Malako 3 - BONKANDA WA NZAKOMBA W’AEYOKO

¹ KO aolotswa lenkina nda sunagoga; ko bonto aki eko oki la likata jonyeela.

² Ko baoloteemeza, nkina ifoloikya nda mbile ea Sabata; nd’ewela wae bofots’ende joi.

³ Ko aokela bonto oki la likata jonyeela, Emala nd’etei.

⁴ Ko aolakel’iyo, Lindeji l’esekyelo ea mbile ea Sabata na? nkakela e’olotsi, nkina nkakela e’obe? Mbaikya, nkina mbaoma? Lolo baoyala o wai.

⁵ Ko aolaala la nkele, eki’nd’okaka lokeseli nd’ewela ea bocilingano wa betema bekiyo, ko aokela bonto, Sembola likata likawe. Ko aosembola liko, ko joluta ngole likata likande limo.

⁶ Ko Bafalusi baolola, ko nkakoyoko iyo la Ba-Elode baoloangela wango, elenge e iy’oom’ende.

⁷ Lolo Yesu la bakimi baolimana, baocwa nd’eselo ea lieke; ko etukuluku ea nene lima Ngalilaya eolokima: ko lima Yudea,

⁸ la lima Yelusalema, la lima Edome, la ndekana Yoladane, la wiji wa Tula la Sidona, etukuluku ea nene, ak’iy’ookaka belemo beki’nd’okambaka, baoy’el’ende.

⁹ Ko aosangela bakimi bakae bayale ntutama la wato wa nkengu la ncina ea etukuluku, nyango bafokam’el’ende.

¹⁰ Ende aikyaki bant’auke, ko la ncina eko bako baki la nkangi ya nkakaka baokama el’ende wete bofomwa.

¹¹ Ko bekali bia linyamo, ak’iy’oenak’ende, baokwa nda joso likae, ko baobeleza, baokela, We ole Bona owa Nzakomba.

¹² Ko aolasangela o nsangela wae batakumyak’ende lokumo.

¹³ Ko aundaki nda ngongo, ko aoleta el’ende baki’nde osimaka; ko baocw’el’ende.

¹⁴ Ko aosona jom l’afe wete bayale l’ende, ko atom’iyo loongoza bosako,

¹⁵ ko baate mpifo wae boza bademona.

¹⁶ Ko aolila Simona lina Petelo:

¹⁷ ko Yakobo bona owa Zebedayo, la Yoane okosangi la Yakobo nd’ooci, ko aolil’iyo lina Boanelenge, lile wete Bana ba likungola;

¹⁸ ko Andelo la Filipo, la Balutolomayo, la Matayo la Toma, la Yakobo bona owa Alafayo, la Tadayo, la Simona owa Kanana,

¹⁹ la Yudasa owa Keliota ondoangelaki. Ko aoya nd’ilombe.

²⁰ Ko etukuluku eotakana lenkina, ko nd’ewela eko, iyo ntabaata elelo ea toma.

²¹ Aki ilongo ikande ookaka, baoy’okand’ende, el’iyo baokela, Asongwa.

²² Ko bakoci b’enkanda bako bakitelaki lima Yelusalema, baokela, Ale la Balazebuba, ko ayoza bademona la mpamba ea bokulaka owa bademona.

²³ Ko aki’nd’oetak’iyo el’ende, aolakela nda bisonganya, Satana aozeya. Satana ngamo?

²⁴ Ko ayaka likulaka jokafwana likomongo, lifaotema.

²⁵ Ko wenaka ilombe iokafwana ikomongo ifaat’emaelo.

²⁶ Ko ayaka Satana ayakangw’omongo, afaat’emaelo, lolo ifoata nsukela.

²⁷ Lolo nk’onto oat’otswelo nd’ilombe ya bonto owa bolo wae afunza toma tokae, elaka nko aotungya bonto owa bolo nda joso; ko l’afeka ifofunz’ilombe ikande.

²⁸ Nsangel’inyo, nsosolo, wae bana b’anto bifotungwa lim’aoyi bauma, la baoyi’obe la tosaola nko loswele to iy’osaola.

²⁹ Lolo os’osaola Bolimo w’olotsi, afoate etungwelo lima joi liko nda bikeke biuma, lolo ale l’umbelo ea likambo liko elaka nko bikeke biuma.

³⁰ La ncina ek’iy’okelaka, Ale la bokali wa linyamo.

³¹ Ko nyango ekae la bakune bakae baoya; ko baolemala nd’anza, baotomel’ende, baoloeta.

³² Ko etukuluku ekokit’ase, eoloenga, ko baolosangela, Bala, nyango eke la bakune bake bale nd’anza, bayokase.

³³ Ko aolamba, aolakela, Ole nyango ekami la bakune bakami na?

³⁴ Ko aala bakokit’ase bandoenga, aokela, Bala, nyango ekami la bakune’akami!

³⁵ Os’okela baoyi balanga Nzakomba, ende ale bokune’okami, la nkana ekami, la nyango ekami.