Ebleenyaa 'la ‑afluwaa ma zie 'lɛ maa na 5 - Le Nouveau Testament en langue Dida

¹ Na, ‑teyiyinyɔ ‑kpasa 'tʋtʋʋntʋa ma sla 'lɛ de ncɛlɩ sidiin na, ka ɔ ‑kʋ 'lɛ 'dɛ lebhe ɔ 'ka Laagɔ lobho ɩya ɔ 'ka maa 'nyɩ. Ɔla lobholia ‑ɩ ‑glɩ 'lɛ lebhe ɔ 'ka ncɛlɩ 'la vavalɩɩa 'ma, ɔ 'ka ‑teyi yi ɩya mala nyinyia 'ka valɩɛ 'lɩ.

² 'Nyɩ ɔmɔ 'titi 'ta 'lɛ ‑cɩcɩ ‑ka na, ɔ cɩ mino ɔ cɩ maa ‑ɔ 'ta 'lɛ wɔlɩ ‑ci 'nyɩ ‑ɔ mlɔ 'lɛ na 'la gbʋ gbada.

³ Dɛ ɩ ‑fata 'lɛ lebhe ɔmɔ 'titi ɩya 'lɔlʋa ‑tɛtɛa 'la nyinyia 'la gbʋ, ɔ yi ‑teyi.

⁴ Nclɔɔ 'titi 'manɩ 'ta ɔla 'wluun ɩya ɔ 'ka ɔcɩ 'ŋlɩ ‑naa zʋ, ‑ma Laagɔ ‑ɔ la 'lɛ nclɔɔ 'nyɩ ɔ lii 'lɛ, saa ɩ 'plɩ 'lɛ Awlɔɔn 'la gbazɔ na.

⁵ Dɛ Klisi ‑ma, ɔmɔ 'titi 'ta 'lɛ ɔcɩ ‑teyiyinyɔ ‑kpasa 'la 'klʋagbaa 'nyɩ, ‑ma ɔmɔa ‑ɔ 'clɔɔ 'lɛ lebhe: 'Na cʋ ‑n ‑glɩ 'lɛ, ‑amʋ, ‑yaka, n yɔɔ ‑valɩɔ na, ɔmɔ ‑ɔ 'nyɩɔ 'lɛ ma.

⁶ Ɔ ya ‑awlɛɔ dabhlo 'cla lebhe: ‑N ‑glɩ ‑teyiyinyɔ 'lʋkʋlʋkʋ ɩya 'lʋkʋlʋkʋ, Mɛlɩkɩzedɛkɩ 'bhisa.

⁷ Na, daa ɔ ‑kʋa 'lɛ ‑dʋdʋa 'kʋ na, ɔmɔ ‑ɔya 'ciin 'la 'mɩɔ ‑gaa 'lɛ nɩkplaan. Ɔ ya bhibhie, ɔ ya zɩzla 'nyɩ ɔ ya 'lɛ ɔmɔa ‑ɔ -cɩ kaa 'mɔɔ 'lɛ 'kwɩa nɩkplaan ‑salɩɛ mino na la, 'nyɩ ɔmɔ ‑naa yɔɔ 'lɛ neeŋonu, ɔla ‑ncɩdʋdʋkʋlalɩɛa 'la gbʋ.

⁸ Ɔ ‑glɩa Laagɔ 'la 'Cʋ 'bhlɩmɔɔn, ‑ma 'kwlɩbhɩɛa nɩkplaan, ɔ ya zʋlɩɛ ca.

⁹ Na, ɔ glalɩ 'lɛ ɩmɩ ‑naa ‑tɛtɛa 'kʋ na, ɔ yanɩ maa ‑ɔ ‑ka 'lɛ ɔla zʋlɩɛ na 'la gbʋ, gbʋʋnsalɩɛa ‑ɩ ‑kʋ 'lɛ 'lʋkʋlʋkʋ ɩya 'lʋkʋlʋkʋ na, ɩla 'wlʋlʋda 'plɩ,

¹⁰ ‑ofi lebhe Laagɔ ya 'cla lebhe ɔ ‑glɩ ‑teyiyinyɔ ‑kpasa, Mɛlɩkɩzedɛkɩ 'bhisa.

A mʋnɩ 'kʋklʋʋn pɔɔtɛtɛa nɩkplaan

¹¹ Wɔlɩ ‑naa 'kʋ, ‑a ‑ka wɔɔbhutukpa ɩya a ka nyɩtɛ, ‑ma ɩla ‑zɔnsalɩɛa 'tɛ, sa ala 'nuda kalɩ cɩ na.

¹² Daa tootoa, a cɩanɩa ‑sa ‑yaka ala 'wluun 'la canya 'plɩ, ‑ma a 'matɩ ka ‑azla le ma ca anyɩ Laagɔ 'la wɔɔnyɩtʋa 'la ‑bɛkawɔlɩa. A 'tanɩ nyɩ 'titi 'la linya ‑glɩ, ‑ma a yanɩ ‑awlɛ nyɩanyɩacuo 'plɩ.

¹³ ‑Masa ncaatʋtʋʋntʋa ‑ɔ nyɩ ka ka 'lɛ na, ɔ cɩ 'ta wɔlɩa ‑ɩ 'nylugolu 'lɛ 'kʋ na nyɩtɛlɩɛ mino, sa 'cipɔlaa ɔ ‑glɩ ka 'lɛ na.

¹⁴ ‑Ma ncɛlɩa ‑ɔ glɛɛ 'lɛ na, maa ‑ɔ li 'lɛ nyɩ 'titi, maa ‑ɔ ‑cinɩ 'lɛ ɩmɩa ‑ɩ nanɩ 'lɛ ɩya ɩmɩa ‑ɩ ‑nyu 'lɛ na nɩkplaangbazlɩlɩsa.