Tito 3 - BONKANDA WA NZAKOMBA W’AEYOKO

¹ W’OAFWEYA wete bafike bakulaka la ba-mpifo, bimez’iyo la lifiki, belame la wengi bolemo w’olotsi,

² bafotang’onto lotango j’obe, bafoyaleme la wamba, lolo bayaleme la bongengo, beney’ant’auma elenge ea linsimi liuma.

³ Ek’is’oyalaka nda joso l’olole, ko l’otendo, tofombamaki, toki nda likwala ja mposa ileki la bisengo bilenge la bilenge, tokendaki la nkele ea bonkita ko l’inkunya, tokeji la jino, ko totonanaki.

⁴ Lolonde aki liota ja Nzakomba Boikyi’okiso ko la lolango lolang’ende banto, oenyaka,

⁵ atoikyaki; afa l’elemo bia liongi bek’iso mongo okambaka, lolo eleng’ele isei ikande, l’esoelo ea mbaotswa lenkina, ko la njeema lenkina ea Bolimo w’olotsi,

⁶ boki’nd’outezaka el’iso o mpafula la Yesu Masiya Boikyi’okiso;

⁷ wae is’ayengwa l’oya’okande toyaleme basangoli eleng’ele lolendezo ja loiko lotasilaka.

⁸ Joi line lile nsosolo, ko ndanga wete osange baoyi’ane la nkakemya mongo wae iy’andimezaki Nzakomba bafonga loil’otema nda nkakamba ea belemo bi’olotsi. Baoyi’ane bal’olotsi ko bale la nkito el’anto:

⁹ lolo fengola biuo bisamba wanya, la biandelo bia biotswelo la lisa, la bikoli nd’ewela ea bisekyelo: ele baoyi’ako bafa la nkito, ko bale o mpampa.

¹⁰ Bonto akafol’anto nd’oloi aki’nd’olakeme la lofeli bolak’omoko nkina belak’efe, w’ofengole lifengo;

¹¹ ele we olea wae bonto ow’eleng’eko aolunga, ko aokel’obe, aolumb’ende mongo likambo.

¹² A em’otoma Alutema nkina Tukiko ele we, asaka la mposa wete oy’el’emi nda Nikopoli: el’emi njosangya wae njal’eko nd’ekeke ea mpio.

¹³ Fonga lokambya Zena, botefeji owa bisekyelo, ko la Apolo, wae bakende nda lokendo lokiyo l’olotsi, wete bafosambe yomba.

¹⁴ Koko kela bant’akiso bekele wae bakambaka belemo bi’olotsi bendeji la biela bindel’iyo, nyango bafoyaleme nga bafocw’amuka.

¹⁵ Bale l’emi bauma bakuola. W’auol’iyo batok’eefe nd’imeezo. Boya boyale l’iny’auma. O ngoko.