Malako 5 - BONKANDA WA NZAKOMBA W’AEYOKO

¹ KO baoya wij’a lieke nd’ese ea Ba-Ngelasa.

² Aki’nde osafwa lima wato, nkakoyoko bonto oki la bokali wa linyamo aoya lima beomba, aokumana l’ende.

³ Aki l’okit’ase bokae nd’eomba: ko nk’onto ond’otungyeya lenkina o la benyolo bia mbolo mongo nye;

⁴ ncina wae aotungama betungama beuke la bifoke la benyolo bia mbolo, ko aotena benyolo se, ko aolata bifoke kwa, ko nk’onto oki la mpamba wae afolol’ende.

⁵ Ko bots’otso la mbile mbile, ende aki nda beomba la nda ngongo, aobeleza, ko aokot’omongo la bikenje.

⁶ Ko aki’nde oene Yesu lim’esi, aolikumwa, ko aokusam’el’ende;

⁷ ko aobeleza la lofoso ja bolo, aokela, Emi la we tole mo, Yesu Bona owa Nzakomba eleki ndekola? Nkoonda nda lina ja Nzakomba, tonsisozake.

⁸ Ncina wae aolosangela, We, bokali wa linyamo, ola lim’el’ende.

⁹ Ko aolouola, Lina like na? Ko aolosangela, Lina likami wete Etukuluku, ncina wae tole bauke.

¹⁰ Ko aoloonda mbaonda mongo wete afaimola beko lim’ese eko.

¹¹ Ko botonga wa nsombo w’onene boki eko nda ngongo, iola toma.

¹² Ko beko beoloonda, beokela, Ototome ele nsombo, kela totsw’el’iko.

¹³ Ko aolacikela mboka. Ko bekali bia linyamo beolola, beolotswa nda nsombo: ko botonga bokitela ngongo la loangu, bokwela lieke; ko nsombo iowa nda lieke, iki nkina nkot’ife.

¹⁴ Ko bakayaki nsombo toma baolota, ko baosanga joi Eko nd’onanga la nd’okili bokiyo bouma. Ko baoy’oena joi liko likelamaki.

¹⁵ Ko baoy’ele Yesu, ko baolena oki la bademona akit’ase, aolota bito, ko bolimo’okande o ko, wae bont’oko oki l’etukuluku ea bademona, ko iyo baoloka booma.

¹⁶ Ko bandenaki baolasangel’iyo eleng’eki joi okelamaka ele bonto oki l’ademona, ko la joi liki nsombo.

¹⁷ Ko baanga loonda wete iman’ese ekiyo.

¹⁸ Ko aki’nde okondel’a wato, bonto oki l’ademona aoloonda wae ayale l’ende.

¹⁹ Ko Yesu ntimeza ngoko, lolo aolosangela. Kenda nd’ola’oke ele balongo bake, ko wasangele belemo bi’enene beki Nkolo okokambelaka, l’isei iki’nde okokaka.

²⁰ Ko aokenda, ko aanga lolanza nda Dekapoli belemo beko beki Yesu okambelak’ende; ko banto bauma baokamwa.

²¹ Ko aki Yesu ofendaka lenkina nda wato wij’oi, etukuluku ea nene eotakana el’ende; ko aki nd’eselo ea lieke.

²² Ko chef emo ea sunagoga, lina likae Yailo, aoya; ko aki’nd’oenaka, aokwa nd’akaka bakande,

²³ ko aoloonda bouke mongo, aokela, Bona’okami ow’omoto ow’isisi aotutama l’iwa: nkoonda wae oy’oafya bakata bake el’ende wete aike; ko ifoika.

²⁴ Ko aokenda l’ende. Ko etukuluku ea nene eolokima, ko baokam’el’ende.

²⁵ Ko bomot’omo oki la nkangi, balongo’akande balekaki années jom l’ife,

²⁶ ko aolen’elo mongo la bitutelo bia nkanga iuke, ko aokenza liaci likae liuma, ko nkangi ntesila nye, lolo eokaka nkakaka;

²⁷ aki’nd’ookaka lokumo ja Yesu, aoya nd’afeka nd’etukuluku e’anto, ko aofomwa bonkoto bokande.

²⁸ El’ende aokela, Ayaka mpomwa o l’enkoto’ekae kika, njifoika.

²⁹ Ko nkakoyoko elekelo ea balongo bakae eotena, ko aolea nda jonge likae wae aika lima nkangi ekae.

³⁰ Ko nkakoyoko Yesu aokotola nd’otema’okande wete mpamba eolola lim’el’ende, ko aokengwana nd’etukuluku, aokela, Ofomwaki benkoto bekami na?

³¹ Ko bakimi bakae baolokela, Wena etukuluku eokama ele we, ko okela nde, Ompomwaki na?

³² Ko aala wiji la wiji oen’ende okelaki joi line.

³³ Lolo bomoto aolok’ooma, ko aolenga, eki’nd’oeaka joi likelamaki el’ende, aoya, ko aokwa nda joso likae, ko aolosangela joi liuma fole.

³⁴ Ko aolokela, Bona, imeezo eke eokoikya; kenda o wai, bikaka lima nkangi eke.

³⁵ Nk’atefel’ende, banto baoya lim’ilombe ya chef ea sunagoga, baokela, Bona’oke ow’omoto aowa. Otungya bolaki lenkina lae?

³⁶ Lolo aki Yesu ookaka joi lik’iy’otefelaka, aokela chef ea sunagoga, Tawokake booma, imeza o njimeza kika.

³⁷ Ko ntimeza bont’omo akende l’ende, imola nko Petelo la Yakobo la Yoane okosangi la Yakobo nd’ooci.

³⁸ Ko baoya nd’ilombe ya chef ea sunagoga, ko aotan’etongo, ko banto balela, ko la nkimo mongo.

³⁹ Ko aki’nd’otswaka, aolakela, Lotongola, ko lolela lae? Bona atafowa, lolo eci l’ais’ilo.

⁴⁰ Ko baoloseka kye. Lolo aki’nd’aoza iy’auma, aokol’ise la nyango ea bonolu, ko l’iyo baki l’ende, ko aolotswa nd’itenela iki bonolu.

⁴¹ Ko aokita bonolu nda likata, aolokela, Talita kumi, lile wete, Bonolu ow’omoto, nkokela, Betswa.

⁴² Ko nkakoyoko bonolu ow’omoto aolemala, ko ayokende. Aki années jom l’ife. Ko nkako baokamwa nkakamwa mongo.

⁴³ Ko aolasasa nsasasa nda ncina wae joi line lifaeana l’ont’omoko. Ko aokela wete bokaya toma ta ndala.