Zozi Klisi 'la Dɩnanɩa Makɩ zie 'lɛ na 8 - Le Nouveau Testament en langue Dida

Zozii ya ncaatabhli wli ‑nmɔɔna lililɩɩ 'nyɩ

¹ 'Dɛ 'la clɩɩa 'kʋ, ncaabhutukpa ya ‑awlɛ 'dɛ 'wluwlalɩ, ma 'taa lililʋʋ ‑ylɛylɛ ‑ka. Zozii ya ɔla gɩlɩnyaa* la 'nyɩ ɔ ya maa 'cla lebhe:

² «Ncɛlɩ ‑naa 'la gbɩa ‑kaan ŋaazɩ. 'Lɩka, ma yaan cɩ clɩɩ ‑mɔta li 'nyɩ ma 'tanɩ lililʋʋ ‑ylɛylɛ ‑ka.

³ Gbazɩ n ‑ka maya nyɔmɩ ‑kɔfɩa 'cintalɩ le ma cɔlɔ ma 'bhlɩ na, ‑gugwiea 'kʋ, ŋɔmʋ cɩ 'ka maa ‑sɩa, sa ‑anʋa 'wlʋ 'koonkoon na.»

⁴ Ɔla gɩlɩnyaa yɔɔ neenŋonu lebhe: «‑Da ‑kote ‑naa nɩkplaan, 'nda 'titi, ‑a ‑cɩ kaa 'lɛ 'flawoa ‑ʋ cɩ 'ka 'lɛ maa 'fɩan lua na, 'lɩlɩ bha?»

⁵ Zozii ya maa neencla lebhe: «'Flawu ‑zlʋsaa a ‑ka 'lɛ bha?» Ma yɔɔ 'cla lebhe: «‑Ngbɔɔsɔ.»

⁶ 'Nyɩ ɔ ya ‑alawleea 'cla lebhe ma kʋ ‑dʋdʋa 'kʋ sa. Ɔ ya 'flawua ‑ngbɔɔsɔa 'ma, ɔ ya Laagɔ bhɔlʋ, ɔ yɩɩ 'kliindɩdɩlɩ 'nyɩ ɔ yɩɩ ɔla gɩlɩnyaa 'nyɩ le ma 'kɩɩ poli 'nyɩ ma yɩɩ ‑alawleea poli.

⁷ Ma ‑kamʋa 'dɛ ‑zlii cʋ ‑zlʋsaasa, ɩmɩ ‑ma, ɔ yɩɩ 'nyupalɩ 'nyɩ ɔ ya maa 'cla lebhe ma poli ‑mʋɩ.

⁸ Ma ya li 'nyɩ ma ya lo. 'Klia ‑ɩ ji 'lɛ na, ma yɩɩ 'kʋbhli 'nyɩ ɩ ya ‑toku ‑ngbɔɔsɔ 'kʋ ye.

⁹ 'Nyɩ ɔ yanɩ maa 'cintalɩ le ma cɔlɔ ma 'bhlɩ, ma cɩa ‑sa ncaatabhliwli ‑nmɔɔna (4000) 'wlʋ.

¹⁰ 'Kplookʋ ɔya ɔla gɩlɩnyaa ya gɔlʋa nɩkplaan 'tɔ 'nyɩ ma ya Damanutabhlɩa 'kʋ mʋ.

Falizɩɛnnyaa ya 'ciinzizielɩlobholi 'clalɩ

¹¹ Falizɩɛnnyaa* ya ci 'nyɩ maya Zozii ya wɔɔtɩtʋɛ bhɔ. Ma 'kɔɔ 'lɛ 'gbuzu ‑zɔn 'pa na, ma yɔɔ 'ciinzizielɩlobholia ‑ɩ 'wlʋlʋ 'lɛ ‑laagɔɔn na 'clalɩ.

¹² Ɔ ya nyɔmʋslu 'nyɩ ɔ ya 'cla lebhe: «'Lɩsaa 'la gbʋ ‑pɔtɔnʋ 'la ncɛlɩa 'clalɩa 'lɛ 'ciinzizielɩlobholi bha? N solui anyɩ, ɩ ‑glɩ ‑nʋawlɛ: Ghleda bhlogbɩɩ cɩ 'ta maa ‑nyɩɔ!»

¹³ Daa ɔ bhɩalɩ 'lɛ nyɩtɛlɩɛ na, ɔ ya maa cɩɩnwlʋlʋ, ɔ ya ‑awlɛ gɔlʋa nɩkplaan 'tɔ 'nyɩ ɔ ya 'nyigean mʋ.

Gɩlɩnyaa 'taa Zozii 'la wɔɔnyɩtʋa ‑zɔn 'nu

¹⁴ Gɩlɩnyaa yaa bo, ma 'ta 'flawu 'ma, 'flawo bhlogbɩɩ ‑tɛɛ ma ‑kaa 'lɛ macɩ 'kʋ gɔlʋa nɩkplaan.

¹⁵ Zozii ya maa wɔlɩ pɔlɛcɩfalɩ 'nyɩ ɔ ya maa 'cla lebhe: «A zʋlʋ pɔlɛkʋ! Falizɩɛnnyaa* 'la 'zɩa* ɩya Ewlɔdʋ 'la 'zɩa, a 'la mʋnʋɩ.»

¹⁶ Gɩlɩnyaa, maa bhlobhlo 'claclalɩa neen, sa ma 'taa 'flawo ‑ka na.

¹⁷ Zozii ya sɛɛ cibhlili 'nyɩ ɔ ya maa neencla lebhe: «A 'ta 'lɛ 'flawo ‑ka na, 'lɩsaa 'la gbʋ a nyɩtɛ ka ‑azla 'lɛ 'flawoa a 'ta 'lɛ ‑ka na, 'la wɔlɩ bha? A 'ta ka ‑azla 'nu bha? 'A falɩ 'ta wɔlɩ pɔlɛ cɩ bha? Ka ala pɔlɛa ‑titlilio ka 'lɛ bha?

¹⁸ A ‑ka 'ci 'nyɩ 'a 'lɩ 'ta sa. A ‑ka 'nyukwli, a 'nu 'ta bha? A luoli 'ta bha?

¹⁹ Daa ncaatabhliwli ‑ngbia (5000) 'la gbʋ, n 'dɩdɩlɩa 'lɛ 'flawua ‑ngbia 'kliin na, 'flawu klia 'la ‑toku ‑zlʋsaa a famʋanɩa 'lɛ bha?» Ma yɔɔ 'cla lebhe: «'Kʋgba ‑mɔsɔ.»

²⁰ «'Nyɩ daa, ncaatabhliwli ‑nmɔɔnaa (4000) 'la gbʋ, n 'dɩdɩlɩa 'lɛ 'flawua ‑ngbɔɔsɔa 'kliin na, 'flawu klia 'la ‑toku ‑zlʋsaa a famʋanɩa 'lɛ bha?» Ma nabhe: «‑Ngbɔɔsɔ.»

²¹ Zozii ya maa 'cla lebhe: «'Nyɩ a 'nu 'ta ka ‑azla 'lɛ ‑tɛɛ bha?»

Zozii ya 'citutunyɔ jabha

²² Zozii ɩya ɔla gɩlɩnyaa ya Bɛsayida ŋeni. Ma yɔɔ 'citutunyɔ bhlo ‑la 'nyɩ ma yɔɔ 'wlusla le ɔ klaa 'mɔɔ cɩ.

²³ Ɔ ya 'citutunyɔa sɔ kpa, ɔ ‑yɔɔsɔ ya 'dua nɩkplaan 'wlʋ. Ɔ ya ɔla 'cia ‑daadʋ ‑bʋa, ɔ yɔɔ sɩ 'kʋ ‑gbɛ 'nyɩ ɔ yɔɔ neencla lebhe: «‑N lɩ lʋʋ bha?»

²⁴ 'Citutunyɔa ya 'ci 'kʋbhli 'nyɩ ɔ ya 'cla lebhe: «N ‑jlɛ ncɛlɩ, 'ma ‑kʋ le si, ‑ma ma namʋ.»

²⁵ Ɔ ya ‑awlɛ ɔla 'cia sɩ 'kʋ ‑gbɛ 'nyɩ ɔ lɩanɩa sa, ɔ ya jabha, ɔ ‑jlɛanɩa lɩɩa ‑tɛtɛa wɩaan.

²⁶ Ɔ yɔɔ ‑jioli 'nyɩ le ɔ mʋ 'sleen, ‑ma ɔ yɔɔ 'cla lebhe: «‑Naa 'ŋatɩa 'dua.»

Pɩɛlɩ nabhe Zozii ‑glɩ 'lɛ Laagɔ 'la ‑Sasanyɔa

²⁷ Zozii ɔya ɔla gɩlɩnyaa* ya 'bhlɩa ma la 'lɛ Sezalee Filipʋ na 'la cɩa 'dia 'kʋ mʋ. ‑Gugwiea 'kʋ, ɔ ya ɔla gɩlɩnyaa neencla lebhe: «Ncɛlɩ 'la da, ncaasaa n ‑glɩa 'lɛ bha?»

²⁸ Ma yɔɔ 'cla lebhe: «‑Anʋa nabhe, ‑mɔ ‑glɩ 'lɛ 'Nyuwluzʋnyɔ Zaan, ‑anʋa nabhe ‑mɔ ‑glɩ 'lɛ Elii 'nyɩ ‑anʋa ma cla 'lɛ lebhe ‑n ‑glɩ Laagɔnekʋnyɩtɛnyaa* mala nɩkplaan bhlo.»

²⁹ Zozii ya maa neencla lebhe: «'Nyɩ anyɩ ala da, ncaasaa n ‑glɩa 'lɛ bha?» Pɩɛlɩ ya nesa 'nyɩ ɔ yɔɔ 'cla lebhe: «‑Mɔ ‑glɩ 'lɛ Laagɔ 'la ‑Sasanyɔa*.»

³⁰ Ɔ ya maa tie le wɔlɩ ‑naa, ma 'la solui nclɔɔ bhlogbɩɩ.

Zozii 'la 'kwɩ ɩya ɔla 'kwɩɩnkʋbhue

³¹ Zozii ya ɔla gɩlɩnyaa* calɩɛ bhɔ 'nyɩ ɔ claa lebhe: «Ɩ ‑fata lebhe Nclɔɔa 'Cʋa*, 'kwlɩ ‑bhutukpa bhɩɔ, ɩya ncaakpasɩa, ‑teyiyinya tocɩa ɩya ‑jlɩmaazienyaa* ‑blɔɔ, ma bhlɔɔ, ɩya ‑mɔta ‑zelia, ɔ ‑bho kwɩɩn 'kʋ.»

³² Ɩmɩ ‑naa, ɔ nyɩtɛa 'mɩɩ 'kpataa. Pɩɛlɩ ‑yɔɔsɔ ya gbɛga 'nyɩ ɔ zalalɩa 'mɔɔ 'ci.

³³ Daa ɔ cala 'lɛ kwla 'nyɩ ɔ 'lɩ 'lɛ ɔla gɩlɩnyaa na, ɔ ya Pɩɛlɩ 'wlugbɛtɛlɩ 'nyɩ ɔ yɔɔ cla lebhe: «Sataan*, 'wlʋlʋʋn cɩɩn, ‑naa wɔɔgugwiea 'ta Laagɔ 'la wɔɔgugwie ‑glɩ, ‑ma ncɛlɩ 'la wɔɔgugwie ɛ ‑glɩ 'lɛ.»

³⁴ Zozii ya ‑alawleea ɩya ɔla gɩlɩnyaa la 'nyɩ ɔ ya maa 'cla lebhe: «Nclɔɔ ‑ɔ ‑ka ‑wa lebhe ‑ɔ kaan gɩlɩ na, 'naa ɔ ‑blɔ ɔmɔ 'titi ɔcɩ, ɔ 'ma ɔla dabhlalɩsua ɩya ɔ gɩlɩɩn.

³⁵ Ɔmɔa ‑ɔ ‑wa 'lɛ le ‑ɔ ka ɔla jabhʋa 'kʋtɩtɔlʋ na, ʋ cɩ ‑gbɩɔ, ‑ma ɔmɔa, ‑ɔ ŋonu 'lɛ lebhe ɔla jabhʋa ‑gbɩɔ, ‑amʋ ɩya Dɩnanɩa* 'la gbʋ na, ɔ cɩ 'kʋʋ gbʋʋnsa.

³⁶ Nclɔɔ 'la jabhʋa ‑ka ‑dʋdʋ 'kʋ 'la 'nanɩa ‑tɛtɛa 'la 'matɩlɩɛ nɩkplaan ‑gbɩɔlʋ na, ‑nvʋsʋɛ saa ɔ 'lɩa 'lɛ bha?

³⁷ 'Nyɩ 'lɩsaa 'titi nclɔɔ cɩ 'kaa 'lɛ ‑sa ɩya ʋ 'ka 'lɛ ɔla jabhʋa nɩkplaan 'kplɩ bha?

³⁸ Ncaatʋtʋʋntʋa n ‑ya 'naa wɔɔnyɩtʋa 'la ‑zo cɩ 'ka 'lɛ 'bhla, ‑pɔtɔnʋ 'la ncɛlɩa ‑ɔ 'wlʋlʋ 'lɛ Laagɔ cɩɩn 'nyɩ ‑ɔ nʋ 'lɛ nyinyi na 'ci 'ku na, Nclɔɔa 'Cʋa ‑ma, 'dɛ 'la nclɔɔa 'la ‑zo cɩ kɩnɩɔ 'bhlamʋ, daa ɔya ‑kplɔkplɔ ‑bhlaandleecɩa* cɩ 'ka 'lɛ ɔ To 'la 'klʋagbaa nɩkplaan cili na.»