Zozi Klisi 'la Dɩnanɩa Makɩ zie 'lɛ na 11 - Le Nouveau Testament en langue Dida

Zozii ble Zolizalɛmʋ

¹ Daa Zozii ɩya ɔla gɩlɩnyaa* mɛ 'lɛ Zolizalɛmʋ cɩ na, Bɛtɩfazee ɩya Betanii 'la 'klia nɩkplaan, ‑Olivʋsikike ‑gbazɔa, Zozii ya ɔla gɩlɩnya ‑mɔsɔ lobhu

² 'nyɩ ɔ ya maa 'cla lebhe: «A mʋ 'dua ‑ʋ ‑kʋ 'lɛ anyɩ 'kʋklʋʋn na 'kʋ: A ‑kʋʋ nɩkplaan ble ‑jaa na, a cɩ 'ka 'flumuco 'lɩ, ʋ ‑gʋɔ, nclɔɔ bhlogbɩɩ 'ta ka ‑azlʋʋ 'kʋ 'tɔ, a ‑bluluu ɩya a ‑lamʋʋ.

³ Gbazɩ nclɔɔ ‑ka anyɩ neencla lebhe: 'Lɩsaa 'la gbʋ a nʋa 'lɛ ɩmɩ ‑naa bha? A 'clɔɔ lebhe: ‑Kwlenyɔa 'matɩʋ, ‑ma ɔ cɩ 'kʋʋ ‑da cala 'fan.»

⁴ Ma ya mʋ 'nyɩ ma ya 'flumucoa 'lɩ, ʋ ‑gʋɔa ‑jlukuun 'sligbine cɩ, clikpoa nɩkplaan. Ma yʋʋ ‑blulu.

⁵ Maa ‑ɔ ‑kʋa 'lɛ 'dɛ na, ‑anʋa ya maa neencla lebhe: «'Lɩsaa 'la gbʋ a blulua 'lɛ 'flumucoa bha?»

⁶ Ma ya maa, saa ‑tɛɛa Zozii nyɩtɛ 'lɛ na, solu 'nyɩ ma ya maa 'cintalɩ.

⁷ Ma ya 'flumucoa Zozii ‑la, ma yʋʋ mala lokua 'kʋ 'pa 'nyɩ Zozii yʋʋ 'kʋ sakʋ.

⁸ Ncaabhutukpa ya mala lokua ‑gugwiea 'kʋ ylʋ 'nyɩ ‑anʋa paa 'mɛɛ silabhɩa ma 'kɔtɔlʋa 'lɛ 'kwlaa nɩkplaan na 'kʋ.

⁹ Maa ‑ɔ ‑kʋa 'lɛ Zozii 'kʋklʋʋn ɩya maa ‑ɔ gɩɩa 'mɔɔ 'lɛ 'kʋ na, ma ‑gaa nɩkplaan: «Ozana!» 'Nyupalɩɛ ŋeni ɔmɔa ‑ɔ cili 'lɛ ‑Kwlenyɔa 'la 'ŋlɩa nɩkplaan na!

¹⁰ 'Nyupalɩɛ ŋeni ‑kwleliea ‑ɩ ci 'lɛ na, ‑a to Daviti 'la ‑kwleliea! 'Klʋagba ŋeni 'kʋzilo Laagɔ 'yɛpɩ ‑laagɔɔn!

¹¹ Ɔ ya Zolizalɛmʋ, Laagɔpaakadiea* ‑zɔn ble. Ɔ bhɩalɩ 'lɛ daa ‑tɛtɛa 'fɩan 'cikpalɩɛ na, ɔ ya ‑zɔnwlʋ 'nyɩ ɔya 'kʋgba ‑mɔsɔa ya Betanii mʋ, sa 'ylʋ yaanɩa tooto mʋ na.

'Figisua ‑ʋ tlʋ 'ta 'lɛ na

¹² Da ‑zeli ze 'lɛ 'nyɩ Zozii ɩya ɔla gɩlɩnyaa* ‑kʋa 'lɛ Betanii 'wlʋda na, ŋɔmʋ yɔɔ kla.

¹³ Ɔ ya 'figisu, ‑ʋ ‑ka 'lɛ 'taakpɩ 'wlu na 'vʋʋn 'lɩlɩ 'nyɩ ɔ ya mʋ le ɔ 'ka kope, ka ɩ ‑ka ‑kʋ lebhe ɔ cɩa 'mʋʋ lʋʋ 'wlu 'lɩlɩ na. ‑Ma daa ɔ mɩʋ 'lɛ cɩ na, 'taakpɩ bhlobhlo ɔ ŋeniu 'lɛ 'wlu, sa ‑n 'ta ka kaa 'figi 'la tlʋda na.

¹⁴ Ɔ ya nesa, ɔ yʋʋ 'cla lebhe: «Nclɔɔ bhlogbɩɩ 'la liakɩnɩ ‑naa cie ‑ylɛylɛ.» Ɔla gɩlɩnyaa ‑poa 'nyukwliin.

Zozii ya lɩɩpɛlʋzʋnyaa Laagɔpaakadiea ‑zɔn 'tli

¹⁵ Zozii ɩya ɔla gɩlɩnyaa* ya Zolizalɛmʋ ŋeni. Ɔ ya Laagɔpaakadiea* ‑zɔn ble 'nyɩ ɔ ya maa ‑ɔ ‑kʋa 'lɛ 'yɛpɩ, ‑ɔ zʋa 'lɛ 'pɛlʋ ɩya maa ‑ɔ pɩaa 'lɛ na 'tlilɩɛ bhɔ. Ɔ ya 'dalakacinyaa 'la 'tlɔnblɩcɩa ɩya 'kpaakpɩ 'pɛlʋzʋnyaa 'la kpua sagblii.

¹⁶ 'Nyɩ ɔ te 'taa nclɔɔ bhlogbɩɩ ne ɔya bhɛbhɛlʋʋ 'ka Laagɔpaakadiea 'ŋatɩ.

¹⁷ Ɔ caa maa 'nyɩ ɔ 'claa maa lebhe: «Ɩ 'ta ‑zieo lebhe: 'Na ‑palʋa, ʋmʋ ma cɩ 'ka 'lɛ 'lɔlɩa ‑tɛtɛa 'fɩan 'la bhibhiepalʋ* la bha? ‑Ma anyɩ, a yʋʋ 'winya 'la zizieda ple.»

¹⁸ ‑Teyiyinyaa tocɩa ɩya ‑jlɩmaazienyaa* ya ɩmɩa ‑ɩ 'plɩ 'lɛ na 'nu 'nyɩ ma 'matɩanɩa ɔla 'bhlada. ‑Ma ma 'gulua 'mɔɔ, sa ɔla cacawɔlɩa klaa ‑alawleea pɔlɛ na.

¹⁹ 'Ylʋ mʋ 'lɛ na, Zozii ɩya ɔla gɩlɩnyaa ya 'dua nɩkplaan 'wlʋ.

Pɔɔtɛtɛ ɩya bhibhieli

²⁰ ‑Zʋkpasaa, Zozii ɩya ɔla gɩlɩnyaa* ‑kʋa 'lɛ 'plɩda na, ma ya 'lɩ lebhe 'figisua ya yɛ ‑aan ʋla ‑sikplɩa nɩkplaan.

²¹ Pɩɛlɩ ya luoli, ɔ yɔɔ 'cla lebhe: «Canyɔ, 'figisua ‑n 'pa 'lɛ na, ʋ 'fɩan ya yɛ.»

²² Zozii ya maa 'cla lebhe: «A kalɩ Laagɔ 'la pɔɔtɛtɛ.

²³ N solui anyɩ, ɩ ‑glɩ ‑nʋawlɛ, gbazɩ nclɔɔ ‑ka 'kikee ‑naa 'cla lebhe: 'Wlʋ ‑gluu ɩya ‑n bhlili geen, 'nyɩ pɔɔvʋ 'tɔɔ pɔlɛɛn ‑kʋ, ‑ma ɔ ka pɔɔtɛtɛ ‑ka na, ɩ cɩ sɛɛ 'plɩ.

²⁴ Ɩmɩ 'wluku na, n cla anyɩ lebhe: Ɩmɩa 'fɩan a cɩ ka 'lɛ bhibhieli nɩkplaan 'clalɩ na, a kalɩ pɔɔtɛtɛ lebhe a yɩɩ 'lɩ ɩya ɩ 'ka anyɩ ‑nyɩɔ.

²⁵ Gbazɩ, a ‑ka bhibhieda ‑kʋ 'nyɩ a ‑ka luoli lebhe aya nclɔɔ bhlo ‑kalɩ wɔlɩ na, a va ɩya a Toa ‑ɔ ‑kʋ 'lɛ ‑laagɔɔn na, ɔmɔ ‑ma, ɔ 'ka ala nyinyia va.» [

²⁶ ]

'Ndagbazɩ Zozii 'la ‑kwleliea 'wlʋlʋa 'lɛ bha?

²⁷ Zozii ɩya ɔla gɩlɩnyaa* ya ‑awlɛ Zolizalɛmʋ mʋ. Zozii ‑kʋa 'lɛ Laagɔpaakadiea* ‑zɔn 'kʋnamʋnamʋnʋda na, ‑teyiyinyaa tocɩa, ‑jlɩmaazienyaa* ɩya ncaakpasɩa yɔɔ cɩmɛ.

²⁸ Ma yɔɔ neencla lebhe: «'Ŋlɩ saa nɩkplaan ‑n nʋnʋa 'lɛ ‑anɩ ‑naa bha? Ncaasaa ‑ɔ 'nyɩɔ 'lɛ ɩla nʋjiolɩ bha?»

²⁹ Zozii ya maa 'cla lebhe: «N 'ka anyɩ wɔɔkle bhlogbɩɩ ‑tɛɛ neencla. A ŋonuun neen ɩya ‑amʋ ‑ma, n 'ka anyɩ 'ŋlɩa nɩkplaan n nʋnʋ 'lɛ ‑anɩ ‑naa na pala.

³⁰ Zaan 'la 'nyuwluzʋlɩɛa, ‑laagɔɔn ɩ 'wlʋlʋa 'lɛ bha, ‑ma ncɛlɩ wlɩɩn bha? A ŋonuun neen.»

³¹ Ma guguanɩa maa bhlobhlo macɩ nɩkplaan 'nyɩ ma claa lebhe: «Gbazɩ ‑a ‑ka 'cla lebhe: ‑Laagɔɔn na, ɔ cɩ 'ka 'cla lebhe: 'Lɩsaa 'la gbʋ a 'ta 'lɛ ɔla wɔlɩa ‑nʋawlɛ la bha?

³² 'Nyɩ gbazɩ, a ‑ka 'cla lebhe: Ncɛlɩ wlɩɩn na,» ‑alawleea 'la ŋanɔ bhlaa maa, sa maa ‑tɛtɛa maa Zaan le Laagɔnekʋnyɩtɛnyɔ* 'titi na.

³³ Ma ya Zozii neenŋonu lebhe: «‑A 'ta ‑ci.» 'Nyɩ Zozii ya maa 'cla lebhe: «‑Amʋ ‑ma, 'n pala 'ta anyɩ, 'ŋlɩa nɩkplaan n nʋnʋ 'lɛ ɩmɩ ‑naa na.»