Zozi Klisi 'la Dɩnanɩa Makɩ zie 'lɛ na 7 - Le Nouveau Testament en langue Dida

Zozii ɩya Zifʋnyaa 'la ‑jlɩmaa

¹ Falizɩɛnnyaa* ɩya ‑jlɩmaazienya* ‑zlʋsaasa ya Zolizalɛmʋ 'wlʋlʋ, ma ya ci 'nyɩ ma ya Zozii cɩ 'wluwlalɩ.

² Ma ya 'lɩ lebhe ɔla gɩlɩnyaa* ‑anʋa, ma 'ta wlɩwɔlʋ, saa mala ‑jlɩmaa 'clalɩ 'lɛ na 'nyɩ ma ya 'lɛ li.

³ Falizɩɛnnyaa* ɩya ‑daa Zifʋnyaa* 'fɩan 'plɩlɩ ma tokadɔcɩ 'la ‑jlɩmaa 'kʋ. Ma 'ta ka 'nanɩ wlɩwɔlʋ na, 'ma li 'ta.

⁴ 'Nyɩ gbazɩ ma ‑ka ‑adabhlaan 'wlʋ, 'nyɩ ma 'ta ka cɩwɔlʋ na, maa li 'ta. 'Sɛ 'la ‑godogodonʋnʋgbɩ ‑bhutukpa, ma 'plɩlɩ 'lɛ 'kʋ na, ɩ ‑kʋ. Ɩmɩ -ɩ -glɩ 'lɛ 'nyumlakobhi, nyidi ɩya ‑dakwɩ 'la cɩwɔlʋlɩɛ.

⁵ Falizɩɛnnyaa ɩya ‑jlɩmaazienyaa ya Zozii neencla lebhe: «'Lɩsaa 'la gbʋ ‑naa gɩlɩnyaa 'plɩlɩ 'taa 'lɛ ‑a tokadɔcɩ 'la ‑jlɩmaa 'kʋ bha? Wɔɔsaa 'wluku maa wɔlʋ 'ta 'lɛ wlɩ 'nyɩ ma lia 'lɛ bha?»

⁶ Zozii ya maa 'cla lebhe: «Yooyo ncɛlɩnyɩ, Laagɔnekʋnyɩtɛnyɔ* Izayii ‑kaa 'ge, daa ɔ 'cla 'lɛ lebhe: Laagɔ nabhe: 'Lɔlʋʋ ‑naa, nimli 'kʋ ʋ kanvʋlʋʋn 'lɛ, ‑ma ʋla pɔlɛa tlʋʋn cɩ da.

⁷ 'Kpɔkpɔ 'titi ma gʋgwlaan 'lɛ, sa, mala wɔlɩa ma ca 'lɛ na, ncɛlɩ 'la ‑jlɩmaa ɩ ‑glɩ 'lɛ.»

⁸ Zozii ya ‑awlɛ maa 'cla lebhe: «A salɩ Laagɔ 'la ‑jlɩmaa 'ci kʋ 'nyɩ a 'plɩlɩ ncaanʋnʋgbɩa 'kʋ.»

⁹ Zozii claa maa lebhe: «A salɩ Laagɔ 'la ‑jlɩmaa 'ci 'kʋ le a 'ka a 'naa 'nanɩ 'kʋ 'plɩlɩsa cibhlili.

¹⁰ Sa Moyizi ya 'cla lebhe: Zʋ ‑n 'nɔ ɩya ‑n to. Ɔ ya ‑awlɛ 'cla lebhe: Ɔmɔa ‑ɔ ‑cɩ ka 'lɛ ɔ to ‑aana ɔ 'nɔ vla na, ɩ ‑fata lebhe ma 'bhlɔɔ.

¹¹ ‑Ma anyɩ a cla lebhe: Ka ɩ ‑ka ‑kʋ le nclɔɔ ‑ka ɔ to ‑aana ɔ 'nɔ 'cla lebhe: Lʋʋa n cɩ 'kaa ‑mɔɔ 'lɛ 'nyɩ le n 'kɔɔ klalɩ na, ʋ ‑glɩ ‑kɔlʋban, ɩ sa ‑zɔn le n yʋʋ Laagɔ 'ŋlɩ cɩ slalɩ na,

¹² a nyɩ 'dɛ ‑naanɔa ‑jioli le ɔ 'la klalɩanɩ ɔ to ‑aana ɔ 'nɔ.

¹³ 'Lɩka ‑sa, a sa 'lɛ 'dɛ Laagɔ 'la wɔɔnyɩtʋa, 'nyɩ a ca 'lɛ ala ‑jlɩmaa. 'Nyɩ a nʋ 'sɛ 'la nʋnʋgbɩ ‑bhutukpa.»

Ɩmɩa ‑ɩ nyumo 'lɛ nclɔɔ Laagɔ 'ci 'kʋ na

¹⁴ Zozii ya ‑awlɛ ‑alawleea la 'nyɩ ɔ yaa 'cla lebhe: «Anyɩa 'fɩan a poon 'nyukwliin ɩya a 'nu.

¹⁵ Lʋʋa ‑ʋ mʋ 'lɛ nclɔɔ nɩkplaan na, ‑n 'ta ʋmʋ nyumo 'tɔɔ 'lɛ Laagɔ 'ci 'kʋ, ‑ma ɩmɩa ‑ɩ 'wlʋlʋɔ 'lɛ nɩkplaan na, ɩmɩ ‑ɩ nyumoo 'lɛ.» [

¹⁶ ]

¹⁷ Na, daa Zozii 'wlʋlʋ 'lɛ ‑alawleea cɩɩn 'nyɩ ɔ mʋ 'lɛ 'sleen na, ɔla gɩlɩnyaa* yɔɔ 'cla le ɔ ‑sa maa ‑nyandlaa ɔ bu 'lɛ na ‑zɔn.

¹⁸ Ɔ ya maa 'cla lebhe: «Na anyɩ ‑ma, ka 'a 'nu 'ta 'lɛ bha? 'A 'lɩ 'ta le lʋʋa ‑ʋ mʋ 'lɛ nclɔɔ nɩkplaan na, 'ʋ nyumo 'tɔɔ Laagɔ 'ci 'kʋ bha?

¹⁹ Sa 'ʋ mʋ 'ta ɔla pɔlɛa 'ciin, ‑ma ɔla nɩkplaan ʋ mʋ 'lɛ 'nyɩ ɔ mʋ 'lɛ 'kwla 'kʋ.» Ka Zozii cla 'lɛ ‑da lebhe lililɩɩa 'fɩan ɩ ‑kplɔ.

²⁰ Ɔ ya ‑awlɛ 'cla lebhe: «Ɩmɩa ‑ɩ 'wlʋlʋ 'lɛ nclɔɔ nɩkplaan na, ɩmɩ ‑ɩ nyumoo 'lɛ Laagɔ 'ci 'kʋ.

²¹ Wɔɔgugwie ‑nyinyea 'fɩan, ɛ 'wlʋlʋ nclɔɔ nɩkplaan, ɔla pɔlɛ 'ciin: ‑Badaaglu, 'wi, ncaabhlalɩɛ,

²² ŋodimatɩɛ ɩya ŋlʋmatɩɛ, ‑lɩɩtʋtʋɛ, ‑abhɔlɛ, ‑kplakpla, yooyogbanʋlɩɛ, woze, ‑glaankalɩɛ, ‑tutule ɩya pɔɔbhlagbɩ.

²³ Wɔɔnyinyi ‑naa ‑tɛtɛa, nclɔɔ 'la pɔlɛ 'ciin ɩ 'wlʋlʋ 'lɛ 'nyɩ ɩ nyumoo 'lɛ Laagɔ 'ci 'kʋ.»

Lowluŋlɔ bhlo 'la pɔɔtɛtɛ

²⁴ Zozii ya 'dɛ 'wlʋ 'nyɩ ɔ ya Tilibhlɩa 'kʋ mʋ. Ɔ ya 'sle bhlo nɩkplaan ble, ɔ 'taa ‑wa lebhe nclɔɔ cibhlilia sɛɛ, ‑ma ma ya sɛɛ cibhlili ‑tɛɛ.

²⁵ 'Ŋlɔ bhlo, 'wugo ‑nyunyu bhɩa ɔla ŋlʋcʋkwla 'kwlɩ. Daa ɔ 'nu 'lɛ Zozii 'la wɔlɩ na, 'kplookʋ, ɔ ya ci 'nyɩ ɔ yɔɔ ‑deliin ‑kukoonkplii sasla.

²⁶ 'Ŋlɔ ‑naa ‑glɩa Glɛkɩŋlɔa ma valɩlɩ 'lɛ Silofenisibhlɩa 'kʋ na. Ɔ 'clalɩa Zozii le ɔ ‑sa ɔ ‑nyɔŋlɔ 'wugo ‑nyunyua nɩkplaan.

²⁷ Zozii yɔɔ 'cla lebhe: «'Talɩ 'cuoa 'cin ma 'ka lo 'fɩɔn, sa ɩ 'ta nanɩ lebhe ma 'ma 'cuoa 'la 'flawoa ɩya ma 'pʋʋ goye.»

²⁸ 'Ŋlɔa yɔɔ 'cla lebhe: «‑Kwlenyɔ, ɩ ‑glɩ ‑nʋawlɛ, ‑ma goyea kʋ 'tlɔnblɩa ‑zɔn 'nyɩ ɩ li ne 'kʋ 'la 'kli pɩa ‑ɩ bhli 'lɛ na.»

²⁹ Zozii yɔɔ 'cla lebhe: «Wɔlɩ ‑naa ‑n nyɩtɛ 'lɛ na, ɩmɩ 'wluku, mʋ, ‑ma 'wugo ‑nyunyua ya ‑naa 'cʋa nɩkplaan 'wlʋ.»

³⁰ Daa ɔ cɔlɔ 'lɛ 'sleen na, 'cileea ‑gataa 'kusia 'kʋ, 'wugo ‑nyunyua yaa 'mɔɔ nɩkplaan 'wlʋ.

Zozii ya ‑amunaanyɔ bhlo jabha

³¹ Zozii ya Tilibhlɩa 'kʋ 'wlʋ, ɔ ya Sidɔɔn 'plɩlɩ, ɔ ya Dekapɔlʋbhlɩa 'ŋatɩ 'nyɩ ɔ ya Galileenyia cɩ cɔlɔ.

³² Ma yɔɔ 'nyukwlitelinyɔ bhlo nyɩtʋ bhɩaa 'lɛ 'kwlɩ na, ‑la 'nyɩ ma yɔɔ 'clalɩ le ɔ ‑gbɛɔ sɔ 'wlu.

³³ Ɔ ‑yɔɔsɔ ya ‑alawleea cɩɩnwlʋlʋ 'nyɩ ma ya gbɛga. Ɔ yɔɔ ‑wlɩca 'nyukwliin fa, ɔ ya ɔcɩ ‑daadʋ ‑wlɩca 'ciin zʋ 'nyɩ ɔ ya nclɔɔa 'la mɩɔa ko.

³⁴ Ɔ ya ‑laagɔɔn kope, ɔ ya nyɔmʋslu 'nyɩ ɔ ya 'cla lebhe: «Efata», ɩ sa ‑zɔn lebhe: «Kalɩ 'gbo.»

³⁵ 'Kplookʋ, ɔla 'nyukwlia ya 'gbokalɩ, ɔla mɩɔa ya ‑blulu 'nyɩ ɔ nyɩtɛanɩa 'nanɩ.

³⁶ Zozii ya maa 'fɩan 'cla lebhe ma 'la ‑saa nclɔɔ bhlogbɩɩ 'dɩ, ‑ma saa ɔ saa 'mɩɩ 'lɛ maa neen na, sɛ ma saa 'mɩɩ 'lɛ ‑tɛɛ.

³⁷ Nikpoo ‑slaa maa 'kadieda 'nyɩ ma claa lebhe: «‑Zaagbʋsa, lɩɩa ‑tɛtɛa ɔ nʋ 'lɛ na, ɩ nanɩ! Ɔ gba 'nyɩ 'nyukwlitelinya nu 'nyɩ ‑amunaanya nyɩtɛ.»