Kols 4 - Le Nouveau Testament en langue Dida

¹ Geyetocɩnyɩ, a kla ala geyea saa ‑ɩ 'nylugolu 'lɛ 'kʋ 'nyɩ ‑ɩ ‑gɩlɩɔ 'lɛ 'ciin na, sa a ‑ci sɛɛ lebhe anyɩ ‑ma, a ‑kamʋ to bhlo 'yɛpɩ ‑laagɔɔn.

A bhibhie ɩya a namʋnʋ dɩgalɩɩn

² A 'la sɛa bhibhie 'kʋ. 'Naa ɩ 'plɩ ala 'ciin 'la wɔlɩ ɩya a bhɔlʋ Laagɔ.

³ A bhibhiemʋ ‑ala da, ɩya Laagɔ 'ka ‑ala pliciea gbine kalɩ. A bhibhie ɩya a 'ka Klisi 'la wɔlɩa ‑ɩ ‑zizieo 'lɛ na, ɩla 'dɩa sa, sa ɩla gbʋ n ‑kʋ 'lɛ ‑abhluakɩa nɩkplaan na.

⁴ A bhibhie ɩya n kɩɩ nyɩtɛ, sa ɩ ‑fata lebhe n nyɩtɩɩ na.

⁵ A nʋ saa 'fɩan ɩya aya maa ‑ɔ 'ta 'lɛ Klisi 'la pɔɔtɛtɛ ‑ka na, namʋnʋ dɩgalɩ nɩkplaan.

⁶ 'Naa ala wɔɔnyɩtʋ kla clɩɩa 'fɩan pɔlɛ, ʋ pla anyɩ neen, ɩya a cibhlili nclɔɔ nclɔɔ neenŋonusa.

Bhɩalɩwɔlɩ ɩya ‑ayopalɩɛ

⁷ ‑Ɔ ‑glɩ 'lɛ 'na cɩ 'la wɔlɩa na, Tisiki, 'na ‑wawabholia, lobhocoa n 'tɛlɩ 'lɛ ‑deli 'kʋ, 'nyɩ ‑ɔ glɩ 'lɛ 'na 'namʋnyɔ ‑Kwlenyɔ 'la lobholia nɩkplaan na, cɩ 'ka anyɩ ɩla 'dɩa ‑tɛtɛa ‑sa.

⁸ ‑Gblɩgblɩsa n lobhuo 'lɛ anyɩ 'bhlɩ, le ɔ 'ka anyɩ ‑ala cɩ 'la 'dɩ ‑sa, ɩya ɔ 'ka anyɩ pɔlɛɛn zʋ.

⁹ Na, Onezimʋ, ‑ala ‑wawabholia ‑a 'tɛlɩ 'lɛ ‑deli 'kʋ, 'nyɩ -ɔ ‑glɩ 'lɛ a 'bhlɩnyɔ na, ɔmɔ ‑ɔ fɔɔ 'lɛ. Ma cɩ 'ka anyɩ ɩmɩa ‑tɛtɛa ‑ɩ plɩ 'lɛ ‑wɔlʋ na, 'dɩ 'kʋ ‑salɩ.

¹⁰ Asitakɩ, n yɔɔsɔɔ ‑kʋ 'lɛ wɔlʋ ‑palʋʋnpapalʋa ‑zɔn na, pa anyɩ ‑ayo. Makɩ, Banabasɩ 'la 'slibholia, ɔmɔ ‑ma, ɔ pa anyɩ ‑ayo. Ma ya anyɩ ɔla wɔlɩ solu. Na, ɔ ‑ka anyɩ 'bhlɩ ci na, 'naa a klɔɔ 'nanɩ.

¹¹ Zozii, ma la ‑awlɛ 'lɛ Zusutusu na, ɔmɔ ‑ma ɔ pa anyɩ ‑ayo. Maa ‑naa ‑tɛɛ ‑ɔ ‑glɩ 'lɛ Zifʋnyaa* n ‑ya maasɔ nʋ 'lɛ Laagɔ 'la Nyɩbhɛlɩdua* 'la lobholia na, 'nyɩ ma zʋʋn pɔlɛɛn ‑gbɔɔn.

¹² Epaflasɩ, ‑ɔ ‑glɩ 'lɛ a 'bhlɩnyɔ na, pa anyɩ ‑ayo. Zozi Klisi 'la lobhoco ‑naa vʋ ala da ‑gbɔɔn ɔla bhibhiea nɩkplaan le a 'ka sɛ kpaan 'nylugo, ala pɔɔtɛtɛa 'ka 'kʋglalɩ ɩya a 'ka ɩmɩa ‑tɛtɛa ‑ɩ ‑ka 'lɛ Laagɔ 'tʋ na nʋ.

¹³ N li ɔla ‑danʋfʋɛ lebhe ɔ nyɩ ɔcɩ sɛsʋ ‑gbɔɔn, anyɩ, Laodiseedua 'kʋ ‑naanʋa ɩya Ilapoliidua 'kʋ ‑naanʋa 'la gbʋ.

¹⁴ ‑Dɔtɛ Luku, ‑ala ‑wawanagɔa, ɩya Demasɩ, ma pa anyɩ ‑ayo.

¹⁵ A 'pa bholiecɩa ‑ɔ ‑kʋ 'lɛ Laodiseedua nɩkplaan na ‑ayo. A 'pa Ninfa ‑ma, ɩya ‑laagɔnɩkplaa ‑a 'wlalɩ 'lɛ ɔla 'slea nɩkplaan 'wlu na ‑ayo.

¹⁶ A ‑ka 'na ‑afluwaa zɛlɩlɩɛ bhɩalɩ na, a gba ɩya ma zɛlɩmʋa Laodiseedua 'kʋ 'la ‑laagɔnɩkplaa sidiin. Anyɩ ‑ma a zɛlɩ amaa ‑a ‑cɩ ka 'lɛ 'yɛpɩ 'wlʋlʋ na.

¹⁷ A 'cla Asipʋ lebhe ɔ falɩ lobholia ‑Kwlenyɔ zʋɔ 'lɛ wlɩɩn na pɔlɛ cɩ, ɩya n nʋɩ 'nanɩ.

¹⁸ ‑Ayoa ‑amʋ Pɔlʋ n pa 'lɛ anyɩ na, 'lɩkʋʋ: A luoli lebhe n ‑kʋ ‑abhluakɩ nɩkplaan. 'Naa 'nyupalɩɛa ŋeni anyɩ.