Malako 2 - BONKANDA WA NZAKOMBA W’AEYOKO

¹ AKI betso bemo osilaka, aoya lenkina nda Kapalanauma, ko baoloka wae ale nd’ilombe.

² Ko bant’auke baotakana to wete nk’emaelo ekociki nda wiso o nye: ko aolasangela joi.

³ Ko baoya, baoloyela bonto oki la nkangi ea nkataana mongo, banto banei baolotomba.

⁴ Ko ak’iyo ntabaat’elekelo el’ende nd’ewela ea nkaka ea banto, baoteola nsamba e’ilombe ndongama l’ende; ko ak’iy’oteolaka, baokiteza ntange eki owa nkangi ea nkataana okeci.

⁵ Ko aki Yesu oene imeezo ekiyo, aokela bonto owa nkangi ea nkataana, Bona, otungwa lima baoyi bake b’obe.

⁶ Ko bakoci b’enkanda bamo bakokit’ase eko, ko baokakaza nd’etema’ekiyo,

⁷ Bont’one atefela ngoso lae? Asaola Nzakomba isaola! Omo otungol’anto lim’aoyi’obe na? imola nko Nzakomba kika.

⁸ Ko nkakoyoko, aki Yesu okotolaka nd’olimo’okae wae baokakaza ngoko nd’etema’ekiyo, aolakela, Lokakaza baoyi’ane nd’etema’ekinyo lae?

⁹ Nkina nkele bonto owa nkangi ea nkataana, Otungwa lima baoyi’obe’akawe; la nkele, Betswa, ko ambola ntange eke, ko kenda; oleki ikao nd’etefelo na?

¹⁰ Lolo nd’ewela wae lea Bona ow’onto ale la mpamba wae atungole banto lima baoyi’obe nd’okili, (aokela bonto owa nkangi ea nkataana),

¹¹ Nkokela we, Betswa, ambola ntange eke, ko kenda nd’ilombe ike.

¹² Aolemala, ko nkakoyoko aolambola ntange ekae, ko aolola nda joso likiy’auma; wete iy’auma baokamwa, ko baomemya Nzakomba, baokela, Kilo, tene ngone.

¹³ Ko aocwa lenkina nd’eselo ea lieke; ko etukuluku euma eoya el’ende, ko aolalaka.

¹⁴ Aki’nde olekane, aolena Lewi, bona owa Alafayo, akokit’ase nd’itenela ifut’iyo mpuci, ko aolokela, Onkim’emi. Ko aolemala, aolokim’ende.

¹⁵ Ko joi joliela, aki’nd’okit’ase nd’ilombe ikande, ko batakanyi ba mpuci bauke la bant’obe bakokit’ase la Yesu l’akimi bakae, nd’ewela ek’iyo bauke, ko baolokima.

¹⁶ Aki bakoci b’enkanda la Bafalusi oenaka wete aleki toma la banto b’obe la batakanyi ba mpuci, baokela bakimi bakae, Ale toma la batakanyi ba mpuci la bant’obe lae?

¹⁷ Aki Yesu ookaka, aolakela, Banto bakema bolo ntabelaka nkanga e’ete, lolo bandoka nkangi. Emi nciyaki oeta bandeji, lolonde bant’obe.

¹⁸ Bakimi ba Yoane la Bafalusi bayokile toma. Ko baoya, ko baolokela, Bakimi ba Yoane la bakimi b’afalusi bakila toma, ko bakimi’ake bafokile lae?

¹⁹ Ko Yesu aolakela, Kamba balongo ba wengi owa waji bakileya toma nd’ekeke eyala wengi l’iyo? Ayala wengi l’iyo bafokileya.

²⁰ Lolo ekeke ifoya: endimana wengi lim’el’iyo, mpanga bakile toma nda mbil’eko.

²¹ Nk’onto osamba ebolo ea eto e’aeyoko nd’onkoto w’ojwela: nyango eto e’aeyoko endilami nda lilusu efokanjola eto e’ojwela, ko lilusu jofula.

²² Ko ntabilaka basanga b’aeyoko nda bikucu bia kalakala; nyango basanga bafoole bikucu, ko basanga bafofitane ko la bikucu ngoko; lolo bilaka basanga b’aeyoko nda bikucu bi’aeyoko.

²³ Ko joi line jokelama, wae aotuwana basala b’asangu nda mbile ea Sabata; ko ak’iy’oleke, bakimi bakande baanga lomuka basangu.

²⁴ Ko Bafalusi baolokela, Bala, iyo bakela joi lifeji la mbile ea Sabata ncina na?

²⁵ Ko aolakela, Inyo lotafoanda joi liki Dawidi okelaka, aki’nde oelaka, ko okaka nzala, ende mongo l’iy’aki l’ende?

²⁶ Elenge eki’nd’otswaka nd’ilombe ya Nzakomba nd’ekeke eki Abiatala, nkanga ea joso mongo, ko eki’nde oleka mampa y’oeko, ifeji wete banto bale, imola nko nkanga kika, ko eki’nd’okaaka baki l’ende?

²⁷ Ko aolakela, Mbile ea Sabata ekelamaki nd’eloko ea bonto, afa bonto nd’eloko ea mbile ea Sabata.

²⁸ Nd’ewela eko, Bona ow’onto ale Nkolo o l’ea Sabata.