Zozi Klisi 'la Dɩnanɩa Makɩ zie 'lɛ na 16 - Le Nouveau Testament en langue Dida

Zozii 'la kwɩɩnkʋbhue

¹ Daa Zifʋnyaa* 'la nyɔkwɛclɩɩa* 'plɩ 'lɛ na, Malii, Madalaa ŋlɔa, Malii Zakɩ 'nɔ ɩya Salomee ya 'ŋɔnɔpalɩɩ ‑pɩa le ma 'kaa 'mɩɩ Zozii 'la ‑blaanyɛkɛa 'kʋ 'pa.

² Nyamaclɩɩ ‑zʋkpaa pɩɩ, daa 'ylʋbhuoa bho 'lɛ 'kʋ na, ma ya lesua 'kʋ mʋ.

³ Ma 'claclalɩa neen lebhe: «Ncaasaa ‑cɩ kaa 'lɛ ‑anyɩ lesua nekʋ 'la cokwiea 'bhisiolu bha?»

⁴ Ma na ma bhli 'lɛ 'wlu 'kʋ na, ma ya 'lɩ lebhe cokwie 'kadie ‑naa yaa 'bhisio.

⁵ Ma ble 'lɛ lesua nɩkplaan na, ma ya nyɩgbɩɔ bhlo 'lipasɔa 'kʋ sakʋda 'lɩ, ɔ ‑plaa lokupɔpʋɛ nɩkplaan 'nyɩ pɔlɛɛn ya maa 'wlʋ.

⁶ Ɔ ya maa 'cla lebhe: «Pɔlɛɛn 'la 'wlʋa anyɩ. Nazalɛtɩnyɔ Zozii, ma bho 'lɛ dabhlalɩsua 'ciin na, ɔmɔ a 'matɩ 'lɛ. Ɔ 'ta ‑da ‑kʋ, ɔ ya 'kwɩɩnkʋbho. A kopeka daa ma zʋa 'mɔɔ 'lɛ na.

⁷ A mʋ a solu ɔla gɩlɩnyaa* ɩya Pɩɛlɩ lebhe ɔ pʋ ka anyɩ 'kʋklʋʋn Galilee. 'Yɛpɩ a cɩ 'kɔɔ 'lɛ 'lɩlɩ, saa ɔ solua 'lɛ anyɩ na.»

⁸ Ma ya lesua nɩkplaan 'wlʋ 'nyɩ ma ya 'gu, sa 'wugo ya maa 'wlu 'wlʋ 'nyɩ ma tɩtɛlɩa na. Ma 'ta nclɔɔ bhlogbɩɩ 'dɩ ‑sa, sa ŋanɔ bhlaa maa na. [

Zozii ya Madalaaŋlɔ Malii 'ciinfutolu

⁹ Nyamaclɩɩ ‑zʋkpaa, daa Zozii ‑bho 'lɛ 'kwɩɩn 'kʋ na, ɔ ya Madalaaŋlɔ Malii, ɔmɔa ɔ saa 'lɛ 'wugwi ‑nyinyia ‑ngbɔɔsɔa nɩkplaan na, 'ciinfutolu ‑bɛɛ.

¹⁰ Ɔmɔ ‑naa ya mʋ, ɔ ya maa ‑ma ‑yɔɔsɔ ‑kʋa 'lɛ 'nyɩ ‑ma ‑kʋnɩa 'lɛ ɔla 'kwɩa 'la cɩɩnkalɔɔn ɩya 'nʋgbʋtulɩɛ nɩkplaan na, 'dɩ ‑sa.

¹¹ Daa ma 'nu 'lɛ lebhe ɔ ‑kʋa, ‑ma ɔ yaa 'mɔɔ 'lɩ na, ma 'tɩɩ ‑nʋawlɛ la.

Zozii ya gɩlɩnya ‑mɔsɔ 'ciinfutolu

¹² 'Ɩ leen, Zozii ya gɩlɩnya* ‑mɔsɔ ‑ɔ ‑kʋa 'lɛ ‑bhlide 'kʋ ‑mʋda na, 'ciinfutolu, ‑ma ɔ ‑zʋanɩa ‑buun 'klʋ.

¹³ Ma ya cɔlɔ, ma ya ma 'yea 'dɩ ‑sa. ‑Ma ma 'ta mala wɔlɩa ‑nʋawlɛ la.

Zozii ya gɩlɩnyaa 'kʋgba bhloa 'ciinfutolu

¹⁴ Bhɩalɩdaa, Zozii ya 'kʋgba bhloa 'ciinfutolu, daa ma ‑kʋa 'lɛ 'tlɔnblɩ 'kʋ na. Ɔ ya maa 'cizalalɩ, pɔɔtɛtɛa ma 'ta 'lɛ ‑ka ɩya pɔlɩa ‑ɩ ‑titlilio 'lɛ maa na, 'la gbʋ, ‑ofi lebhe daa ɔ ‑bho 'lɛ 'kwɩɩn 'kʋ 'nyɩ maa ‑ɔ 'lɩɔ 'lɛ, ‑salɩɩ 'lɛ maa 'dɩ 'kʋ na, ma 'ta mala wɔlɩa ‑nʋawlɛ la.

¹⁵ 'Nyɩ ɔ ya maa 'cla lebhe: «A mʋ ‑laagɔzɔan ‑tɛtɛa, a ‑sa Dɩnanɩa* ɩya a solu ncɛlɩa 'fɩan.

¹⁶ Ɔmɔa ‑ɔ cɩ 'lɛ ‑nʋawlɛ la 'nyɩ ‑ɔ cɩ 'lɛ 'nyuwluzʋɔ na, ɔ cɩ gbʋʋnsalɩɛ 'lɩ. ‑Ma ɔmɔa ‑ɔ cɩ 'ta 'lɛ ‑nʋawlɛ la na, ɔ cɩ 'ku.

¹⁷ 'Lɩka nʋnʋgbɩa maa ‑ɔ cɩ ka 'lɛ ‑nʋawlɛ la, cɩ 'ka 'lɛ nʋlɩɛ mino na: 'Na 'ŋlɩa nɩkplaan, ma cɩ 'ka 'wugwi ‑nyinyi 'tli, ma 'ka 'bhlɩwɔlɩ ‑leli nyɩtɛ,

¹⁸ ma 'ka tla wlɩɩn 'kʋbhli ɩya ka ma ‑ka lʋʋ ‑nyunyu 'mla 'titio na, ʋ 'la ka maa lʋʋ ‑ylɛylɛ nʋ. Ma cɩ 'ka guzenya sɩ 'wlugbɛ ɩya ma 'ka jabha.»

Zozii ya ‑laagɔɔn ‑gblaa

¹⁹ Daa ‑Kwlenyɔ Zozii bhɩalɩ 'lɛ maa solulɩɛ na, ɔ ya ‑laagɔɔn ‑gblaa 'nyɩ ɔ ya Laagɔ 'lipasɔ 'kʋ sa kʋ.

²⁰ Maa, ma yaa daa ‑tɛtɛa, Dɩnanɩa* ‑sa ‑kaan mʋ. ‑Kwlenyɔ ‑kʋa maa 'kʋ 'nyɩ ciinzizielɩlobholi nɩkplaan ɔ glalɩa Wɔɔnyɩtʋa 'kʋ.