2 Tim 3 - Le Nouveau Testament en langue Dida

Leen bhɩalɩclɩɩa

¹ Ɩ ‑fata lebhe ‑n cibhlili lebhe leen bhɩalɩclɩɩa nɩkplaan, 'pʋpʋa 'kʋ cɩ 'ka 'tɛbhalɩ.

² Ncɛlɩ cɩ 'ka nylo kalɩ, ma 'ka 'dala wabha, ma 'ka gbɩɩnkpoli ɩya ma 'ka ‑tutule li. Ma cɩ 'ka Laagɔ cɩ nyumo, ma 'ka mala valɩnya gbatlɩmʋnʋ, ma 'la 'ka 'nanɩnʋlɩɛ cibhlili ɩya mala 'nyi 'la ka Laagɔ 'la lʋʋ bhlogbɩɩ yi.

³ Mala wɔlɩ cɩ 'ka 'tɛbhalɩ ɩya ma 'la ka ncaaŋaazɩ kalɩ. Ma cɩ 'ka ncɛlɩ ‑glaankalɩ, ma 'ka zɔgblɩ kalɩ, ma 'ka ncɛlɩ gbaylɩsa ɩya ma 'ka wɔɔnanɩa ‑tɛtɛa zɔbhɛlɩ.

⁴ Ma cɩ 'ka ma 'ye 'pɛlʋzʋ, ma 'la 'ka gugu, ma 'ka ‑tutule ‑wugo kalɩ ɩya ma 'ka ‑laagɔzɔan 'la 'cikʋmɛnɔa wabha ma 'ka Laagɔ 'kʋzi.

⁵ Ma cɩ 'ka palalɩ le ‑laagɔgʋgwlanya, ‑ma ma cɩ 'ka ɩmɩa ‑ɩ ‑glɩ 'lɛ gʋgwlɛa 'la 'tɛtɩa na ‑blɔ. Ncɛlɩ ‑naa, tlʋbhalɩ maa cɩ da!

⁶ Maa nɩkplaan ‑anʋa ble 'sli nɩkplaan 'nyɩ ma 'nyiglili 'ŋwlɛa ‑ɔ 'ta 'lɛ macɩ da ‑ci, ‑ɔ bhɛɛ 'lɛ nyinyigbaakwɩ 'nyɩ lɩɩ ‑mizimizi 'la 'tʋ bhla 'lɛ na.

⁷ Clɩɩa 'fɩan, ŋwlɛ ‑naa 'matɩ lebhe ma 'ka wɔɔleli ca, ‑ma maa mino 'ta ɩya ma 'ka ‑nʋawlɛa cibhlili.

⁸ Saa ‑tɛɛa Zannɛsɩ ɩya Zanblɛsɩ mʋnʋa 'lɛ Moyizi gbatlɩ na, sɛɛ ‑tɛɛ bhlogbɩɩ, ncɛlɩ ‑naa, mʋnʋ 'lɛ ‑nʋawlɛa gbatlɩ. Ma ‑glɩ ncɛlɩa ‑ɔ ‑ka 'lɛ yooyo ‑wugo 'nyɩ ‑ɔ 'ta 'lɛ pɔɔtɛtɛ 'titi ‑ka na.

⁹ ‑Ma, ma cɩ 'ta 'koonko mʋ, sa saa ‑tɛɛa Zannɛsɩ ɩya Zanblɛsɩ 'la wɔlɩa 'plɩ 'lɛ na, ncɛlɩa ‑tɛtɛa cɩ 'ka mala yooyogbɩa cibhlili.

Bhɩalɩ ‑wɔlɩ

¹⁰ ‑Ma ‑mɔ, ‑n ya 'na cacawɔlɩa 'kʋ 'plɩlɩ. ‑N ya 'na 'namʋɛa, 'na wɔlɩa n gɩlɩ 'lɛ na, 'na pɔɔtɛtɛa, 'na gbadalɩɛa, 'na ‑walʋa ɩya 'na pɔɔklalɩɛa 'lɩ.

¹¹ ‑N ‑ci gbaylɩa ‑ɩ ‑saan 'lɛ ɩya 'kwlɩa ‑ɩ bhɩaan 'lɛ 'yɛpɩ Antɩɔsʋ, Ikonɩɔmʋ ɩya Lislidia 'kʋ na. Gbaylia ‑anɩ saa 'taan 'lɛ ‑sa bha? ‑Ma ‑Kwlenyɔa yaan ɩmɩa ‑tɛtɛa nɩkplaan ‑sa.

¹² 'Nyɩ ma 'fɩan ‑ɔ ‑wa 'lɛ lebhe maya Zozi Klisi 'ka bhlo 'plɩ ɩya ma 'ka Laagɔ 'la pɔɔsa nʋ na, ma cɩ 'ka gbaylɩsalɩɛ 'lɩ.

¹³ ‑Ma ‑ɔ ‑glɩ 'lɛ nyinyinʋyaa ɩya ncaanyiglilinyaa na, maya ‑abhɔlɛgbɩa cɩ 'ka 'kʋmʋmʋnʋ, ma 'ka ncɛlɩ ɩya maa 'titi ‑ma 'nyiglilimʋ.

¹⁴ ‑Ma ‑mɔɔ, ɩmɩa ‑n ya 'lɛ ca 'nyɩ ‑n ‑ci 'lɛ lebhe ‑ɩ ‑glɩ ‑nʋawlɛ na, kalɩɩ kpaan. N ‑ci canyaa ‑ɔ cɔɔ 'lɛ mɩ na.

¹⁵ ‑Naa 'cuon tooto, ‑n ‑ci 'lɛ ‑Kplɔkplɔ Zieziewɔlɩa*. Ɩ cɩ mino ɩ cɩɔ dɩgalɩ 'nyɩ le ‑n ka 'naa pɔɔtɛtɛa Zozi Klisi 'kʋ zʋ ɩya ‑n ka gbʋʋnsalɩɛ 'lɩ.

¹⁶ Zieziewɔlɩa ‑tɛtɛa ‑glɩ Laagɔ 'la niwɔlɩ. Ma cɩɩ 'ma 'nyɩ ma cɩ nclɔɔ ‑nʋawlɛ ca, ma cɩɔ 'bɩsa, ma cɩ wɔlɩ 'ciingɩlɩ, ma cɩ ɩmɩa ‑ɩ 'nylugolu 'lɛ 'kʋ na ca,

¹⁷ le Laagɔ 'la nclɔɔ 'ka 'kʋglalɩ ɩya ɔ 'ka nʋnʋgbɩa ‑tɛtɛa ‑ɩ nanɩ 'lɛ na nʋlɩɛ mino.