Zozi Klisi 'la Dɩnanɩa Matie zie 'lɛ na 23 - Le Nouveau Testament en langue Dida

A zʋlʋ ‑jlɩmaazienyaa ɩya Falizɩɛnnyaa pɔlɛ 'kʋ

¹ Zozii ya ‑alawleea ɩya ɔla gɩlɩnyaa* 'cla lebhe:

² «‑Jlɩmaazienyaa* ɩya Falizɩɛnnyaa*, ka ma ‑kʋ 'lɛ 'dɛ le ma 'ka Moyizi 'la ‑jlɩmaa ‑zɔn ‑sa.

³ Na, a nʋ ɩya a 'plɩlɩ ɩmɩa 'fɩan ma cɩ 'ka 'lɛ anyɩ solu na 'kʋ, ‑ma a 'la nʋa maa 'bhisa. ‑Ofi lebhe maa nʋ 'ta ɩmɩa ma nyɩtɛ 'lɛ na.

⁴ Ma ca ‑gbaakwɩ 'kadɩ 'nyɩ ma slui ma 'ye, 'dɛndlana ‑ma 'titi ŋonu 'ta ɩya ma 'kɩɩ ‑wlicie ko.

⁵ Mala nʋnʋgbɩa 'fɩan, 'ka ma nʋɩ 'lɛ le ncɛlɩ 'ka maa 'lɩmʋ. Ma pɩa 'wlu 'nyɩ 'gbandɩ ‑blii gɩɩ 'lɛ mala nɩkplaanplalokua cɩ.

⁶ Ma ‑ka maa 'tlɔnblɩ 'kʋ la ‑aana ma ‑ka bhiebhiepalɩa ‑zɔn mʋ na, ma ‑wa 'kʋklʋʋnkpua 'kʋ sakʋlɩɛ

⁷ 'nyɩ 'clikpua nɩkplaan, ma ‑wa 'lɛ lebhe ncɛlɩ 'pa maa ‑ayo ɩya ma la maa canya.

⁸ ‑Ma anyɩ, a 'la 'claa lebhe ma la anyɩ canya, ‑sa anyɩa 'fɩan a ‑ka canyɔ bhlogbɩɩ 'nyɩ a ‑glɩ 'lɛ bholiecɩ.

⁹ A 'la laa ‑dʋdʋa 'kʋ, nclɔɔ bhlogbɩɩ to, ‑sa anyɩ, to bhlogbɩɩ ‑tɛɛ a ‑ka 'lɛ, ɔmɔ ‑ɔ ‑kʋ 'lɛ 'yɛpɩ ‑laagɔɔn.

¹⁰ Sɛɛ bhlogbɩɩ, a 'la 'claa ncɛlɩ lebhe ma la anyɩ kpanya, sa ala kpanyɔa bhlogbɩɩa a ‑ka 'lɛ na, ɔmɔ ‑glɩ 'lɛ Laagɔ 'la ‑Sasanyɔa*.

¹¹ Anyɩ sidiin, ɔmɔa ‑ɔ ‑to 'lɛ 'kʋ na, 'naa ɔ 'plɩ ala lobhoco.

¹² Na, ɔmɔa ‑ɔ ‑cɩ ka 'lɛ ɔcɩ 'kʋto na, ma cɩɔ ‑dʋdʋ 'kʋ ‑la 'nyɩ ɔmɔa ‑ɔ ‑cɩ 'ka 'lɛ ɔcɩ ‑dʋdʋ 'kʋ ‑la na, ma cɩɔ 'kʋto.

Zozii sa ‑jlɩmaazienyaa ɩya Falizɩɛnnyaa ‑zɔn

¹³ ‑Munzue bho anyɩ ‑jlɩmaazienya* ɩya Falizɩɛnnyanyɩ*! Yooyo ncɛlɩnyɩ! Anyɩa ‑ɔ kpaslɩlɩ 'lɛ ncɛlɩ ‑laagɔɔn 'la Nyɩbhɛlɩdua* 'la gbinea na! Anyɩ 'titi 'a ble 'ta 'yɛpɩ 'nyɩ 'a te 'ta maa ‑ɔ ‑wa 'lɛ lebhe ‑ɔ cɩa 'yɛpɩ ble na, ne. [

¹⁴ ]

¹⁵ ‑Munzue bho anyɩ, ‑jlɩmaazienya ɩya Falizɩɛnnyanyɩ! Yooyoncɛlɩnyɩ! Anyɩa ‑ɔ bhli 'lɛ 'bhlɩ 'bhlɩ ɩya ge le a ‑ka lowlunyɔ bhlogbɩɩ 'titio 'lɩ na, a 'kɔɔ ala gʋgwlakandinyɔ ple 'nyɩ daa ɔ yɔɔ 'lɛ 'plɩ na, a gba 'nyɩ ɔya ‑kosua ‑ʋ ŋomu 'ta 'lɛ na, ‑fatanɩ dɩpici ‑mɔsɔ, 'nyɩ ɔ zinɩ anyɩ 'kʋ.

¹⁶ ‑Mʋnzue bho anyɩ, 'citutunyanyɩ, ‑ɔ kpa 'lɛ 'citutunya na! Anyɩa ‑ɔ cla 'lɛ lebhe: Gbazɩ nclɔɔ ‑ka Laagɔpaakadiea* 'ŋlɩ sla 'nyɩ ɔ ‑ka ta na, 'ɩ nʋ 'ta lʋʋ, ‑ma gbazɩ ɔ ‑ka ʋla ‑zɔn 'la ‑asɩkɛa 'ŋlɩ sla 'nyɩ ɔ ‑ka ta na, ɩ ‑fata lebhe ɔ ‑glalɩ ɔla ‑ndanyɩtalɩɛa 'kʋ na.

¹⁷ 'Citutunyanyɩ, ‑badaaglunyanyɩ! 'Lɩsaa kalɩa 'lɛ gbʋ bha? ‑Asɩkɛa bha? ‑Ma Laagɔpaakadie ‑ʋ ple 'lɛ ‑asɩkɛa gbakabhalʋʋ na bha?

¹⁸ A cla ‑awlɛ lebhe: Gbazɩ nclɔɔ ‑ka gʋgwlagbatɩa 'ŋlɩ sla 'nyɩ ɔ ‑ka ta na, ɩ 'ta gbʋ ‑glɩ, ‑ma gbazɩ ɔ ‑ka vavalɩɩa ‑ɩ ‑kʋ 'lɛ gʋgwlagbatɩa 'kʋ, 'ŋlɩ sla 'nyɩ ɔ ‑ka ta na, ɩ ‑fata lebhe ɔ ‑glalɩ ɔla ‑ndanyɩtalɩɛa 'kʋ.

¹⁹ 'Citutunyanyɩ! 'Lɩsaa kalɩa 'lɛ gbʋ bha? Vavalɩɩa bha? ‑Ma gʋgwlagbatɩa ‑ɩ ple 'lɛ vavalɩɩa gbakabhalɩɩ na bha?

²⁰ Na, ɔmɔa ‑ɔ talɩ 'lɛ gʋgwlagbatɩa 'kʋ na, gʋgwlagbatɩa ɩya lɩɩa 'fɩan ‑ɩ ‑kʋɛ 'lɛ 'kʋ na, ɩmɩ ɔ talɩ 'lɛ 'kʋ.

²¹ Ɔmɔa ‑ɔ talɩ 'lɛ Laagɔpaakadie 'kʋ na, Laagɔpaakadiea ɩya ɔmɔa ‑ɔ ‑kʋʋ 'lɛ ‑zɔn na 'kʋ ɔ talɩ 'lɛ.

²² Ɔmɔa ‑ɔ sla 'lɛ ‑laagɔɔn 'ŋlɩ 'nyɩ ‑ɔ ta 'lɛ na, Laagɔ 'la nyɩbhɛlɩkpoa ɩya ɔmɔa ‑ɔ ‑kʋa 'lɛ 'kʋ sa na, 'kʋ ɔ talɩ 'lɛ.

²³ ‑Munzue bho anyɩ, ‑jlɩmaazienya ɩya Falizɩɛnnyanyɩ! Yooyo ncɛlɩnyɩ! Anyɩa ‑ɔ nyɩ 'lɛ Laagɔ ala 'ŋɔnɔpapitia 'la 'kʋgba cea 'nyɩ ‑ɔ te 'lɛ ɩmɩa ‑jlɩmaa nɩkplaan, ‑ɩ 'wɔlʋ 'lɛ 'kʋ 'nyɩ ‑ɩ ‑glɩ 'lɛ 'kʋnylugolulɩɛ, ŋaazɩɩnlɩlɩɛ ɩya niwɔlɩ 'la 'kʋglalɩlɩɛ na. ‑Anɩ ‑naa, ɩmɩ ɩ ‑fataa 'lɛ lebhe a nʋa ɩya a 'la tea ‑da ‑naanɩa ‑ma.

²⁴ A ‑glɩ 'citutunyaa ‑ɔ kpa 'lɛ ncɛlɩ na! A kplɩ ala nʋ nɩkplaan 'nyɩ a sa 'yɛpɩ zokpie, ‑ma a mla ‑samoo ‑totobhuo.

²⁵ ‑Munzue bho anyɩ, ‑jlɩmaazienya ɩya Falizɩɛnnyanyɩ! Yooyo ncɛlɩnyɩ! Anyɩa ‑ɔ wɔlʋ 'lɛ ‑kɔbhɛa ɩya ‑dakɔa 'la cɩa 'nyɩ ɩla nɩkplaan yee 'lɛ ala ghlighlilɩɩa ɩya ala yooyogbanʋlɩɛa -tɛtɛa 'kʋ na.

²⁶ Falizɩɛnnyɔ, 'citutunyɔ! Wɔlʋ ‑kɔbhɛa nɩkplaan ‑bɛɛ ɩya ɛla cɩa ‑masɛ 'ka ‑kplɔ.

²⁷ ‑Munzue bho anyɩ, ‑jlɩmaazienya ɩya Falizɩɛnnyanyɩ! Yooyo ncɛlɩnyɩ! Anyɩa ala gbɩa ‑kʋ 'lɛ le lesia ma ya 'lɛ pubha na. Ma ‑kɩɩ 'lɩ na, ɩ nanɩ, ‑ma nɩkplaan yee ncaakɔ ɩya 'zɩ* ‑mizimizi 'kʋ.

²⁸ Na, 'sɛtɛɛ bhlogbɩɩ a ‑kʋ 'lɛ. Ma ‑ka anyɩ 'lɩ na, a palalɩ le 'kʋnylugolunya, ‑ma ala pɔlɩa yee yooyogbɩ ɩya gbanyinyi 'kʋ.

²⁹ ‑Munzue bho anyɩ, ‑jlɩmaazienya ɩya Falizɩɛnnyanyɩ*! Yooyo ncɛlɩnyɩ! Anyɩa ‑ɔ sla 'lɛ Laagɔnekʋnyɩtɛnya 'la lesi 'nyɩ ‑ɔ budo 'lɛ 'kʋnylugolunya 'la lesi 'nyu na.

³⁰ A cla lebhe: ‑Anyɩ, ɩ ‑ka ‑kʋ lebhe ‑a yaa ‑a tokadɔcɩ 'la 'bhlɛsʋa 'lɩmʋ na, ‑aya maasɔ cɩ 'taa ‑plɔ ɩya ‑a kaa Laagɔnekʋnyɩtɛnya 'la ‑dolu sakɔsɔ.

³¹ Ala wɔɔnyɩtʋa nɩkplaan, anyɩ 'titi a cibhlili lebhe a ‑glɩ maa ‑ɔ 'bhla 'lɛ Laagɔnekʋnyɩtɛnyaa na, mala 'cuo.

³² Anyɩ, a bhɩalɩnɩ ɩmɩa a tokadɔcɩa bhɔa 'lɛ na!

³³ Tlanyɩ, kpaclɩlɔlʋnyanyɩ! 'Nsasa a cɩ 'ka 'lɛ ‑kosua ‑ʋ ŋomu 'ta 'lɛ na 'la gbaylɩsalɩɛa 'wlubibili bha?

³⁴ Ɩla gbʋ na, ‑amʋ n cɩ 'ka anyɩ 'bhlɩ Laagɔnekʋnyɩtɛnya, dɩgalɩnya ɩya ‑jlɩmaazienya lobhu. A cɩ 'ka ‑anʋa 'bhla ɩya a 'ka maa dabhlalɩsu 'ciin bho, a cɩ 'ka ‑anʋa ala bhiebhiepalɩa ‑zɔn ‑ngblieen bhutili ɩya maa ‑ɔ cɩ ka 'lɛ 'gu na, a 'ka 'di 'di 'kʋ 'plɩ ɩya a 'ka maa 'matɩ.

³⁵ Na, 'kʋnylugolunyaa ‑tɛtɛa mala ‑dolua -ʋ 'kɔsɔ 'lɛ ‑dʋdʋa 'kʋ sa na, ʋla ‑tobhua cɩ 'ka anyɩ 'wlu ‑gbɛ, ‑ɩ bhɔlʋɔ 'lɛ 'kʋnylugolunyɔ Abɛlɩ 'kʋ ‑aan 'nyɩ ‑ɩ ŋeni 'lɛ Balasii ‑yowli Zakalii 'kʋ, ɔmɔ ‑naa a 'bhlalɩ 'lɛ ‑kplɔkplɔdaa ɩya gʋgwlagbatɩa ‑gbaaglɩɩn na.

³⁶ N solu anyɩ, ɩ ‑glɩ ‑nʋawlɛ, ɩmɩ ‑naa ‑tɛtɛa, anyɩ ‑pɔtɔnʋ 'la ncɛlɩa -ɔ ‑cɩ ka 'lɛ ɩla ‑tobhua ‑slo.

Zozii bhʋtʋ Zolizalɛmʋdua

³⁷ Zolizalɛmʋ, Zolizalɛmʋ, ‑mɔa ‑ɔ bhla 'lɛ Laagɔnekʋnyɩtɛnya 'nyɩ ‑ɔ bhla 'lɛ maa Laagɔ lobhuo 'lɛ 'bhlɩ na, cɔkʋʋn na. Saa ‑gʋgɔ 'wlalɩ 'lɛ ʋla 'cuo ʋla ‑papua ‑zɔn 'wlu na, 'lɩsaa n 'taa 'lɛ nʋ le n 'kaa ‑naa 'cuoa 'wluwlalɩ bha? ‑Ma ‑n 'ta ŋonu.

³⁸ 'Lɩka ala ‑palʋa, ʋ cɩ 'ka ‑zɔn we.

³⁹ ‑Ghɛɛ, n solu anyɩ, ‑ɩ 'manɩɔ 'lɛ ‑da na, 'a cɩ 'tanɩɩn 'lɩ ‑aan 'nyɩ a cɩ 'cla lebhe: 'Naa 'nyupalɩɛ ŋeni ɔmɔa, ‑ɔ cili 'lɛ ‑Kwlenyɔ 'la 'ŋlɩa nɩkplaan na.»