Lobh 25 - Le Nouveau Testament en langue Dida

Pɔlʋ nyɩtɛ ɔla da goonvla Fɛsɩtusu ‑deliin

¹ Na, goonvla Fɛsɩtusu li 'lɛ clɩɩ ‑mɔta ɔla ‑kwlekpoa 'kʋ na, ɔ ya 'dua ma la 'lɛ Sezalee na 'kʋ 'wlʋ 'nyɩ ɔ ya Zolizalɛmʋ ‑gblaa.

² ‑Teyiyinyaa tocɩa ɩya Zifʋnyaa* tocɩa ya 'kʋbho, ma yɔɔ 'bhlɩ mʋ le ma 'kaa Pɔlʋ tʋ kulu. Ma ya goonvlaa cɩ zɩzlalɩ

³ 'nyɩ ma yɔɔ 'clalɩ le ɔ gba ɩya ma ‑lamʋ Pɔlʋ Zolizalɛmʋ. Ma yaa wɔlɩ gʋa le ma 'kaa 'mɔɔ ‑gugwiea 'kʋ 'bhlalɩ.

⁴ ‑Ma Fɛsɩtusu ya maa 'cla lebhe Sezaleedua 'la ‑palʋʋnpapalʋa ‑zɔn Pɔlʋ cɩ 'ka 'lɛ kʋ. ‑Awlɛ, ka ɔmɔ 'titi cɩ 'ka 'lɛ ‑clɩɩ -klipɛ nɩkplaan cɔlɔ.

⁵ Na, ɔ ya maa 'cla lebhe: «Ka ɩ ‑ka ‑kʋ lebhe nclɔɔ ‑naa ya wɔɔnyinyi nʋ na, 'naa a 'bhlɩtocɩa gɩlɩɩn ‑a ka Sezalee kwli ɩya ma 'kɔɔ 'yɛpɩ tʋ kulu.»

⁶ Clɩɩ ‑ngbata ‑aana 'kʋgba ‑tɛɛ Fɛsɩtusu li 'lɛ maa cɩ. Ɔ kwli 'lɛ Sezalee 'nyɩ ‑zeli ze 'lɛ na, ɔ ya 'tɩtɩpladaa sakʋkan mʋ. 'Nyɩ ɔ ya gba ma ya Pɔlʋ ‑lamʋ.

⁷ Daa ma ‑lamʋɔ 'lɛ na, Zifʋnyaa ‑ɔ 'wlʋlʋa 'lɛ Zolizalɛmʋ na yɔɔ didio 'nyɩ ma yɔɔ wɔɔnyinyi ‑bhutukpa 'kʋ gɩ. ‑Ma ma mino 'taa ɩya ma 'kaa 'mɩɩ ‑zɔn ‑sa.

⁸ Pɔlʋ ya ɔla da nyɩtɛ 'nyɩ ɔ yaa 'cla lebhe: «N 'ta ka wɔɔnyinyi ‑ylɛylɛ nʋ, n 'ta ka Zifʋnyaa 'la ‑jlɩmaa, Laagɔpaakadiea* ‑aana 'bhlɩa 'la ‑kwletoa gbatlɩmʋnʋ.»

⁹ Fɛsɩtusu ‑waa 'lɛ lebhe ɔ 'kaa Zifʋnyaa 'la pɔlɛkʋmɛnɔmɛnɔgbɩ nʋ na, ɔ ya Pɔlʋ neencla lebhe: «‑N ‑wa lebhe ‑n cɩ Zolizalɛmʋ ‑gblaa ɩya n 'kɔɔ 'yɛpɩ 'tɩtɩplalɩ bha?»

¹⁰ Pɔlʋ ya 'cla lebhe: «'Tɩtɩplajlee ‑naa ‑kʋ Sezalɩ 'la ‑kwleliea ‑zɔn. Na, ‑da ɩ ‑fata 'lɛ lebhe ma ‑plalɩɩn 'tɩtɩ. ‑Mɔɔ 'titi ‑n ci sɛɛ lebhe n 'ta ka Zifʋnyaa wɔɔnyinyi ‑ylɛylɛ cɩ nʋ.

¹¹ Ɩ ‑ka ‑kʋ lebhe ‑zaagbʋsa, n ‑glɩ wɔlɩa ma nyɩtɛ 'lɛ na 'la nʋnyɔ, ɩ ‑ka ‑kʋ le n ya wɔɔnyiyia ‑tɛtɛa ‑ɩ ya 'kwɩ ‑fata 'lɛ na nʋ na, n ŋonu lebhe n cɩ ɩla gbʋ 'ku. ‑Ma wɔlɩa ‑tɛtɛa ma nyɩtɛ 'lɛ 'na gbʋ 'nyɩ ‑nʋawlɛ 'tɩɩ nɩkplaan ‑kʋ na, nclɔɔ bhlogbɩɩ 'ta ‑jioli ‑ka ɩya ɔ 'kaan maa 'nyɩnɩ le ma ‑saan gbaylɩ. ‑Anɩ ‑naa 'la gbʋ na, n ‑wa lebhe n cɩ Sezalɩ ‑deliin mʋ ɩya ɔ 'ka 'na 'tɩtɩa ‑pla.»

¹² Na, Fɛsɩtusu ɩya ɔla dɩgalɩnyɩnyaa ya neennununu 'nyɩ ɔ ya 'cla lebhe: «‑N ‑wa lebhe ‑n cɩ Sezalɩ ‑deliin mʋ: N cɩ ka Sezalɩ ‑deliin mʋ.»

Pɔlʋ ‑kʋ nyɩbhɛlʋ Aglipaa ‑deliin

¹³ Na, clɩɩ ‑zlʋsaasa 'plɩ 'lɛ na, nyɩbhɛlʋ Aglipaa ɩya ɔ mɛnɔ Belenisi ya Sezaleedua 'kʋ ci 'nyɩ ma ya goonvla Fɛsɩtusu kope mʋ.

¹⁴ Ma ya 'yɛpɩ clɩɩ ‑zlʋsaasa li, 'nyɩ Fɛsɩtusu ya nyɩbhɛlʋa Pɔlʋ 'la cɩa wɔlɩ solu. Ɔ yɔɔ 'cla lebhe: «Nclɔɔ bhlo ‑kʋ ‑da, Felisi yɔɔ ‑palʋʋnpapalʋ ‑zɔn te.

¹⁵ Daa n mʋa 'lɛ Zolizalɛmʋ na, ‑teyiyinyaa tocɩa ɩya Zifʋnyaa* 'la ncaakpasɩa yaan 'bhlɩ ci, ma yɔɔ tʋ kulu 'nyɩ ma yaan 'clalɩ le n ‑saa 'mɔɔ gbaylɩ.

¹⁶ ‑Ma n ya maa neenŋonu lebhe nclɔɔa ma ya 'lɛ wɔlɩ 'kʋ gɩ na, ma 'ta 'ka ɔya ɔla wɔlɩkʋgɩnyaa saazʋ ɩya ma 'kɔɔ ‑jioli 'nyɩ le ɔ nyɩtɛ ɔla da na, ɩ 'ta Wlɔmʋnya 'la nʋnʋgbɩ ‑glɩ le ma ‑sɔɔ gbaylɩ.

¹⁷ Na, dɛ ma 'cɩlɩ 'lɛ ‑wɔlʋ 'wlu. 'Nyɩ n 'ta clɩɩ zʋ, ‑ma daa ‑zeli ze 'lɛ na, n ya 'tɩtɩplajlea nɩkplaan ci, n ya sakʋ, 'nyɩ n ya 'lɛ 'cla lebhe ma ‑lamʋ nclɔɔa.

¹⁸ ‑Ma daa ɔla wɔlɩkʋgɩnyaa 'wlalɩ 'lɛ 'wlu na, ma 'ta gbawɔlɩa 'titia n cɩa 'lɛ gugu lebhe ɔ yaa nʋ na, ‑ylɛylɛ nyɩtɛ.

¹⁹ Wɔlɩa ‑tɛɛa ma ‑yɔɔsɔ 'tɩtɔ 'lɛ na, ɩ ‑glɩ maa 'titi mala gʋgwlɛa 'la wɔlɩ, ɩya nclɔɔ bhlo ma lɔɔ Zozii, ɔla wɔlɩ. Nclɔɔ ‑naa ya 'ku, ‑ma Pɔlʋ nabhe ɔ ‑ja, ɔ ‑kʋ ka ‑azla.

²⁰ Na, n 'lɩ 'ta 'lɛ saa 'titia n 'ka 'lɛ ‑sa 'la wɔlɩa klaklalɩ na, dɛ n 'cla 'lɛ Pɔlʋ le ɔ ‑ka wa na, ɔ mʋ Zolizalɛmʋ ɩya ma 'ka 'yɛpɩ ɔla 'tɩtɩa ‑plalɩ.

²¹ ‑Ma, ɔ 'ta ŋonu, ɔ ya 'clalɩ le Wlɔmʋ 'la ‑kwletoa 'titi ‑pla ɔla 'tɩtɩa. Na, n ya 'cla lebhe ma zʋɔ ‑palʋa ‑zɔn ‑aan ɩya clɩɩa 'kʋa ma cɩ 'kɔɔ 'lɛ ‑kwletoa ‑deliin fa na, ɩ 'ka ŋeni.»

²² Aglipaa ya Fɛsɩtusu 'cla lebhe: «‑Amʋ ‑masɛ, n ‑wa lebhe n cɩ nclɔɔ ‑naa neen 'nu.» Fɛsɩtusu yɔɔ 'cla lebhe: «‑Cɩpa, ‑n cɩ ‑kɔɔ neen 'nu.»

²³ Na, ‑zeli ze 'lɛ na, Aglipaa ɩya ɔ mɛnɔ Belenisi ya ci. Ma bhɔsʋa 'nanɩ, 'nyɩ maya 'sojaa tocɩ ɩya 'dua tocɩa ‑ɔ gɩlɩa 'lɛ maa na, ya 'tɩtɩpladaa ble. Fɛsɩtusu ya gba, ma ya Pɔlʋ ‑lamʋ.

²⁴ Ɔ ya wɔɔnyɩtʋ 'ma 'nyɩ ɔ ya 'cla lebhe: «Nyɩbhɛlʋ Aglipaa, ɩya anyɩa 'fɩan ‑ɔya ‑anyɩsɔ ‑kʋ 'lɛ da na, a ‑jlɛ nclɔɔ ‑naa. Ɔla gbʋ, Zifʋnyaa ‑tɛtɛa ya Zolizalɛmʋ ci, ma yaan ŋeni, 'nyɩ ma ya ‑awlɛɛn 'lɛ ‑wɔlʋ gɩlɩ. Ma ‑gaa nɩkplaan 'nyɩ ma cla 'lɛ lebhe ɩ 'tanɩ ‑fata lebhe nclɔɔ ‑naa kʋ ‑awlɛ ‑laagɔzɔn.

²⁵ ‑Ma ‑amʋ, n 'ta ɔla nʋnʋgbɩa nɩkplaan wɔlɩ bhlogbɩɩ, ‑ɩya 'kwɩ ‑fata 'lɛ na, 'lɩlɩ. ‑Masa, ɔmɔ 'titi ya 'lɛ 'clalɩ le ɔ cɩ ‑kwletoa ‑deliin mʋ na, dɛ n 'cla 'lɛ lebhe n cɩɔ mɔ ‑deliin fa.

²⁶ 'Bhlɩmɔɔn, n 'lɩ 'ta wɔlɩa 'titia n cɩ 'ka 'lɛ ‑kwletoa zie ɔla 'sasʋʋn na, ɩla gbʋ dɛ n gba 'lɛ 'nyɩ ma yɔɔ 'lɛ anyɩ ‑deliin ‑la, ka n nabhe n 'ka 'lɛ 'cla le ‑mɔ, nyɩbhɛlʋ Aglipaa ‑deliin ɩya n ‑kɔɔ neen 'nu na, n 'ka sɛnɩ mino ɩya n 'ka ‑kwletoa ziesa cibhlili.

²⁷ Sa, n gugu lebhe ma ‑ka ‑palʋʋnpapanyɔ ‑kwletoa ‑deliin fa, 'nyɩ ma 'tɔɔ wɔlɩa 'titia ma gɩɔ 'lɛ 'kʋ na, ‑zɔn ‑sa na, ɩ 'ta 'ciingɩlɩɔ.»