Zizieziziewɔlɩa Zozii pala 'lɛ Zaan na 'la ‑afluwaa 22 - Le Nouveau Testament en langue Dida

¹ Na, 'bhlaandleea* yaan jabhʋa 'la 'nyidɔlʋa pala, ʋ ‑kplɔa wɩaan. Ʋ 'wlʋlʋa Laagɔ ɩya 'bhlabhlɩcoa 'la ‑kwlekpoa nɩkplaan.

² 'Dua 'la 'clikposidiian, 'nyɩdɔlʋa ghla ‑glagbʋ 'nyɩ jabhʋa 'la sua ‑ʋ tlʋlʋ 'lɛ dɩ 'kʋgba ‑mɔsɔ lio nɩkplaan na, 'nylugo 'lɛ ʋla ‑glagbaa sidiin. 'Cɩa 'fɩan nɩkplaan, ʋ tlʋ 'nyɩ ʋla 'takpɩa jabha 'lɛ ‑laagɔzɔan 'la ncɛlɩa.

³ Gbalʋ cɩ 'tanɩ kʋ. ‑Ma Laagɔ ɩya 'bhlabhlɩcoa 'la ‑kwlekpoa cɩ kʋʋ 'lɛ nɩkplaan kʋ ɩya ɔla lobhocuoa 'kɔɔ gʋgwla.

⁴ Ma cɩ 'ka ɔla 'klʋa 'ciinlɩ ɩya ɔla 'ŋlɩa 'ka maa 'kʋtaan kʋ.

⁵ 'Tutu cɩ 'tanɩʋ 'kʋ pla. Ma cɩ 'tanɩ ylʋ ŋama naa, ma cɩ 'tanɩ 'ylʋbhuo 'matɩ le ma 'ka salɩ, sa ‑Kwlenyɔ, Laagɔ cɩ 'ka maa ɔla zezezelia 'kʋ 'kɔsɔ ɩya ma 'ka ‑kwle 'lʋkʋlʋkʋ ɩya 'lʋkʋlʋkʋ.

Bhɩalɩwɔlɩ

⁶ Na, 'bhlaandleea* yaan 'cla lebhe: «Wɔɔnyɩtʋ ‑naa ‑glɩ ‑nʋawlɛ 'nyɩ ma cɩʋ ‑deli 'kʋ 'tɛbhalɩ. ‑Kwlenyɔ, Laagɔ, ‑ɔ nyɩtɛlɩ 'lɛ ɔla nekʋnyɩtɛnyaa* neen na, ya ɔla 'bhlaandleea lobhu, le ɔ pala ɔla lobhocuoa ɩmɩa ‑ɩ cɩ ka 'lɛ ‑clɩɩklipɛ nɩkplaan, ŋeni na.»

⁷ 'Lɩka, n ci 'yɛpɩ clɩɩklipɛ nɩkplaan. Ɔ ‑kʋ 'nanɩ, ɔmɔa ‑ɔ zʋ 'lɛ Laagɔ 'la niwɔlɩa ‑ɩ ‑kʋ 'lɛ ‑afluwaa ‑naa nɩkplaan na sa na.

⁸ ‑Amʋ Zaan, 'na 'nyukwli ya wɔlɩ ‑naa 'nu 'nyɩ 'na 'ci yɩɩ 'lɛ 'lɩ. 'Nyɩ, daa n 'nui 'lɛ 'nyɩ n 'lɩɩ 'lɛ na, n ya 'bhlaandleea, ‑ɔ palaa ‑amʋa 'lɛ mɩ na, ‑deliin ‑kukoonkplii sasla le n 'kaa 'mɔɔ gʋgwla.

⁹ ‑Ma ɔ yaan 'cla lebhe: «‑Naa nʋa sɛɛ! Lobhoco n ‑glɩmʋ 'lɛ, ‑mɔɔ ɩya ‑n bholiecɩa ‑ɔ ‑glɩ 'lɛ Laagɔnekʋnyɩtɛnyaa, ɩya maa ‑tɛtɛa ‑ɔ 'plɩlɩ 'lɛ ‑afluwaa ‑naa nɩkplaan 'la wɔɔnyɩtʋa 'kʋ na 'bhisa. Laagɔ ɩ ‑fata 'lɛ lebhe ‑n gʋgwla.»

¹⁰ 'Nyɩ ɔ yaan ‑awlɛ 'cla lebhe: «‑Naa ‑zizielia ncɛlɩ Laagɔ 'la niwɔlɩa ‑ɩ ‑zieo 'lɛ ‑afluwaa ‑naa nɩkplaan na, sa clɩɩa ya cɩmɛ na.

¹¹ Na, 'naa ɔmɔa ‑ɔla nʋnʋgbɩ 'ta 'lɛ 'kʋnylugolu na, ɔ gɩ 'kʋ ɔ nʋ ɩmɩa ‑ɩ 'ta 'lɛ 'kʋnylugolu na, 'naa nyinyinʋnyɔ gɩ 'kʋ ɔ nʋ ɔla nyinyia, ‑ma 'naa 'kʋnylugolunyɔ gɩ 'kʋ ɔ nʋ ɩ ɩmɩa ‑ɩ 'nylugolu 'lɛ 'kʋ na ɩya ‑kplɔkplɔnyɔ gɩ ɔla ‑kplɔlɩɛa 'kʋ.»

¹² 'Lɩka, n ci 'yɛpɩ ‑clɩɩklipɛ nɩkplaan. N ‑ka 'na dluuplʋlɩɛa wlɩɩn ɩya n 'ka nclɔɔ nclɔɔ, ɔla nʋnʋgbɩa 'la dlua ‑plʋ.

¹³ ‑Amʋ ‑ɔ ‑glɩ 'lɛ ‑Alɩfaa ɩya ‑Omegaa, ‑amʋ ‑glɩ 'lɛ ‑bɛka -naanɔa ɩya 'kʋbhɩalɩ -naanɔa, bhɔda ɩya 'wlukoda.

¹⁴ Ma ‑kʋ 'nanɩ, maa ‑ɔ wɔlʋ 'lɛ mala nɩkplaanplalokua le, ma 'ka jabhʋa 'la sua ‑jioli 'kʋ kalɩlɩ ɩya ma 'ka gbinia neen 'plɩlɩ ɩya ma 'ka 'dua nɩkplaan ble na.

¹⁵ A 'pa yooyo ncɛlɩa, ‑agasanyaa, ‑badaaglulinyaa, ncaabhlanyaa, ‑zliigʋgwlanya ɩya maa ‑tɛtɛa ‑ɔ ‑wa 'lɛ yodizʋlɩɛ na, ‑jlukuun.

¹⁶ ‑Amʋ Zozii, n ya 'na 'bhlaandleea lobhu, le ɔ ‑sa anyɩ dɩ ‑naa ‑tɛtɛa 'fɩan gʋgwladɩa nɩkplaan. N ‑glɩ Daviti 'la vanɩkplaa 'la 'kɔla, n ‑glɩ ziplisa 'la lelezoliea!

¹⁷ 'Wugoa ɩya 'cɩcɩɛnʋŋlɔa nabhe: «Ci!» 'Naa ɔmɔa ‑ɔ 'nu 'lɛ wɔlɩ ‑naa na, ɔmɔ ‑ma ɔ 'cla lebhe: «Ci,» 'Naa ɔmɔa 'nyutʋ bhla 'lɛ na, ci. 'Naa ɔmɔa ‑ɔ 'matɩ 'lɛ jabhʋa 'la 'nyua na, ci ɩya ɔ 'lɩʋ 'kpɔkpɔ.

¹⁸ ‑Amʋ Zaan, n solu ncaatʋtʋʋntʋa ‑ɔ nu 'lɛ Laagɔnekʋnyɩtɛyaa 'la wɔɔnyɩtʋa ‑ʋ ‑kʋ 'lɛ ‑afluwaa ‑naa nɩkplaan na lebhe nclɔɔ ‑kʋʋ 'kʋ zʋlʋ na, Laagɔ cɩ 'ka 'kwlɩbhɩɛa ‑ɛla wɔlɩa ‑zieo 'lɛ ‑afluwaa ‑naa nɩkplaan na, ɔla daa ‑gbɛ.

¹⁹ 'Nyɩ gbazɩ nclɔɔ ‑ka Laagɔnekʋnyɩtɛnyaa 'la wɔɔnyɩtʋa ‑ʋ ‑zieo 'lɛ ‑afluwaa ‑naa nɩkplaan na, bhlogbɩɩ 'yɛpɩ ‑sa na, Laagɔ cɩ 'ka ɔla daa jabhʋa 'la sua ɩya ‑kplɔkplɔdua 'la wɔlɩa ‑afluwaa ‑naa nyɩtɛ 'lɛ na nɩkplaan ‑sa.

²⁰ Ɔmɔa ‑ɔ li 'lɛ wɔlɩ ‑naa 'la ‑danʋfʋɛ na, ɔ nabhe: «‑Ghɛɛ, ɩ ci 'yɛpɩ ‑clɩɩklipɛ nɩkplaan.» Ɩ kʋ sɛɛ! 'Maa ci, ‑Kwlenyɔ Zozii!

²¹ 'Naa ‑Kwlenyɔ Zozii 'la 'nyupalɩɛa kʋ anyɩa 'fɩan ‑tɛtɛa 'kʋ!