2 Zaan 1 - Le Nouveau Testament en langue Dida

‑Ayopalɩɛ

¹ ‑Amʋ ncaakpasaa, ‑amʋ ‑ɔ zie 'lɛ Laagɔ 'la deslaslaŋlɔa ɩya ɔla 'cuoa n ‑wa 'lɛ ‑nʋawlɛ nɩkplaan na. ‑N 'ta ‑amʋ bhlogbɩɩ ‑tɛɛ ɔ 'ta 'lɛ anyɩ ‑wa, ‑ma maa 'fɩan ‑ɔ ‑ci 'lɛ ‑nʋawlɛ na ‑masɛɛ,

² ‑ofi lebhe ‑nʋawlɛ ‑kʋ ‑anyɩ nɩkplaan, 'nyɩ ɛ cɩ 'ka ‑anyɩ cɩ kʋ 'lʋkʋlʋkʋ ɩya 'lʋkʋlʋkʋ na.

³ 'Nyupalɩɛ, ŋaazɩɩnlɩlɩɛ, ɩya pupuea ‑ɩ 'wlʋlʋ 'lɛ To Laagɔ ɩya Zozi Klisi, Toa 'la 'Cʋa wlɩɩn na, cɩ 'ka ‑anyɩ cɩ kʋ ɩya ‑a ka ‑nʋawlɛ ɩya ‑walʋ nɩkplaan namʋnʋ.

A namʋnʋ ‑nʋawlɛ ɩya ‑walʋ nɩkplaan

⁴ N ya 'lɩ lebhe ‑naa 'cuoa ‑anʋa namʋnʋ ‑nʋawlɛ nɩkplaan, ‑jlɩmaa Toa 'nyɩ 'lɛ ‑anyɩ na 'la 'sasʋʋn, 'nyɩ ɩ yaan pɔlɛkʋmɛnɔ 'kadie nʋ.

⁵ Na, 'ŋlɔ, ɩmɩa n 'clalɩnɩɔ 'lɛ ‑pɔtɔnʋ na, ɩmɩ ‑ɩ ‑glɩ 'lɛ lebhe ‑a wabhawabhalɩ. 'N zie 'tɔɔ ‑jlɩmaa ‑lele, ‑ma amaa ‑a ‑ka 'lɛ bhɔdaa tooto na, ama n zieo 'lɛ.

⁶ Na, ‑walʋa ‑glɩ 'lɛ lebhe ‑a 'plɩlɩ ɔla ‑jlɩmaa 'kʋ. 'Nyɩ ‑jlɩmaa a 'nu 'lɛ bhɔdaa tooto na, ama ‑glɩ 'lɛ lebhe a namʋnʋ ‑walʋ nɩkplaan.

A zʋlʋ ncaanyiglilinyaa pɔlɛ 'kʋ

⁷ Ncaanyiglilinya ‑bhutukpa ya ‑laagɔzɔan 'kʋcɩlɩ. Ma 'ta pɔɔtɛtɛ ‑ka lebhe Zozi Klisi ya nclɔɔ 'plɩ 'nyɩ ɔ ya 'lɛ ci. Maa ‑naa -ɔ ‑glɩ 'lɛ ncaanyiglinyaa ɩya Klisi 'la ‑zɔbhɛlɩgbanyaa.

⁸ A zʋlʋ acɩ pɔlɛ 'kʋ, ɩya ala lobholia 'la 'ka 'kpɔkpɔ 'plɩ, ‑ma a 'ka ɩla dluuplʋlɩɛa ‑tɛtɛa 'lɩ.

⁹ Ncaatʋtʋʋntʋa ‑ɔ 'plɩlɩ 'ta 'lɛ Klisi 'la cacawɔlɩa 'kʋ, 'nyɩ ‑ɔ dɩɩ 'lɛ 'bɩɩn na, ɔ 'ta Laagɔ ‑ci. ‑Ma ɔmɔa ‑ɔ 'plɩlɩ 'lɛ cacawɔlɩa 'kʋ na, ɔya Toa ɩya 'Cʋa ‑glɩ bhlo.

¹⁰ Gbazɩ nclɔɔ ‑ka anyɩ 'bhlɩ ci, 'nyɩ ɔ 'ta anyɩ wɔlɩ ‑naa ca na, a 'la famʋɔ 'sleen ɩya a 'la 'pɔɔ ‑ayo.

¹¹ Sa nclɔɔ ‑ɔ ‑kɔɔ ‑ayo 'pa na, ka ɔyɔɔsɔ 'wlalɩ 'lɛ ɔla wɔɔnyinyia 'kʋ.

Bhɩalɩwɔlɩ

¹² N ‑ka wɔɔbhutukpa ɩya n 'ka anyɩ solu, ‑ma n 'ta wabha lebhe n 'kɩɩ zie. Sa n 'tɛlɩ pɔlɛ 'kʋ le n 'ka anyɩ 'bhlɩ ci, ɩya n 'ka anyɩ neen solulu ɩya ‑ala pɔlɛkʋmɛnɔa 'ka 'kʋglalɩ.

¹³ ‑N mɛnɔ, Laagɔ 'la deslaslaŋlɔa, ɔla 'cuoa pɔɔ ‑ayo.