Zozi Klisi 'la Dɩnanɩa Makɩ zie 'lɛ na 5 - Le Nouveau Testament en langue Dida

Zozii ya 'wugonyunyunyɔ bhlo jabha

¹ Zozii ɩya ɔla gɩlɩnya* ya 'nyia 'tɔ 'nyɩ ma ya Zelasaabhlɩa 'kʋ ŋeni.

² Daa Zozii 'wlʋ 'lɛ gɔlʋa nɩkplaan ‑jaa na, 'wugonyunyɔ bhlo ya lesikpaa nɩkplaan 'wlʋlʋ 'nyɩ ɔ yɔɔ 'bɩɩncili.

³ Lesia nɩkplaan ‑glɩa 'lɛ ɔla kʋkʋda. 'Nyɩ nclɔɔ bhlogbɩɩ mino 'taanɩa 'mɔɔ gʋalɩɛ, ‑abhluaka 'titio nɩkplaan.

⁴ Sa ma zʋa ‑azlaa 'mɔɔ 'kpamu ɩya ‑abhluakɩ nɩkplaan, ‑ma ka ‑tɛɛ ɔ gbʋgbɔlʋa 'kpamua 'nyɩ ɔ dɩa ‑abhluakɩa. Nclɔɔ bhlogbɩɩ 'tanɩa ɔla ‑sɩatɛtɩ ‑ka.

⁵ Bhlibhliylʋ ɩya zezezeli nɩkplaan, ka ‑tɛɛ ɔ 'plɩplɩlɩa 'lɛ lesia nɩkplaan ɩya 'kikia 'wlu 'kʋ, ɔ paa 'lɛ 'kasɛ, ɔ maa 'lɛ cɔkʋ 'nyɩ ɔ kplekplelia ɔcɩ.

⁶ Daa ɔ 'lɩlɩ 'lɛ Zozii 'vʋʋn na, ɔ ya sɔmɩfa 'nyɩ ɔ yɔɔ ‑deliin ‑kukoonkplii sasla.

⁷ Ɔ ya nɩkplaan ‑gaa 'nyɩ ɔ ya 'cla lebhe: «Zozii, 'Kʋzilo Laagɔ 'la 'Cʋ, wɔɔsaa ‑ɔ ‑kʋa 'lɛ n ‑yɔɔsɔ ‑gbaaglɩɩn bha? N slɔɔ 'wlu Laagɔ 'la 'ŋlɩa nɩkplaan, ‑naa zʋan ‑vʋʋ!»

⁸ Sa Zozii claa 'mʋʋ lebhe: «'Wugo ‑nyunyu, 'wlʋ nclɔɔ ‑naa nɩkplaan!»

⁹ Zozii yʋʋ neencla lebhe: «‑Naa 'ŋlɩ?» Ʋ yɔɔ 'cla lebhe: «'Na ŋlɩ ‑glɩ 'lɛ zulobuo, sa ‑a ‑zu ‑gbɔɔn na.»

¹⁰ Ʋ zɩzlalɩa Zozii cɩ le ɔ 'la 'tlia maa 'bhlɩa 'kʋ.

¹¹ Bhuzikpa 'kadie ‑kʋa 'dɛ 'kikea cɩ 'nyɩ a lia.

¹² 'Wugwi ‑nyinyia ya Zozii 'wlusla 'nyɩ ɩ yɔɔ 'cla lebhe: «Falɩ ‑anyɩ bhuzia nɩkplaan, 'talɩ ‑anyɩ 'cin ɩya ‑a kɩɩ nɩkplaan ble.»

¹³ Ɔ yɩɩ 'dɛ 'la ‑jiolia 'nyɩ. Ɩ ya ‑zɔnwlʋ 'nyɩ ɩ ya bhuzia nɩkplaan ble. Bhuzikpaa ya 'kikea 'wlu 'wlʋ, a ya 'nyia nɩkplaan 'kɔsɔ 'nyɩ a ya 'kʋmla. Ɩ cɩa ‑sa bhuzi ‑tabhli ‑mɔsɔ (2000) 'wlʋ.

¹⁴ Bhuzia 'la kpanyaa ya 'gu 'nyɩ ma ya duku ɩya ‑bhlidia 'kʋ 'dɩ fa. 'Nyɩ ncɛlɩ ya ci le ma 'ka ɩmɩa ‑ɩ 'plɩ 'lɛ na 'lɩ.

¹⁵ Ma ya Zozii cɩ ŋeni 'nyɩ ma ya nclɔɔa 'wugwi ‑nyinyi ‑bhutukpaa ‑kʋa 'lɛ nɩkplaan na 'lɩ, ɔ ‑kʋa 'dɛ sa, ɔ ‑bibiea lokwi 'nyɩ ɔ ‑falɩa ɔcɩ pɔlɛ cɩ. Na, ŋanɔ ya maa pla.

¹⁶ Maa ‑ɔ 'lɩmʋa 'lɛ ɩmɩ ‑naa 'la da na, ma ya maa ɩmɩa ‑ɩ ŋenia 'lɛ 'wugwinyinyinyɔa ɩya bhuzia na, 'dɩkʋsalɩ.

¹⁷ Ma ya Zozii 'wlusla le ɔ 'wlʋ mala 'bhlɩa 'kʋ.

¹⁸ Daa Zozii ‑kʋ 'lɛ gɔlʋa nɩkplaan 'tɔda na, nclɔɔa 'wugwi ‑nyinyia 'wlʋ 'lɛ nɩkplaan na, ɔ yɔɔ bhibhie le ɔ famʋɔ.

¹⁹ ‑Ma Zozii 'ta ŋonu, ɔ yɔɔ 'cla lebhe: «Cɔlɔ, mʋ 'sleen, ‑naa ncɛlɩ cɩ ɩya ‑n solu maa ɩmɩa ‑Kwlenyɔ, ɔla ŋaazɩɩnlɩlɩɛa nɩkplaan, ɔ nʋ 'lɛ 'nyɩ ɔ yɔɔ 'lɛ 'nyɩ na.»

²⁰ Nclɔɔa ya mʋ 'nyɩ Dekapɔlʋbhlɩa 'kʋ, ɩmɩa 'fɩan Zozii nʋɔ 'lɛ cɩ na, ɔ salɩa 'mɩ 'dɩ 'kʋ. 'Nyɩ maa 'fɩan ‑ɔ 'nua 'mɔɔ 'lɛ neen na, nikpoo ya maa sla.

Zayiwlusu ‑nyɔŋlɔ ɩya 'ŋlɔa ‑ɔ klaa 'lɛ Zozii 'la lokwia cɩ na

²¹ Zozii ya gɔlʋʋn 'tɔ 'nyɩ ɔ ya gbazɩa ɔ 'wlʋlʋa 'lɛ na, cɔlɔ. Ncaabhutukpa yɔɔ cɩ 'wluwlalɩ. Ɔ ‑kʋa 'nyia cɩ.

²² Zifʋnyaa* 'la bhibhiepalʋa* tocɩa nɩkplaan bhlo, ma lɔɔ Zayiwlusu, ɔ ya ci. Ɔ 'lɩ 'lɛ Zozii na, ɔ yɔɔ ‑deliin ‑kukoonkplii sasla,

²³ ɔ ya zɩzla 'nyɩ ɔ yɔɔ 'cla lebhe: «'Na 'ciŋlʋcʋkwlaa ɔ ‑kʋ 'kwɩ neen, ci ‑n ‑gbɛɔ sɔ 'kʋ, ɔ 'ka jabha ɩya ɔ 'ka kʋ.»

²⁴ Zozii ‑yɔɔsɔ ya mʋ. Ncaabhutukpa gɩlɩa 'mɔɔ 'nyɩ ma mɛmɛnɩa 'mɔɔ.

²⁵ 'Ŋlɔ bhlo ‑dolu wlʋa 'mɔɔ cɩ ‑aan liowli 'kʋgba ‑mɔsɔ 'wugo.

²⁶ Ɔ ya ‑dɔtɛcɩ ‑bhutukpa wlɩɩn sɛlɩ, ɔla 'dalaa 'fɩan ɔ ‑kaa 'lɛ na, ɔ yaa nyumo. Ɔ 'tɩɩ jabhʋ bhlogbɩɩ nɩkplaan 'lɩlɩ, ‑ma ka ‑tɛɛ ɔla gua nylanylanɩa 'lɛ 'kʋ.

²⁷ Ŋlɔɔ ‑naa ya Zozii 'la wɔlɩ 'nu. Ɔ ya ‑alawleea sidiin ci, ɔ yɔɔ leen 'wlʋlʋ 'nyɩ ɔ ya ɔla lokwia cɩkla.

²⁸ Ɔ claa ɔcɩ lebhe: «Gbazɩ n ‑kaa mino 'nyɩ n ‑kaa ɔla lokwia ‑tɛɛ cɩkla na, n cɩa jabha.»

²⁹ 'Kplookʋ, ‑dolua ‑ʋ wlʋa 'mɔɔ 'lɛ cɩ na, ya nɩkplaan do 'nyɩ ɔ ya ɔla 'nyɛkɛa nɩkplaan 'lɩ lebhe ɔ ya jabha.

³⁰ Dɩpɩa bhlogbɩɩ, Zozii ya 'lɩ lebhe 'tɛtɩ bhlo yɔɔ nɩkplaan 'wlʋ. ‑Alawleea sidiin, ɔ ya kwlacala 'nyɩ ɔ ya neencla lebhe: «‑Ɔ klaa 'lɛ 'na lokwia cɩ bha?»

³¹ Ɔla gɩlɩnyaa* yɔɔ 'cla lebhe: «‑Mɔ 'titi ‑n ‑jlɛ ‑alawleea ‑a mɛmɛnɩɔ 'lɛ na 'nyɩ ‑n cla neen lebhe: Ncaasaa ‑ɔ klaan 'lɛ cɩ bha?»

³² ‑Ma ɔmɔ, ɔ kopea ɔcɩ cɩ le ɔ 'kaa ɔmɔa ‑ɔ nʋ 'lɛ sɛɛ na cibhlili.

³³ Sa 'ŋlɔa ‑cia 'lɛ ɩmɩa ‑ɩ 'plɩlɩɔ 'lɛ 'kʋ na, pɔɔvʋ yɔɔ kla, ɔ tɩtɛlɩa, ɔ ya ci, ɔ ya Zozii ‑deliin ‑kukoonkplii sasla 'nyɩ ɔ yɔɔ ‑nʋawlɛa 'fɩan solu.

³⁴ Zozii yɔɔ 'cla lebhe: «N ‑nyɔŋlɔ, ‑naa pɔɔtɛtɛa yɔɔ jabha. Mʋnʋ pupueen ɩya ‑naa gua ʋ bhɩa.»

³⁵ Wɔlɩ ‑naa, ɩ ‑kʋ kaa 'mɔɔ neen 'nyɩ ncɛlɩ ya 'lɛ Zayiwlusu 'bhisleen 'wlʋlʋ, ma ya 'lɛ ci 'nyɩ ma yɔɔ 'lɛ 'cla lebhe: «‑N ‑nyɔŋlɔ ya 'ku. 'Lɩsaa 'la gbʋ ‑n bhɩaka ‑awlɛ 'lɛ Canyɔa 'kwlɩ bha?»

³⁶ Zozii 'ta mala wɔɔnyɩtʋa 'kʋmanɩ, ‑ma ɔ ya Zifʋnyaa* 'la bhibhiepalʋa* toa 'cla lebhe: «Pɔlɛɛn 'la 'wlʋɔ, pɔɔtɛtɛ ‑tɛɛ 'nyɩ ‑n kalɩ.»

³⁷ ‑N 'ta Pɩɛlɩ, Zakɩ ɩya ɔ bholi Zaan ‑tɛɛ na, ɔ 'ta ‑buun nclɔɔ ‑jioli 'nyɩ le ɔ fɔɔ.

³⁸ Ma ya Zifʋnyaa 'la bhibhiepalʋtoa 'bhisleen ŋeni. Zozii lɩ lebhe 'slea ‑gblogbloluo, ncɛlɩ tu 'nyɩ ma paa 'kasɛ.

³⁹ Ɔ ya ble 'nyɩ ɔ ya maa 'cla lebhe: «'Lɩsaa 'la gbʋ 'slea ‑gblogbloluo 'lɛ 'nyɩ a tua 'lɛ ‑sa bha? 'Cileea 'ta ka 'ku, ‑ma ka ɔ ŋɔmʋ 'lɛ.»

⁴⁰ Ma nyanɩa 'mɔɔ. Ɔ ya maa 'fɩan ‑zɔnwla 'nyɩ ɔ ya 'cileea to, ɔ 'nɔ ɩya maa ‑tɛɛa ‑ɔ faa 'mɔɔ 'lɛ na, 'ma 'nyɩ ma ya ‑palʋa ‑zɔan 'cileea ‑kʋa 'lɛ na, ble.

⁴¹ Ɔ ya 'cileea 'la sɔa 'kʋbhli 'nyɩ ɔ yɔɔ 'cla lebhe: «Talita kum», ɩ sa ‑zɔn lebhe: «Ŋlʋgbɩɔco, ‑bho 'kʋ, ‑amʋ ‑ɔ clɔɔ 'lɛ sɛɛ.»

⁴² 'Kplookʋ, 'cileea ya 'kʋbho 'nyɩ ɔ ya 'namʋ zʋ, sa ɔ ‑glɩa liowli 'kʋgba ‑mɔsɔco na. Maa ‑ɔ ‑kʋa 'lɛ 'dɛ na, neen ya maa yɛ.

⁴³ Zozii ya maa 'cla le ma 'la solua wɔlɩ ‑naa nclɔɔ bhlogbɩɩ 'nyɩ ɔ ya ‑awlɛ maa 'cla le ma 'nyɩɔ nyɩ.