Luka 24 - BONKANDA WA NZAKOMBA W’AEYOKO

¹ LOLO nda mbile ea joso ea semaine, nd’ekyelo mongo, baoya nd’oomba, baoyela toma ta mpimbo tok’iy’oezaka.

² Ko baotan’ekenje eokalimwa lim’oomba.

³ Baolotswa, ko ntabatan’ilaka ya Nkolo Yesu.

⁴ Koko ak’iy’okakaana la joi liko, bala, baend’afe baolemala ntutama l’iyo la bito bia ngesingesi.

⁵ Ak’iy’ookak’ooma, ko baosuny’etsa nd’amoci, iyo baolakela, Inyo las’end’oyoike ele bawei lae?

⁶ Af’ane, lolo aoetswa lim’iwa; lofwa elenge eki’nd’osangelak’inyo, aki’nde nda Ngalilaya,

⁷ wae Bona ow’onto ifolekyama nd’akata b’akeli b’obe, ko ifoakema nd’ekulusu, ko nda mbile e’isato ifoetswa lenkina.

⁸ Ko baolofwa baoyi baki’nde,

⁹ ko baoluta lim’oomba, ko baosangela ba-jom-l’omoko l’ant’auma baki eko baoyi’ane bauma.

¹⁰ Iyo wae Malia Mangandala, la Yoana, la Malia nyango ea Yakobo: ko iyo l’amato bamo baosangela bikima baoyi’ane.

¹¹ Ko baoyi’ane baolokana ele bikima ng’etefelatefela; ko iyo ntabimeza nye.

¹² Lolonde Petelo aolemala, ko aolikumwa nd’oomba; aosunama ko aala nd’etei, aolena bito bia mbenza biambi biko kika; ko aocwa nd’ola’okae, ko ayokamwa la joi lindielaki.

¹³ Ko bala, bam’akiyo bafe baokenda mbil’eko nd’onanga otangema Emao, boki esi lima Yelusalema nga kilomètres jom l’ife.

¹⁴ Ko baosoola nd’aoyi’auma bakelamaki.

¹⁵ Ko ak’iy’osoola ko baoluwana, Yesu mongo aotutama, ko aamana l’iyo.

¹⁶ Ko baiso’akiyo baosukama wae bafoe’ende.

¹⁷ Ko aolakela, Baoyi’ane basool’inyo nda lokendo lokinyo na? Ko baosilama, bilongi la lokeseli.

¹⁸ Ko om’okiyo, otangema Keleopa, aolamba, aolokela, Kamba we kika okit’ase bofaya nda Yelusalema, ko ofea baoyi bandielak’eko nda bembil’ene?

¹⁹ Ko aolakela, Baoyi ba na? Ko baolokela, Baoyi ba Yesu, bosi Nazaleta, oki boteli owa mpamba nd’olemo la nda joi nda joso ja Nzakomba l’ant’auma;

²⁰ ko elenge eki nkanga ya joso la ba-mpifo’akiso olekyak’ende wae umbame nd’iwa, ko boakak’ende nd’ekulusu.

²¹ Lolonde iso tolendezaki wae osikola Yisalaele o nk’ende. Onde, ko joi limo wete ene ele wae mbile e’isato lim’aki baoyi’ane okelamaka.

²² Ko joi limo wae bamato’amo ba boloi’okiso baotokamweya;

²³ iyo baocwa nd’oomba la nkesa mongo; ko ak’iyo ntaben’ilaka ikae, baoy’okela wete baolen’enelo ea bikima bia loola bindasangelaki wae ende ayoike.

²⁴ Ko bamo baki l’iso baocwa nd’oomba, baolena nk’eleng’eki bamato osangaka: lolonde ntaboen’ende mongo.

²⁵ Ko aolakela, O l’anto b’elole, l’etema beleki lokuto nda njimeza ea baoyi’auma baki bateli osangaka!

²⁶ La ntaonga nde wae Masiya en’elo l’aoyi’ane ko otswa nda jilangi likae?

²⁷ Ko aangaki lima Mose ko lima bateli’auma, aolafolaza baoyi bakotami nda bikotelo biuma bia Nzakomba nd’eloko ekande mongo.

²⁸ Ko baotutama l’onanga bok’iy’ocwaka: ko ende akelaki nga alekane.

²⁹ Ko iyo baoloonda, baokela, Yala l’iso; ele bokolo botutama, ko mbile ecindela. Ko aolotswa wae ayale l’iyo.

³⁰ Koko, aki’nd’okit’ase l’iyo nda mesa ea toma, aokola mampa ko aosak’okako; aoten’iko ko aolakaya,

³¹ Ko baiso’akiyo baolifwa ko baoloea; ko aolimwa el’iyo limo.

³² Ko baotefelana, Betema’ekiso ntabefeta nd’etei ekiso nga tsa nde, aki’nd’otefelaka l’iso nda mboka, ko aki’nd’otokombozaka bikotelo bia Nzakomba?

³³ Ko baolemala nda heure eko, baoluta nda Yelusalema, ko baotana ba-jom-l’omoko l’amo baki l’iyo batakai,

³⁴ ko iyo baokela, Nkolo aoetswa nsosolo, ko aolenya ele Simona.

³⁵ Ko baosang’aoyi bakelamaki nda mboka, ko l’elenge eki’nd’oeanaka l’iyo nda ntatena ea mampa.

³⁶ Ko nk’atefel’iyo baoyi’ane, Ende mongo aolemala nd’etei ekiyo, aolakela, Kuci el’inyo.

³⁷ Lolo baolok’ooma ko baanga boangi, baotanga wae baolena bokali.

³⁸ Ko aolakela, Lokakaana ko lokakaza nd’etema’ekinyo ncina na?

³⁹ Loala bakata l’akaka’akami wete nde nk’emi: lommame, ko lena; ele bokali bofa la wunyu la biese, elenge enden’inyo mbata.

⁴⁰ Ko aki’nd’otefelaka joi line aolaeneya bakata l’akaka’akae.

⁴¹ Ko ak’iyo ntabimeza nd’ewela ea bosalangano, ko baokamwa, aolakela, Inyo lole la yomba ya ndala endo?

⁴² Ko baoloka etei ea nse ea nkakanga.

⁴³ Aokola ko aola nda joso likiyo.

⁴⁴ Ko aolakela, Bane bale baoyi’akami baki’mi osangelak’inyo aki’mi l’inyo, wae baoyi’auma bakotami nda bisekyelo biki Mose, la nd’ateli, la nda Nsau, nd’eloko ekami bifiela.

⁴⁵ Nkako aofolaza belimo’ekiyo wae bea bikotelo bia Nzakomba fombo;

⁴⁶ ko aolakela. Joi jokotama ngone, wae Masiya ifen’elo, ko ifoetswa lenkina lim’ele bawei nda mbile e’isato;

⁴⁷ ko nsango ea mbututala la ntungola e’anto lima baoyi’obe esangeme nda lina likae nd’okili bouma, mbaanga lima Yelusalema.

⁴⁸ Inyo lole temoins ba baoyi’ane.

⁴⁹ Ko bala, njifosokoz’inyo elaka ea Fafa: lolonde loyala nd’onanga elaka nko lolotsama la mpamba lim’aliko.

⁵⁰ Ko aolatomba elaka nko bakolongi la Betania; ko aosangya bakata’akae ko aolasakela bokako wa swa.

⁵¹ Koko, aki’nd’oasakele bokako wa swa, aolena l’iyo, ko aotombama nda loola.

⁵² Iyo baolomemya, ko baoluta nda Yelusalema l’ekemo euke;

⁵³ ko baki nd’ilombe ya Nzakomba bikeke biuma, ko bayomemya Nzakomba.