Luka 4 - BONKANDA WA NZAKOMBA W’AEYOKO

¹ KO Yesu aokama la Bolimo w’olotsi, ko aoluta lima Yoladane, ko aotombama l’olimo nd’etekeleke,

² aomekama la Satana bembile ntuk’inei. Ko ntaleki yomba ya ndala nye nda bembile beko; ko aki bembil’eko osile, aoloka nzala.

³ Ko Satana aolokela, Nga w’ole Bona owa Nzakomba, sanga wae ekenje ene efaningwa mampa.

⁴ Ko Yesu aolamba, Joi jokotama, Bonto ntaikaka la mampa kika, [lolonde la wengi joi ja Nzakomba.]

⁵ Ko aolotomba nd’aliko, ko aoloeneya bakulaka bauma ba bise biuma nkakoyoko.

⁶ Ko Satana aolokela, Emi njifokoka mpifo ene euma, la jilangi ja bakulak’ako; eki mpifo eko okaemaka el’emi; ko nka bonto olang’emi ndoka.

⁷ Ko ayak’onkusamel’emi, mpifo ene euma ifoyalema ekawe.

⁸ Ko Yesu aolamba, aolokela, Joi jokotama, Memya Yawe Nzakomba eke, ko osaela nk’ende kika.

⁹ Ko aolotomba nda Yelusalema, ko aoloila nd’aliko b’ilombe ya Nzakomba nda nsonge, ko aolokela, Nga w’ole Bona owa Nzakomba, usa we mongo lim’endo;

¹⁰ ele joi jokotama, Ende ifotoma bikima bikae bia loola nd’eloko eke, wae bakesanya:

¹¹ koko, Bifokotomba nd’akata’akiyo, Nyango likaka like lifoiman’ekenje.

¹² Ko Yesu aolamba, aokela, Joi jokotama, Tomekake Yawe Nzakomba ekawe.

¹³ Ko aki Satana osizaka bemeka beuma, aoliman’el’ende fele.

¹⁴ Ko Yesu aoluta nda Ngalilaya la mpamba ea Bolimo; ko lokumo lokae lokumyama nda bise bikotutsi.

¹⁵ Ko aolaka nda basunagoga bakiyo, ko iy’auma baolomemya.

¹⁶ Ko aoya nda Nazaleta, wiji bok’iy’oongolaka; ko nd’elenge eki’nde aolotswa nda sunagoga nda mbile ea Sabata, ko aolemala wae aand’onkanda.

¹⁷ Ko baolokitsa bonkanda w’oteli Yesaya. Aoumbol’onkanda, ko aolen’itenela ikotama joi line,

¹⁸ Bolimo wa Yawe bole l’emi, Eki’nd’ombisaka l’auta wae nsangele banto b’eola bosako w’olotsi: Antomaki osanga etungwelo ele njanga, L’enelo ele bawei’aiso, Oelola banto bak’iy’otukaka,

¹⁹ Osanga ekeke ea Yawe esimam’olotsi.

²⁰ Ko aoumb’onkanda, aoluteya ele bosali, ko aokit’ase; ko bant’auma baki nda sunagoga baoloaka baiso’akiyo.

²¹ Ko aang’oakela, Mbil’ene ekotelo ene eoliela nd’atoi’akinyo.

²² Ko bant’auma baolokoza, ko baokamwa nd’eloko ea baoyi b’oya bandolaki lim’omwa’okae: ko baokela, One afa bona owa Yosefa nde?

²³ Ko aolakela, Nsosolo, inyo lifoncwela joi line, Nkanga e’ete, bikya we mongo: baoyi’aso bak’is’okaka baokelama nda Kapalanauma, kelaka endo ngoko nd’ese eke mongo.

²⁴ Ko aokela, Nsosolo, nsangel’inyo, Boteli ntasimamaka nd’ese ekae mongo.

²⁵ Lolo nsangel’inyo la nsosolo, Bamato ba bituka baki’auke nda Yisalaele nd’embile beki Eliya, nd’ekeke eki loola okombamaka années isato la nsanza botoa, aki eto ea nzala e’enene okwelak’ese euma;

²⁶ lolo Eliya ntatomamaki el’omo owa bamato’ako, lolonde aotomama nda Salepata kika, nd’ese ea Sidona, ele bomot’omo oki etuka.

²⁷ Ko banto b’aeka bauke baki nda Yisalaele nd’ekek’eki Elisa ow’oteli; ko nk’omo owa b’aeka’ako ofetswaki, lolonde Namana bosi Sulia kika.

²⁸ Ko bant’auma baki nda sunagoga baokama la nkele, ek’iy’ookaka baoyi’ane;

²⁹ ko baolemala, baolooza lim’onanga, ko baolotomba nd’ompempe wa ngongo eki bonanga’okiyo okotongi, wete bouse nd’ase la besunangongo.

³⁰ Lolo aotuwana nd’etei ekiyo, ko aokenda.

³¹ Ko aokitela nda Kapalanauma, bonanga wa Ngalilaya. Ko aolalaka nda mbile ea Sabata:

³² ko baokamwa la lilako likae; eki joi likae liki la mpamba.

³³ Ko bonto aki nda sunagoga, oki la bokali wa linyamo; ko aobeleza la lofoso ja bolo,

³⁴ Cika! iso la we tole ngamo? Yesu owa Nazaleta, oyaki wae otofite? njokea we, ole owa boeko owa Nzakomba.

³⁵ Ko Yesu aolofela, aokela, Ambya lofoso, ko ola lim’el’ende. Ko aki demona ounzak’ende nd’ase nd’etei ekiyo, aolola lim’el’ende, ko ntooky’ende eefe.

³⁶ Ko iy’auma baokamwa, baotefelana, baokela, Joi line lile na? el’ende aosangela bekali bia linyamo la mpifo la mpamba, ko bolaka.

³⁷ Ko lokumo lokande lokumyama nda bise biuma biki ntutama.

³⁸ Ko aolola lima sunagoga, ko aolotswa nd’ilombe ya Simona. Ko nyango ea waji owa Simona aoloka nkangi ea angala e’enene: ko baoloonda nd’eloko ekae.

³⁹ Aolemala el’ende, ko aofela nkangi ea angala, ko eolocika: ko aetswa nkako, ko aolasaela.

⁴⁰ Ko aki jefa oile, iy’auma baki la banto ba nkangi ya bilenge la bilenge, baolayela el’ende; ko aolafy’akata bakae el’iy’auma, ko aolaikya.

⁴¹ Ko bademona baolola lim’ele bant’auke, baobeleza, baokela, W’ole Bona owa Nzakomba, Ko aolafela, ko ntacik’iyo wete batefela nye, ek’iy’oeaka wae ale Masiya.

⁴² Ko aki nkesa okya, aolola ko aocwa nd’etekeleke: ko banto ba bitukuluku baoloasa, ko baoya el’ende, ko bakelaki wete bosuke, wae afiman’el’iyo.

⁴³ Lolo aolakela, Bolotsi wae nsange nsango e’olotsi ea likulaka ja Nzakomba nd’enanga bemo ngoko: el’emi ntomamaki la ncin’ene.

⁴⁴ Ko ayosange nsango nda basunagoga ba Ngalilaya.