¹ Nd’ekek’eko bakimi bayokam’ende, bakela, Labi, leka toma.

³² Lolo aolakela, Nde la toma ta ndala tof’iny’oea.

³³ Nd’ewel’eko bakimi baoluwana, bakela, La bont’omo aoloyela yomba ya ndala?

³⁴ Yesu aokela, Toma tokami wete nkele wango’okande ontomaki, ko nsiza bolemo’okande.

³⁵ Inyo lofokele, Nsanza iciki inei, ko emukelo eoya? Loala, nsangel’inyo, lounz’aiso’akinyo ko lene basala, wete baolela, beji l’emukelo.

³⁶ Omukaka ambaka bofuto, ko atakanyaka bamuka ele loiko ja seko: ncina wae ondonaka ko omukaka basalangane bolongo.

³⁷ O ngoko etefelo ene ele nsosolo, Omo ayone, ko onkina ayomuke.

³⁸ Ntomak’inyo wae lomuke ek’inyo ntalokambaki bolemo, bant’amo bakambaki, ko inyo loyasulungana nd’elemo’ekiyo.

³⁹ Koko nd’onanga’oko bouke wa Ba-Samalia baoloimeza nd’ewela ea joi liki bomoto osangaka, Ansangelaki baoyi’auma baki’m’okelaka.

⁴⁰ Nd’ewel’eko aki Ba-Samalia oyaka el’ende, baoloonda wae ateme l’iyo: ko aokit’ase l’iyo bembil’efe.

⁴¹ Ko bant’ankina bauke baolimeza nd’ewela ea joi likande mongo.

⁴² Koko baokela bomoto, Aeyoko timeza, afa nd’ewela ea nsango ikawe; el’iso mongo toloka, ko tea wae one ale Boikyi ow’enanga beuma o nsosolo mongo.

⁴³ Aki bembile bek’efe oleka, aoliman’eko, ko aocwa Ngalilaya.

⁴⁴ Eki Yesu mongo osangaka wae boteli ntaataka lokumo nd’ese ekae mongo.

⁴⁵ Aki’nd’okite Ngalilaya, Ba-Ngalilaya baolosambela, ek’iy’oenaka belemo beuma beki’nd’okambaka nd’elambo nda Yelusalema, ek’iy’ocwaka nd’elambo o ngoko.

⁴⁶ Nd’ewel’eko aut’oya lenkina nda Kana ea Ngalilaya eki’nd’ofaningolaka basi vina.

⁴⁷ Koko bonto owa mpifo aki eko, bona’okae owa jende aki la nkangi nda Kapalanauma. Aki’nd’ookaka, wae Yesu aoya nda Ngalilaya lima Yudea aocw’el’ende, ko aoloonda wae akitele, ko aikya bon’okae otutsi l’iwa.

⁴⁸ Yesu aolokela, Ayak’inyo lofene ntaza l’elemo bia nkakamwa lofaimeza nye.

⁴⁹ Bont’oko owa mpifo aolokela, Nkolo, yaka yokitela eka’mi atafa bon’okami owa.

⁵⁰ Yesu aolokela, Wambokende; bona’oke aika. Bont’oko aolimez’omwa boki Yesu oosangelaka, ko aokenda.

⁵¹ Nk’akitel’ende, bakwal’akae baoy’okumana l’ende, baosanga wae bon’okande aika.

⁵² Ko aolauola heure eki’nd’oangaka loika. Ko baolokela, Mbil’eki lobi, nga midi, nkangi e’angala eolocika.

⁵³ La ngoko, Ise aolea wae eki heure eko eki Yesu osangelaka, Bona’oke aika. Koko aolimeza o njimeza, ende mongo l’iy’auma baki nd’ilombe ikae.

⁵⁴ Lone wae lotaza j’ife loki Yesu okelaka, lim’eki’nd’oyaka lima Yudea nda Ngalilaya.