Yoane 3 - BONKANDA WA NZAKOMBA W’AEYOKO

¹ BONT’OMO aki eko owa Bafalusi, lina likae Nikodemo, engambe ea Ba-Yuda.

² Ende aoy’ele Yesu l’otso, ko aolokela, Labi, tea wae ole bolaki oyei lim’ele Nzakomba: ele nk’ont’omo okeleya ntaz’ine ikela we, imola nko Nzakomba ale l’ende.

³ Yesu aolamba, aolokela, Nsosolo, nsosolo, nkosangela we, ayaka bonto ntaotswaka lima loola, afokuseya jena likulaka ja Nzakomba.

⁴ Nikodemo aolokela, Akita bonto mpaka, aotsweya ngamo? akuseya jotswa lenkina nda likunju ja nyango ekande, ko aotswa nde?

⁵ Yesu aolamba, Nsosolo, nsosolo, nkosangela we, ayak’onto ntaotswaka l’asi ko l’olimo, afaotsweya nda likulaka ja Nzakomba.

⁶ Os’ootswa lim’ele jonge wae jonge, ko os’ootswa lim’ele Bolimo wae bolimo.

⁷ Tokamwake eki’m’okokelaka, Lootswaka lima loola.

⁸ Impempe ilekaka wiji bolang’iko, ko oloka lofoso j’iko, lolo ofea lim’eki iko oyaka, ko l’ecwa iko: nk’eleng’eko la wengi’onto ootswa l’olimo.

⁹ Nikodemo aolamba, ko aolokela, Baoyi’ane bakelama ngamo?

¹⁰ Yesu aolamba, aolokela, Kamba we bolaki mongo owa Yisalaele, ko ofea baoyi’ane?

¹¹ Nsosolo, nsosolo, nkosangela, wete toyotefela baoyi bandea iso, ko toyosange nk’ako bak’is’oenaka; ko inyo lofambe nsango ekiso.

¹² Nga nsangel’inyo baoyi b’okili ko lofimeza, a em’osangel’inyo baoyi ba loola, lifimeza ngamo?

¹³ Nk’onto ondulelaki nda loola, imola nk’ende okitelaki lima loola, wae Bona ow’onto ole nda loola.

¹⁴ Ngoki Mose osangyaka njwa nd’etekeleke, o ngoko Bona ow’onto ifosangema,

¹⁵ ncina wete wengi’onto ondoimeza ifoata loiko ja seko.

¹⁶ Nd’ewel’eki Nzakomba okaka banto b’okili bouma eefe eleng’ene, wae akaaki Bona’okande owa likinda, wete wengi’onto ondoimeza afaofitana, lolo ifoata loiko ja seko.

¹⁷ Eki Nzakomba ntatomaki Bona’okae nd’okili wae aumbe ba-bokili, lolonde ba-bokili baike l’ende.

¹⁸ Ondimez’ende afoumbama; lolo ofimeza aolumbama aeyoko, nd’ewela wae afimeza nda lina ja Bona owa Nzakomba owa likinda.

¹⁹ Ene ekwelo wae fole eoya nd’okili; la wilima la fole, banto balangaki wilima: nd’ewela wae beketo bekiyo beki’obe.

²⁰ Wengi’onto okela bobe atonaka fole, ko afoye nda fole, nyango beketo bekae befolomwa.

²¹ Lolo okelaka nsosolo ayaka nda fole, wae belemo bekande beolenya wete beokelama ele Nzakomba.

²² Nd’afeka ba baoyi’ane Yesu la bakimi’akande baoya nd’ese ea Yudea: ko aotem’eko l’iyo, ko aolin’anto nd’asi.

²³ Koko Yoane ayin’anto nda Ainona ntutama la Salima, eki basi bauke eko: ko banto baoy’el’ende ko baolinama.

²⁴ Eki nd’ekeke eko atafusama nd’onyolo.

²⁵ Koko bikoli bioliela ndatsa bakimi ba Yoane la bosi Yuda la ncina ea elenge ea mpetola.

²⁶ Ko baoy’ele Yoane, baolokela, Labi, ende oki la we wij’a Yoladane, ko oki w’osangaka nsango nd’eloko ekande, bala, ayin’anto, ko bant’auma baoy’el’ende.

²⁷ Yoane aolamba, akela, Bonto ntaataka yomba imola nko iokaem’el’ende lima loola.

²⁸ Inyo mongo lolimeza wae nsangaki, Emi mpa Masiya, lolo ntomama nda joso likae.

²⁹ Oata waji wae wengi, lilongo ja wengi ondemi, ko okoz’ende ale l’osalangano nd’ewela ea lolaka ja wengi. Nd’ewel’eko, bosalangano bokami bokoka.

³⁰ Sikinde acw’okaka, lolo emi nsotsame.

³¹ End’oya lima loola alekola bauma o ndekola mongo; lolo ende ole ow’okili ale wae ow’okili, ko atefela baoyi b’okili; end’oya lima loola aolekola bauma o ndekola.

³² Ayosange baoyi baki’nd’oenaka, ko la baki’nd’ookaka, ko nk’ont’ondamba nsango ekae.

³³ Ondambaki nsango ekae aolila lotaza lokae wae Nzakomba ale nsosolo.

³⁴ El’ende oki Nzakomba otomaka atefela baoyi ba Nzakomba, ele Nzakomba afokaya Bolimo la njeeza.

³⁵ Ise oka Bona eefe, ko aolokaya baoyi’auma nda likata likae.

³⁶ Ondimeza Bona aata loiko ja seko, lolo otendola Bona afaena loiko, lolonde nkele ea Nzakomba eoyal’el’ende o njalema.