Zozi Klisi 'la Dɩnanɩa Makɩ zie 'lɛ na 9 - Le Nouveau Testament en langue Dida

¹ Zozii ya ‑awlɛ maa 'cla lebhe: «N solu anyɩ, ɩ ‑glɩ ‑nʋawlɛ, maa ‑ɔ ‑kʋ 'lɛ ‑da na, mala nɩkplaan ‑anʋa cɩ 'ta 'ka 'ku 'nyɩ ma cɩ Laagɔ 'la Nyɩbhɛlɩdua* ‑ʋ cili 'lɛ 'tɛtɩ nɩkplaan na 'ciinlɩ.»

Zozii ya kaci

² Clɩɩ ‑ngbʋflʋ 'plɩ 'lɛ na, Zozii ya Pɩɛlɩ, Zakɩ ɩya Zaan ‑tɛɛ 'ma, ma ya 'kikikadie bhlo 'wlu mʋ 'nyɩ maa 'ci 'kʋ, ɔ ya kaci,

³ ɔla nɩkplaanplalokua ya pubha plɛtɛtɛɛ, saa ‑dʋdʋ ‑naa 'kʋ, lokwi 'ta ka ‑azla 'lɛ pubha na.

⁴ Elii ɩya Moyizi ya maa 'ciinfutolu 'nyɩ maya Zozii zʋa 'dɩ.

⁵ Pɩɛlɩ ya Zozii 'cla lebhe: «Canyɔ, ɩ nanɩ lebhe ‑a kʋ ‑da, ‑a 'sla ‑paapli ‑mɔta, ‑nanʋ bhlo, Moyizi 'nʋ bhlo ɩya Elii 'nʋ bhlo.»

⁶ Pɩɛlɩ 'taanɩa wɔlɩa 'titia ɔ nyɩtɛa 'lɛ na ‑ci, sa ŋanɔ ‑plaa ɔya ɔ 'yea na.

⁷ 'Nyukplu ya ci, ʋla ‑zuzua ya maa 'kʋwɔlɩ 'nyɩ ‑blɩɩzɔn bhlo ya 'nyukplua nɩkplaan 'wlʋlʋ, ʋ claa lebhe: «‑Anɔ ‑naa, ɔmɔ ‑ɔ ‑glɩ 'lɛ 'na ‑wawacoa. A poo 'nyukwliin.»

⁸ 'Kplookʋ, ma na ma kope 'lɛ macɩ cɩ na, ma 'tanɩ ‑buun nclɔɔ bhlogbɩɩ 'lɩ, ‑ma Zozii ɔya maasɔ ‑tɛɛ.

⁹ Daa ma ‑kʋa 'lɛ 'kikea kwlida na, ɔ ya maa 'cla lebhe ɩmɩa ma 'lɩ 'lɛ na, Nclɔɔa 'Cʋa* 'ta ka 'kwɩɩnkʋbho na, ma 'la solui nclɔɔ bhlogbɩɩ.

¹⁰ Wɔlɩ ‑naa, ɔ solu 'lɛ maa na, ma yɩɩ 'kʋplɩlɩ. ‑Ma, maa bhlobhlo 'claclalɩa neen lebhe: «‑Anɩsaa ‑ɩ ‑glɩa ‑awlɛ 'lɛ 'kwɩɩnkʋbhue bha?»

¹¹ Ma ya Zozii neencla lebhe: «'Lɩsaa 'la gbʋ ‑jlɩmaazienyaa* claa 'lɛ lebhe Elii ‑cɩ 'ka 'lɛ ‑bɛɛ cili bha?»

¹² Ɔ ya maa neenŋonu lebhe: «‑Zaagbʋsa Elii ‑cɩ 'ka 'lɛ ‑bɛɛ cili ɩya ɔ 'ka lɩɩa ‑tɛtɛa 'kʋgɩglalɩ. ‑Ma, 'lɩsaa 'la gbʋ Zieziewɔlɩa ‑masɛɛ claa 'lɛ lebhe Nclɔɔa 'Cʋa, 'kwlɩ cɩ 'kɔɔ bhɩa ‑bhutukpa ɩya ma 'kɔɔ zɔbhɛlɩ bha?

¹³ ‑Ma n cla anyɩ lebhe: Elii ya tooto ci 'nyɩ ma yɔɔ mala saa ma ‑wa 'lɛ na nʋ, saa ɩ ‑zieoa 'lɛ lebhe ma cɩ kaa 'mɔɔ nʋ na.»

Zozii ya 'cileea 'wugo ‑nyunyua ‑kʋa 'lɛ nɩkplaan na jabha

¹⁴ Daa Zozii, Pɩɛlɩ, Zakɩ ɩya Zaan ‑kʋa 'lɛ gɩlɩnyaa* 'bɩɩn mʋnʋda na, ma ya 'lɩ lebhe ncaabhutukpa ‑didioa maa 'nyɩ ‑jlɩmaazienyaa ‑ya maasɔ 'tɩtɔa wɔlɩ.

¹⁵ Daa ncɛlɩa 'lɩ 'lɛ Zozii ‑jaa na, nikpoo ya maa sla 'nyɩ maya sɔmɩ yɔɔ 'bɩɩn mʋnʋ le ma 'kɔɔ ‑ayo 'pa.

¹⁶ Zozii ya ɔla gɩlɩnyaa neencla lebhe: «Wɔɔsaa aya maasɔ 'tɩtɔa 'lɛ bha?»

¹⁷ ‑Alawleea sidiin, nclɔɔ bhlo yɔɔ neenŋonu lebhe: «Canyɔ, 'na 'cʋa ‑n ‑lɔɔ 'lɛ, sa 'wugo ‑nyunyu 'nyɩ 'tɔɔ ‑jioli le ɔ nyɩtɛ.

¹⁸ Daa 'fɩan ɔ cɩ 'lɛ kʋ na, 'wugoa ‑kɔɔ 'kʋ ‑gblaa na, ka ʋ palɩɔ 'lɛ sa, ‑daadʋflifli wlʋɔ 'lɛ neen, ɔ talɩ 'lɛ ‑glaa 'nyɩ ɔ jɛjɛlɩ 'lɛ. N ya ‑naa gɩlɩnyaa 'cla lebhe ma 'tli 'wugo ‑naa, ‑ma ma 'ta mino.»

¹⁹ Ɔ ya maa 'cla lebhe: «Anyɩ ‑pɔtɔnʋ 'la ncɛlɩ ‑naa, ‑a 'ta 'lɛ pɔɔtɛtɛ ‑ka na, bhlaasaan n cɩ 'kaa 'lɛ anyɩ cɩɩnwlʋlʋ bha? 'Na pɔɔklalɩɛa, bhlaasaan ɩ cɩ 'kaa 'lɛ 'wluko bha? A ‑laan 'cileea.»

²⁰ Ma yɔɔ mɔ fa. Daa 'wugoa 'lɩ 'lɛ Zozii 'ciin na, ʋ ya 'cileea 'dɩdɔ gbasa, ɔ ya ‑dʋdʋ 'kʋ bhli, ɔ 'bhisioa 'nyɩ ‑daadʋflifli wlʋa 'mɔɔ neen.

²¹ Zozii ya ɔ toa neencla lebhe: «Ɩmɩ ‑naa ‑kɔɔ 'lɛ nʋlɩɛ bhɔ na, ɩ nʋnɩ liowli ‑zlʋsaa bha?» Toa yɔɔ neenŋonu lebhe: «Ɔla 'cuon tooto.

²² ‑Daanda, 'wugoa pɔɔ ‑kosuun, ʋ pɔɔ 'nyiin le ɔ 'ka 'ku. ‑Ma ɩ ‑ka ‑kʋ lebhe ‑n cɩ mino na, 'lɩ ‑anyɩ ŋaazɩɩn ɩya ‑n ci ‑anyɩ 'kʋ.»

²³ Zozii yɔɔ 'cla lebhe: «'Lɩsaa 'la gbʋ ‑n claa 'lɛ lebhe: Ɩ ‑ka ‑kʋ lebhe ‑n cɩ mino na bha? Ɔmɔa ‑ɔ ‑ka 'lɛ pɔɔtɛtɛ na, ɔ mino ‑tɛtɛa 'fɩan nʋlɩɛ.»

²⁴ 'Kplookʋ, 'cileea toa yaan ‑gaa 'nyɩ ɔ ya 'cla lebhe: «N 'tɛlɩ pɔlɛ 'kʋ, bhooje ciin 'kʋ ɩya ‑n zʋlʋ 'na pɔɔtɛtɛa 'kʋ.»

²⁵ Daa Zozii 'lɩ 'lɛ lebhe ncaabhutukpa 'wlalɩa 'wlʋ na, ɔ ya 'wugo ‑nyunyua 'wlugaalɩ 'nyɩ ɔ yʋʋ 'cla lebhe: «‑Amuna ɩya 'nyukwliteli ‑wugo, ‑amʋ n clɔɔ lebhe 'wlʋ 'cilee ‑naa nɩkplaan ɩya ‑naa cɔlɔanɩ ‑ylɛylɛ.»

²⁶ 'Wugoa yaan ‑gaa, ʋ ya 'cileea gbasa 'dɩdɔ 'nyɩ ʋ ya ‑zɔnwlʋ. 'Cileea ya 'plɩ le saa ɔ ya 'lɛ 'ku na, ɩ gba na, maa 'fɩan ma claa lebhe: «Ɔ ya 'ku.»

²⁷ ‑Ma Zozii ya ɔla sɔa 'kʋbhli, ɔ yɔɔ 'kubhli 'nyɩ ɔ ya 'nylugo.

²⁸ Daa Zozii ble 'lɛ 'sleen na, ɔla gɩlɩnyaa yɔɔ ‑asule neencla lebhe: «'Lɩsaa 'la gbʋ ‑anyɩ ‑a 'ta 'lɛ 'wugo ‑naa 'tliliɛ mino bha?»

²⁹ Ɔ ya maa 'cla lebhe: «‑Sa 'la 'wugo ‑naa, bhibhieli ‑tɛɛ ‑ɩ minʋʋ 'lɛ 'tlilɩɛ.»

Zozii nyɩtɛ ‑mɔsɔda ɔla 'kwɩ ɩya ɔla 'kwɩɩnkʋbhue 'la wɔlɩ

³⁰ Zozii ɩya ɔla gɩlɩnyaa* ya 'dɛ 'wlʋ, ma 'ŋatɩa Galileebhlɩa, ‑ma Zozii 'taa ‑wa lebhe ma cibhlilia sɛɛ.

³¹ Sa ɔ caa ɔla gɩlɩnyaa 'nyɩ ɔ claa maa lebhe: «Nclɔɔa 'Cʋa*, ma cɩ 'kɔɔ ncɛlɩ wlɩɩn 'pɛlʋ zʋlʋ, ma 'kɔɔ 'bhla ‑ma ɩla ‑mɔta ‑zelɩa, ɔ cɩ 'ka 'kwɩɩnkʋbho.»

³² ‑Ma gɩlɩnyaa 'nu 'taa wɔlɩ ‑naa 'la ‑zɔn 'nyɩ ma 'kaa 'mɔɔ 'lɛ neencla na, ɩ ‑kaa maa ŋanɔ.

‑Anɔsaa ‑ɔ zia 'lɛ ɔ 'yea -tɛtɛa 'kʋ bha?

³³ Zozii ɩya ɔla gɩlɩnyaa* ya Kapɛnayumʋ mʋ. Ma ble 'lɛ 'sleen na, Zozii ya ɔla gɩlɩnyaa neencla lebhe: «‑Gugwiea 'kʋ, wɔlɩ saa a 'titɔanɩa 'lɛ bha?»

³⁴ ‑Ma 'ma ‑sa 'taa ne. Sa ‑gugwiea 'kʋ, ma yaa wɔlɩ 'tɩtɔ le ma 'kaa, ɔmɔa ‑ɔ zi 'lɛ maa 'fɩan 'kʋ na, cibhlili.

³⁵ Zozii ya sakʋ, ɔ ya 'kʋgba ‑mɔsɔa la 'nyɩ ɔ ya maa 'cla lebhe: «‑Ɔ ‑ka ‑wa lebhe ɔ 'ka 'kʋklʋʋn kʋ na, 'naa ɔ 'plɩ anyɩa 'fɩan 'la leen ‑naanɔ ɩya ala lobhoco.»

³⁶ 'Nyɩ ɔ ya 'cileeco 'ma, ɔ yɔɔ maa sidiin zʋ, ɔ yɔɔ gbʋgbʋa 'nyɩ ɔ ya maa 'cla lebhe:

³⁷ «Ɔmɔa, ‑amʋ 'wluku, ‑ɔ ‑cɩ ka 'lɛ ‑anɔ ‑naa 'bhisa 'kʋ 'la 'cilee 'nanɩ kla na, ‑amʋ 'titi ɔ kla 'lɛ 'nanɩ. 'Nyɩ ɔmɔa ‑ɔ klaan 'lɛ 'nanɩ na, ‑n 'ta ‑amʋ ɔ kla 'ta 'lɛ 'nanɩ, ‑ma ɔmɔa, ‑ɔ lobhuun 'lɛ na.»

Ɔmɔa ‑ɔ 'ta 'lɛ ‑anyɩ ‑zɔ na, ɔ ‑glɩ ala ‑plɔnyɔ

³⁸ Zaan ya Zozii 'cla lebhe: «Canyɔ, ‑a ya nclɔɔ bhlo 'lɩ, ɔ ma ‑naa 'ŋlɩa 'nyɩ ɔ tli 'wugwi ‑nyinyi. ‑A ya wabha lebhe ‑a kaa 'mɔɔ mɩ tie, sa 'ɔ gɩlɩ 'ta ‑anyɩ na.»

³⁹ ‑Ma Zozii ya 'cla lebhe: «A 'la tieo mɩ. Sa nclɔɔ cɩ 'ta 'na 'ŋlɩ 'ma, ɔ 'ka 'ciinzizielɩlobholi nʋ ɩya ɔ ‑ka 'dɛ 'wlʋ na, ɔ 'ka 'na wɔɔnyinyi nyɩtɛ.

⁴⁰ Ɔmɔa ‑ɔ 'ta 'lɛ ‑anyɩ ‑zɔ na, ɔ ‑glɩ ‑ala ‑plɔnyɔ.

⁴¹ 'Nyɩ ɔmɔa ‑ɔ ‑cɩ ka 'lɛ anyɩ 'nyukobhu 'nyɩ le a 'ka 'mla, ‑ofi lebhe, a ‑glɩ Laagɔ 'la ‑Sasanyɔa* 'nʋa na, n solui anyɩ, ɩ ‑glɩ ‑nʋawlɛ, ɔla dluuplʋlɩɛa 'ta 'dɛ ‑wlʋɔ.»

Pɔlɛkʋzʋlʋlɩɛ

⁴² Zozii ya 'kʋgɩ 'nyɩ ɔ ya 'cla lebhe: «Ncaatʋtʋʋntʋa ‑ɔ ‑cɩ ka 'lɛ 'cuo ‑naa ‑ma ‑ka 'lɛ 'na pɔɔtɛtɛ, mala sidiin 'la bhlo nyinyiin fa na, ɩ nanɩ le ma gʋalɩɔ cokwie 'kadie ‑blɩɩn ɩya ma 'pɔɔ geen.

⁴³ Ɩ ‑ka ‑kʋ lebhe ‑naa sɔa, ʋmʋ ‑kɔɔ nyinyiin fa na, 'dɩʋ 'kʋ. Sa ‑n ‑ya sɔ klea ‑ka jabhʋa nɩkplaan ble na, ɩ nanɩ 'nyɩ ɩ zi saa ‑n ‑ya sɩa ‑mɔsɔa cɩ 'kaa 'lɛ ‑kosuun mʋ na 'kʋ. ‑Kosu ‑naa ‑ʋ 'ta 'lɛ ŋomuda ‑ka na. [

⁴⁴ ]

⁴⁵ Ɩ ‑ka ‑kʋ lebhe ‑naa bhoa ‑ʋ kɔɔ nyinyiin fa na, 'dɩʋ 'kʋ. Sa, ‑n ‑ya bho klea ‑ka jabhʋa nɩkplaan ble na, ɩ nanɩ 'nyɩ ɩ zi saa ‑n ‑ya bhɩa ‑mɔsɔa cɩ 'kaa 'lɛ ‑kosua ‑ʋ ŋomu 'ta 'lɛ na nɩkplaan ble na 'kʋ. [

⁴⁶ ]

⁴⁷ 'Nyɩ ɩ ‑ka ‑kʋ lebhe ‑naa 'cia ‑ɛ ‑kɔɔ nyinyiin fa na, kpɛɛ. Sa ‑n ‑ya 'ci bhlo ‑ka Laagɔ 'la Nyɩbhɛlɩdua* nɩkplaan ble na, ɩ nanɩ 'nyɩ ɩ zi saa ‑n ‑ya 'cia ‑mɔsɔa cɩ 'kaa 'lɛ ‑kosua ‑ʋ ŋomu 'ta 'lɛ na nɩkplaan ‑pɔɔ na 'kʋ.

⁴⁸ Gbazɩa nɔa 'ku 'ta 'lɛ 'nyɩ ‑kosua ŋomu 'ta 'lɛ na.

⁴⁹ Sa ‑kosuun nclɔɔ nclɔɔ cɩ 'ka 'lɛ ‑gliin 'pɔɔ.

⁵⁰ ‑Glii ‑glɩ ‑lʋʋ 'nanʋ. ‑Ma gbazɩ ‑glii ‑kanɩ 'dʋʋn 'wlʋ na, 'nsasa a cɩ 'kanɩɩ 'lɛ 'dʋʋn zʋzʋlʋ bha? 'Naa a kalɩ ‑glii anyɩ 'titi acɩ nɩkplaan ɩya pupue kʋ aya a 'ye ‑gbaaglɩɩn.»