Zozi Klisi 'la Dɩnanɩa Makɩ zie 'lɛ na 3 - Le Nouveau Testament en langue Dida

Nclɔɔa ‑ɔ ‑ka 'lɛ 'kukusɔa na

¹ Zozii ya ‑awlɛ Zifʋnyaa* 'la bhibhiepalʋa* ‑zɔn ble. Nclɔɔ bhlo ‑kʋa 'yɛpɩ, ɔ ‑kaa 'kukusɔ.

² Ma kopea Zozii 'ciin, ka ɩ ‑ka ‑kʋ le nyɔkwɛclɩɩa* 'kʋ, ɔ cɩ 'kaa 'mɔɔ jabha na, ɩya ma 'kaa 'mɔɔ wɔlɩkʋgɩ.

³ Zozii ya nclɔɔa ‑ɔ ‑ka 'lɛ 'kukusɔa na 'cla lebhe: «‑Bho 'kʋ, ci ‑da ncɛlɩa 'fɩan 'ci 'kʋ.»

⁴ Ɔ ya maa neencla lebhe: «Nyɔkwɛclɩɩa 'kʋ, ‑anɩsaa ‑ɩ ‑fataa 'lɛ le ma nʋ bha? 'Nanɩ ‑aana ‑abhɔlɛ bha? Ma jabha nclɔɔ ‑aana ma kopeo 'ciin ɩya ɔ 'ku bha?» ‑Ma maa, 'ma ‑sa 'taa ne.

⁵ Ɔ ya maa 'fɩan dɔgbɛciin kopeli ‑aan ɔ ya 'kʋcɩlɩ, sa mala pɔlɩa ‑titlilioa 'lɛ na, ɩ kalɩa 'mɔɔ cɩɩn. Ɔ ya nclɔɔa 'cla lebhe: «‑Glɔ ‑naa sɔa nɩkplaan.» Nclɔɔa ya ɔla sɔa nɩkplaan ‑glɔ 'nyɩ ʋ ya jabha.

⁶ Falizɩɛnnyaa* ya ‑zɔnwlʋ 'nyɩ 'kplookʋ, maya Ewlɔdʋ 'la ‑kandinyaa ya 'wluwlalɩ le ma 'kaa saa ma cɩ 'kaa 'lɛ nʋnʋnʋ ɩya ma 'kɔɔ 'lɛ 'bhla na, 'matɩ.

Ncaabhutukpa ya Zozii 'bhlɩ ci

⁷ Zozii ɩya ɔla gɩlɩnyaa* ya 'dɛ 'wlʋ, ma ya Galilee 'la 'nyia cɩ mʋ. Ncaabhutukpa ya Galileebhlɩa 'kʋ 'wlʋlʋ 'nyɩ ma yɔɔ gɩlɩ. Saa ma nua 'lɛ ɔla nʋnʋgbɩa cɩa wɔlɩa na, ncaabhutukpa ya Zudeebhlɩa,

⁸ Zolizalɛmʋ, Idumee, Zludɛɛnnyidɔlʋa leen, Tili ɩya Sidɔɔnbhlɩa 'kʋ 'wlʋlʋ 'nyɩ ma yɔɔ 'bhlɩ ci.

⁹ Zozii ya ɔla gɩlɩnyaa 'cla lebhe ma bhɔsʋɔ gɔlʋ, ‑alawleea 'la ka sɛɔ mɛmɛnɩ.

¹⁰ Sa ɔ ya 'lɛ ncaabhutukpa jabha na, maa ‑anʋa 'fɩan ‑ma 'taa 'lɛ ‑ja na, ma mɛa 'mɔɔ cɩ le ma 'kaa 'mɔɔ cɩkla.

¹¹ 'Wugwi ‑nyinyia ‑kɔɔ 'lɩ na, ɩ bhlilio ‑deliin, ɩ ‑gaa nɩkplaan 'nyɩ ɩ cla lebhe: «‑Mɔ ‑ɔ ‑glɩ 'lɛ Laagɔ 'la 'Cʋa!»

¹² Zozii zalalɩa 'mɩɩ 'ci le ɩ 'la nyɩtɛa ɔla cɩa wɔlɩ.

Zozii ya 'Kʋgba ‑mɔsɔa desla

¹³ Zozii ya 'kikea 'wlu ‑gblaa, ɔ ya maa ‑anʋa ɔ 'matɩa 'lɛ na la 'nyɩ ma yɔɔ cɩ ci.

¹⁴ Maa sidiin, ɔ ya 'kʋgba ‑mɔsɔ desla le ma 'kɔɔ cɩ kʋ ɩya ɔ 'ka maa Dɩnanɩa* ‑sakaan lobhu.

¹⁵ Ɔ ya maa 'wugwi ‑nyinyia 'la 'tlitɛtɩ 'nyɩ.

¹⁶ 'Lɩka 'kʋgba ‑mɔsɔa ɔ sla 'lɛ de na: Simɔɔn, ɔ lɔɔ Pɩɛlɩ,

¹⁷ Zebedee ‑yowli Zakɩ ɩya ɔ bholi Zaan, ɔ la maa Boanɛgɛzɩ, ɩ sa ‑zɔn le ‑laagɔzadlɛ 'la 'cuo,

¹⁸ Andlee, Filipʋ, Batelemii, Matie, Tomaa, Alɩfee ‑yowli Zakɩ, Tadee, 'bhlɩkʋtɩtɔlʋnyɔ Simɔɔn

¹⁹ ɩya Zuda Iskalɩɔtʋ, ɔmɔa 'titia ‑ɔ zʋɔ 'lɛ 'pɛlʋ na.

Ma nabhe Bɛzebulu ‑kʋ 'lɛ Zozii nɩkplaan

²⁰ Zozii ya 'sleen cɔlɔ 'nyɩ ‑alawleea ya ‑awlɛ 'wluwlalɩ. Ɩ gba na ɔya ɔla gɩlɩnyaa* 'lɩ 'taa ‑jioli ɩya ma 'kaa li.

²¹ Daa ɔla 'slinyaa 'nu 'lɛ sɛɛ na, ma ya ci le ma 'kɔɔ 'kʋbhli. Sa ma claa lebhe: «'Wluun yɔɔ nyumo.»

²² ‑Jlɩmaazienyaa* ‑ɔ 'wlʋlʋa 'lɛ Zolizalɛmʋ na, claa lebhe: «Bɛzebulu ‑kʋɔ 'lɛ nɩkplaan, 'wugwi ‑nyinyia toa 'la 'tɛtɩa nɩkplaan ɔ 'tlili 'lɛ 'wugwi ‑nyinyia.»

²³ Ɔ ya maa la 'nyɩ ɔ ya maa ‑nyandlaa nɩkplaan 'cla lebhe: «'Nsasa Sataan* cɩ 'kaa 'lɛ Sataan 'tlitlili bha?

²⁴ Gbazɩ nyɩbhɛlɩdu ‑kaan ‑do na, 'ʋ cɩ 'ta kla,

²⁵ gbazɩ 'sle ‑ma a ‑kaan ‑do na, 'a cɩ 'ta kla.

²⁶ Na, gbazɩ Sataan ‑ka ɔmɔ 'titi ɔcɩ gbatlɩmʋnʋ na, ɔ yaan do, 'ɔ cɩ 'tanɩ kla, ɔla da ya bhɩa.

²⁷ Nclɔɔ cɩ 'ta ‑bhɩakpanyɔ 'bhisleen ble ɩya ɔ 'ka mino ɔ 'ka ɔla 'nanɩa 'ma, ɩ ‑ka ‑kʋ le ɔ 'ta kɔɔ gʋa ‑bɛɛ na. Na 'fɩɔn, ɔ 'ka 'lɛ ɔla 'nanɩa 'ma na, ɩ ‑fata lebhe ɔ ‑gʋɔ.

²⁸ N solui anyɩ, ɩ ‑glɩ ‑nʋawlɛ: Nyinyia ‑tɛtɛa ncɛlɩ cɩ 'ka 'lɛ nʋ ɩya wɔɔnyinyia ‑tɛtɛa ma cɩ 'ka 'lɛ Laagɔ cɩ nyɩtɛlɩ na, ɩ cɩ 'ka maa ‑vɔɔ.

²⁹ ‑Ma ɔmɔa ‑ɔ ‑cɩ ka 'lɛ ‑Kplɔkplɔ ‑Wugoa* wɔɔnyinyi cɩ nyɩtɛlɩ na, 'ɩ cɩ 'tɔɔ ‑vɔɔ, sa ɩ ‑glɩ nyinyia ‑ɩ ‑gbɛɔ 'lɛ 'wlu 'lʋkʋlʋkʋ ‑aan 'lʋkʋlʋkʋ na.»

³⁰ Ka ɔ nyɩtɛ 'lɛ sɛɛ, sa ‑anʋa claa lebhe: «'Wugo ‑nyunyu ‑kʋɔ 'lɛ nɩkplaan.»

Zozii 'la 'lɔlʋnyaa 'titi

³¹ Ma ‑kʋ kaa dɩpɩa bhlogbɩɩ 'nyɩ Zozii ɔ 'nɔ ɩya ɔ bholiecɩ ya 'lɛ ci. Ma ‑kʋa ‑jlukuun 'nyɩ ma ya 'lɛ nclɔɔ lobhu le ɔ 'clɔɔ le ɔ ci.

³² Ncaabhutukpa ‑kʋa 'mɔɔ cɩ sa 'nyɩ ma yɔɔ 'cla lebhe: «'Lɩka ‑n 'nɔ, ‑n bholiecɩ ɩya ‑n mɛɛncɩ, ma ‑kʋ -ɔ ‑jlukuun ma 'matɩɔ.»

³³ Ɔ ya maa neencla lebhe: «Ncaasaacɩɩ -ɔ ‑glɩa 'lɛ n 'nɔ ɩya n bholiecɩ bha?»

³⁴ Ɔ ya 'cibie, ɔ ya maa ‑ɔ ‑kʋa 'mɔɔ 'lɛ cɩ sa na kope 'nyɩ ɔ ya 'cla lebhe: «'Lɩka n 'nɔ ɩya n bholiecɩ.

³⁵ Ncaatʋʋntʋtʋa ‑ɔ nʋ 'lɛ Laagɔ 'la pɔɔsa na, ɔmɔ ‑ɔ ‑glɩ 'lɛ n bholi, n mɛnɔ, n 'nɔ.»