Ebleenyaa 'la ‑afluwaa ma zie 'lɛ maa na 12 - Le Nouveau Testament en langue Dida

'Naa ‑ala 'cia kʋ Zozii 'kʋ

¹ Na, ‑anyɩ ‑ma, ‑danʋfʋɛcɩ ‑bhutukpa ‑didionɩ 'lɛ ‑sa ‑anyɩ na, ‑a 'panɩ ‑gbaakwɩa ‑tɛtɛa ɩya nyinyia ‑ɩ 'ta 'lɛ ‑anyɩ didiocɩ kalɩ na 'kwlaan, ɩya ‑a fa sɔmɩ, pɔɔklalɩɛ nɩkplaan ɩya ‑a ka gbɩɩnclalɩɛa ‑zɔn 'wlʋ,

² daa ‑ala 'cia gɩɩ 'lɛ Zozii na. Ɔmɔ ‑ɔ gba 'lɛ ‑a 'lɩ 'lɛ pɔɔtɛtɛ 'nyɩ -ɔ glalɩɛ 'lɛ 'kʋ na. Ɔ ya pɔlɛkʋmɛnɔa ‑ʋ ‑glɩa 'lɛ ɔla da na ‑blɔ, ɔ 'ta ‑zo bu, ‑ma ɔ ya dabhlalɩsua 'ciin 'la 'kwɩa 'kʋ ŋonu. Ɩla leen, ɔ ya Laagɔ 'la nyɩbhɛlɩkpoa 'lipasɔ 'kʋ sakʋ.

³ Na, a gugu ɔmɔa ‑ɔ sɛlɩ ‑sa nyinyinʋnya 'la gbatlɩa ma mʋnʋɔ 'lɛ na nɩkplaan na 'la wɔlɩa, ɩya a 'la 'talɩa acɩ 'cin ɩya 'nyɛkɛ 'la 'kɔtɔa anyɩ.

⁴ ‑Masa aya nyinyi 'la tʋa, a 'ta kʋʋ vʋ ‑aan ɩya ‑dolu 'ka sakɔsɔ,

⁵ 'nyɩ a ya 'lɛ 'tɛtɩɩnzʋwɔlɩa Laagɔ solu 'lɛ anyɩ, ɔla 'cuo 'bhisa na 'kʋbolu. 'Na 'Cʋ, ‑naa 'sakalɩa ‑Kwlenyɔ 'la 'bɩsalɩɛa 'ci 'kʋ, Ɔ ‑kɔɔ 'bɩsada ‑kʋ na, 'nyɛkɛ 'la 'kɔtɔɔ.

⁶ Sa ɔmɔa ‑Kwlenyɔ ‑wa 'lɛ na, ɔmɔ ɔ sa 'lɛ 'bɩ, Ɔ saa maa 'fɩan ɔ la 'lɛ ɔla 'cuo na 'bɩ.

⁷ Ala dɩgalɩcibhlilie 'la gbʋ 'kwlɩ bhɩa 'lɛ anyɩ. Ɔla 'cuo 'bhisa Laagɔ kla 'lɛ anyɩ. ‑Masa 'cisaa ɔ to ‑sa 'taa 'lɛ 'bɩ bha?

⁸ Ɩ ‑ka ‑kʋ lebhe 'bɩsalɩɛa ‑ɩ ‑glɩ 'lɛ ɔla 'cuoa ‑tɛtɛa 'la da na, a 'tɩɩ nɩkplaan kʋmʋ na, 'dɛndlana, ‑n 'ta ɔla 'cuo 'titi a 'ta 'lɛ ‑glɩ, ‑ma ‑bozocuo a ‑glɩ 'lɛ.

⁹ ‑Ala ‑dʋdʋ 'kʋ 'la tocɩa ya ‑anyɩ dɩgalɩ ca, 'nyɩ ‑a yɩɩ 'nanɩ nɩkplaan 'lɩlɩ, na -a toa ‑glɩ 'lɛ Laagɔ 'nyɩ ‑ɔ ‑kʋ 'lɛ ‑laagɔɔn na, ɔmɔ ‑a cɩ 'ta 'lɛ ŋonu, ‑a ka ‑zɔn kʋ ɩya ‑a kɔɔ jabhʋa wlɩɩn 'lɩlɩ bha?

¹⁰ Maa, clɩɩkle nɩkplaan 'la 'bɩɩ ma sa 'lɛ ‑anyɩ, saa ma 'lɩlɩlɩa 'lɛ na, ‑ma ɔmɔ, ‑ala 'nanɩ 'la gbʋ ɔ sa 'lɛ ‑anyɩ 'bɩ, ɩya ɔla ‑kplɔlɩɛa 'ka ‑anyɩ 'kʋ ŋenimʋ.

¹¹ 'Bɩsalɩɛa ‑tɛtɛa ‑lalɩ 'ta 'kpabhuoa bhlogbɩɩ 'kʋ pɔlɛkʋmɛnɔ, ‑ma cɩɩnkalɔ. ‑Ma ɩla da ‑kaan bɔ na, maa ɩ 'plɩlɩ 'lɛ 'kʋ na, ɩ gba 'nyɩ ma plɩ 'kʋnylugolunya 'nyɩ ma lɩ pupue.

¹² Na, a ‑glɔnɩ wlɩa ‑ɩ ya 'lɛ cɔbha ɩya 'kukowlia ‑ɩ kla 'tanɩ 'lɛ na nɩkplaan,

¹³ ɩya ala bhɩa 'la gbʋ, a ‑sa ‑gugoa ‑ɩ 'nylugolu 'lɛ 'kʋ na, ɩya bhobhlinyɔ 'la kplea 'la 'ka sɛɛ ‑tɛtɛ 'kplɩsɩɔ, ‑ma ɔ 'ka jabha.

A 'plɩ 'kʋnylugolunya

¹⁴ A 'sɩslɩlɩ ɩya pupue 'ka aya ncɛlɩa ‑tɛtɛa ‑gbaaglɩɩn kʋ ɩya a 'matɩ ‑kplɔlɩɛa ‑ɩ 'ta 'lɛ ‑kʋ, 'nyɩ nclɔɔ bhlogbɩɩ cɩ 'ta 'lɛ ‑Kwlenyɔa 'ciin 'lɩ na.

¹⁵ A zʋlʋ pɔlɛ 'kʋ, ɩya nclɔɔ bhlogbɩɩ 'la ‑saa ɔcɩ Laagɔ 'la ‑dananɔa ‑zɔn. Kalɔkalɔsukpluu bhlogbɩɩ 'la 'lɩa 'wlʋda, ʋ 'la gblogblolua anyɩ ɩya ʋ 'la nyumoa ‑kandea.

¹⁶ A zʋlʋ pɔlɛ 'kʋ, ɩya ‑badaaglulinyɔ ‑aana nclɔɔa ‑ɔ 'ta 'lɛ ‑kplɔkplɔlɩɩa 'la zʋlɩɛ ‑ka le Esayuu ‑ɔ zʋ 'lɛ ɔla kpasɩa 'pɛlʋ lililɩɩ 'la gbʋ na, 'la kʋa anyɩ sidiin.

¹⁷ 'Nyɩ a ‑ci sɛɛ lebhe ɩmɩ ‑naa 'la leen, daa ɔ 'matɩnɩ 'lɛ le ɔ 'kaa 'nyupalɩɛa ‑aja 'kʋ lili na, ma yɔɔ mɩ nɩkplaan ‑sa, 'nyɩ ɔla zɩzlalɩɛa ɩya ɔla 'mɩɔa 'tanɩ wɔlɩ bhlogbɩɩ kacilɩɛ mino.

¹⁸ A 'ta 'tata 'kʋ 'la lʋʋ cɩmɛ, ‑kosua ‑ʋ bhu 'lɛ na, 'tutu, 'tutu kpɔɔnkpie, ‑bubo,

¹⁹ lɛglɩ ɩya ncaablɩɩzɔn. Maa ‑ɔ 'nua 'mɩɩ 'lɛ neen na, ma 'tanɩ wabha lebhe ma 'kanɩ wɔɔnyɩtʋa 'nyuwkliinpo.

²⁰ Sa maa mino 'taa ɩya ma 'ka ‑jlɩmaa ‑naa 'kʋŋonu, ‑a cla 'lɛ lebhe: Lʋʋa ‑tɛtɛa ‑ʋ cɩ ka 'lɛ 'kikea ko na, mlɛ 'titi ‑ɛ ‑ka 'lɛ ‑kʋo na, ma cɩɛ cɔkʋ vʋ.

²¹ Na, saa 'titia wɔlɩa mala 'ci ‑jlɛa 'lɛ na, ɩ ‑kaa 'lɛ ŋanɔ na, Moyizi ya 'cla lebhe: Pɔlɛɛn ‑wlʋɔɔn 'nyɩ 'na ‑lɩɩbhuoa tɩtɛlɩ!

²² ‑Ma anyɩ, a ya Siyɔɔnkikea ɩya ‑Jajalaagɔ 'la 'dua cɩ mɛ, a ya Zolizalɛmʋdua ‑ʋ ‑kʋ 'lɛ ‑laagɔɔn na ɩya ʋla 'bhlaandleetabhlia* ‑ɔ 'wlalɩ 'lɛ 'wlʋ 'nyɩ ‑ɔ nʋ 'lɛ ‑pɔpʋɛ na, cɩ mɛ.

²³ ‑Bɛka -valɩcuoa ‑ɔla 'ŋlɩa ‑zieo 'lɛ ‑laagɔɔn na 'la ‑kandea, ɩya Laagɔ, ncɛlɩa 'fɩan 'la 'tɩtɩplanyɔa, ɩya 'kʋnylugolunyaa 'la 'wugwia ‑ɩla 'kʋglalɩɛa ya 'lɛ 'wluko na,

²⁴ ɩya Zozii, mɛnʋ ‑lelua 'la 'menisitaa, ɩya ‑dolua ‑ʋ 'moni 'lɛ 'nyɩ ‑ʋ ‑gaa 'lɛ nɩkplaan ‑ʋ zi 'lɛ Abɛlɩ 'nʋa 'kʋ na, ‑tɛtɛ ‑naa 'fɩan a mɛ 'lɛ cɩ.

²⁵ Na, a zʋlʋ pɔlɛ 'kʋ! Ɩya a 'la ‑saa ɔmɔa ‑ɔ solu 'lɛ anyɩ na 'la niwɔlɩa 'bɩ. Sa, maa ‑ɔ 'ta 'lɛ ŋonu le ‑ɔ ka ɔmɔa ‑ɔ zʋa 'lɛ maa flɩɩn ‑dʋdʋa 'kʋ na, 'nyukwliinpo na, ma ta 'lɛ gbaylɩsalɩɛa 'wlu bi na, ‑anyɩ ‑ma ɩ cɩ 'ta ‑anyɩ 'sɛpɛlɩ, ɩ ‑ka ‑kʋ lebhe ‑a ‑ka ɔmɔa ‑ɔ ‑kʋ 'lɛ ‑laagɔɔn 'nyɩ ‑ɔ solu 'lɛ ‑anyɩ na kɔkʋʋn ‑tlana.

²⁶ Ɔmɔa ɔla ‑blɩɩzɔan 'dɩdɔa 'lɛ ‑dʋdʋa ‑tɛtɛa ‑godogodoa na, 'lɩka wɔlɩa ‑ɔ nyɩtɛnɩ 'lɛ ‑pɔtɔnʋ na. N cɩ 'ka gba ɩya ‑dʋdʋa 'ka bhɩalɩda tɩtɛlɩ, 'nyɩ ‑n 'tanɩ ʋmʋ bhloo, ‑ma ‑laagɔɔn ‑masɛɛ.

²⁷ Na, bhɩalɩdaa ‑naa pala lebhe lɩɩa ‑tɛtɛa ‑ɩ gba 'lɛ 'nyɩ ‑laagɔzɔan kla 'ta 'lɛ na, ɩ cɩ 'ka mlɔ, ɩya ɩmɩa ‑ɩ gbɔlʋ 'ta 'lɛ na, ɩ 'ka kʋ.

²⁸ Na, ‑a ya 'lɛ Nyɩbhɛlɩdua ‑ʋ gbɔlʋ 'ta 'lɛ na 'lɩ na, ‑a kla 'dɛ 'la 'nanɩa kpaan ɩya ‑a 'plɩlɩɩ 'kʋ ɩya ‑a lobho Laagɔ saa ‑ɩ ‑kɔɔ 'lɛ 'tʋ na, ‑ncɩdʋdʋkʋlalɩɛ ɩya zʋlɩɛ nɩkplaan.

²⁹ Sa ‑ala Laagɔa ‑glɩ ‑kosua ‑ʋ li 'lɛ ‑tɛtɛa 'fɩan na.