Malako 4 - BONKANDA WA NZAKOMBA W’AEYOKO

¹ KO aanga lolaka lenkina nd’eselo ea lieke. Ko etukuluku e’anto bauke mongo eotakana el’ende, ko ncina eko aokondela nda wato, aokit’ase eko nda lieke, ko etukuluku euma eki nd’okili nd’eselo ea lieke.

² Ko aolalaka baoyi bauke la bisonganya, ko aolakela nda lilako likande,

³ Lokoza, bala, woni aocwa oona biofo nsanzela:

⁴ koko aki’nd’oone, biofo bemo beokwa nda mboka, ko tofulu toy’okoma beko.

⁵ Ko bemo beokwa nda bikenje, eki beko ntabeata bamoci bauke; ko nkakoyoko beomela, eki ntabeata bamoci ba njindo;

⁶ ko aki jefa oala, beonyeela, ko beoenga, eki beko ntabeata bili.

⁷ Ko bemo beokwa nd’etei e’aeke, ko baeke baomela, baofita beko la nkaka, ko ntabecw’engenge.

⁸ Ko bemo beokwa nd’amoci ba lobwo, ko beocw’engenge, beomela, ko beofula, ko beocwa bemo nga ntuku isat’isato, ko bemo nga ntuku botoa’otoa, ko bemo nga bonkam’onkama.

⁹ Ko aokela, Ole la batoi bandoka, kel’end’okoza.

¹⁰ Ko aki’nde oyale nk’omongo, iyo baki l’ende la ba-jom-l’afe baolouola bisonganya biko.

¹¹ Ko aolakela, Wisisa wa likulaka ja Nzakomba bokaema el’inyo: lolo ele bako bale nd’anza baoyi bauma baokelama nda bisonganya:

¹² nd’ewela wae Bamboale mbaala, ko bafene; Ko bamboke njooka, ko bafokotole; Nyango bafoututale, ko bafotungwa lim’aoyi’akiyo b’obe.

¹³ Ko aolakela, Lofokotola esonganya ene, ko lifea bisonganya biuma ngamo?

¹⁴ Woni aona joi.

¹⁵ Ko bane wete bako bale nda mboka andonami joi; ko andok’iyo, nkakoyoko Satana aoy’ofonol’iyo joi lindonami el’iyo.

¹⁶ Ko ngoko, bane wete bako bandonami nda bikenje; ko andok’iyo joi, nkakoyoko baolamba liko l’ekemo;

¹⁷ ko bafa la wili el’iyo mongo, ko bafoteme; lolo nd’afeka, aya elo la benyoko nd’eloko ea joi, nkakoyoko baolembwa.

¹⁸ Ko bamo wete bako bandonami nd’etei e’aeke. Bane wete bako bandokaki joi,

¹⁹ ko bekakaano bi’okili, la bokakatano wa liaci, la mposa ya baoyi bamo bankina, baolotswa, ko baofita joi la nkaka, lifocw’amuka.

²⁰ Ko bane wete bako bandonami nd’amoci ba lobwo, wae bako bandokaki joi, ko baolamba liko, baocw’amuka, omo nga ntuku isat’isato, omo nga ntuku botoa’otoa, omo nga bonkam’onkama.

²¹ Ko aolakela, Oi la, bayelak’itswa wae bile nd’ase b’eoko, nkina nd’ase ba ntange, afa nd’ilelo ea itswa?

²² Nko joi lindisi lifaisw’olo, ko nko joi ja wisisa lifaeny’olo.

²³ Nga bonto ale l’atoi bandoka, kel’end’okoza.

²⁴ Ko aolakela, Loalaka baoyi bandok’inyo; jeza lindez’inyo lifezama el’inyo lenkina, ko bifofulez’inyo liko,

²⁵ Ko ifokaema el’ende oata, ko bifofonol’ende ofoate o bako baat’ende.

²⁶ Ko aokela, Likulaka ja Nzakomba lile ngole bonto ondona wofo nd’amoci;

²⁷ ko aetama, ko aetswa l’otso la mbile, ko ende afea elenge emela ko efula wofo boko.

²⁸ Bokili bocw’amuka bokomongo; nda joso lokasa, nkako loso nd’otembe, ko l’afeka biofo beokema nd’otembe.

²⁹ Lolo ae biofo okema, asokoza bongwango eko, ele emukelo eokita.

³⁰ Ko aokela, Tifosonganya likulaka ja Nzakomba ngamo? ko l’esonganya esongany’iso liko na?

³¹ Lile ngole wofo wa sinapi, aki boko oonami nd’amoci, bolekola biofo beuma bele nd’okili l’isisi,

³² lolonde ae boko wonama, bomela, ko bolekola njunda iuma l’onene, ko bokela bitafi bi’onene, kela tofulu t’aliko toyoyala nda ncici ea sinapi eko.

³³ Ko nda bisonganya biuke bi’eleng’eko aolasangela joi, nko baoyi bako bandeji l’iyo wae boke;

³⁴ ko aotefela l’iyo o la bisonganya kika, lolo aosangela bakimi bakae ncina ea baoyi’auma nk’ende l’iyo kika.

³⁵ Mbil’eko, aki bokolo okite, aolakela, Kela tokende wij’a lieke.

³⁶ Ko baocika etukuluku, baolokola ngoki’nde nda wato. Ko biato bemo beki l’ende.

³⁷ Ko bompompo w’onene mongo bokumba, ko mpombe ya nene iokondela nda wato, wete boanga loyola l’asi.

³⁸ Ko ende aki nda jenda, akeci nd’ekomba: ko baoloetola, o baolokela, Bolaki, ofotoke lokeseli nd’ewela towa?

³⁹ Ko aki’nde oetswa, aosasa bompompo, ko aokela lieke, Wai, yala ko. Ko bompompo bolambya, ko lim’ako basi baosilama sila.

⁴⁰ Ko aolakela, Loloka bofoju lae? lotafoat’imeezo?

⁴¹ Ko baoloka booma mongo, ko baokel’iyo mongo, Bont’one ale na? Kamba bompompo la lieke baoloimeza?