Yoane 2 - BONKANDA WA NZAKOMBA W’AEYOKO

¹ NDA mbile e’isato, baolamb’elambo ea bolongai nda Kana ea Ngalilaya: ko nyango ea Yesu aki eko:

² ko baoleta Yesu l’akimi’akande nd’elambo eko.

³ Ko aki vina okucwa, nyango ea Yesu aolokela, Bafa la vina mo!

⁴ Ko Yesu aolokela, Bomoto, emi la we tole mo? Ekeke ekami etafiela.

⁵ Nyango ekae aokela bakambi, Joi nko loswele li end’osangel’inyo lokela ngoko.

⁶ Koko mpoke y’inene ya bikenje botoa ikemi eko ncina e’elenge ea Ba-Yuda ea mpetola, wengi mpoke ikeji la litres ntuk’inei.

⁷ Yesu aolakela, Loyoza mpoke l’asi to. Ko baoyoz’iko to.

⁸ Ko aolakela, Lotokol’aeyoko, ko lotomb’ele wesanyi ow’elambo.

⁹ Ko baotomba. Ko aki wesanyi ow’elambo omekaka basi bafaningwaki vina, ko ntea lim’eki vina oyaka, (lolo bakambi batokolaki basi baolea), wesanyi ow’elambo aoleta wengi owa waji,

¹⁰ ko aolokela, Wengi’onto ambezak’anto nda joso vina e’olotsi, ko ae banto omel’ouke, mpanga aambez’eko efolotsi: lolo we ofonga vina e’olotsi elaka nk’aeyoko.

¹¹ Yesu aokela lotaza lone lokae ja joso nda Kana ea Ngalilaya, ko aoleneya jilangi likae, koko bakimi’akande baoloimeza.

¹² Nd’afeka ba baoyi’ako aokitela nda Kapalanauma, ende la nyango ekande, l’akune ko la bakimi akande. Ko baoyal’eko betso beuke.

¹³ Koko elambo e’Efendelo ea Ba-Yuda eotutama, ko Yesu aocwa nda Yelusalema.

¹⁴ Koko aotana nd’ilombe ya Nzakomba iy’atekyaki ngombo, la mpate, la bimbenga, l’iy’aenzanyaki francs bakit’ase nk’eko:

¹⁵ ko aokela boambo w’okulu, aolaoz’iy’auma lim’ilombe ya Nzakomba, la mpate, la ngombo, ko aofanzola francs, ko aokalimola mesa ikiyo bandenzanyaki francs:

¹⁶ ko aokel’iy’atekyaka bimbenga, Limola bine lim’ane: talokelake ilombe ya Fafa ekami ilombe y’aoka.

¹⁷ Bakimi bakae baolofwa wae joi jokotama, Mposa ea mpia e’ilombe ikawe eonsiza.

¹⁸ Ba-Yuda baolamba, baolokela, Lotaza loe w’oteneya na? ele w’okela baoyi’ane.

¹⁹ Yesu aolamba, aolakela, Lofit’ilomb’ine ya Nzakomba, ko mpanga njemy’iko nd’embil’esato.

²⁰ Nd’ewel’eko, Ba-Yuda baokela, Etongelo e’ilomb’ine eki années ntuku inei l’années botoa, ko we wifutoemya nd’embil’esato nde?

²¹ Lolo aotefela la ncina ea ilombe ikae y’oeko wae jonge likae mongo:

²² koko aki’nd’oetswaka lim’ele bawei, bakimi bakae baolofwa wete atefelaki joi line, ko baolimeza bikotelo bia Nzakomba ko la joi liki Yesu otefelaka.

²³ Koko aki’nde nda Yelusalema nd’elambo e’Efendelo bouke w’anto baolimeza nda lina likae, ek’iy’oenaka ntaza iki’nd’okelaka.

²⁴ Lolo Yesu ntimeza wae il’otema el’lyo: eki’nd’oeaka bant’auma,

²⁵ ko ntela bosangi wae osangel’ende elenge e’onto, nd’ewela eki’nde mongo oeaka betema be’anto.