Luka 2 - BONKANDA WA NZAKOMBA W’AEYOKO

¹ JOI joliela nd’embil’eko wae bosise boyaki lim’ele Kaisala Anguseto, wae banto bauma bakotame baina.

² Bone wete bokota wa joso nd’ekek’eki Kwilinu gouverneur owa Sulia.

³ Ko bant’auma baocwa okotam’aina, wengi’onto nd’onanga’okae mongo.

⁴ Ko Yosefa aocwa ngoko lima Ngalilaya, lim’onanga wa Nazaleta, nda Yudea nd’onanga wa Dawidi, botangema Beteleme, eki’nde ow’ilongo l’ooci wa Dawidi;

⁵ wae akote lina j’omongo la ja Malia oki l’ende elaka wae ayale waji’okae, ko ende atutama loota.

⁶ Koko ak’iyo eko, ekeke eoliela wae aote.

⁷ Ko aotaki nsomi ekande ea jende; ko aoloomba la bito bia mbaomba, ko aoloambya nda sanduku ela nyama toma, ek’iyo ntabaat’itenela nd’ilombe y’afaya.

⁸ Ko baesanyi ba mpate baki nd’es’eko nd’esobe, ko baesanya botonga’okiyo l’otso.

⁹ Ko ekima ea Yawe aolemala l’iyo, ko jilangi ja Yawe jongesa nda wiji bokiyo: ko baolok’ooma mongo.

¹⁰ Ko ekima aolakela, Talokak’ooma; el’emi njel’inyo bosako w’olotsi w’osalangano mongo, koko boko wifoyal’ele bant’auma:

¹¹ ele Boikyi ole Masiya Nkolo aootsw’el’inyo mbil’ene nd’onanga wa Dawidi.

¹² Ko lone lotaza el’inyo wete, lifotana bona aombama la bito bia mbaomba, ko ambi nda sanduku ela nyama toma.

¹³ Ko sasimo, etukuluku ea bikima bia loola baki l’ekima, ko baomemya Nzakomba, ko baokela,

¹⁴ Imemya ele Nzakomba nd’aliko mongo, Ko nd’okili kuci el’anto basim’ende.

¹⁵ Koko, aki bikima oimanak’el’iyo baoluta nda loola, baesanyi baokela el’iyo mongo, Kela tokende nda Beteleme, ko tene joi line likelamaki, liki Yawe oteneyaka.

¹⁶ Ko baoya la lomolomo, ko baotana Malia la Yosefa, ko l’ona ambi nda sanduku ela nyama toma.

¹⁷ Ko ak’iy’oenaka, baosanga joi lisangemaki el’iyo nd’eloko ea bona.

¹⁸ Ko bant’auma bandokaki baokamwa l’aoyi basangemaki el’iyo la baesanyi.

¹⁹ Lolo Malia aofonga baoyi’ane bauma, ko aokanela nd’otema’okae.

²⁰ Ko baesanyi baoluta, baomemya Nzakomba, ko baolokanga nd’ewela e’aoyi’auma bak’iy’ookaka ko la bak’iy’oenaka, o ngoki bako osangemaka el’iyo.

²¹ Ko aki mbile ea mwambi okite, baotena nsonge, ko baoloila lina likae YESU, wae lina liandemaki ngoko l’ekima etafa nyango ofoswa jemi likae.

²² Ko aki bembile bekiyo bia mpetola okokaka, eleng’ele bisekyelo biki Mose, baoloyela nda Yelusalema, wae bolekya ele Yawe,

²³ (ngole joi likotamaka nda bisekyelo bia Yawe, Wengi nsomi ea jende ootswa lima likunju ifotangema ow’oeko ele Yawe).

²⁴ Ko baolekya mbeka ngoki joi osangemaka nda bisekyelo bia Yawe, Bimpompo bife, nkina baasa ba bimbenga bafe.

²⁵ Ko bala, bont’omo aki nda Yelusalema, otangema Simiona; ko bont’one aki bonto owa njelama l’owa boondo mongo, olendezaki Bocicimyi owa Yisalaele: ko Bolimo w’olotsi aki el’ende.

²⁶ Ko joi jolenya el’ende la Bolimo w’olotsi, wae afaen’iwa, ataf’end’oena Masiya ea Yawe.

²⁷ Ko aoya l’olimo nd’ilombe ya Nzakomba: ko aki nyango l’ise oyelaka bona, Yesu, wete bakele nd’eloko ekae eleng’ele bisekyelo,

²⁸ ende aoloamba, ko aolokeketela, ko aomemya Nzakomba, aokela,

²⁹ Yawe, kela bokwal’okawe akend’aeyoko la kuci, Eleng’ele joi like,

³⁰ Eki baiso’akami oenaka loiko loke,

³¹ Loki w’oezaka nda joso j’elongi ea bant’auma;

³² Fole efolaza Bafaya, Ko la jilangi ja banto’ake ba Yisalaele.

³³ Ko ise la nyango ekae bayokamwa l’aoyi batefelami nd’eloko ekae;

³⁴ ko Simiona aolasakela bokako wa nsakema, ko aokela Malia nyango ekae, Bala, bon’one aosonama wae ayale ncina ea ekwelo l’esangyelo ea bant’auke nda Yisalaele; ko la lotaza lotangema lotango;

³⁵ onde, l’ifaka ifotuwana botema’oke mongo; wae nkai ienya lima betema beuke.

³⁶ Ko bont’omo aki eko, otangema Ana, boteli ow’omoto, bona owa Fanwele, ow’oloi w’Asela, (ende aokita ekota mongo, ko aki la bome années nsambo lim’ak’iy’oalanaka,

³⁷ ko aki etuka années ntuku mwambi l’inei), ko bomot’oko ntimanak’ilombe ya Nzakomba, aomemya Nzakomba la nkakila ea toma ko la mbaonda l’otso la mbile.

³⁸ Aki’nd’oyaka nda heure eko, aosima Nzakomba boya, ko aotefela nd’eloko ekae ele bant’auma balendeza esikwelo ea Yelusalema.

³⁹ Ko ak’iy’osizaka baoyi’auma eleng’ele bisekyelo bia Yawe, baoluta nda Ngalilaya, nd’onang’okiyo mongo, wete Nazaleta.

⁴⁰ Ko bona aosekwa, aokaka l’ekemo, aokama la wanya; ko boya wa Nzakomba boki el’ende.

⁴¹ Ko ise la nyango ekae bacwaka wengi année nda Yelusalema nd’elambo e’Efendelo.

⁴² Ko aki’nde années jom l’ife, bacwaki eko nd’elenge e’elambo;

⁴³ ko ak’iy’okokyaka bembile, ko baoluta, bonol’oko Yesu aocikala nd’afeka nda Yelusalema; ko ise la nyango ekae ntabeaki;

⁴⁴ lolo iyo baokanela wae ayokende l’iyo nd’olongo, ko baocwa lokendo ja mbil’emoko; ko baoloasa ele bioto l’alongo bakiyo:

⁴⁵ ko ak’iyo ntabotana, baoluta nda Yelusalema wae boase.

⁴⁶ Ko nd’afeka ba bembil’esato, baolotana nd’ilombe ya Nzakomba, aokit’ase nd’etei e’alaki, aolokoza baoyi’akiyo, ko aolauol’iyo biuo;

⁴⁷ ko bant’auma bandokak’ende baokamwa la wanya bokae l’elenge eki’nd’oambaka.

⁴⁸ Ko ak’iy’oene, baokamwa; ko nyango ekae aolokela, Bona, otokeelaki ngone lae? bala, emi l’ise eke tokasaki la lokeseli mongo.

⁴⁹ Ko aolakela, Lonjasaki ngamo? Kamb’inyo ntaleaki wae mpokambe belemo, imola nko bia Fafa?

⁵⁰ Ko iyo ntabakotola ncina ea joi liki’nd’oasangelaka.

⁵¹ Ko aokitela l’iyo, ko aoya nda Nazaleta; ko aolafika; ko nyango ekae aofonga baoyi’ane bauma nd’otema’okae.

⁵² Ko Yesu aokaka la wanya la lisekwa, ko la losimo ele Nzakomba l’ele banto.