Zizieziziewɔlɩa Zozii pala 'lɛ Zaan na 'la ‑afluwaa 20 - Le Nouveau Testament en langue Dida

Ma ya Sataan ‑palʋʋnpa liowlu ‑tabhlu

¹ Na, n ya 'bhlaandlee* bhlo 'lɩ, ɔ 'wlʋlʋa ‑laagɔɔn. Ɔ ‑kaa 'bhukua ‑ʋ 'ta 'lɛ 'wlukoda ‑ka na 'la 'safɛa ɩya ‑abhluaka 'kadie wlɩɩn.

² Ɔ ya ‑gbɔgbʋmlɛa, ‑godogodotlɛa, ‑ɛ ‑glɩ 'lɛ gɔzɛ ɩya Sataan* na 'kʋbhli 'nyɩ ɔ yɛɛ gʋa le ɛ 'ka 'bhlia nɩkplaan liowli ‑tabhlu li.

³ Ɔ yɛɛ 'bhukua ‑ʋ 'ta 'lɛ 'wlukoda ‑ka na nɩkplaan 'pa, ɔ yʋʋ kpaslɩlɩ 'nyɩ ɔ yʋʋ 'tla le ɛ 'la kanɩ ncɛlɩ 'nyiglili ‑aan ɩya liowlia ‑tabhlua 'ka 'kʋcɩlɩ. ‑Ma ‑ɩ ‑fata lebhe ɩmɩ ‑naa leen, ma 'talɩɛ 'cin ɩya ɛ 'ka ‑clɩɩklipɛ 'plɩmʋ.

⁴ 'Nyɩ n ya ‑kwlekpu 'lɩ. Ma ya maa ‑ɔ cii 'lɛ ‑kʋ sakʋkan na 'tɩtɩplalɩɛ 'la ‑jioli 'nyɩ. N ya ‑awlɛ maa ma 'dɩ 'lɛ 'wli 'kʋ, Zozii 'la ‑danʋfʋɛa ma li 'lɛ na 'la gbʋ ɩya Laagɔ 'la niwɔlɩa 'la gbʋ na 'la 'wugwia 'lɩ, ɩya maa ‑ɔ 'taa 'lɛ mlɛa ‑aana ɛla palalɩlʋʋa gʋgwla 'nyɩ ‑ɔ 'taa 'lɛ ɛla cibhlilidaa 'kʋtaan ‑aana sɔ cɩ ‑ka na ‑masɛɛ. Ma ya 'kwɩɩnkʋbho 'nyɩ maya Klisi yaa ‑kwle ‑aan liowli ‑tabhlu.

⁵ 'Lɩka ‑bɛka ‑kwɩɩnkʋbhuea. ‑Daa 'kua 'ta 'kwɩɩnkʋbho ‑aan 'nyɩ liowlia ‑tabhlua ya 'lɛ 'kʋcɩlɩ.

⁶ Ma ‑kʋ 'nanɩ 'nyɩ ma ‑glɩ ‑kplɔkplɔnya, maa ‑ɔ ‑kʋmʋ 'lɛ ‑bɛka ‑kwɩɩnkʋbhuea nɩkplaan na. ‑Mɔsɔ kwɩa 'tanɩ maa ‑jioli 'kʋ ‑kalɩ. Ma cɩ 'ka Laagɔ ɩya Klisi 'la ‑teyiyinya 'plɩ ɩya ma ‑yɔɔsɔ 'ka liowli ‑tabhlu nɩkplaan ‑kwle.

Tʋa ya Sataan ‑sɩa

⁷ Daa liowlia ‑tabhlua cɩ 'ka 'lɛ 'kʋcɩlɩ na, ma cɩ 'ka Sataan* 'cintalɩ ɩya ɔ 'ka ɔla ‑palʋʋnpapalʋa ‑zɔn 'wlʋ,

⁸ ɩya ɔ 'ka mʋ, ɔ 'ka ‑dʋdʋa 'kʋ 'la ‑kotia ‑nmɔɔnaa ma la 'lɛ Gɔgʋ ɩya Magɔgʋ na 'la ncɛlɩa 'nyiglili. Ɔ cɩ 'ka maa 'wluwlalɩ le ma 'ka tʋ vʋ: Ma ‑zu le ‑gezɔn 'la 'nyonu.

⁹ Ma ya ‑dʋdʋa ‑tɛtɛa 'kʋcɩlɩ 'nyɩ ma ya Laagɔ 'la ncɛlɩa 'la sakʋdaa ɩya ɔla ‑wawadua kpamu. ‑Ma ‑kosu ya ‑laagɔɔn 'wlʋlʋ 'nyɩ ʋ ya maa ‑sie.

¹⁰ 'Nyɩ ma ya gɔzɛ, mala 'nyiglilinyɔa, ‑kosua ɩya pipi sloa 'la 'bhukua nɩkplaan 'pa, 'yɛpɩ mlɛa ɩya yooyo Laagɔnekʋnyɩtɛnyɔa* cɩ. 'Nyɩ 'kwlɩ cɩ 'ka maa bhɩa zezezelɩɩn ɩya bhlibhliylʋʋn, 'lʋkʋlʋkʋ ɩya 'lʋkʋlʋkʋ.

Bhɩalɩtɩtɩa

¹¹ Na, n ya ‑kwlekpokadie 'pɔpʋa bhlo ɩya ɔmɔa ‑ɔ ‑kʋa 'lɛ 'kʋ sa na 'lɩ: ‑Laagɔɔn ɩya ‑dʋdʋa yɔɔ 'ci 'kʋ mlɔnʋ 'nyɩ ma cɩ 'tanɩɩ 'lɩ.

¹² 'Nyɩ n ya 'kua 'lɩ, 'cuo ɩya ‑glɛɛglɛnya, ɩ 'nylugoa ‑kwlekpoa ‑deliin, 'nyɩ ‑afluwi ya ‑kalɩɔ. ‑Daa ‑afluwa bhlo ya ‑kalɩɔ: Jabhʋa 'la ‑afluwaa, 'nyɩ ma ya 'kua 'tɩtɩpla, ɩla nʋnʋgbɩa ɩya ɩmɩa ‑ɩ ‑zieoa 'lɛ ‑afluwia nɩkplaan na 'la 'sasʋʋn.

¹³ Gea ya ɛla 'kua ‑zɔnwlaa, 'kwɩ ɩya 'kuduku ‑ma ya ɩla 'kua ‑zɔnwlaa 'nyɩ ma ya nclɔɔ nclɔɔ 'tɩtɩpla, ɔla nʋnʋgbɩa 'la 'sasʋʋn.

¹⁴ Na, ma ya 'kwɩ ɩya 'kuduku ‑kosubhukua nɩkplaan 'pa. ‑Kosubhukua ‑glɩ 'lɛ ‑mɔsɔ kwɩa!

¹⁵ Ncaatʋtʋʋntʋa ɔla 'ŋlɩ 'ta 'lɛ jabhʋa 'la ‑afluwaa nɩkplaan ‑zieo na, ‑kosubhukua nɩkplaan ma pɔɔ 'lɛ.