Malako 16 - BONKANDA WA NZAKOMBA W’AEYOKO

¹ AKI mbile ea Sabata osile, Malia owa Mangadala, la Malia nyango ea Yakobo, la Salome, baosomba bete bia mpimbo wae baoy’oisa ilaka o mbaisa.

² La nkesa mongo nda mbile ea joso ea semaine, baoya nd’oomba aki jefa okya.

³ Baotefela l’iyo mongo, Otokalimoza ekenje lima wiso wa boomba na?

⁴ Lolo, ak’iy’ounzak’aiso, baolena wete ekenje eolimana; ekenje eko eki enene mongo.

⁵ Baolotswa nda boomba, ko baolena bosekota okokit’ase nda wiji w’elome, aolot’onkoto wa fe; ko baolok’ooma.

⁶ Lolo ende aolakela, Talokamwake; inyo lasa Yesu owa Nazaleta, oakemaki nd’ekulusu; aoetswa; af’ane; bala, wiji bok’iy’oambyaka!

⁷ Lolo lokenda, losangele bakimi bakae ko la Petelo, Ende aocwa nda joso likinyo nda Ngalilaya; lifoen’ende eko, ngoki bomongo osangelak’inyo.

⁸ Ko baolola, baolota lima boomba; baokamwa, ko baolenga, ntabasangel’onto joi limoko; ek’iy’oangaka boangi.

⁹ Aki Yesu oetswaka lim’iwa nda mbile ea joso ea semaine la nkesa mongo, aoleny’a joso ele Malia owa Mangadala, oki’nd’oozaka bademona nsambo.

¹⁰ Malia aocw’osanga bosako el’iyo baki l’ende, ak’iy’ookaka lokeseli, ko bayolele la mpisali.

¹¹ Ko iyo, ak’iy’ookaka wae Yesu aoika, ko aoleny’el’ende, ntabimeza.

¹² Nd’afeka aoleny’omongo l’elenge enkina el’afe bakiyo, ak’iy’okende nda basala.

¹³ Ko bacwaki osangela bamo; lolonde ntabaimez’iyo.

¹⁴ Koko nd’afeka ende aolenya ele ba-jom-l’omoko, ak’iy’okokit’ase a mesa; ko aolafela nd’ewela e’osamba w’imeezo bokiyo ko la bocilingano wa betema’ekiyo, ek’iy’o ntabimeza bandoenak’ende, aki’nd’oetswaka lim’iwa.

¹⁵ Ko aolasangela, Lokenda nd’enanga beuma, losangele bant’auma bosako w’olotsi.

¹⁶ Ondimeza ko ainame nd’asi ifoika; lolo ofimeza ifumbama likambo.

¹⁷ Ko ntaz’ine ifokenda l’iyo bandimeza; nda lina likami bifoza bademona; bifotefela la mposo inkina:

¹⁸ bifambola njwa l’akata, ko ayaka bamela yomba iw’anto, bafaok’eefe; ko nga bafy’akata ele banto ba nkangi, iyo bifoika.

¹⁹ Ko Nkolo Yesu, aki’nd’otefelaka l’iyo, aokolama nda loola, ko aokit’ase nda wiji wa likata j’elome ja Nzakomba.

²⁰ Ko iyo baokenda, baongoza bosako w’olotsi nda bise biuma, ko Nkolo akambaki l’iyo, ko aokemya nsango la ntaza ikimaki. O ngoko.