Zozi Klisi 'la Dɩnanɩa Makɩ zie 'lɛ na 10 - Le Nouveau Testament en langue Dida

'Cɩcɩɛ ɩya 'cɩcɩɛgbɔlʋlɩɛ

¹ Zozii ya 'dɛ 'wlʋ 'nyɩ ɔ ya Zudeebhlɩa 'kʋ, Zludɛɛn ‑nyidɔlʋa leen mʋ. Ncaabhutukpa ya ‑awlɛɔ cɩ 'wluwlalɩ 'nyɩ saa ɔ nʋ ‑azla 'lɛ na, ɔ ya maa calɩɛ bhɔ.

² Falizɩɛnnyaa* yɔɔ cɩmɛ le ma 'kaa 'mɔɔ 'gbuzu ‑zɔn 'pa. Ma claa 'mɔɔ neen lebhe: «‑Jioli ‑nyɩɔ nclɔɔ le ɔ gbɔlʋ ɔ nʋŋlɔ 'cɩcɩɛ bha?»

³ Zozii ya maa neencla lebhe: «‑Jlɩmaa saa Moyizi 'nyɩa 'lɛ anyɩ bha?»

⁴ Ma yɔɔ neenŋonu lebhe: «Moyizi ya ‑jioli 'nyɩ le ma zie 'cɩcɩɛgbɔlʋfluwa ɩya ma 'tli 'ŋlɔ.»

⁵ Zozii ya maa 'cla lebhe: «Sa ala pɔlɩa ‑titlilio 'lɛ na, ɩla gbʋ Moyizi 'nyɩ 'lɛ anyɩ ‑jlɩmaa ‑naa.

⁶ ‑Ma bhɔdaa, daa Laagɔ nʋ 'lɛ ‑laagɔzɔan na, ɔ ya maa ŋodi ɩya 'ŋlɔ cɩ nʋ.

⁷ Ɩla gbʋ dɛ nclɔɔ cɩ 'ka 'lɛ ɔ to ɩya ɔ 'nɔ cɩɩnwlʋlʋ, ɔ 'ka ɔ nʋŋlɔ cɩmɛ

⁸ ɩya maa ‑mɔsɔa 'kanɩ 'nyɛkɛ bhlo 'plɩ. Dɛ 'la daa, ma 'tanɩ ‑mɔsɔ ‑glɩ, ‑ma 'nyɛkɛ bhlogbɩɩ.

⁹ Na ɩmɩa Laagɔ ya 'lɛ cɩmɛmɛnɩ na, nclɔɔ 'la ‑sasalɩɩ cɩ.»

¹⁰ Daa ma ci 'lɛ 'sleen na, gɩlɩnyaa* ya ‑awlɛ wɔlɩ ‑naa Zozii neencla.

¹¹ Ɔ ya maa 'cla lebhe: «Ɔmɔa ‑ɔ gbɔlʋ 'lɛ ɔ nʋŋlɔ 'cɩcɩɛ 'nyɩ ‑ɔ cɩ 'lɛ ‑buun ŋlɔ na, ɔ ‑glɩ ŋlʋmatɩnyɔ ɔ nʋŋlɔa 'ci 'kʋ.

¹² 'Nyɩ 'ŋlɔ ‑ma ɔ ‑ka ɔ ‑ŋuto 'cɩcɩɛgbɔlʋ 'nyɩ ɔ ‑ka ‑buun ‑ŋodi 'cɩ na, ɔ ‑glɩ ŋodimatɩŋlɔ.»

Zozii palɩ 'cuo 'nyu

¹³ Ma ya Zozii 'cuo ‑la le ɔ 'ka maa sɔ 'wlu ‑gbɛ. ‑Ma gɩlɩnyaa* ŋonu 'taa.

¹⁴ Daa Zozii 'lɩ 'lɛ ɩmɩ ‑naa na, ɩ 'tɔɔ pɔlɛkʋmɛma 'nyɩ ɔ ya maa 'cla lebhe: «A 'talɩ 'cuoa 'cin, ma cɩɩn cɩ, a 'la 'tlia maa, sa Laagɔ 'la Nyɩbhɛlɩdua* ‑kʋ, ʋ ‑nyɩɔ maa ‑anʋa, ‑ɔ ‑kʋ 'lɛ maa 'bhisa na.

¹⁵ N solui anyɩ, ɩ ‑glɩ ‑nʋawlɛ: Ɔmɔa ‑ɔ cɩ 'ta 'lɛ Laagɔ 'la Nyɩbhɛlɩdua wabha le 'cilee 'bhisa na, ɔ cɩ 'tʋʋ nɩkplaan ble.»

¹⁶ 'Nyɩ ɔ ya maa 'ma, ɔ ya maa sɔ 'wlu ‑gbɛ 'nyɩ ɔ ya maa 'nyupalɩ.

Zozii ɩya ncaanyɩbhɛlʋ

¹⁷ Daa Zozii maanɩa 'lɛ ‑gugwie na, nclɔɔ bhlo ya sɔmɩ fa, ɔ yɔɔ ‑deliin ‑kukoonkplii sasla 'nyɩ ɔ yɔɔ neencla lebhe: «Canyɔ 'nanɔ, 'lɩsaa n cɩ 'kaa 'lɛ nʋ ɩya n 'ka 'lɛ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na, 'lɩ bha?»

¹⁸ Zozii yɔɔ 'cla lebhe: «'Lɩsaa 'la gbʋ ‑n laan 'lɛ ncaananɔ bha? Nclɔɔ ‑ylɛylɛ 'ta ‑nanɩ, ‑ma Laagɔ bhlo ‑tɛɛ.

¹⁹ ‑N ‑ci ‑jlɩmaa: ‑Naa 'bhlaa nclɔɔ, ‑naa 'matɩa 'ŋlɔ, ‑naa ghlia 'wi, ‑naa lia ‑kplakpla ‑danʋfʋɛ, ‑naa lia nclɔɔ ‑dufle ɩya zʋ ‑n 'nɔ ɩya ‑n to.»

²⁰ Nclɔɔa yɔɔ 'cla lebhe: «Canyɔ, ‑jlɩmaa ‑naa ‑tɛtɛa n yaa 'kʋplɩlɩ 'na nyɩgbɛ 'kʋ tooto.»

²¹ Zozii yɔɔ 'ciinkope, ɔ yɔɔ wabha 'nyɩ ɔ yɔɔ 'cla lebhe: «Ɔ ‑tonɩɔ lʋʋ bhlogbɩɩ: Mʋ, zʋ ‑naa kalɩkalɩlɩɩa 'fɩan 'pɛlʋ, va 'dalaa ŋaazɩnya ɩya ‑n ka ‑laagɔɔn 'bhɛlɩ li ɩya ci ‑n gɩlɩɩn.»

²² Ɔ 'nu 'lɛ wɔlɩ ‑naa na, 'nyɛkɛ yɔɔ 'kɔtɔ, ɔ ya ‑cʋʋ 'plɩ 'nyɩ ɔ ya mʋ, sa ɔ ‑lioa 'bhɛlɩ 'kadɩ na.

²³ Zozii ya ɔcɩ cɩ kope 'nyɩ ɔ ya ɔla gɩlɩnyaa* 'cla lebhe: «Laagɔ 'la Nyɩbhɛlɩdua* nɩkplaan ‑blelɩɛa cɩ 'ka 'tɛbhalɩ ɩ 'ka maa ‑ɔ ‑lio 'lɛ 'bhɛlɩ 'kadɩ na ‑nyɩɔ.»

²⁴ Wɔlɩ ‑naa ya gɩlɩnyaa pɔlɛɛnsa. ‑Ma Zozii ya ‑awlɛ maa 'cla lebhe: «'Na 'cuonyɩ, Laagɔ 'la Nyɩbhɛlɩdua nɩkplaan ‑blelɩɛa, ɩ 'tɛ.

²⁵ ‑Samoo 'ka 'lɛ 'mɛsɛlʋ 'la kofo nɩkplaan bleli na, ɩ ‑cɔlʋɔ 'nyɩ ɩ zi saa nyɩbhɛlʋ 'ka 'lɛ Laagɔ 'la Nyɩbhɛlɩdua nɩkplaan ble na 'kʋ.»

²⁶ Gɩlɩnyaa 'la pɔlɛɛnwlʋlɩɛa ya ‑awlɛ 'kʋzʋlʋ 'nyɩ ma 'claclalɩa neen lebhe: «Na ncaasaa 'titi ‑ɔ ‑cɩ kanɩ 'lɛ gbʋʋnsalɩɛ 'lɩ bha?»

²⁷ Zozii ya maa 'ciinkope 'nyɩ ɔ ya maa 'cla lebhe: «Ɩmɩ ‑naa, ncɛlɩ cɩ 'tɩɩ nʋlɩɛ mino, ‑ma Laagɔ ɔmɔ, ɔ cɩɩ mino, sa ɔ ‑glɩ ‑tɛtɛa 'fɩan 'la minonyɔ na.»

²⁸ Pɩɛlɩ yɔɔ 'cla lebhe: «'Lɩka, ‑anyɩ ‑a ya ‑tɛtɛa 'fɩan 'cintalɩ 'nyɩ ‑a yɔɔ 'lɛ gɩlɩ.»

²⁹ Zozii yɔɔ 'cla lebhe: «N solui anyɩ, ɩ ‑glɩ ‑nʋawlɛ, nclɔɔ cɩ 'ta 'sle, bholiecɩ, mɛɛncɩ, to, 'nɔ, 'cuo ‑aana 'kwlɩ te, n ‑ya Dɩnanɩa* 'la gbʋ

³⁰ ɩya ɔ 'la ka ‑pɔtɔnʋ, 'bhlɛsʋ ‑naa nɩkplaan, 'sli, bholiecɩ, mɛɛncɩ, 'nɔcɩ, 'cuo ɩya 'kwlɩ, ɩla dɩpici gwlɩɩ ‑ngbi 'lɩ, gbaylɩsalɩɛ nɩkplaan ɩya 'kʋklʋʋn 'la 'bhlɛsʋa nɩkplaan, ɔ 'ka jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'lɩ.

³¹ 'Kʋklʋʋn ‑naanʋa ‑bhutukpa cɩ 'ka leen 'plɩlɩ ɩya leen ‑naanʋaa 'ka 'kʋklʋʋn 'plɩ.»

‑Mɔtada Zozii nyɩtɛ ɔla 'kwɩ ɩya ɔla 'kwɩɩnkʋbhue 'la wɔlɩ

³² Zozii ɩya ɔla gɩlɩnyaa* ‑kʋa ‑gugwie 'kʋ, ma ‑gblaa Zolizalɛmʋ 'nyɩ Zozii pʋa maa 'kʋklʋʋn. Gɩlɩnyaa ‑kʋa pɔɔvʋʋn 'nyɩ ŋanɔ bhlaa maa ‑ɔ gɩlɩa 'lɛ maa na. Ɔya 'kʋgba ‑mɔsɔa ya ‑awlɛ gbɛga 'nyɩ ɔ ya maa, ɩmɩa ‑ɩ ‑cɩ kaa 'mɔɔ 'lɛ ŋeni na, solulɩɛ bhɔ. Ɔ ya maa 'cla lebhe:

³³ «'Lɩka, ka ‑a ‑gblaa 'lɛ Zolizalɛmʋ ɩya Nclɔɔa 'Cʋa*, ma 'kɔɔ ‑teyiyinyaa tocɩa ɩya ‑jlɩmaazienyaa* wlɩɩn 'pɛlʋzʋlʋ, ma cɩ kɔɔ 'tɩtɩpla, ma 'ka 'cla lebhe ma 'bhlɔɔ ɩya ma 'kɔɔ maa ‑ɔ 'ta 'lɛ Laagɔ ‑ci na, wlɩɩn zʋ.

³⁴ Ma cɩ 'kɔɔ nyanɩ, ma 'kɔɔ ‑daadʋ 'ciinŋwla, ma 'kɔɔ ‑ngblieen bhutili, ma 'kɔɔ 'bhla, ɔ 'ka 'ku ɩya ɩla ‑mɔta ‑zelia, ɔ 'ka 'kwɩɩnkʋbho.»

Zakɩ ɩya Zaan 'la 'clalɩlɩɛ

³⁵ Zakɩ ɩya Zaan, Zebedee 'la 'cuoa, ma ya Zozii cɩmɛ 'nyɩ ma yɔɔ 'cla lebhe: «Canyɔ, ‑a ‑wa lebhe ɩmɩa ‑a ‑cɩ kɔɔ 'lɛ 'clalɩ na, 'maa nʋɩ ɩya ‑n 'nyɩ ‑anyɩ.»

³⁶ Ɔ ya maa 'cla lebhe: «'Lɩsaa a ‑wa 'lɛ lebhe n nʋ ɩya n 'nyɩ anyɩ bha?»

³⁷ Ma yɔɔ 'cla lebhe: «Daa ‑n cɩ 'ka 'lɛ ‑naa 'klʋagbaa nɩkplaan ble na, 'maa 'nyɩ ‑anyɩ ‑jioli ɩya bhlo 'ka ‑naa 'lipasɔa 'kʋ sakʋ ɩya bhlo 'ka ‑naa 'dabaa 'kʋ sakʋ.»

³⁸ Zozii ya maa 'cla lebhe: «Ɩmɩa a 'clalɩ 'lɛ na, a 'tɩɩ ‑ci. ‑Kɔbhɛa n cɩ 'ka 'lɛ 'mla na, a cɩɛ 'mlalɩɛ mino bha? 'Nyuwluzʋlɩɛa n cɩ 'ka 'lɛ 'lɩ na, a cɩɩ 'lɩlɩɛ mino bha?»

³⁹ Ma yɔɔ 'cla lebhe: «‑A cɩ mino.» Zozii ya maa 'cla lebhe: «‑Kɔbhɛa n cɩ 'ka 'lɛ 'mla na, a cɩɛ 'mla, 'nyuwluzʋlɩɛ n cɩ 'ka 'lɛ 'lɩ na, a cɩɩ 'lɩ.

⁴⁰ ‑Ma ‑ɩ ‑glɩ 'lɛ 'na 'lipasɔa ‑aana 'na 'dabaa 'kʋ 'la sakʋlɩɛa na, ‑n 'ta ‑amʋ ‑ɔ 'nyɩ 'tɩɩ 'lɛ: Maa ‑anʋa 'la gbʋa ɩ bhɔsʋɔ 'lɛ na, maa ɩ cɩ 'ka 'lɛ ‑nyɩɔ.»

⁴¹ Daa ‑danaanʋaa 'kʋgbaa 'nu 'lɛ wɔlɩ ‑naa na, ma ya Zakɩ ɩya Zaan dɔgbɛ 'kʋ 'manɩ.

⁴² Zozii ya maa la 'nyɩ ɔ ya maa 'cla lebhe: «A ‑ci sɛɛ lebhe maa ma ma 'lɛ le 'bhlɩtocɩa na, ka ma ‑kwle 'lɛ ma 'bhlɩnyaa 'nyɩ ncaakadɩa kʋlʋ 'lɛ maa 'kʋ.

⁴³ ‑N 'ta ‑sɛɛ ɩ 'ta 'lɛ anyɩ sidiin ‑kʋ. ‑Ma anyɩ sidiin, gbazɩ bhlo ‑ka ‑wa lebhe ɔ 'ka ‑kwle na, 'naa ɔ 'plɩ ala lobhoco.

⁴⁴ 'Nyɩ, anyɩ sidiin, gbazɩ bhlo ‑ka ‑wa lebhe ɔ 'ka 'kʋklʋʋn kʋ na, 'naa ɔ 'plɩ anyɩa 'fɩan 'la geyu.

⁴⁵ Sa, Nclɔɔa 'Cʋa* 'ta ci le ma 'kɔɔ lobho, ‑ma ka ɔ ci 'lɛ le ɔ 'ka lobho ɩya ncaabhutukpa 'la nɩkplaankplɩlɩɛ 'la gbʋ, ɔ 'ka ɔcɩ ‑sa.»

Zozii ya 'citutunyɔ Batimee jabha

⁴⁶ Zozii ɩya ɔla gɩlɩnyaa* ya Zelikoo mʋ. Da maya ncaabhutukpa ‑kʋa 'lɛ Zelikoo 'wlʋ da na, 'citutunyɔ, Timee ‑yowli, Batimee ‑kʋa ‑gugwiea cɩ sa, ɔ zlaa.

⁴⁷ Ɔ 'nu 'lɛ lebhe Nazalɛtɩnyɔ Zozii na, ɔ yaan ‑gaa 'nyɩ ɔya 'cla lebhe: «Zozii, Daviti 'la 'Cʋ, 'maa 'lɩɩn ŋaazɩɩn!»

⁴⁸ Ncaabhutukpa klaa 'mɔɔ 'kʋ le ɔ mɛa ɔla nea, ‑ma ka ‑tɛɛ ɔ 'tɛbhalɩa neen 'nyɩ ɔ claa lebhe: «Daviti 'la 'Cʋ, 'lɩɩn ŋaazɩɩn!»

⁴⁹ Zozii ya 'nylugo 'nyɩ ɔ ya 'cla lebhe: «A lɔɔ.» Ma ya 'citutunyɔa la, ma yɔɔ 'cla lebhe: «'Sɩslɩlɩ ‑n ‑bho 'kʋ, ɔ lɔɔ.»

⁵⁰ Ɔ ya ɔla bibielʋʋa 'kwlaanpa, ɔ ya ɔcɩɩn 'sʋ 'nyɩ ɔ ya Zozii 'bɩɩn mʋnʋ.

⁵¹ Zozii yɔɔ 'cla lebhe: «'Lɩsaa ‑n ‑wa 'lɛ lebhe n nʋ ɩya n 'nyɩɔ bha?» 'Citutunyɔa yɔɔ 'cla lebhe: «Canyɔ, 'naa n 'lɩ sa.»

⁵² Zozii yɔɔ 'cla lebhe: «Mʋ, ‑naa pɔɔtɛtɛa yɔɔ jabha.» 'Kplookʋ ɔ ya salɩ, 'nyɩ ɔ ya Zozii gɩlɩ.