Ebleenyaa 'la ‑afluwaa ma zie 'lɛ maa na 8 - Le Nouveau Testament en langue Dida

Zozii ‑glɩ 'lɛ ‑ala ‑teyiyinyɔ ‑kpasaa 'titi

¹ Na, wɔlɩa 'titia ‑a ‑wa 'lɛ lebhe ‑a ka nyɩtɛ na, ɩmɩ ‑glɩ 'lɛ lebhe ‑sa 'la ‑teyiyinyɔ ‑kpasaa ‑a ‑ka 'lɛ, ɔmɔa ‑ɔ ‑kʋ 'lɛ ‑laagɔɔn, 'Kʋzilo Laagɔ 'la nyɩbhɛlʋkpoa 'lipasɔa 'kʋ sa,

² 'nyɩ ɔ nʋnʋ 'lɛ ɔla ‑teyiyilobholia gʋgwladaa, ɩ ‑glɩ 'lɛ ‑Kwlenyɔ 'la 'slasla -naanɩa 'titi, 'nyɩ ɩ 'ta 'lɛ nclɔɔ 'la 'slasa -naanɩ ‑glɩ na.

³ ‑Teyiyinyɔ ‑kpasa 'tʋtʋʋntʋa ma sa 'lɛ na, ka ma sɔɔ 'lɛ le ɔ 'ka Laagɔ lɩɩ va ɩya ɔ 'ka ‑teyi yi. Dɛ ɩ ‑fata 'lɛ lebhe ɔmɔ ‑ma, ɔ kalɩa lʋʋa ɔ cɩ 'ka 'lɛ Laagɔ va na.

⁴ Ɩ ‑kaa ‑kʋ lebhe ‑dʋdʋa 'kʋ Klisi ‑kaa ‑kʋa na, 'ɔ cɩ 'taa ‑teyiyinyɔ 'plɩ ‑ylɛylɛ 'titi, ‑masa ‑anʋa ‑kʋa 'dɛ tooto, ‑ɔ vaa 'lɛ ncɛlɩ 'la 'nyɩnyɩlɩɩa Laagɔ, saa ‑jlɩmaa bhlia 'lɛ 'kʋ na.

⁵ Mala gʋgwlɛa ‑glɩ ‑laagɔɔn ‑naanɛa 'la dɩbalɩ ‑naanɛ ‑aana ɛla ‑zuzu, ɩmɩa ‑tɛɛa Moyizi 'ka 'lɛ ‑paaplua 'sla 'nyɩ Laagɔ soluo 'lɛ na, ɩla 'sasʋʋn. Ɔ yɔɔ 'cla lebhe: Kopeka, ɩmɩa n palɔɔ 'lɛ 'kikea 'wlu na, ɩmɩ 'bhisa 'kʋ ‑n cɩ ka 'lɛ ‑tɛtɛa 'fɩan nʋ.

⁶ ‑Ma Zozii 'la lobholia zi manɩa 'kʋ, sa ɔ ‑glɩ mɛnʋa ‑ʋ zi 'lɛ mɛnʋa ‑tɛtɛa 'kʋ, 'nyɩ ‑ʋ 'slalɩɔ 'lɛ ‑ndanyɩa ‑ɩ zi 'lɛ ‑ndanyɩa ‑tɛtɛa 'kʋ na ɩla 'menisita.

Mɛnʋ ‑lelua

⁷ Ɩ ‑ka ‑kʋ lebhe ma 'taa ‑bɛka -mɛnʋa 'ge nɩkplaan 'lɩlɩ na, maa cɩ 'taa 'matɩ le ma 'kaa 'mʋʋ ‑buun ‑naanʋ 'jeen zʋ.

⁸ ‑Ma, ka Laagɔ ‑salɩ 'lɛ maa 'ge, dɛ ɔ 'cla 'lɛ lebhe: «‑Kwlenyɔ nabhe, 'lɩka clɩɩ ci 'yɛpɩ, ɩya n ‑ya Izlayɛlɩlɔlʋa* ɩya Zuda 'la 'lɔlʋa 'ka mɛnʋ ‑lelu li.

⁹ ‑N 'tanɩ ʋmʋa n ‑ya ma tokadɔcɩ lia 'lɛ, daa n bhlia 'lɛ maa sɔ 'kʋ, 'nyɩ n ‑sa 'lɛ maa Ejibhitibhlɩa 'kʋ na, 'bhisa 'kʋ ‑naanʋ. ‑Kwlenyɔ nabhe: ‑Masa maa 'titi 'ta 'lɛ 'na mɛnʋa nɩkplaan kʋlɩɛ mino na, dɛ ‑amʋ ‑ma, n 'talɩ 'lɛ maa 'cin.

¹⁰ ‑Ma ‑Kwlenyɔ ya ‑awlɛ 'cla lebhe: Clɩɩ ‑naa ‑ka 'plɩ na, 'lɩka mɛnʋa n ‑ya Izlayɛlɩlɔlʋa ‑cɩ 'kanɩ 'lɛ li na. Mala wɔɔgugwie nɩkplaan n cɩ 'kanɩ 'lɛ 'na ‑jlɩmaa zʋ, mala pɔlɩa 'ciin n cɩ 'kanɩa 'lɛ zie, ɩya n 'ka mala Laagɔ 'plɩ, ɩya ma 'ka 'na 'lɔlʋ 'plɩ.

¹¹ Nclɔɔ bhlogbɩɩ cɩ 'tanɩ ɔ 'bhlɩnyɔ ‑aana ɔ bholi ca ɩya ɔ 'kɔɔ 'cla lebhe: 'Maa cibhlili ‑Kwlenyɔ! Sa, ‑ɩ ‑bhɔlʋ 'lɛ 'cuoa 'kʋ ‑aan 'nyɩ ‑ɩ ŋeni 'lɛ ncaakpasɩa 'kʋ na, maa 'fɩan cɩ 'kaan cibhlili,

¹² ‑ofi lebhe n cɩ 'ka maa ŋaazɩɩn 'lɩ, n 'ka mala ‑ngasitʋlɩɛa va, ɩya n 'la kanɩ mala nyinyia luoli.»

¹³ Laagɔ nyɩtɛnɩ 'lɛ mɛnʋ ‑lelu 'la wɔlɩ na, 'dɛndlana, ɔ ya ‑bɛka -naanʋa ‑godogodo ‑naanʋ plee. 'Nyɩ lʋʋa ‑ʋ yanɩ 'lɛ ‑godogodo lʋʋ 'plɩnɩ na, 'plɩkan ʋ cinɩ 'lɛ.